Rhaglen

Derbyn unrhyw ymddiheuriadau am absenoldeb.

Bydd y Cadeirydd yn cynnig y dylid llofnodi cofnodion y Cyfarfod Blynyddol o’r Cyngor a gynhaliwyd ar 2 Gorffennaf, 2026 fel rhai cywir.

Derbyn unrhyw ddatganiadau o fuddiant personol.

Derbyn unrhyw gyhoeddiadau gan y Cadeirydd.

Nodi unrhyw eitemau sy’n fater brys ym marn y Cadeirydd fel y gellir eu hystyried.

Ystyried unrhyw gwestiynau y rhoddwyd rhybudd priodol ohonynt o dan Adran 4.18 o’r Cyfansoddiad.

Cyflwyno adroddiad yr Aelod Cabinet dros Economi a Chymuned.

Cyflwyno adroddiad Cadeirydd y Panel Strategol Diogelu.

Cyflwyno Adroddiad Blynyddol Craffu.

Yn unol â’r Rhybudd o Gynnig a dderbyniwyd dan Adran 4.19 o’r Cyfansoddiad, bydd y Cynghorydd Cai Larsen yn cynnig fel a ganlyn:-

Mae’r Cyngor hwn:

Yn nodi’r cynnydd yn nifer y cartrefi modur a faniau gwersylla sy’n defnyddio lleoliadau ar draws Gwynedd i barcio ac aros dros nos, gan gynnwys cilfannau, meysydd parcio, ardaloedd arfordirol a mannau prydferth;

Yn cydnabod y cyfraniad pwysig y gall ymwelwyr sy’n defnyddio cartrefi modur a faniau gwersylla ei wneud i economi Gwynedd, ac yn croesawu ymwelwyr sy’n defnyddio cyfleusterau priodol ac sy’n parchu ein cymunedau a’n hamgylchedd;

Yn mynegi pryder, fodd bynnag, ynghylch achosion lle mae cerbydau’n aros am gyfnodau estynedig mewn mannau nad ydynt wedi eu bwriadu ar gyfer hynny, gan feddiannu mannau parcio, achosi problemau i drigolion a defnyddwyr eraill, a rhoi pwysau ar rai o ardaloedd mwyaf sensitif a phoblogaidd y sir;

Yn nodi bod y Cyngor eisoes wedi sefydlu safleoedd Arosfannau pwrpasol ar gyfer cartrefi modur, ond bod problemau parcio ac aros dros nos amhriodol yn parhau mewn nifer o leoliadau;

Yn cydnabod bod cyfyngiadau ar gapasiti ac adnoddau dynol y Cyngor yn gallu ei gwneud yn anodd gweithredu ym mhob lleoliad ar yr un pryd, ond nid yw’n derbyn y dylai diffyg capasiti i weithredu ym mhobman olygu na ellir mynd i’r afael â phroblemau amlwg a pharhaus mewn lleoliadau penodol.

Felly, mae’r Cyngor yn galw ar y Cabinet a’r Aelod Cabinet perthnasol i fynd i’r afael â’r problemau sy’n deillio o barcio ac aros dros nos amhriodol gan gartrefi modur a faniau gwersylla ar draws Gwynedd, ac i ystyried pa gamau y gellir eu cymryd i ddod â gwell rheolaeth ar y sefyllfa.

Yn unol â’r Rhybudd o Gynnig a dderbyniwyd dan Adran 4.19 o’r Cyfansoddiad, bydd y Cynghorydd Paul Rowlinson yn cynnig fel a ganlyn:-

Mae’r Cyngor

• yn pryderu am y nifer o blant a phobl ifanc sy’n reidio e-sgwteri ar balmentydd a ffyrdd cyhoeddus;
• yn credu bod hyn yn peryglu diogelwch y rhai sy’n eu defnyddio a diogelwch cerddwyr, yn enwedig y rhai sydd â nam ar eu golwg;
• yn nodi bod e-sgwteri yn dod o fewn y diffiniad cyfreithiol o ‘gerbyd modur’. O ganlyniad, maent yn destun yr un gofynion ag sy’n ofynnol ar gyfer cerbydau modur eraill, megis eu trwyddedu a’u hyswirio a’r angen i fod â thrwydded yrru i’w defnyddio ar ffyrdd cyhoeddus. O ganlyniad, ni ellir eu defnyddio yn gyfreithlon heblaw ar dir preifat gyda chaniatâd y tirfeddiannwr;
• yn nodi bod e-sgwteri yn cael eu treialu gan lywodraeth y DG ac fe’u caniateir ar ffyrdd o fewn rhai ardaloedd ond nid yw’r un o’r rhain o fewn Gwynedd;
• yn credu nad yw llawer o rieni a phobl ifanc yn sylweddoli bod defnyddio e-sgwteri ar ffyrdd cyhoeddus yn anghyfreithlon ac y gall yr heddlu atafaelu’r e-sgwter a chyflwyno adroddiad trosedd traffig sef ‘gyrru cerbyd modur heb yswiriant trydydd parti’, gan arwain at ddirwy o £300 a 6 phwynt ar drwydded yrru’r gyrrwr.

Er mwyn mynd i’r afael â’r broblem hon, mae’r Cyngor yn galw ar Lywodraeth Cymru a Llywodraeth y DG i ystyried pa gamau y gallent eu cymryd / pa reoliadau y gallent eu cyflwyno, er mwyn mynd i’r afael â’r broblem.

Llythyr gan Lywodraeth Cymru mewn ymateb i Rybudd o Gynnig y Cynghorydd Huw Rowlands i gyfarfod 2 Gorffennaf 2026 o’r Cyngor ynglŷn â Bwrdd Iechyd Prifysgol Betsi Cadwaladr.