Mater - cyfarfodydd

Claire Incledon (Dirprwy Swyddog Monitro) i gyflwyno’r adroddiad.

I adolygu’r Cylch Gorchwyl ar gyfer yr Is-bwyllgor Trafnidiaeth Strategol.

Mabwysiadwyd y Cylch Gorchwyl.

Cyflwynwyd yr adroddiad gan y Dirprwy Swyddog Monitro.

PENDERFYNIAD

Mabwysiadwyd Y Cylch Gorchwyl.

RHESYMAU DROS Y PENDERFYNIAD

Rhaid i’r Is-bwyllgor weithredu’r rheolau a’r gweithdrefnau hynny fel y’u mabwysiadir gan y CBC ac a nodir yn y Cylch Gorchwyl - dyma’r pwerau sy’n cael eu dirprwyo i’r Is-bwyllgor. Rhaid i unrhyw ddiwygiad i’r telerau hyn gael eu cymeradwyo gan y CBC.

TRAFODAETH

Adroddwyd y bu i Gyd-bwyllgor Corfforedig y Gogledd sefydlu’r Is-bwyllgor Trafnidiaeth Strategol i gyflawni’r swyddogaeth o ddatblygu a chynhyrchu Cynllun Trafnidiaeth Rhanbarthol a pholisïau cysylltiedig.

Cadarnhawyd mai rôl yr Is-bwyllgor hwn yw datblygu polisïau rhanbarthol ar y cyd gyda’r Awdurdodau Lleol a phartneriaid. Nodwyd bod yr Is-bwyllgor hwn yn rhoi cyngor strategol i’r Cyd-bwyllgor wrth ddatblygu a mabwysiadu Cynllun Trafnidiaeth Rhanbarthol.

Tywyswyd yr Aelodau drwy’r Cylch Gorchwyl gan gyfeirio at y ddeddfwriaeth berthnasol megis Adran 109 Deddf Trafnidiaeth 2000, Rheoliadau Cyd-bwyllgor Corfforedig (Swyddogaethau Trafnidiaeth)(Cymru) a Rhan 5 Deddf Llywodraeth Leol ac Etholiadau (Cymru) 2021.

Eglurwyd bod naw prif agwedd o rôl yr Is-bwyllgor hwn, gan fanylu ar y rolau creiddiol, sef:

·       Gwneud argymhellion i’r Cyd-bwyllgor Corfforedig ar gymeradwyo ac adolygu Cynllun Trafnidiaeth Rhanbarthol a’i gyflwyno i Weinidogion Cymru i’w gymeradwyo.

·       Gwneud argymhellion i’r Cyd-bwyllgor Corfforedig ar bolisïau i’w gweithredu gan yr awdurdodau trafnidiaeth leol yn ei ardal o Strategaeth Drafnidiaeth Cymru.

·       Cynghori a gwneud argymhellion ar wasanaeth trafnidiaeth strategol integredig a chysylltiedig yn y Gogledd, drwy fonitro ac adolygu Cynllun Trafnidiaeth Rhanbarthol.

Pwysleisiwyd bod rôl yr Is-bwyllgor yn strategol ei natur, gan ei fod yn cydlynu gweithgarwch Awdurdodau Lleol a phartneriaid eraill fel y byddai dull rhanbarthol strategol yn ei le yn y maes polisi perthnasol.

Nodwyd bod gan yr Is-bwyllgor gyfrifoldebau i reoli prosiectau a rhaglenni. Esboniwyd bydd y rôl hon yn cael ei gyflawni drwy gydlynu, cynllunio a datblygu’r Rhaglenni prosiectau perthnasol a chyflwyno argymhellion i’r Cyd-bwyllgor Corfforedig. Ymhelaethwyd ar y cyfrifoldeb i fonitro ac adolygu lefel a defnydd adnoddau gan gynnwys staff, gan gyfeirio unrhyw argymhellion i’r Cyd-bwyllgor Corfforedig.

Cyhoeddwyd bydd yr Is-bwyllgor Trafnidiaeth Strategol yn paratoi adroddiad chwarterol ar ei waith i’r Cyd-bwyllgor Corfforedig. Eglurwyd bod angen i’r adroddiadau hyn gynnwys:

·       Cynnydd ar weithredu’r Cynllun Trafnidiaeth Rhanbarthol yn cynnwys Rhaglenni a Phrosiectau unigol.

·       Perfformiad Ariannol y Pwyllgor

·       Datblygiadau sydd ar y gweill