I dderbyn diweddariad ar raglen waith Chwarter 1 Archwilio Cymru ac adroddiadau sydd wedi eu cyhoeddi yn ddiweddar
Penderfyniad:
Derbyn yr
adroddiad.
Cofnod:
Cyflwynwyd - adroddiad ar y cyd gan Reolwr Gwasanaeth Cefnogi Busnes y
Cyngor ac Archwilydd Arweiniol, Archwilio Cymru yn amgáu diweddariad Chwarter 1
Archwilio Cymru ar waith y cyrff adolygu (Atodiad 1) ac adroddiad cenedlaethol
‘Taliadau Uniongyrchol ar gyfer Gofal Cymdeithasol i Oedolion’ (Atodiad 2).
Croesawyd Alan
Hughes (Archwilio Cymru) i’r cyfarfod, a manylodd ar gynnwys adroddiad Chwarter
1.
Gwahoddwyd cwestiynau a sylwadau gan yr
aelodau. Yn ystod y drafodaeth, codwyd y
materion a ganlyn:-
·
Mewn ymateb i gwestiwn, cadarnhawyd mai yn 2023 y byddai’r
adroddiad terfynol ar y gwaith Sicrwydd ac Asesu Risg (tudalen 114 o’r rhaglen)
yn barod. Eglurwyd bod yna 2 elfen i’r
gwaith, sef ystyried yr elfennau er sicrwydd a’r mannau lle mae’r risg yn
bodoli. Fel arfer, roedd y gwaith yn
cael ei grynhoi o gwmpas Rhagfyr / Ionawr cyn trafod gyda’r cynghorau
ynglŷn â lle mae’r budd mwyaf i fod yn siapio cynllun lleol y flwyddyn i
ddod, a’r siapio yna oedd wedi helpu dylanwadu’r cynllun archwilio ar gyfer
eleni. Gan hynny, wrth edrych ar
faterion fel Gofal heb ei Drefnu, Digidol ac Adolygiad o Effethiolrwydd
Craffu ddaeth allan o’r gwaith y llynedd, byddai’r archwilwyr yn mynd drwy’r
drefn eto o asesu sicrwydd a risg ac yn ceisio dod i gasgliad ynglŷn â lle
mae’r elfennau sicrwydd. Roedd yna
ychydig o risg yn bodoli hefyd, a gallai’r risg fod yn genedlaethol, yn
rhanbarthol neu’n lleol. Byddai’r gwaith
yn digwydd drwy gydol y flwyddyn, gan edrych ar y sefyllfa ariannol tuag at
ddiwedd y flwyddyn pan fyddai’r cyfrifon wedi’u drafftio, fel bod modd tynnu’r
ffigurau ohonynt. Dyna un o’r darnau
gwaith oedd ar y gweill ar hyn o bryd, sef edrych ar y patrwm ariannol yn y
cynghorau.
·
Gan gyfeirio at waith sy’n digwydd dros gyfnod mwy
hir-dymor, holwyd a oedd yna unrhyw negeseuon interim fyddai’n gallu helpu’r
pwyllgor gyda’i waith, yn hytrach nag aros tan ddiwedd y broses. Mewn ymateb, nodwyd bod argymhelliad yn yr
adroddiad Taliadau
Uniongyrchol ar gyfer Gofal Cymdeithasol i Oedolion ynglŷn â data, a bod
cyfeiriad yn y 4 adroddiad diwethaf a baratowyd gan Archwilio Cymru yng
Ngwynedd at well defnydd o ddata. Cafwyd
adroddiad yn edrych ar y drefn reoli perfformiad ac roedd cyfeiriad yno at
ddefnydd o ddata yn hybu gwneud penderfyniadau, ac ati, fel rhan o edrych ar
sut mae argymhellion yn deillio o archwiliad allanol, ac ati, yn cael eu
cwblhau. Roedd yna adroddiadau rheolaidd
hefyd yn diweddaru’r pwyllgor ar yr ymateb i’r argymhellion. Nid oedd yn debygol y byddai’r data yn symud
oddi ar y radar yn fuan iawn a chredid bod angen gwneud y defnydd gorau ohono i
wneud penderfyniadau.
·
Mewn ymateb i gwestiwn, eglurwyd bod yr Adolygiad o
Effeithiolrwydd Craffu yn ddarn o waith lleol, er ei fod yn bwnc oedd yn codi
mewn cynghorau eraill hefyd, a diau y byddai yna enghreifftiau o waith tebyg ar
gael ar safle we Archwilio Cymru gan ei fod yn destun sy’n cael ei archwilio o
dro i dro yn y cynghorau.
