Rhaglen a chofnodion

Derbyn unrhyw ymddiheuriadau am absenoldeb

Derbyniwyd ymddiheuriad gan y Cynghorwyr Annwen Daniels, Annwen Hughes, John Brynmor Hughes, Sion Jones a Jason W Parry,

Derbyn unrhyw ddatganiad o fuddiant personol

Ni dderbyniwyd datganiad o fuddiant personol gan unrhyw aelod oedd yn bresennol

Nodi unrhyw eitemau sy’n fater brys ym marn y cadeirydd fel y gellir eu hystyried.

Dim i’w nodi

Bydd y Cadeirydd yn cynnig y dylid llofnodi cofnodion cyfarfod o’r pwyllgor hwn a gynhaliwyd 11.09.17 fel rhai cywir  

Llofnododd y Cadeirydd gofnodion cyfarfod o’r pwyllgor a gynhaliwyd ar 11eg o Fedi 2017 fel rhai cywir.

Cyflwyno, er gwybodaeth, cofnodion yr Is Bwyllgor Trwyddedu Cyffredinol a gynhaliwyd ar y dyddiau canlynol:

a)    22.08.17

b)    13.11.17

Cyflwynwyd, er gwybodaeth, gofnodion cyfarfodydd o’r Is-bwyllgor Trwyddedu Cyffredinol a gynhaliwyd 22.8.17 a 13.11.17

I ystyried adroddiad Pennaeth Adran yr Amgylchedd

Cyflwynwyd adroddiad Pennaeth Adran yr Amgylchedd yn cynghori'r Aelodau ar yr elfennau hynny o’r Ddeddf Cydraddoldeb 2010 sydd yn weithredol ers Ebrill 2017. Adroddwyd bod  adrannau 165, 166 a 167, sydd yn berthnasol i gerbydau sydd yn hygyrch i gadeiriau olwyn, yn ei gwneud hi yn ofynnol i’r Awdurdod Trwyddedu benderfynu os ydynt yn dymuno cyhoeddi rhestr o gerbydau sydd wedi eu dynodi fel rhai hygyrch. Y bwriad yw sicrhau bod gwell gwybodaeth ar gael i ddefnyddwyr cadeiriau olwyn am y cerbydau hynny sydd yn addas ar eu cyfer, yn eu hardaloedd, ac iddynt fod yn hyderus y byddant yn derbyn cymorth angenrheidiol i deithio’n ddiogel.

Ategwyd bod Adran 167 o’r Ddeddf yn rhoi caniatâd i’r Awdurdodau gynnal rhestr ddynodedig o gerbydau hygyrch i gadeiriau olwyn. Er nad oes rhwymedigaeth gyfreithiol  na gofyn statudol i gynnal rhestr o’r fath, nodwyd bod y llywodraeth yn awgrymu’n gryf y dylai Awdurdodau Lleol gadw'r rhestr yn gywir a chyfredol. Cyfeiriwyd at ganllawiau statudol y mae'r Adran Drafnidiaeth wedi eu pennu ynghylch gweithredu’r adrannau ynghyd ag argymell pa brosesau y dylai’r Awdurdodau Lleol eu hystyried i sicrhau bod y Ddeddf yn cael ei gweithredu’n effeithiol.

Adroddwyd bod 53 o gerbydau trwyddedig fyddai yn cael eu dynodi fel rhai sydd yn hygyrch i gadeiriau olwyn yng Ngwynedd (13% o gyfanswm y Sir). Nodwyd y byddai cyhoeddi rhestr yn  ffordd o annog cynnydd mewn ceisiadau am drwydded cerbydau o’r fath ac yn anogaeth i gwmnïau sylweddoli bod gwerth economaidd posib i gynnwys cerbyd hygyrch fel rhan o’u fflyd.

