Agenda item

I ystyried adroddiad y Prif Weithredwr

Bod y Pwyllgor Penodi yn cynnig y Datganiad o Bolisi Tal (drafft) i’r Cyngor ar Fawrth y 3ydd 2022, fel un i’w fabwysiadau ar gyfer 2022/23

 

Cyflwynwyd adroddiad gan y Prif Weithredwr yn nodi bod dyletswydd statudol ar bob Cyngor i baratoi Datganiad Polisi Tâl blynyddol. Yn unol â phenderfyniad y Cyngor wrth fabwysiadu Polisi Tâl ar gyfer 2012/13, roedd disgwyliad i’r Pwyllgor Penodi Prif Swyddogion gynnal adolygiad blynyddol o gynaliadwyedd y polisi a chyflwyno unrhyw argymhellion yn dilyn adolygu’r Polisi Tâl i’r Cyngor Llawn yn flynyddol. 

 

Adroddwyd nad oedd addasiadau yn cael eu cynnig i’r polisi eleni,

 

Tynnwyd sylw at adolygiad cyflogau Prif Swyddogion. Atgoffwyd yr Aelodau bod y Pwyllgor wedi argymell adolygiad o gyflogau Prif Swyddogion, ond na ddylid cynnal yr adolygiad hyd nes bod penderfyniad ar lefel cenedlaethol wedi ei wneud yn y lle cyntaf. Adroddwyd nad oedd cytundeb wedi ei gyrraedd hyd yma ar gyfer 2021/22. Y bwriad yw cynnal yr adolygiad a chyflwyno’r canfyddiadau i’r Pwyllgor o ganlyniad i gyhoeddi’r gytundeb cenedlaethol.

 

Yng nghyd-destun cyflogau swyddi o dan lefel prif swyddogion, nodwyd, fel cyflogau prif swyddogion nad oedd cytundeb cenedlaethol wedi ei gyrraedd. Ategwyd bod trafodaethau yn parhau rhwng yr Undebau a’r Cyflogwyr, bod balot wedi ei chynnal a bod ymateb i’w ddisgwyl yn yr wythnosau nesaf.

 

 

Yn dilyn cyhoeddiad gan Llywodraeth Cymru (Rhagfyr 2021) i ariannu cynnydd yng nghyflogau staff maes gofal i lefel Cyflog Byw (£9.90), bydd angen i gynghorau sicrhau cydymffurfiad a’r cyfarwyddyd hwnnw o fis Ebrill 2022 Nodwyd, petai cynnydd mewn cyflogau 2021/22 a 2022/23 byddai cyflog yr awr i ofalwyr y Cyngor, uwchlaw’r Cyflog Byw; os na fydd cytundeb cenedlaethol, bydd rhaid cymryd camau i godi’r lefelau cyflog o’r 1af o Ebrill 2022, yn unol â’r cyfarwyddyd.

 

Ategwyd bod y Cyngor wedi mabwysiadu meini prawf Cynllun Arfarnu Swyddi GLPC fel sail i osod graddfa cyflog ar gyfer pob swydd sydd o dan Amodau Gwaith Gweithwyr Llywodraeth Leol. Eglurwyd bod y berthynas rhwng tâl Prif Swyddogion a gweithwyr eraill wedi ei ddylunio i alluogi’r Cyngor i recriwtio a chadw’r gweithwyr addas a gorau yn ei swyddi amrywiol, wrth gynnal y pwyntiau gwahaniaethol a arfarnwyd yn yr arfarniad swyddi. Amlygwyd bod Adolygiad Hutton o Gyflog Teg yn y Sector Gyhoeddus yn argymell cymhareb o ddim mwy na 1:20 rhwng y cyflog uchaf a’r cyflog isaf (llawn-amser) - cymhareb Gwynedd ar hyn o bryd yn 1:6.4.

 

Ers cyhoeddi’r adroddiad, nodwyd bod cytundeb cenedlaethol wedi ei gyrraedd i gynyddu cyflogau Prif Weithredwyr o 1.5%. Yn ddarostyngedig i dderbyn y Datganiad Polisi Tâl, bydd yr adroddiad i’r Cyngor Llawn (03/03/22), yn cael ei ddiweddaru i arddangos y cynnydd.

