Agenda item

Aelod Cabinet: Cynghorydd Gareth W Griffith

Cyflwyno’r Adroddiad Adolygu a derbyn sylwadau’r Pwyllgor ar y cynnwys.

Derbyn yr adroddiad gan nodi’r sylwadau a dderbyniwyd.

Cyflwynwyd adroddiad gan yr aelod cabinet dros Amgylchedd drwy nodi bod yr adroddiad yma gerbron y Pwyllgor ar gyfer derbyn sylwadau’r aelodau.   

Eglurodd y Rheolwr Polisi Cynllunio ar y Cyd bod gofyniad ar y Cyngor i baratoi adroddiad adolygu cryno a chynnwys rhai pethau penodol e.e.  wybodaeth fydd yn cael ei hystyried i lywio’r Cynllun datblygu lleol.

Cyfeiriwyd at Atodiad 1 a nodwyd ei fod wedi rhannu i mewn i 6 rhan. Trafodwyd y rhannau i gyd yn drylwyr gan esbonio pwrpas bob un.

Trafodwyd y camau nesaf sef bod ymgynghoriad cyhoeddus am 6 wythnos cyn bydd adroddiad terfynol yn dod gerbron y Cyngor Llawn. Gofynnwyd I'r Pwyllgor ystyried yr adroddiad adolygu drafft a chynnig sylwadau ar faterion fydd angen eu hadolygu wrth baratoi’r cynllun diwygiedig.

Yn ystod y drafodaeth cododd y sylwadau fel a ganlyn:

-          Holwyd pam fod y Cyngor yn cynllunio ar y cyd efo Môn gan nad oes yr un Sir arall yng Nghymru sy’n cydweithio yn yr un modd. Nododd bod Gwynedd gyda’u hanghenion unigryw sy’n haeddu cynllun unigol.  

-          Cyfeiriwyd at dudalen 53 yn y rhaglen lle nodwyd bod y ddarpariaeth tai wedi disgyn o dan darged.

-          Nodwyd bod effaith ar gymunedau gan nad yw cynlluniau Wylfa yn parhau ac awgrymwyd dylai’r nifer tai a ddynodir yn y cynllun fod yn amodol ar ddatblygiadau yn cael eu gwireddu  rhag peryglu cymunedau.

-          Codwyd cwestiynau ynghylch dymchwel ac ail-adeiladu tai o fwy o faint a’r effaith amgylcheddol. Er yn fwy costus i’w brynu gallai tŷ newydd mwy o faint fod yn fwy gost effeithol gyda’r costau rhedeg yn is.

-          Mynegwyd pryder ynghylch codi tai heb fod yr angen yno a nodwyd nad oeddent yn fforddiadwy i fwyafrif o drigolion Gwynedd a Môn.

-          Croesawyd yr adolygiad a chytunwyd a sylwadau’r aelodau eraill ynghylch angen y tai newydd gan fod poblogaeth Gwynedd a Môn yn statig.

-          Awgrymwyd bod angen tai fforddiadwy marchnad leol ar draws y siroedd ac nid mewn rhai ardaloedd yn unig gan fod tystiolaeth yn dangos bod tai allan o gyrhaeddiad mwyafrif y bobl leol.

-          Holwyd ynghylch y cynllun peilot ‘Scottish Power’ gan fod tlodi tanwydd ym Mhenllyn ond nad yw’r cynllun yn ei gynnwys.

-          Mynegwyd balchder bod ystyriaeth yn cael ei roi i fioamrywiaeth, fodd bynnag tynnwyd sylw at y diffyg trafodaeth ar yr ardal AHNE.

-          Codwyd pwynt ynghylch defnyddio deunyddiau lleol megis llechi lleol ar dai sy’n cael eu hadeiladu er mwyn sicrhau gwaith yn y chwarel ac arian yn aros yn lleol.

-          Mynegwyd siom nad oes modd i blant o deuluoedd ffermio aros yn eu cartrefi gan nad oes modd iddynt adeiladu tai ar y tir. Ategwyd bod hyn yn arwain at ffermydd yn cael eu gwerthu. 

Mewn ymateb nododd y Swyddogion y canlynol:

-          Cytunwyd bod y sefyllfa yn wahanol erbyn hyn yn dilyn newyddion nad oes datblygiad wylfa ar y gorwel a bod hyn yn cael ei gynnwys wrth ddiwygio’r cynllun.

-          Nododd bod sicrhad y bydd tystiolaeth gadarn ei hangen er mwyn datblygu tai a bod yr angen lleol ar eu cyfer yna.

-          Ategodd ei fod yn hynod berthnasol o bob agwedd y cynllun newydd ar gyfer bob math o ddatblygiad eu bod yn cwrdd â gofynion carbon y Cyngor.

-          Atgoffwyd y Pwyllgor bod papur wedi bod ger eu bron yn ymwneud ag ail gartrefi ac o ganlyniad cyflwynwyd adroddiad i'r Senedd.

-          Nodwyd bod gwybodaeth ynghylch cynllun ‘Scottish Power’ ar eu gwefan er mwyn derbyn fwy o wybodaeth ar yr ardaloedd sy’n rhan o’r cynllun.

-          Cydnabuwyd pwynt yr aelod ar ddefnydd o ddeunyddiau lleol, fodd bynnag nododd ei fod yn anghyfreithlon gosod amodau ar ddeunyddiau a dim ond amod sy’n sicrhau bod y deunydd yn debyg o ran edrychiad sy’n bosib ei wneud.

-          Awgrymwyd y dylai’r aelodau gymryd rhan yn yr ymgynghoriad er mwyn lleisio eu barn ar y pwyntiau sydd wedi codi yn y Pwyllgor heddiw ond sydd tu hwnt i gylch gwaith yr adroddiad.