Mater - cyfarfodydd

Aelod Cabinet – Y Cynghorydd Cemlyn Williams

Ystyried adroddiad ar yr uchod.

Derbyn yr adroddiad gan nodi’r sylwadau a godwyd, gan hefyd obeithio cael diweddariad ar hyn ymhellach ymlaen yn y flwyddyn.

Croesawyd swyddogion yr Adran Addysg a GwE i’r cyfarfod.

Cyflwynwyd – adroddiad yr Aelod Cabinet Addysg yn manylu ar y Grant Rhaglen Dysgu Carlam a dderbyniwyd gan ysgolion i gynorthwyo disgyblion yn sgil Covid.

Manylodd yr Uwch Reolwr Ysgolion ar gefndir ac amodau’r grant, gan nodi bod cyfanswm yr arian a neilltuwyd i ysgolion Gwynedd tua £2,220,440. 

Cyfeiriodd Arweinydd Craidd – Cynradd, GwE at y Dangosfwrdd Cynllunio Grantiau Rhanbarthol a luniwyd gan GwE er mwyn cefnogi ysgolion i gynllunio’n effeithiol ar gyfer gwario’r grantiau, gan hefyd roi trosolwg o’r cynlluniau ysgolion cynradd.  Yna rhoddodd Arweinydd Craidd – Uwchradd, GwE drosolwg o’r cynlluniau ysgolion uwchradd.

Rhoddwyd cyfle i’r aelodau ofyn cwestiynau a chyflwyno sylwadau.

Awgrymwyd, unwaith y bydd yr ysgolion wedi cael cyfle i ddefnyddio’r grant yn llawn, y byddai’n fuddiol derbyn crynodeb o farn penaethiaid, athrawon a disgyblion sydd wedi elwa o’r gefnogaeth ychwanegol, fel bod modd mesur effaith y grant.  Awgrymwyd hefyd y byddai’n fuddiol cael crynodeb o’r arferion da a danlinellwyd gan Arweinyddion Craidd – GwE.

Mewn ymateb, eglurwyd bod disgwyl i’r penaethiaid gyflwyno gwybodaeth i’r Adran Addysg a GwE yn nhymor yr hydref am effaith y grantiau, a gellid dod â hynny gerbron y craffwyr ar yr adeg hynny.  Nodwyd hefyd bod Llywodraeth Cymru yn awyddus i gael enghreifftiau o’r arferion da y cyfeiriwyd atynt fel bod modd eu rhannu’n genedlaethol.

I gloi, pwysleisiodd yr Aelod Cabinet Addysg bwysigrwydd sicrhau cysondeb o ran y ddarpariaeth ar draws y sir.  Mynegodd ei werthfawrogiad o’r gwaith a gyflawnwyd, ond cytunodd nad oedd GwE na’r Adran mewn sefyllfa i roi diweddariad llawn ar hyn o bryd.  Nododd ymhellach ei fod yn ymwybodol o’r gweithgareddau sydd wedi mynd ymlaen, a bod rhannu arferion da yn elfen bwysig iawn o hyn.

PENDERFYNWYD derbyn yr adroddiad gan nodi’r sylwadau a godwyd, gan hefyd obeithio cael diweddariad ar hyn ymhellach ymlaen yn y flwyddyn.