Agenda item

Codi adeilad yn lle adeilad presennol (rhannol ôl-weithredol) ar gyfer defnydd fel gweithdy masnachol, storfa, a modurdy, ac hawl ol weithredol ar gyfer ffurfio mynedfa newydd ynghyd a ffordd mynediad ynghyd a dymchwel modurdy a sied

 

AELOD LLEOL: Cynghorydd Peter Garlick

 

 Dolen i'r dogfennau cefndir perthnasol

 

Gohirio.

·         Cais am asesiad manylach o’r effaith weledol ac ateb i’r cwestiwn, Pam bod angen safle gwaith ym Mhenygroes a Bontnewydd ?

 

Codi adeilad yn lle adeilad presennol (rhannol ôl-weithredol) ar gyfer defnydd fel gweithdy masnachol, storfa, a modurdy, a hawl ôl weithredol ar gyfer ffurfio mynedfa newydd ynghyd a ffordd mynediad ynghyd a dymchwel modurdy a sied

 

Tynnwyd sylw at y ffurflen sylwadau hwyr

 

a)            Amlygodd yr Rheolwr Cynllunio mai cais rhannol ôl weithredol ydoedd ar gyfer codi gweithdy diwydiannol (dosbarth defnydd B2) ar leoliad adeilad amaethyddol blaenorol. Adroddwyd y  byddai’r gweithdy newydd yn mesur 20 medr o hyd, 12 medr o led a 5.2 medr i’r crib ac yn cael ei adeiladu o fframwaith ddur (sydd eisoes mewn lle) wedi ei orchuddio gyda sitiau dur gyda’r tai preswyl agosaf wedi eu lleoli tua 200 medr oddi wrth y safle

 

Pwrpas y gweithdy yw ar gyfer busnes yr ymgeisydd. Ategwyd bod bwriad codi modurdy domestig ar safle modurdy blaenorol ynghyd a chadw mynedfa newydd i’r ffordd sirol di ddosbarth cyfochrog.

 

Aseswyd egwyddor y bwriad yn ôl Polisi CYF 6 o’r Cynllun lle nodir y gellid caniatáu cynigion ar gyfer adeiladau er diben cyflogaeth/busnes newydd cyn belled fod posib cydymffurfio a meini prawf y polisi. Nodwyd bod y  polisi yn annog datblygiadau ar raddfa fach sy’n gwneud defnydd priodol o adeiladau sy’n bodoli yn barod ac sy’n gweddu a’r ardaloedd gweledig. Er hynny, nid yw Polisi presennol yn diffinio graddfa, ac felly bu rhaid pwyso a mesur yr achos yn sgil pwrpas ac amcanion y Polisi ac  anodd oedd gweld sut y byddai adeilad diwydiannol dosbarth defnydd B2 o’r maint yma yn cydymffurfio a’r Polisi.

 

Eglurwyd bod yr ymgeisydd yn rhedeg ei fusnes o Ystâd Ddiwydiannol Peblig yng Nghaernarfon ond bod y safle hwnnw yn rhy fach ar gyfer gweithrediadau'r busnes ac felly bwriad yw  ymestyn y busnes i eiddo arall ym Mhenygroes. Byddai'r trefniant yma yn caniatáu i staff y cwmni i weithio o’r Ystâd Ddiwydiannol Penygroes ac i’r ymgeisydd weithio o’i gartref am resymau personol. Nodwyd hefyd na fyddai angen i’r ymgeisydd weithio o fewn unedau diwydiannol presennol oherwydd natur ei waith o fewn y busnes ac felly ymddengys mai’r bwriad yw sefydlu'r busnes yn Llain Meddygon oherwydd anghenion personol. Ystyriwyd felly, nid yw lleoliad cefn gwlad wedi ei ddangos yn hanfodol i’r busnes y gellid ei reoli o leoliad arall ac nad oedd cyfiawnhad cynllunio wedi dangos dros ganiatáu'r gweithdy ar safle y tu allan i ffin datblygu.

 

Ni ystyriwyd bod maint, graddfa na natur y bwriad yn cydymffurfio gydag amcanion polisi PCYFF1, PCYFF2, PCYFF3 na CYF6 Cynllun Datblygu Lleol ar y Cyd Gwynedd a Môn ac felly'r argymhelliad oedd gwrthod y cais

 

b)            Yn manteisio ar yr hawl i siarad nododd yr ymgeisydd y sylwadau canlynol:

·         Ef oedd perchennog Axis Precision sydd yn cyflogi a hyfforddi pobl leol - yn cyflogi wyth aelod o staff gyda saith ohonynt yn siarad Cymraeg.

