Agenda item

YR AELOD CABINET – CYNGHORYDD GARETH GRIFFITH

 

Diweddaru’r Pwyllgor am y cynnydd hyd yma yn nhermau rheolaeth cerbydau modur a phwerau ymdrin â modurwyr sydd yn parcio’n anghyfreithlon.

Derbyn yr adroddiad gan nodi’r sylwadau a dderbyniwyd.

Cyflwynwyd diweddariad gan Pennaeth Adran Amgylchedd ar y cynnydd hyd yma ar argymhellion y Grŵp Tasg. Atgoffwyd y pwyllgor bod y Grŵp Tasg wedi ei sefydlu ym mis Gorffennaf 2019 i ymgymryd ag adolygiad cynhwysfawr o’r strategaeth parcio weithredol ac ystyried ei addasrwydd a pherthnasedd i anghenion presennol y Cyngor a’i chymunedau. Eglurwyd bod adolygu'r trefniadau parcio ar draws y Sir yn anorfod yn nhermau cynaliadwyedd ariannol o ran cyllidebau'r awdurdod er sicrhau bod trefniadau rheoli ymarferol yn rhai effeithiol ac effeithlon. Ategwyd bod adroddiad cynhwysfawr wedi ei gyflwyno i’r Pwyllgor Craffu Cymunedau ym mis Rhagfyr 2020 yn cynnig argymhellion arloesol a phriodol ar gyfer datrys rhai o’r materion yn ymwneud a pharcio. Cyflwynwyd adroddiad terfynol i’r Cabinet ym mis Chwefror 2021 ac fe gymeradwywyd yr isod:

 

·         Mabwysiadu Strwythur Ffioedd Parcio Newydd oedd yn sicrhau cysondeb ar draws y Sir

·         Adolygu cynnig parcio yn ystod cyfnod y Nadolig

·         Dim newidiadau i’r Cynllun Bathodyn Glas

·         Dim newidiadau i’r Cynllun Parcio i Breswylwyr

·         Cryfhau’r Tîm Gorfodaeth Parcio

 

Cadarnhawyd bod yr argymhellion hyn wedi’u gweithredu.

 

O ganlyniad i gyfyngiadau’r pandemig, cydnabuwyd fod llawer o faterion wedi cael cryn effaith ar gymunedau’r Sir yng nghyd-destun parcio. Rhoddwyd diweddariad pellach ar waith oedd yn cael ei wneud i ymateb i ddau faes penodol, sef rheolaeth cartrefi modur a phwerau ymdrin â modurwyr yn parcio’n anghyfreithlon.

 

Yng nghyd-destun cartrefi modur, eglurwyd, mewn ymateb i nifer o gwynion am gartrefi modur yn parcio mewn lleoliadau anaddas a bod diffyg rheolaeth arnynt o fewn y Sir, bod gwaith helaeth wedi ei wneud ar y cyd gyda’r Adran Economi i geisio adnabod goblygiadau’r cynnydd mewn defnydd cerbydau modur (oherwydd cyfyngiadau teithio dramor) a’r effaith o fewn y Sir. Ymgysylltwyd gyda gweithredwyr safleoedd carafanau yng Ngwynedd, y sector cartrefi modur yn ogystal â’r cyhoedd a chymunedau ar draws y Sir drwy holiadur ac adroddwyd bod yr ymateb wedi bod yn un cadarnhaol iawn ac yn amlygu’r angen am fesurau ar gyfer rheoli’r sector cartrefi modur yn y Sir yn well.

 

Yn dilyn penderfyniad gan y Cabinet yn Nhachwedd 2021 mabwysiadwyd cynllun peilot i ddatblygu lleoliadau parcio ym meysydd parcio’r Cyngor ar gyfer cartrefi modur fyddai’n annog defnydd canol trefi a lleihau’r dwysedd o gartrefi modur sy’n defnyddio lleoliadau anaddas. Ategwyd bod Bwrdd Prosiect wedi ei sefydlu i symud y gwaith ymlaen ac y byddai angen cyflwyno ceisiadau cynllunio ar gyfer addasu’r meysydd parcio dan sylw.

