Rhaglen, penderfyniadau a chofnodion

I dderbyn unrhyw ymddiheuriadau am absenoldeb

Derbyniwyd ymddiheuriadau gan y Cyng. Alan Jones Evans a’r Cyng. Hefin Underwood

I dderbyn unrhyw ddatganiad o fuddiant personol

Dim i’w nodi

Nodi unrhyw eitemau sy’n fater brys ym marn y cadeirydd fel y gellir eu hystyried.

Dim i’w nodi

Bydd y Cadeirydd yn cynnig y dylid llofnodi cofnodion cyfarfod o’r pwyllgor hwn a gynhaliwyd 10fed o Fehefin 2024 fel rhai cywir  

Llofnododd y Cadeirydd gofnodion cyfarfod o’r pwyllgor a gynhaliwyd 10fed o Fehefin 2024  fel rhai cywir

Cyflwyno, er gwybodaeth, cofnodion yr Is Bwyllgor Trwyddedu Cyffredinol a gynhaliwyd ar y dyddiau canlynol:

a)     07-05-24

b)     10-06-24

c)     04-09-24

d)     08-10-24

Cyflwynwyd a derbyniwyd er gwybodaeth, gofnodion yr Is Bwyllgorau Trwyddedu Cyffredinol a gynhaliwyd 7fed o Fai 2024, 10fed o Fehefin, 4ydd o Fedi 2024 a’r 8fed o Hydref 2024

I gymeradwyo diwygio’r drefn dirprwyo penderfyniadau i’r Is Bwyllgor yn unol a’r drefn a argymhellir yn yr adroddiad .

PENDERFYNIAD: Cymeradwyo diwygio’r drefn dirprwyo penderfyniadau i’r Is-bwyllgor.

Hawliau Dirprwyedig Pennaeth Amgylchedd: adolygu cymal 11.3.5 fel a ganlyn-

Gweithredu pwerau’r Cyngor ym maes trwyddedu cerbydau hacni a cherbydau hur preifat ag eithrio’r materion canlynol sydd yn gyfrifoldeb i’r Is-Bwyllgor o'r Pwyllgor Trwyddedu Cyffredinol.

·       Penderfynu ar gais am drwydded gyrrwr hacni/hurio preifat pan fydd adroddiad o'r Biwro Cofnodion Troseddol yn dangos collfarn neu rybudd heddlu,  a phan fydd y cais yn groes i bolisi’r Awdurdod.

·       Penderfynu ar gais am drwydded cerbyd hacni/hurio preifat pan na fydd y cerbyd yn cydymffurfio â pholisi'r awdurdod.

·       Penderfynu ar gais am drwydded gweithredwr hurio preifat pan fydd adroddiad o'r Gwasanaeth Datgelu a Gwahardd yn dangos collfarn neu rybudd heddlu , a phan fydd y cais yn groes i bolisi’r Awdurdod.

·       Y drefn i sicrhau fod y penderfyniad wedi ei ddirprwyo i swyddog mewn amgylchiadau lle nad yw hanes troseddol yr unigolyn, neu unrhyw fater i’w ystyried, yn groes i bolisi.

·       Bod gan y Pennaeth ddisgresiwn o dan y Cynllun Dirprwyo i gyfeirio unrhyw gais am wrandawiad Is Bwyllgor lle mae amgylchiadau yn cyfiawnhau gwneud hynny: ni fydd y newidiadau yn effeithio ar yr hawl hynny.

Cyflwyno’r diwygiadau i’r Swyddog Monitro fel y gall eu cynnwys fel rhan o adroddiad ‘Adolygu’r Cyfansoddiad’ fydd yn cael ei gyflwyno i’r Cyngor Llawn eu cymeradwyo yn derfynnol.