·         Y busnes ar hyn o bryd ar ystâd Peblig ond ar fin symud i ystâd Penygroes oherwydd bod y to yn gollwng a’r peiriannau’n rhydu -  nid yw’n lle da i weithio, mae’n oer a llaith.

·         Ei wraig yn dioddef o MS a’r salwch yn cael effaith mawr ar ei blant sydd wedi gofalu amdani ers yn blant bach tra roedd yntau yn gweithio. Er yn anhapus gyda’r sefyllfa, ei wraig yn deall bod rhaid rhoi amser i’r busnes ar y pryd

·         Wedi prynu Llain Meddygon oherwydd gweld cyfle iddo allu rhedeg y busnes o’r cartref a gofalu am ei wraig - hyn yn bwysig iddo gan nad yw’n deg rhoi’r cyfrifoldeb ar y plant sydd bellach angen canolbwyntio ar eu bywydau eu hunain.

·         Gwaith wedi ei wneud ar y tŷ yn Llain Meddygon i’w wneud yn addas i berson anabl - y gobaith yw symud i mewn yn y gwanwyn.

·         Nid oedd yr adeiladau allanol gwreiddiol mewn cyflwr da, ac felly penderfynodd brynu sied newydd. Derbyniodd gyngor gwael ynghylch ceisiadau cynllunio ac roedd yn edifarhau am hyn

·         Petai y cais yn cael ei wrthod, mwy na thebyg bydd swyddi yn cael eu colli a’r  busnes efallai yn cau yn gyfan gwbl.

 

c)            Yn manteisio ar yr hawl i siarad nododd yr Aelod Lleol y pwyntiau canlynol:

·         Ei fod yn cefnogi’r cais ac yn derbyn fod y cais yn un anarferol

·         Y bwriad yw hwyluso patrwm byw a gwaith yr ymgeisydd drwy roi cyfle iddo ef a’i fab weithio o adre a gofalu am ei wraig

·         Cadarnhau mai symud oedd y busnes o Peblig i Penygroes - nid oedd dau safle

·         Bod fframwaith y datblygiad eisoes wedi ei godi ac yn debyg i’r sied wreiddiol ac er efallai yn hirach, bod crib y to 1m yn llai. Derbyn bod yr ymgeisydd wedi dechrau ar y gwaith ond hyn oherwydd iddo gael ei gamarwain

·         Bydd y sied yn cael ei pheintio yn wyrdd sydd yn debyg i  adeiladau cyfagos ac yn plethu i mewn i’r amgylchedd - dim yn niweidiol - o well safon na’r adeilad gwreiddiol

·         Y CDLl yn ffafrio cefnogi busnesau fel yr un sydd yma

·         Cyngor Cymuned Bontnewydd wedi trafod y cais yn fanwl – dim gwrthwynebiad ar wahân i beth fydd yn gynwysedig yn yr adeilad - erbyn hyn deallir y bydd sied a garej - nid yw’r adeilad ar gyfer busnes yn unig

·         Bod bwriad plannu coed a thirweddu a chreu un fynedfa newydd ddiogel

·         Gwelir unedau mwy mewn ardaloedd gwledig

·         Cyfle yma i gefnogi Cymry lleol

 

d)            Cynigwyd ac eiliwyd i ohirio’r cais

 

e)            Yn ystod y drafodaeth ddilynol nodwyd y sylwadau canlynol gan aelodau:

·         Bod y bwriad yn ymddangos yn well na’r adeilad blaenorol

·         Angen gwell asesiad ar yr effaith o ystyried bod yr adeilad yn llai na’r un blaenorol

·         Bod eglurhad wedi ei dderbyn am y fynedfa

·         Y bwriad yn cynnig gwaith a chyfleoedd yn lleol

·         Pam yr angen i gynnal safle ym Mhenygroes a Bontnewydd?

 

Mewn ymateb i sylw am y fynedfa a’r cwrtil, nododd y Rheolwr Cynllunio nad oedd gan y Swyddogion bryder ynglŷn â pharcio a maint y cwrtil gan mai dau yn unig oedd yn bwriadu gweithio yn yr adeilad. Cydymffurfiaeth gyda pholisi CYF6 oedd yn amlygu’r pryder mwyaf i swyddogion.

 

PENDERFYNWYD  Gohirio.

 

Cais am asesiad manylach o’r effaith weledol ac ateb i’r cwestiwn, pam bod angen safle gwaith ym Mhenygroes a Bontnewydd ?