Rhaglen, penderfyniadau a chofnodion

I dderbyn unrhyw ymddiheuriadau am absenoldeb

Dim i’w nodi

I dderbyn unrhyw ddatganiad o fuddiant personol

Dim i’w nodi

Nodi unrhyw eitemau sy’n fater brys ym marn y cadeirydd fel y gellir eu hystyried.

Dim i’w nodi

Bydd y Cadeirydd yn cynnig y dylid llofnodi cofnodion cyfarfod o’r pwyllgor hwn a gynhaliwyd 14 Hydref 2020 fel rhai cywir  

Bu i’r Cadeirydd dderbyn cofnodion y cyfarfod a gynhaliwyd ar 14 Hydref 2020 fel rhai cywir.

I gymeradwyo cyllideb ar gyfer y flwyddyn ariannol 2021/22 ar gyfer yr Uned Gweinyddu Pensiynau a’r Uned Buddsoddi.

Cymeradwyo Cyllideb ar gyfer y flwyddyn ariannol 2021/22 ar gyfer yr Uned Gweinyddu Pensiynau a’r Uned  Buddsoddi

Cyflwynwyd adroddiad gan y Rheolwr Buddsoddi yn ymwneud a chais i’r Pwyllgor gymeradwyo cyllideb ar gyfer y flwyddyn ariannol 2021–2022, ar gyfer yr Uned Gweinyddu Pensiynau a’r Uned Buddsoddi.

Amlygwyd mai 2019/2020 oedd y tro cyntaf i’r gyllideb ar gyfer yr Unedau gael ei chyflwyno i’r Pwyllgor Pensiynau am gymeradwyaeth a bod bwriad erbyn hyn i gyflwyno’r wybodaeth yn flynyddol. Addaswyd cyllideb 2019 /20 yn unol ag addasiadau i strwythur staff yr Uned Gweinyddu Pensiynau a’r Uned Buddsoddi - man addasiadau yn unig oedd i gyllideb 2021/22 gyda chyllidebau sylfaenol yn parhau'r un fath.

PENDERFYNWYD cymeradwyo Cyllideb ar gyfer y flwyddyn ariannol 2021/22 ar gyfer yr Uned Gweinyddu Pensiynau a’r Uned  Buddsoddi

I ystyried adroddiad y Rheolwr Buddsoddi

Derbyn yr adroddiad er gwybodaeth

Cyflwynwyd, er gwybodaeth adroddiad yn amlygu gwir weithgarwch Rheolaeth Trysorlys y Cyngor yn ystod y flwyddyn ariannol gyfredol. Amlygwyd, yn ystod y chwe mis rhwng y 1af o Ebrill a 30 Medi 30ain 2020 bod gweithgarwch benthyca’r Cyngor wedi aros o fewn cyfyngiadau a osodwyd yn wreiddiol ac nad oedd unrhyw fanciau lle'r oedd y Cyngor wedi adnau arian wedi methu ad-dalu. Ategwyd yr amcangyfrifir bod incwm buddsoddi’r Cyngor yn is nag incwm disgwyliedig cyllideb 2020/ 21.

Yng ngoleuni’r argyfwng pandemig a’r tebygolrwydd o alwadau annisgwyl ar y llif arian, amlygwyd bod y Cyngor wedi cadw mwy o arian parod ar fyr rybudd nag sy’n arferol. Cafodd arian parod hylif ei arallgyfeirio dros sawl gwrth bartïon a Chronfeydd Marchnad Arian i reoli risgiau credyd a hylifedd.

Eglurwyd bod £10m o fuddsoddiadau’r Cyngor mewn cronfeydd eiddo ac ecwiti cyfun strategol sydd yn cael eu rheoli yn allanol lle mae diogelwch a hylifedd tymor byr yn llai o ystyriaeth. O ganlyniad gwireddir yr amcanion drwy incwm refeniw rheolaidd a sefydlogrwydd prisiau hirdymor.

Adroddwyd bod y Cyngor yn mesur perfformiad ariannol ei weithgareddau rheoli trysorlys o ran ei effaith ar y gyllideb refeniw a’i berthynas â meincnod cyfraddau llog. Nodwyd bod Cyfradd Banc, a oedd yn 0.75% ym mis Chwefror, bellach yn 0.1%, ond bydd y llog a enillir o farchnadoedd arian dyddiedig byr yn sylweddol is. Tynnwyd sylw at y dangosyddion cyfraddau llog ac amlygwyd nad oedd y dangosydd risg ‘y terfyn uchaf ar effaith refeniw blwyddyn o gynnydd o 1% mewn cyfraddau llog’ yn cydymffurfio oherwydd effaith cyfraddau llog gwael.

