Mater - cyfarfodydd

I gyflwyno Cynllun Archwilio Manwl ar gyfer Cyd-Bwyllgor Bwrdd Uchelgais Economaidd Gogledd Cymru a ddarparwyd gan Archwilio Cymru.

Derbyniwyd adroddiad Archwilio Cymru a oedd yn amlygu cynllun archwilio’r Bwrdd Uchelgais ar gyfer 2024.

Cyflwynwyd yr adroddiad gan gynrychiolydd Archwilio Cymru.

PENDERFYNWYD

Derbyniwyd adroddiad Archwilio Cymru a oedd yn amlygu cynllun archwilio’r Bwrdd Uchelgais ar gyfer 2024.

RHESYMAU DROS Y PENDERFYNIAD

Archwilio datganiadau ariannol Cyd-bwyllgor Bwrdd Uchelgais Economaidd Gogledd Cymru i sicrhau y rhoddir cyfrif priodol am arian cyhoeddus.

Rhaid i’r Cyd-bwyllgor roi trefniadau ar waith i gael gwerth am arian am yr Adnoddau y mae’n eu defnyddio, a rhaid i’r Archwilydd Cyffredinol fod wedi’i fodloni ei fod yn gwneud hyn.

TRAFODAETH

Tywyswyd drwy Gynllun Archwilio Manwl 2023-24 gan amlinellu’r ffi, risgiau cydnabydiedig, gwybodaeth am y tîm archwilio ac yr amser a gymerwyd i gwblhau’r archwiliad.

Cyhoeddwyd bod y lefel materol wedi ei nodi’n £83,000. Eglurwyd bod y ffigwr hwn wedi ei gyfrifo drwy ganfod 2% (canran perthnasedd) o’r gwariant gros ar hyd y flwyddyn ariannol 2023-24 (£4.159 miliwn). Nodwyd bod y ffi hwn yn uwch na’r flwyddyn flaenorol oherwydd cynnydd mewn gwariant gros. Ymhelaethwyd bod lefel perthnasedd is wedi ei bennu ar gyfer rhai meysydd o’r cyfrifon oherwydd gallent fod yn bwysicach i ddefnyddwyr y cyfrifon. Eglurwyd mai’r meysydd hynny yw ‘Tâl uwch swyddogion’ ac ‘Datgeliadau partïon cysylltiedig’.

Tynnwyd sylw at un risg sylweddol sydd wedi cael ei nodi yn dilyn asesiad o risg cynhenid. Cadarnhawyd mai’r risg yw y gall Rheolwr ddi-ystyrru rheolaethau. Esboniwyd bod y risg wedi ei nodi ar gyfer Arddangosyn 1: risgiau sylweddol i ddatganiadau ariannol, ac ei fod yn cael ei nodi ym mhob cynllun archwilio ar gyfer pob Corff yng Nghymru. Pwysleisiwyd nad yw hwn yn risg sydd wedi cael ei nodi ar gyfer y Bwrdd hwn yn unig. Sicrhawyd bydd Archwilio Cymru yn sicrhau bod eu gweithdrefnau yn ymateb i’r risg hwn.

Esboniwyd bod ‘Prisio rhwymedigaeth net cronfa bensiwn’ wedi cael ei nodi fel risg o fewn Arddangosyn 2: meysydd eraill y canolbwyntir arnynt, fel Risg Archwilio. Nodwyd bod y risg hwn yn gyffredinol ei natur ac bydd i’w weld mewn nifer o gynlluniau archwilio diweddar. Pwysleisiwyd nad yw’r risg hon wedi cael ei nodi ar gyfer  Bwrdd hwn yn unig.

Manylwyd ar amserlen yr archwiliad gan nodi bod y gwaith Cynllunio Archwilio Manwl wedi ei gwblhau ym mis Gorffennaf 2024 ac bu i’r gwaith archwilio gael ei gyflawn ym mis Awst 2024. Nodwyd y bwriedir cyflwyno adroddiad pellach i’r Bwrdd ym mis Tachwedd.

Amlygwyd bod ffioedd ar gyfer 2024-25 wedi cynyddu 6.4% o ganlyniad i chwyddiant. Amcangyfrifwyd bydd cyfamswm ffioedd archwilio yn £26,754 gan bwysleisio bydd ad-daliad yn cael ei gyflwyni i’r Bwrdd os bydd y gwir ffi yn is, gan nad oes modd i Archwilio Cymru wneud elw.

Diolchwyd i’r swyddogion sydd wedi bod yn cydweithio gydag Archwilio Cymru er mwyn ymateb i unrhyw ymholiadau drwy gydol y broses archwilio.