 

Yng nghyd-destun mabwysiadu pwerau towio cerbydau i ffwrdd, eglurwyd bod y drefn wedi dod i rym o ganlyniad i broblemau parcio ar draws y Sir, yn enwedig ardal Llyn Ogwen a Phen y Pas. Ystyriwyd nad oedd diryw o £35 yn ataliad digonol, ac felly cyflwynwyd cynllun o symud y car os nad oedd cydymffurfiaeth gyda’r gofynion parcio. Er bod y cynllun wedi ei ddatblygu gyda chydweithrediad yr Heddlu, adroddwyd bod y Cyngor bellach gyda hawliau gweithredu ac yn cydweithio gyda chwmni Gwalia Garage, Caeathro. Nodwyd bod bwriad cyflwyno diweddariad ar y drefn wrth i’r cynllun aeddfedu.

 

Diolchwyd am yr adroddiad

 

Yn ystod y drafodaeth, cyflwynwyd y sylwadau a ganlyn gan aelodau:-

·         Bod yr ymateb i’r problemau parcio i’w croesawu

·         Bod cynnig darpariaeth mewn meysydd parcio'r Cyngor yn creu cystadleuaeth gyda meysydd carafanau’r Sir

·         Angen ystyried agosatrwydd y meysydd parcio at gartrefi

·         Ni fydd y meysydd parcio yn cael eu goruchwylio – gall hyn arwain at ymddygiadau gwrthgymdeithasol

·         Pwy fyddai’n gwaredu’r gwastraff a charthffosiaeth?

·         Sut mae gwahaniaethu rhwng parcio dros nos a gwersylla dros nos? Rhaid amlygu’r gwahaniaeth os yn cyflwyno cyfyngiadau

·         A fydd gyrwyr loriau (sy’n gorfod cymryd egwyl orffwys) yn cael eu rheoli yn yr un modd? Gall hyn greu problemau i glydwyr sy’n darparu cynnyrch i fusnesau lleol

·         Bod angen diffiniad clir rhwng cartrefi modur, faniau gwersylla (camper vans) a faniau gwersylla sydd yn plygu (folding campers)

·         Bod Cymru yn ymddangos fel gwlad ‘anghyfeillgar’ i ddefnyddwyr cartrefi modur

·         Bod rhaid gwneud lle ar gyfer cartrefi modur

·         Awgrym bod rhai perchnogion cartrefi modur yn osgoi talu am le ar faes carafanau pwrpasol er bod lle ar eu cyfer

·         Bod Gwynedd yn Sir weddol ei maint ac felly anghenion parcio pob cymuned yn wahanol – anodd cael trefniadau sydd yn siwtio pob ardal

·         Cais i ail farcio meysydd parcio gyda rhai baeau yn rhy gul i geir

·         Awgrym i leihau niferoedd baeau bysiau mewn meysydd parcio – buasai hyn yn rhyddhau mwy o le i geir

·         Arwyddion yn gymhleth – rhai yn cynnig tocyn 24awr ond eto arwydd gwahanol yn nodi dim aros dros nos

·         Maes parcio Llandanwg angen sylw – llinellau baeau yn annelwig, arwyddion  wedi gwisgo ac ysgrifen yn pylu

·         Bod nifer o faterion da wedi cael eu gweithredu o ganlyniad i’r adolygiad

·         Bod angen trefniadau gorfodaeth fel rhan o’r cynllun peilot.

 

Mewn ymateb i sylw bod dirwy o £35 yn annigonol i atal parcio anghyfreithlon, nodwyd bod dirywion yn cael eu gosod yn genedlaethol, ond bod ymholiadau wedi cael eu gwneud ynglŷn â defnydd o ddirywion gwahanol fel modd o wella cydymffurfiaeth. Adroddwyd e.e., bod y cynllun towio, cydweithio gyda’r Adran Cefnffyrdd a chyflwyno llinellau melyn dwbl yn ardal Ogwen wedi gwella’r sefyllfa ar ochr Gwynedd ond nad oedd Conwy wedi mabwysiadu ataliadau parcio. Ategwyd bod mesur llwyddiant y cynllun towio yn gynamserol, ond eisoes gwelwyd gwell cydymffurfiaeth.