·
Holwyd a fyddai’n addas i’r pwyllgor hwn weld yr
adroddiad terfynol ynglŷn â’r adolygiad craffu. Mewn ymateb, eglurwyd bod hyn yn syrthio i’r
ardal lwyd rhwng yr hyn sy’n fater archwilio a risg a llywodraethu a’r hyn sy’n
fater craffu pur. Fodd bynnag, roedd gan
y pwyllgor hwn rôl statudol o gadw trosolwg o sut mae’r Cyngor yn cael ei redeg
a chredid bod edrych ar sut mae’r trefniadau craffu yn gweithio yn disgyn i
mewn i’r categori llywodraethu, ac felly o fewn sgôp y pwyllgor. Pwysleisiwyd hefyd mai rôl y pwyllgor hwn
fyddai bodloni ei hun bod gan y Cyngor drefniadau priodol mewn lle i ymateb i’r
prif negeseuon a’r argymhellion, yn hytrach na chraffu’r adroddiad.
Yna gosododd Alan
Hughes (Archwilio Cymru) y cyd-destun i’r adroddiad ‘Taliadau Uniongyrchol ar
gyfer Gofal Cymdeithasol i Oedolion’ a manylodd yr Uwch Reolwr Busnes ymhellach
ar gynnwys yr adroddiad.
Gwahoddwyd cwestiynau a sylwadau gan yr
aelodau. Yn ystod y drafodaeth, codwyd y
materion a ganlyn:-
·
Gan gyfeirio at dudalen 158 o’r rhaglen, lle mae’r
tabl arddangosydd 4 yn cymharu blynyddoedd 2016/17 gyda 2018/19, sylwyd bod
Gwynedd yn un o’r 5 awdurdod welodd y gostyngiad mwyaf yn y ganran o bobl oedd
yn derbyn taliadau uniongyrchol. Holwyd
sut roedd hyn yn cymharu gyda’r blynyddoedd ers hynny, a gofynnwyd hefyd a oedd
gweithwyr cymdeithasol yn gwneud digon i dynnu sylw pobl at y ddarpariaeth. Mewn ymateb, nodwyd bod y niferoedd wedi aros
yn eithaf sefydlog yn ystod y cyfnod Cofid, yn bennaf, mae’n debyg, oherwydd
bod pobl yn teimlo nad oedd hyn yn rhywbeth ychwanegol y byddent yn dymuno ei
gymryd ymlaen yn ystod y cyfnod. Fodd
bynnag, roedd angen cadw trac ar y ffigurau, gan dyfu’r gwasanaeth dros y
blynyddoedd nesaf. Eglurwyd bod llawer o
gynghorau wedi mewnoli’r tîm sy’n rheoli’r taliadau uniongyrchol, a thros y
misoedd nesaf, byddai’r Cyngor hwn yn edrych ar opsiynau gwahanol, megis
mewnoli’r gwasanaeth neu basio’r gwasanaeth ymlaen i gomisiynydd allanol. O ran y pwynt ynglŷn â gweithwyr
cymdeithasol, nodwyd bod hynny’n amrywio ac yn ddibynnol ar hyder y gweithiwr
cymdeithasol i hyrwyddo’r taliadau fel opsiwn.
Nodwyd hefyd mai un o flaenoriaethau’r gwasanaeth dros yr wythnosau
nesaf fyddai darparu gwybodaeth a hyfforddiant i’r gweithwyr cymdeithasol fel
eu bod yn hollol hyderus o ran hyrwyddo’r ddarpariaeth fel opsiwn, ac yn gallu
ymateb i unrhyw gwestiynau neu bryderon.
Awgrymwyd hefyd y gellid codi hyder y gweithwyr cymdeithasol drwy roi’r
cyfle iddynt weld sut mae timau eraill yn gweithredu, e.e. timau o Ynys Môn
sy’n gweithio o Ysbyty Gwynedd.
·
Cyfeiriwyd at y ffeithiau allweddol ar dudalen 133
o’r rhaglen, sy’n nodi bod y gyfran o oedolion a oedd yn derbyn gwasanaethau
gofal cymdeithasol trwy Daliadau Uniongyrchol yn 2018-19 yn amrywio o 1.6%
(137) yng Ngwynedd i 12.9% (336) yng Ngheredigion, a holwyd a oedd y ffigwr
wedi newid yn sylweddol erbyn hyn. Mewn
ymateb, nodwyd bod gan Wynedd 198 o unigolion yn derbyn y taliad bellach, yn
cynnwys unigolion a phlant. Gan hynny,
roedd y ffigwr wedi cynyddu ers 2018/19, ond ddim cymaint ag y dymunid.