Gyda rhagolygon gwan ac ansefydlog, adroddwyd bod y Cyngor yn buddsoddi  cymaint ag y gallent o fewn cyfnod heriol; yn parhau i wneud eu gorau i geisio enillion drwy wasgaru risg, ond hefyd yn gweithredu yn ofalus yn unol â chyngor Arlingclose.

Diolchwyd am yr adroddiad.

Mewn ymateb i gwestiwn ynglŷn â’r rhagolygon, amlygwyd bod yr adroddiad wedi ei ysgrifennu ym mis Medi 2020

PENDERFYNWYD derbyn yr adroddiad er gwybodaeth

Gofyn i’r Pwyllgor Pensiynau gytuno i symud cronfa graidd Baillie Gifford i gronfa Baillie Gifford Global Alpha Paris Aligned.

Cymeradwyo symud taliadau cyfredol Cronfa Graidd Baillie Gifford i Gronfa Alpha Paris Aligned Baillie Gifford sydd yn rhan o Gronfa Global Growth Partneriaeth Cymru yn unol â’r drafodaeth yn y Panel Buddsoddi ddiweddaraf

Cyflwynwyd adroddiad gan y Rheolwr Buddsoddi i geisio cymeradwyaeth y Pwyllgor i gytuno i symud cronfa graidd Baillie Gifford i gronfa Baillie Gifford Global Alpha Paris Aligned. Atgoffwyd yr Aelodau bod Baillie Gifford wedi cyflwyno gwybodaeth ar y Gronfa Alpha Paris Aligned mewn cyfarfod o’r Panel Buddsoddi 14 Hydref 2020. Eglurwyd bod y Gronfa Global Alpha Paris Aligned yn amrywiad carbon isel o’r model craidd ac yn cyd-fynd ag amcanion Cytundeb Paris ac egwyddorion buddsoddi Cronfa Bensiwn Gwynedd.

Ategwyd y byddai rhaid i’r holl gronfeydd pensiwn cyfansoddol sydd yn rhan o’r Gronfa Global Growth gytuno i’r trosglwyddiad. Unwaith bydd y cronfeydd wedi gwneud eu penderfyniad yn lleol, bydd penderfyniad swyddogol yn cael ei wneud gan y Cyd- bwyllgor. Adroddwyd bod hwn yn gam cadarnhaol ymlaen ac y byddai mwy o wybodaeth i ddilyn am welliannau pellach.

Diolchwyd am yr adroddiad

PENDERFYNWYD cymeradwyo symud taliadau cyfredol Cronfa Graidd Baillie Gifford i Gronfa Alpha Paris Aligned Baillie Gifford sydd yn rhan o Gronfa Global Growth Partneriaeth Cymru yn unol â’r drafodaeth yn y Panel Buddsoddi ddiweddaraf

Adrodd ar gynnydd yn erbyn amcanion cyfredol ac adolygu amcanion y dyfodol

Derbyn yr adroddiad a chymeradwyo’n ffurfiol amcanion osodwyd eisoes ar gyfer ymgynghorwyr buddsoddi’r Gronfa.

Cyflwynwyd adroddiad gan y Rheolwr Buddsoddi yn adrodd ar y cynnydd yn erbyn yr amcanion cyfredol ynghyd a chais i’r Pwyllgor adolygu a chymeradwyo’r amcanion ar gyfer 2020/21. Adroddwyd, yn dilyn adolygiad o’r marchnadoedd ymgynghori buddsoddi a rheoli ymddiriedol bu i’r Awdurdod Cystadleuaeth a Marchnadoedd nodi’r angen i Ymddiriedolwyr Cronfeydd Pensiwn osod amcanion i’w ymgynghorwyr buddsoddi gan nodi yn glir yr hyn ddisgwylir ganddynt.

Cyfeiriwyd at yr amcanion cyfredol ynghyd a’r cynnydd a wnaed yn erbyn yr amcanion hynny yn ystod 2019/20. Amlygwyd bod yr amcanion wedi bod yn weithredol ers Rhagfyr 2019, ond nad oeddynt wedi eu derbyn yn ffurfiol gan y Pwyllgor er i’r datganiad cydymffurfio fod wedi ei lofnodi gan Gadeirydd y Pwyllgor erbyn y dyddiad cau gofynnol (7fed o Ionawr 2021).

Adroddwyd bod Hymans yn cyflawni gwaith da, yn darparu adroddiadau cynhwysfawr ar gyfer y paneli buddsoddi, yn cynnig cyngor ymarferol, ymatebion a gohebiaeth amserol  ac yn perfformio yn unol â’r amcanion.