 

Mewn ymateb i’r sylwadau am gartrefi modur, nodwyd y byddai modd rhannu’r gwaith ymchwil a gwblhawyd gyda’r aelodau. Derbyniwyd bod angen ystyried lleoliadau’r meysydd parcio yn ofalus a bod addasrwydd safle yn bwysig. Ategwyd bod materion megis effaith mwynderau, effeithiau gweledol a llifogydd yn cael eu hystyried ac y byddai pob cais yn gorfod mynd drwy’r broses cynllunio. Nodwyd hefyd y byddai cynllun peilot yn fodd o weld a thystiolaethu beth sydd yn dderbyniol.

 

Mewn ymateb i gwestiwn ynglŷn â’r angen am beiriannau talu ac arddangos sydd yn derbyn cerdyn ac arian parod ar draws y Sir, nodwyd bod trafferthion gyda rhai peiriannu sydd yn derbyn cerdyn oherwydd diffyg signal, ond bod pob maes parcio yn cynnig talu gyda ffôn. Ategwyd bod taliad (drwy ap) gyda ffôn yn cynnig manteision sylweddol ac wedi bod yn hynod o lwyddiannus. Nodwyd y byddai’r ddarpariaeth yn gwella, wrth uwchraddio peiriannau talu byddent yn cynnwys cyfarpar i gymryd taliadau cerdyn.

 

Mewn ymateb i sylw ynglŷn â chais gan aelod o’r cyhoedd (drwy law Is-gadeirydd y Cyngor) i’r Cyngor ystyried cyflwyno amseroedd byr ar gyfer ymwelwyr i hafan iechyd neu osod baeau pwrpasol o fewn y maes parcio, nodwyd bod y mater yn cael sylw a thrafodaeth uniongyrchol wedi ei gynnal gyda’r ymholydd.

 

Mewn ymateb i sylw ynglŷn â chais i swyddogion gorfodaeth ddefnyddio disgresiwn wrth osod dirwy gan annog gyrwyr i ‘symud ymlaen’ neu ‘osgoi gor-aros’, nodwyd bod rhai sefyllfaoedd parcio yn anodd ei rheoli, ond bod y cyfyngiadau parcio yn cael eu gosod i bawb - lleol neu beidio. Ategwyd bod y swyddogion yn ystyried disgresiwn wrth ddadlwytho, llwytho a diogelwch ffyrdd yn gyffredinol, ac nad creu incwm oedd y prif yrrwr yma. Y flaenoriaeth oedd cadw ffyrdd yn ddiogel a bod yn gyson a theg gyda phawb. Nodwyd bod gwaith gorfodaeth gan amlaf yn digwydd yn ystod y dydd, ond yn hwyrach mewn ambell faes parcio lle’r oedd parcio 24 awr. ‘Roedd angen sicrhau diogelwch swyddogion.

 

Mewn ymateb i sylw yng nghyswllt pwyntiau gwefru trydan, nodwyd bod arian cyfalaf wedi ei glustnodi a derbyniwyd grantiau i ariannu gosod darpariaeth pwyntiau gwefru trydan. Eglurwyd bu oediad yn sgil y pandemig a materion is-adeiledd e.e. yr angen am is-orsaf trydan yn Nolgellau. Nodwyd y byddai’r gwaith o osod y ddarpariaeth yn digwydd dros y flwyddyn nesaf.

 

Mewn ymateb i sylw ynglŷn ag atal cartrefi modur rhag parcio mewn culfannau dros nos a bod angen gosod arwyddion yn amlygu hyn, nodwyd bod y mater yn un cymhleth oherwydd bod nifer o is-ddeddfau i’w hystyried os am ddatrys y mater. Ategwyd bod y Gwasanaeth wedi ystyried cyngor cyfreithiol. Pwysleisiwyd ni fyddai datrysiad yn y tymor byr.

 

PENDERFYNWYD

 

Derbyn y diweddariad gan nodi’r sylwadau a dderbyniwyd.