Cyflwynwyd adroddiad gan Pennaeth yr Adran Amgylchedd yn gofyn i’r Pwyllgor ystyried a chymeradwyo’r opsiynau ar gyfer addasu trefniadau’r cynllun dirprwyo cyfredol. Eglurwyd bod gan y Cyngor, fel Awdurdod Trwyddedu, ddyletswydd o dan y Ddeddf Cymalau Heddluoedd Trefol 1847 a’r Ddeddf Llywodraeth Leol (Darpariaethau Amrywiol) 1976 i drwyddedu gyrwyr a cherbydau hurio preifat a hacni, a gweithredwyr. Ategwyd ei bod yn ofynnol i’r Awdurdod sicrhau bod y sawl sydd yn ymgeisio am drwydded gyrrwr/ gweithredwr, neu’n ymgeisio i adnewyddu trwydded o’r fath, yn unigolyn ‘addas a phriodol’ i ddal y drwydded honno. Atgoffwyd yr Aelodau mai prif bwrpas trwyddedu cerbydau, gweithredwyr a gyrwyr yw diogelu iechyd y cyhoedd. Dyma’r flaenoriaeth mae’r Cyngor wedi ei ystyried wrth fabwysiadau trefn bwrpasol i geisio cyfarch hyn.

Tynnwyd sylw at eiriad cyfredol y Cyfansoddiad sydd yn gosod trefn benodol o ran pa benderfyniadau sydd wedi eu dirprwyo i swyddogion; a pha benderfyniadau sydd yn disgyn o dan gyfrifoldebau’r Is-bwyllgor. Atgoffwyd yr Aelodau bod adroddiad wedi ei gyflwyno i bwyllgor Rhagfyr 2019 yn amlinellu’r trefniadau gydag opsiynau cychwynnol o ran adolygu’r trefniadau o ddirprwyo penderfyniadau. Yn y Pwyllgor hwnnw cytunodd yr Aelodau y dylai’r Is-bwyllgorau Trwyddedu Cyffredinol barhau i allu dyfarnu penderfyniad mewn modd gwrthrychol a rhesymegol lle mae ceisiadau o ran eu natur yn cyfiawnhau penderfyniad gan yr Is-bwyllgor. Rhoddwyd hawl i’r Gwasanaeth Cyfreithiol a'r Gwasanaeth Trwyddedu ymchwilio ymhellach i gyfarch anfanteision y drefn bresennol gan sicrhau bod unrhyw addasiadau yn parhau i fod yn wydn, yn deg a thryloyw.

Adroddwyd bod trefniadau dirprwyo penderfyniadau yn amrywio o Gyngor i Gyngor a bod hyn hefyd wedi cael ei ystyried wrth adolygu’r drefn. O safbwynt Cyngor Gwynedd, ystyriwyd bod rôl bwysig gan yr Is bwyllgor i ystyried a phenderfynu car geisiadau sydd yn groes i unrhyw bolisi sydd yn weithredol ar y pryd; megis y  polisi presennol sydd yn rhoi arweiniad o ran penderfynu os yw unigolyn yn addas a phriodol i ddal trwydded gyrru tacsi (Polisi Meini Prawf Addasrwydd ar gyfer Gyrwyr a Gweithredwyr). Nodwyd hefyd bod angen pendantrwydd clir o ran diffinio’r amgylchiadau lle dylid cyfeirio cais i’r Is bwyllgor.

Nodwyd, os bydd y Pwyllgor yn cymeradwyo’r addasiadau byddant yn cael eu cyflwyno am gymeradwyaeth derfynol gan y Cyngor Llawn fel rhan o adroddiad gan y Swyddog Monitro ar Adolygu’r Cyfansoddiad.

Diolchwyd am yr adroddiad

Yn ystod y drafodaeth ddilynol, nodwyd y sylwadau canlynol gan yr aelodau:

·       Croesawu’r newid – dim pwynt cyflwyno cais i is-bwyllgor heb fod angen – byddai hyn yn ysgafnhau llwyth gwaith diangen i’r is-bwyllgor ac i’r swyddogion

·       Bod angen sicrhau proses desg ac agored

·       Bod angen sicrhau bod yr ymgeisydd yn ymwybodol o’i hawl i apelio - angen amlygu hyn yn glir ynghyd ag amgylchiadau beth fydd yn cael ei gyfeirio at is-bwyllgor

·       Bod y newidiadau yn ymateb i’r angen yn gynt – yn osgoi oediad yn y broses o aros am benderfyniad i geisiadau

·       Derbyn y byddai’r Is-bwyllgor yn delio gyda’r ceisiadau mwyaf cynhennus

·       Bod cydweithio gyda’r Heddlu yn allweddol i’r broses, yn arbennig yng nghyd-destun gwybodaeth  ...  gweld y cofnod llawn ar gyfer eitem 6.