Diolchwyd am yr adroddiad a gwnaed sylw y bydd disgwyl i’r amcanion gael eu cyflwyno yn flynyddol i’r Pwyllgor Pensiynau yn unol â gofynion y Ddeddf.

Cymerwyd y cyfle i ddiolch i Mr Paul Potter o gwmni Hymans am ei gyngor a’i gefnogaeth i’r Gronfa Bensiwn dros y 12 mlynedd ddiwethaf. Dymunwyd ymddeoliad hapus iddo.

PENDERFYNWYD derbyn yr adroddiad a chymeradwyo’n ffurfiol amcanion a osodwyd eisoes ar gyfer ymgynghorwyr buddsoddi’r Gronfa.

I ystyried adroddiad y Rheolwr Pensiynau

Derbyn yr adroddiad er gwybodaeth

Cyflwynwyd adroddiad, er gwybodaeth gan y Rheolwr Pensiynau yn rhoi diweddariad ar y rheoliadau cyfyngu taliadau ymadael a ddaeth i rym ar y 4ydd o Dachwedd 2020. Tynnwyd sylw yn yr adroddiad at effaith yr addasiadau diweddar ar weithwyr y sector gyhoeddus ac at ddiwygiadau (drafft) pellach mae’r Weinyddiaeth Tai, Cymunedau a Llywodraeth Leol wedi eu cynnig bydd yn debygol o ddod i rym Gwanwyn 2021.

Amlygwyd bod yr addasiadau yn creu dryswch a phwysau gwaith ychwanegol ac mewn ymateb i’r ffactorau cenedlaethol hyn bod darparwr meddalwedd weinyddol y Gronfa yn gorfod diweddaru’r system i gyfrifo’r opsiynau newydd.

Yn ystod y drafodaeth ddilynol nodwyd y sylwadau canlynol:

·         Bod rheoliadau taliadau ymadael yn faes cymhleth a thechnegol iawn

·         Bod y penderfyniad allan o ddwylo’r Awdurdod ac felly dim dewis ar y mater

Mewn ymateb i sylw, na fydd y cap talu ymadael yn gysylltiedig â mynegai, a fydd y cap felly yn debygol o gael ei adolygu, nodwyd na fydd unrhyw addasiad nag adolygiad pellach i hyn.

Mewn ymateb i gwestiwn a fydd modd defnyddio cyfandaliad i osgoi terfyn y cap, nodwyd petai newidiadau pellach i’r rheoliadau yna bydd posib defnyddio’r cyfandaliad i dderbyn lleihad budd-dal

PENDERFYNWYD derbyn yr adroddiad er gwybodaeth

I dderbyn cymeradwyaeth y Pwyllgor i fabwysiadu y Datganiad Polisi Cyfathrebu newydd

Cymeradwyo mabwysiadu'r Datganiad Polisi Cyfathrebu newydd

Cyflwynwyd adroddiad gan y Rheolwr Pensiynau yn gofyn i’r pwyllgor gymeradwyo Datganiad Polisi Cyfathrebu newydd. Eglurwyd bod rhaid  i'r Gronfa ddarparu, cynnal a chyhoeddi Datganiad Polisi Cyfathrebu yn unol â Rheoliad 67 o Reoliadau Gweinyddu Cynllun Pensiwn Llywodraeth Leol (CPLlL). Ategwyd bod rhaid i'r polisi cyfathrebu gael ei adolygu a'i ailgyhoeddi yn dilyn unrhyw newid mewn polisi. Yn dilyn amryw o newidiadau i ddulliau cyfathrebu diweddar diwygiwyd y datganiad i gynnwys dulliau cyfathrebu cyfredol gan ychwanegu defnydd Microsoft Teams, I-Connect a’r adnodd Hunanwasanaeth. Nodwyd nad oedd polisi Gwynedd wedi ei ddiweddaru ers 2010. Cyflwynwyd y datganiad polisi i’r Bwrdd Pensiwn 23.11.20 ac fe addaswyd y polisi yn unol â’u sylwadau.

Mewn ymateb i sylw ynglŷn â chyfathrebu gyda darpar Aelodau, nodwyd mai mater i bob cyflogwr fyddai nodi bod ymaelodi gyda’r cynllun yn un o fuddion y swydd.

Mewn ymateb i gwestiwn, cadarnhawyd bod y datganiad polisi cyfathrebu yn gyson â chanllawiau Polisi Iaith Cyngor Gwynedd

Yn ystod y drafodaeth ddilynol nodwyd y sylw canlynol:

·         Angen rhoi ystyriaeth i ddulliau cyfathrebu gyda darpar gyflogwyr

PENDERFYNWYD cymeradwyo mabwysiadu'r Datganiad Polisi Cyfathrebu newydd