Yn ystod y drafodaeth ddilynol, amlygwyd y pwyntiau canlynol gan Aelodau unigol:

-       Y byddai rhestr yn gosod fframwaith i ddarpariaeth Cyngor Gwynedd

-       Yn ganllaw da i hyrwyddo gwasanaeth

-       Bod posibilrwydd i gydweithio a rhannu'r rhestr  gydag ysbytai'r Sir

-       Delfrydol y dylai pob cerbyd hacni fod yn hygyrch i gadeiriau olwyn ac y dylai hyn fod yn weledigaeth i’r dyfodol

-       Bod angen cyflwyno cyfundrefn newydd yn raddol i annog defnydd o geir amlbwrpas – angen i’r Cyngor fod yn arloesol

-       Cwmnïau llai yn debygol o fuddsoddi petai pwysau yn dod gan y cyhoedd

-       Bod her i’r Adran gadw'r rhestr yn gyfredol

PENDERFYNWYD cymeradwyo:

a)           gweithredu gofynion adrannau 165, 166 a 167 o Ddeddf Cydraddoldeb 2010.

b)           bod y swyddogion yn paratoi polisi, i'w ystyried gan y pwyllgor, ar y meini prawf ar gyfer eithriadau a'r gweithdrefnau ar gyfer gyrwyr na allent gydymffurfio â'r dyletswyddau a osodir yn y Ddeddf am resymau meddygol neu gorfforol.

c)           bod y darpariaethau polisi ar gyfer rhoi'r gweithdrefnau hyn ar waith yn cael eu cynnwys yn yr adolygiad o bolisïau tacsis sydd ar y gweill ar hyn o bryd; a'u cynnwys yn y polisi tacsis unedig fydd yn barod i ymgynghori arno yn fuan.

I dderbyn diweddariad ar lafar ar yr adolygiad

Cafwyd diweddariad ar lafar gan y Rheolwr Trwyddedu ar y broses o adolygu holl bolisïau tacsis Cyngor Gwynedd gan atgoffa’r Aelodau mai'r bwriad oedd cyflwyno un polisi unedol fydd yn cynnwys penderfyniad y Pwyllgor i weithredu adrannau 165, 166 a 167 o’r Ddeddf Cydraddoldeb. Adroddwyd bod James Button (JB) (Cyfreithiwr arbenigol yn y maes trwyddedu) hefyd yn cynnal adolygiad cenedlaethol i atgyfnerthu a gwella'r polisi collfarnau. Ategwyd bod Cyngor Gwynedd yn croesawu'r gwaith yma ac yn gwerthfawrogi unrhyw welliant / diweddariad, gan fod y Cyngor yn gwneud defnydd helaeth o’r polisi wrth ystyried ceisiadau trwydded hacni / gyrrwr tacsi. Adroddwyd y byddai adolygiad JB yn debygol o fod wedi ei gwblhau erbyn Ebrill 2018 ac y bydd unrhyw newidiadau yn cael eu cynnwys ym mholisi unedol Gwynedd.

Yn ystod y drafodaeth ddilynol, amlygwyd y pwyntiau canlynol gan Aelodau unigol:

-       Croesawu'r angen i resymoli a chysoni'r polisïau ar gyfer y 3 ardal yng Ngwynedd

-       Angen sicrhau polisi collfarnau cyffredinol i bawb - ar hyn o bryd y polisïau yn cael eu camddehongli sydd yn gwneud rhai sefyllfaoedd yn anodd

-       Angen sicrhau bod yr addasiadau / newidiadau yn cael eu gweithredu gyda'i gilydd - un addasiad

Mewn ymateb i sylw ynglŷn ag amserlen cyhoeddi'r polisi unedol, amlygwyd y byddai hyn yn ddibynnol ar sicrhau bod yr holl elfennau yn barod ynghyd a chynnal ymgynghoriad ffurfiol, swyddogol. Ategwyd mai’r elfennau fydd yn gyrru’r amserlen, ond gobeithiol  y byddai’r polisi unedol yn weithredol erbyn Mehefin 2018.

DERBYNIWYD y wybodaeth