·
Holwyd
a oedd cleifion sy’n derbyn taliadau uniongyrchol yn ei chael yn anodd cael
pobl i ofalu amdanynt, ac ai dyma’r rheswm pam bod y niferoedd yn isel yng
Ngwynedd? Mewn ymateb, cadarnhawyd bod
hynny’n broblem ar hyn o bryd. Nodwyd,
mewn siroedd eraill, bod yna unigolion yn gweithio i gwmnïau neu i’r cyngor
lleol ac yn gweithio i unigolion sy’n derbyn taliadau uniongyrchol yn ystod y
nos. Roedd angen edrych yn fwy manwl ar
yr opsiwn hwn, ond yn sicr, roedd diffyg cymorthyddion
yn broblem ar hyn o bryd, ac yn debygol o roi pobl i ffwrdd os ydyn nhw’n
edrych i mewn i’r posibilrwydd o daliadau uniongyrchol, ond yn methu cael
gafael ar neb i ofalu amdanynt. Ceisid
cael y cwmni sy’n cael ei gomisiynu gan y Cyngor i gadw cofrestr o gymorthyddion sydd ar gael fel bod unigolion yn gallu cael
gwybodaeth ynglŷn â phwy fyddai’n gallu eu cynorthwyo. Nodwyd hefyd, gan nad oedd yn ofynnol i’r
sawl sy’n cael ei gyflogi fod yn gofrestredig, bod modd i unigolion gyflogi
ffrind neu gymydog, ac roedd hynny weithiau’n cynnig
ateb lle mae’n anodd cael cwmni gofal i roi’r gwasanaeth.
·
Awgrymwyd
gan aelod bod yna naddu ar y wladwriaeth les yma drwy roi cyfrifoldeb ar yr
unigolyn yn hytrach na’r sefydliadau.
·
Holwyd i ba raddau roedd taliadau uniongyrchol yn
caniatáu codi’r gyfradd tâl (sef £12.62 fesul awr) i gymorthyddion
personol, gan fod yna brinder gweithwyr yn y maes yn y sir ac yn ehangach. Mewn ymateb, nodwyd bod Gwynedd yn talu un
o’r cyfraddau uchaf yng Nghymru ar adeg casglu’r data, ond yn amlwg roedd angen
ail-edrych ar y gost uned erbyn hyn gan mai un o’r prif rwystrau i ddod o hyd i
ofalwyr oedd lefel y cyflog.
·
Mewn
ymateb i gwestiwn ynglŷn â’r posibilrwydd o unigolion yn cychwyn micro
fentrau gofal yn lleol, nodwyd bod y Cyngor yn gweithio gyda chwmni o’r enw Community Catalyst ar hyn o
bryd. Bwriad y cwmni oedd sefydlu’r
micro fentrau hyn, a hynny oedd wedi amlygu’r angen i ail-edrych ar y gyfradd
tâl, yn hytrach na bod y sawl sy’n derbyn y taliadau uniongyrchol wedi bod yn
gwneud sylw bod y lefel tâl yn isel.
Felly, os ail-edrych ar y gyfradd, byddai’n rhaid ail-edrych arno ar
gyfer pawb, ac nid ar gyfer y rhai sy’n dod i mewn drwy’r gwaith newydd yn
unig.
Diolchodd y Cadeirydd
i Alan Hughes (Archwilio Cymru) a’r Uwch Reolwr Busnes am gyflwyno’r
adroddiad. Nododd fod y maes yn fwy
cymhleth nag y mae adroddiad ar bapur yn gallu gyfleu, ac awgrymodd fod y
pwyllgor yn annog y swyddogion i fwrw ymlaen gyda’r rhaglen waith.
Nododd Alan Hughes (Archwilio Cymru) fod taliadau uniongyrchol yn faes
i’w hyrwyddo ac anogodd bawb i ddarllen Adran 4 o’r adroddiad, sy’n rhoi blas
o’r math o gefnogaeth mae taliadau uniongyrchol yn gallu rhoi er mwyn gwella
llesiant pobl.
PENDERFYNWYD derbyn yr
adroddiad.
Dogfennau ategol: