Rhaglen a chofnodion

I ethol Cadeirydd ar gyfer 2021/22

Penderfynwyd ethol y Cynghorydd Aled Evans yn Gadeirydd y Bwrdd ar gyfer 2021-22

Diolchwyd i Mr Osian Richards am ei waith fel Cadeirydd y Bwrdd dros y ddwy flynedd diwethaf ac er y cyfnod covid ei fod wedi gwneud y gwaith mewn modd ymroddgar a chydwybodol.

I ethol Is-gadeirydd ar gyfer 2021 /22

Penderfynwyd ethol Mr Eifion Jones yn Is-Gadeirydd y Bwrdd ar gyfer 2021-22

I dderbyn unrhyw ymddiheuriadau am absenoldeb

Dim i’w nodi

I dderbyn unrhyw ddatganiad o fuddiant personol

Dim i’w nodi

Nodi unrhyw eitemau sy’n fater brys ym marn y cadeirydd fel y gellir eu hystyried.

Dim i’w nodi

Bydd y Cadeirydd yn cynnig y dylid llofnodi cofnodion cyfarfod o’r pwyllgor hwn a gynhaliwyd 19 Ebrill 2021 fel rhai cywir  

Llofnododd y Cadeirydd gofnodion cyfarfod blaenorol y pwyllgor hwn a gynhaliwyd 19 Ebrill 2021 fel rhai cywir.

I ystyried materion yn codi o Pwyllgor Pensiynau 24-06-21

Cyfeiriodd y Cynghorydd Peredur Jenkins (Cadeirydd y Pwyllgor) at  eitem a drafodwyd yn y Pwyllgor (a oedd hefyd wedi ei gynnwys ar raglen y Bwrdd). Mynegodd bod diddordeb cyhoeddus wedi codi ar y mater ‘buddsoddi cyfrifol’ gyda chwestiynau gan etholwyr Môn, Conwy a Gwynedd wedi eu cyflwyno i’r Pwyllgor. Gwahoddwyd yr etholwyr i’r Pwyllgor a rhoddwyd ymateb llawn i’r cwestiynau. Ers y Pwyllgor, nodwyd nad oedd ymateb uniongyrchol wedi ei dderbyn gan yr etholwyr (aelodau o grwp Divest Gwynedd) ond nodwyd eu bod yn cynnal protest fel ymateb i’r ymatebion a gawsant. Nodwyd bod Swyddogion ar ran y Pwyllgor Pensiynau wedi darparu datganiad fel ymateb pellach a’r Pwyllgor yn awyddus i’r Bwrdd drafod yr eitem a chefnogi’r datganiad.

I ystyried yr adroddiad

Cyflwynwyd, er gwybodaeth adroddiad gan y Rheolwr Buddsoddi yn darparu manylion gweithgareddau ariannol y Gronfa Bensiwn yn ystod y flwyddyn a ddaeth i ben Mawrth 31ain 2021. Fel y Swyddog Cyllidol Cyfrifol, nododd y Pennaeth Cyllid ei fod eisoes wedi ardystio’r cyfrifon drafft a bod y cyfrifon bellach yn destun archwiliad sy’n cael ei weithredu gan Archwilio Cymru

Adroddwyd bod y cyfrifon yn dilyn ffurf statudol CIPFA gyda’r canllawiau yn dehongli beth sy’n cael ei gyflwyno yn y cyfrifon. Atgoffwyd yr Aelodau bod cyfrifon y llynedd, wedi eu harwyddo gyda pharagraff ‘emphasis of matter’ oherwydd yr ansicrwydd gyda phrisiadau eiddo. Amlygwyd bod y pedwar Rheolwr Eiddo wedi datgan nad oes ansicrwydd eleni. Tynnwyd sylw at Gyfrif y Gronfa gan nodi blwyddyn arferol i gyfraniadau a buddion heb newid sylweddol. Er hynny, adroddwyd newid sylweddol mewn costau rheoli a chyfeiriwyd at nodyn 12a oedd yn egluro mai cynnydd yn ffioedd perfformiad Ecwiti Preifat (Partners) oedd yn gyfrifol am y cynnydd gyda pherfformiad cryf mewn 3 cronfa yn benodol. (Derbyniwyd eglurhad llawn gan y Rheolwyr pan heriwyd eu ffioedd).

Yng nghyd-destun datganiad asedau net, tynnwyd sylw at y newid yn yr asedau buddsoddi (Nodyn 14a) sydd bellach wedi cyrraedd £2.5 biliwn gyda chynnydd sylweddol ym Mhartneriaeth Pensiwn Cymru wedi i gyfran o Fidelity ac Insight drosglwyddo i’r cronfeydd incwm sefydlog yn ystod y flwyddyn.

Diolchwyd am fanylder yr adroddiad.

Derbyniwyd bod y cynnydd mewn costau wedi eu cyfiawnhau ac mai perfformiad da oedd sail y cynnydd, ond gofynnwyd, beth fyddai yn digwydd petai'r perfformiad yn lleihau? Mewn ymateb nodwyd, ar wahân i berfformiad da, bod crisialu dychweliadau hefyd yn ystyriaeth bwysig a bod gofyn i reolwyr asedau ystyried yr elfen dychweliadau wrth fuddsoddi.

Mewn ymateb i gwestiwn ynglŷn â gosod terfyn ar gyfnodau buddsoddi, nodwyd bod addasu cyfnod buddsoddi ‘listed assets’ yn bosib, ond os nad ydynt wedi eu cofrestru / rhestru yna byddai ystyried gwerthu yn annoeth. Nodwyd bod dyfalbarhau gyda Grŵp Partners yn dderbyniol.

DERBYNIWYD y wybodaeth.

I gymeradwyo’r datganiad ac i’r Cadeirydd lofnodi'r datganiad.

Cyflwynwyd adroddiad gan y Rheolwr Buddsoddi yn diweddaru’r Aelodau o ddiwygiadau i ddatganiad Buddsoddi Cyfrifol y Gronfa. Eglurwyd, ers cyflwyno Datganiad Buddsoddi Cyfrifol ym mis Chwefror 2021, oedd yn darparu safbwynt y Gronfa o ddad-fuddsoddi o danwydd ffosil, bod y sefyllfa yn newid yn ddyddiol ac felly’r datganiad yn debygol o gael ei ddiweddaru a’i gyflwyno yn aml i’r Pwyllgor a’r Bwrdd Pensiwn i’w gymeradwyo.

Diolchwyd am yr adroddiad. Ystyriwyd bod yr addasiadau yn gam pwysig i’r cyfeiriad cywir.

Mewn ymateb i gwestiwn ynglŷn ag awgrym gan Hymans y gall Cronfa Gwynedd osod eu targedau eu hunain, nododd y Pennaeth Cyllid bod rhai Cronfeydd yn gosod targedau eu hunain ond heb ystyried sut i’w cyrraedd. Amlygodd bod Cronfa Gwynedd wedi gwneud y penderfyniad o wir weithredu yn hytrach na gosod targed ac nad yw peidio cael targed yn golygu dim cynnydd. O ganlyniad, ystyriwyd bod cyfle i ymgyrchwyr ddylanwadu drwy weithredu yn gyfrifol yn hytrach na gosod addewidion gwag. Mewn ymateb i gwestiwn ategol am safbwynt Partneriaeth Pensiwn Cymru, nodwyd bod yr wyth awdurdod o fewn y gronfa o blaid buddsoddi cyfrifol, ond bod pob Cronfa yn gosod cyfeiriad a chyfnod amser / targed unigol.

Yn ystod y drafodaeth ddilynol nodwyd y sylwadau canlynol gan aelodau:

·         Bod cyfleoedd parhaus i’r Gronfa e.e., isadeiledd carbon

·         Gall ymgysylltu a thrafod egwyddorion yn agored gyda chwmnïau arwain at wella sefyllfaoedd i’r dyfodol

·         Dylid manteisio ar ymdrechion Rheolwyr Buddsoddi - e.e., egwyddor o blannu coed yn rhywbeth sydd yn cael ei drafod

·         Awgrym i bob Cronfa sefydlu Grŵp Tasg fyddai’n adrodd a’r gymariaethau

PENDERFYNWYD:

Cymeradwyo’r datganiad

Cadeirydd y Bwrdd, Y Cynghorydd Aled Evans i lofnodi’r datganiad

I hysbysu aelodau’r Bwrdd o berfformiad buddsoddiadau'r gronfa bensiwn

Cyflwynwyd adroddiad gan y Rheolwr Buddsoddi yn hysbysu’r Aelodau o’r gwaith monitro chwarterol (a blynyddol) sydd yn cael ei wneud gan y Panel Buddsoddi ar berfformiad buddsoddiadau’r Gronfa Bensiwn. Adroddwyd bod Cronfa Bensiwn Gwynedd mewn sefyllfa gymharol iach gyda gwerth y gronfa wedi cynyddu yn raddol ers 2011, ond gyda chwymp ar 31 Mawrth 2020 oherwydd effaith pandemig Covid19.

Gwelwyd dychweliadau positif iawn ar fuddsoddiadau ecwiti gyda’r marchnadoedd yn bownsio nôl wedi cwymp chwarter olaf 2019/20 ynghyd a pherfformiad cryf iawn gan gronfeydd Partneriaeth Pensiwn Cymru. Yng nghyd-destun perfformiad Rheolwyr Buddsoddi Eiddo nodwyd bod dychweliadau eiddo wedi bod yn bositif  gydag adferiad yn y gwerthoedd cyfalaf yn adlewyrchu hyder cynyddol buddsoddwyr. Er hynny amlygwyd nad oedd y stryd fawr wedi perfformio cystal oherwydd bod ansicrwydd yn parhau gyda dyfodol siopau a swyddfeydd.

