Mater - cyfarfodydd

Dewi A Morgan, Prif Swyddog Cyllid y CBC, Dafydd L Edwards, Swyddog Arweiniol y Prosiect CBC a Sian Pugh, Cyfrifydd Grŵp y CBC i gyflwyno’r adroddiad.

Penderfynwyd mabwysiadu opsiwn B gyda chyfanswm £764,820 ar gyfer Cyllideb 2023/24 Cydbwyllgor Corfforedig y Gogledd, ac i gymeradwyo’r ardoll berthnasol ar yr awdurdodau cyfansoddol, fel y’i nodwyd o dan Opsiwn B.

Cyflwynwyd yr adroddiad gan Dafydd L. Edwards (Swyddog Arweiniol Prosiect y Cydbwyllgor).

PENDERFYNIAD

Penderfynwyd mabwysiadu opsiwn B gyda chyfanswm £764,820 ar gyfer Cyllideb 2023/24 Cydbwyllgor Corfforedig y Gogledd, ac i gymeradwyo’r ardoll berthnasol ar yr awdurdodau cyfansoddol, fel y’i nodwyd o dan Opsiwn B.

TRAFODAETH

Cyflwynwyd yr adroddiad gan nodi ei bod yn ofynnol i’r Cyd-bwyllgor Corfforedig gymeradwyo ei gyllideb erbyn diwedd Ionawr, 2023. Eglurwyd bod dau opsiwn wedi eu llunio ar gyfer gwahanol lefelau o weithrediad tuag at gyflawni’r swyddogaeth Cynllunio a Thrafnidiaeth a galluogi’r Cyd-bwyllgor i weinyddu yn briodol.

Nodwyd bod Opsiwn A yn adlewyrchu dyheadau swyddogion proffesiynol Trafnidiaeth a Chynllunio i gyflawni’r ddau gynllun strategol. Ychwanegwyd mewn sefyllfa ddelfrydol byddai Opsiwn A yn cael ei argymell ar gyfer cyllideb y CBC ar gyfer 2023/24, ond yng nghyd-destun y pwysau ariannol ar sawl awdurdod eleni, cyflwynwyd opsiwn B fel cyllideb isafswm realistig a dyma yw’r argymhelliad.

Ychwanegwyd bod opsiwn B yn adlewyrchu penderfyniadau blaenorol y Cyd-bwyllgor o ran tybiaeth o lefel adnoddau. Nodwyd bod amcangyfrifon 2022/23 yn cynnwys tybiaeth o gyflogi swyddogion Trafnidiaeth am 9 mis a swyddogion Cynllunio am 4 mis, tra byddai cyllideb 2023/24 yn cynnwys effaith blwyddyn lawn o gyflogi'r uchod am 12 mis llawn. Ategwyd bod yr opsiwn hwn yn cynnwys amcangyfrif o rôl y Prif Swyddog am ddau ddiwrnod yr wythnos ynghyd a chost swyddogaethau corfforaethol i gefnogi’r Is-bwyllgor Cynllunio a’r Is-bwyllgor Trafnidiaeth.

Mynegwyd y byddai cost Opsiwn B hefyd yn llai nac Opsiwn A am ei fod yn rhagdybio defnydd un tro o gronfeydd wrth gefn gwerth £80,000, sef amcangyfrif o danwariant blwyddyn ariannol 2022/23. Yn ogystal, nodwyd yr angen i godi ardoll ar wahân ar gyfer swyddogaethau Cynllunio, a swyddogaethau eraill. Nodwyd y byddai Awdurdod Parc Eryri yn cyfrannu at gost yr elfen Cynllunio yn unig. Awgrymwyd dosrannu’r ardoll rhwng yr Awdurdodau cyfansoddol ar sail y boblogaeth berthnasol i’r maes gwaith. Nodwyd bod y symiau ardoll ar gyfer yr Awdurdodau unigol wedi eu manylu ym mhwnt 2.2 o’r adroddiad.

Sylwadau’n codi o’r drafodaeth

¾     Nodwyd cefnogaeth i gefnogi Opsiwn B.

¾     Gwnaethpwyd sylw bod angen trafodaethau pellach ar feysydd Cynllunio, Economi a Thrafnidiaeth efo’r Prif Weithredwyr er mwyn cynllunio ar gyfer y ffordd ymlaen yng nghyd-destun y Cyd-bwyllgor Corfforedig. Roedd awydd i drafod trefniadau'r Is-bwyllgorau gan sicrhau cyfarfodydd buan. Gofynnwyd i drefnu cyfarfod efo’r Arweinyddion a’r Prif Weithredwyr cyn gynted a bo modd i drafod yr uchod.

¾     Eglurwyd ei bod yn debygol y bydd cyfarfod blynyddol o'r Cyd-bwyllgor Corfforedig yn cael ei gynnal ym mis Mai ble bydd Cadeirydd yn cael ei benodi am y flwyddyn Bwyllgorau 2023/24.