 

 

Diolchwyd am yr adroddiad

 

Yn ystod y drafodaeth ddilynol nodwyd y sylwadau canlynol gan aelodau:

 

·         Pam na ellid codi’r Cyflog Byw i £10 yr awr – rhif cyflawn? – hyn yn debygol o ddenu mwy o weithwyr i’r maes gofal

·         Angen cynnig cyflog mwy cystadleuol i weithwyr maes gofal, gwaith o fewn y sector breifat, megis siopau manwerthu, yn talu mwy am lai o gyfrifoldebau

·         Angen sicrhau bod Llywodraeth Cymru yn cyfrannu at y gost o gynyddu’r tâl i weithwyr maes gofal

·         Bod y Cyngor yn gweithio at darged lefel isel cyflog byw yn hytrach na tharged uwch – angen gweithio i wella hyn

·         Angen gwybodaeth am y gost o gynyddu cyflogau gofalwyr - ystyried sefyllfaoedd gwahanol

·         Bod yswiriant gwladol yn cynyddu yn mis Ebrill 2022 i gyfarch cynnydd mewn cyflogau maes gofal – lle mae’r arian yma?

·         Gofalwyr yn gwneud gwaith anodd – yn cynnig gofal gyda pharch ac urddas – angen cydnabod hyn

 

Mewn ymateb i gwestiwn ynglŷn â chytundeb ar godiad cyflog 2021/22, ac a fydd ôl daliad i’r gweithlu, nodwyd bod trefniadau yn eu lle i sicrhau ôl daliad cyn Mawrth 31ain 2022 (cyn cynyddu’r yswiriant gwladol 1/4/22) os y ceir cytundeb cenedlaethol cyn cau’r gyflogres ar gyfer mis Mawrth.

 

Mewn ymateb i sylw am ddwyn perswâd ar y Llywodraeth i gynyddu cyflogau gweithwyr maes gofal, nodwyd bod trafodaethau yn cael eu cynnal gyda chynghorau eraill lle daethpwyd i’r casgliad mai £12 yw’r targed cyflog yr awr os am fod yn gystadleuol. Ategwyd bod Cynghorau wedi bod yn lobio ar hyn ers dros flwyddyn ac mai’r gwaith lobio yma sydd wedi arwain at y cynnydd diweddar (sydd yn agosach i £10 yr awr). Derbyn nad yw’r swm yn adlewyrchu'r gwaith sydd yn cael i wneud ond bydd y cynghorau yn parhau i lobio ac anogwyd yr aelodau i wneud yr un peth.

 

Mewn ymateb i sylw y dylid rhoi codiad cyflog i ofalwyr yn unig, atgoffwyd yr Aelodau bod y Cyngor wedi mabwysiadau Cynllun Arfarnu Swyddi sydd yn ymrwymo i dalu cyflogau yn unol â deddfwriaeth cyflog cyfartal. Petai penderfyniad yn cael ei wneud i gynyddu cyflogau gofalwyr, byddai angen ystyried pob swydd sydd yn cael ei harfarnu ar yr un lefel. Ategwyd bod adolygiad o gynnwys swydd-ddisgrifiadau perthnasol o fewn y Gwasanaeth Oedolion yn bresennol.

 

Mewn ymateb i sylw bod y Cyngor yn cyfrannu at gyflogau gofalwyr yn y sector breifat nodwyd bod lefelau tâl y sector breifat yn is na’r sector gyhoeddus a bod y cyfraniad yn cael ei osod fel rhan o’r gyllideb.

 

Mewn ymateb i sylw bod angen cynnal trafodaethau pellach ar lefelau cyflogau maes gofal, nodwyd bod y gyllideb yn cael ei chraffu ym Mhwyllgor Archwilio a Llywodraethu (10/02/22), ond y byddai modd cyfeirio’r drafodaeth am gyflogau swyddi penodol i’r Pwyllgor Craffu perthnasol. Ategwyd mai cyfrifoldeb y Pwyllgor Penodi Prif Swyddogion oedd craffu ac ystyried y polisi tâl.

 

 

PENDERFYNWYD

 

Bod y Pwyllgor Penodi yn cynnig y Datganiad o Bolisi Tal (drafft) i’r Cyngor ar Fawrth y 3ydd 2022, fel un i’w fabwysiadau ar gyfer 2022/23