Diolchwyd am yr adroddiad a canmolwyd y ffigyrau

Nododd Cadeirydd y Pwyllgor Pensiynau bod Partneriaeth Pensiwn Cymru yn Uned gref Gymreig, gyda’r Cynghorau yn cydweithio yn dda ymysg ei gilydd. Ategodd bod y perfformiad yn adlewyrchu dychweliadau o fod a dewis ehangach o opsiynau posib.

Ategodd y Pennaeth Cyllid bod y sefyllfa yn un iach a bod y flwyddyn, o ystyried pandemig covid 19, wedi bod yn un llwyddiannus.

PENDERFYNWYD derbyn y wybodaeth

I dderbyn fersiwn terfynol o’r adroddiad blynyddol

Cyflwynwyd adroddiad Cadeirydd y Bwrdd Pensiynau am 2020/21 yn dilyn derbyn sylwadau gan yr Aelodau yn y cyfarfod diwethaf. Atgoffwyd yr Aelodau ei bod yn ofynnol i Gadeirydd y Bwrdd Pensiwn gyflwyno adroddiad blynyddol fel rhan o adroddiad blynyddol y Gronfa Pensiwn ac fel rhan o gyfarfod blynyddol y Gronfa. Nodwyd bod angen cyflwyno fersiwn terfynol o’r adroddiad erbyn 31/07/21.

Eglurwyd bod gosodiad yr adroddiad yn gyfatebol i adroddiad 2019/20 ac yn cynnig datganiadau ffeithiol oedd yn adlewyrchu’r pynciau a drafodwyd.

Diolchwyd am yr adroddiad

PENDERFYNWYD cymeradwyo’r adroddiad

Derbyn adborth gan y Bwrdd ar y Datganiad Polisi Llywodraethu newydd

Cyflwynwyd adroddiad gan y Rheolwr Pensiynau yn amlygu’r gofyn i’r Gronfa gyhoeddi Datganiad Llywodraethu a Chydymffurfio o dan Reoliad 55 Cynllun Pensiwn Llywodraeth Leol 2013 (fel y’i diwygiwyd) gan adolygu’r datganiad hwnnw yn barhaus. Bwriad y datganiad yw nodi Strwythur Llywodraethu'r Gronfa, y cynllun dirprwyo, a'r cylch gorchwyl ar gyfer ei Chyrff Llywodraethol, y Pwyllgor Pensiynau a'r Bwrdd Pensiynau Lleol.

Amlygwyd bod y datganiad cyfredol mewn grym ers 2008 ac wrth baratoi ar gyfer Prosiect Llywodraethu Da Bwrdd Cynghori’r Cynllun a ddaw i rym Ebrill 2022, nodwyd bod y gwasanaeth wedi bod yn adolygu a diweddaru’r datganiad. Eglurwyd bod y prif newidiadau yn cynnwys darparu mwy o wybodaeth am gyfrifoldebau staff y gronfa bensiwn ynghyd a chyflwyno rhan newydd i’r polisi mewn perthynas â rôl a chyfrifoldebau'r Bwrdd Pensiwn.

Diolchwyd am yr adroddiad a chytunwyd bod angen cydymffurfio gyda’r Rheoliadau ac adrodd ar y sefyllfa bresennol.

Mewn ymateb i gwestiwn ynglŷn ag os oedd bwriad agor y Pwyllgor i gynrychiolaeth o aelodau’r Cynllun ( er derbyn bod cyfle i bawb gael mynychu cyfarfod blynyddol y Gronfa nid yw’n fforwm addas ar gyfer gofyn cwestiynau), nododd y Pennaeth Cyllid wrth sefydlu’r Bwrdd Pensiwn bod  bwriad sefydlu fforwm agored, iach  a thryloyw drwy wahodd aelodau o’r Bwrdd fel sylwedyddion i’r Pwyllgor Pensiynau a Chadeirydd y Pwyllgor Pensiynau i’r Bwrdd. Ategwyd bod Partneriaeth Pensiwn Cymru wedi ystyried y sefyllfa ac adroddwyd bod modd ail ymweld ar strwythur ar drothwy Etholiad 2022 ynghyd a chyflwyno rheoliadau newydd tebygol.

PENDERFYNWYD derbyn y wybodaeth

I ddiweddaru’r Bwrdd am wytnwch diogelwch seibr Cyngor Gwynedd

Croesawyd Huw Ynyr - Pennaeth Cynorthwyol Technoleg Gwybodaeth i’r cyfarfod

Cyflwynwyd, er gwybodaeth, adroddiad blaen gan y Rheolwr Pensiynau mewn ymateb i gais gan yr Aelodau am ddiweddariad o wytnwch diogelwch y Cyngor. Eglurwyd, gan mai Cyngor Gwynedd yw awdurdod gweinyddol Cronfa Bensiwn Gwynedd mai’r Adran Technoleg Gwybodaeth y Cyngor sydd yn amlwg yn gofalu a chynorthwyo gyda’r elfen technoleg gwybodaeth. Amlygwyd bod y Cyngor yn cymryd diogelwch seibr o ddifrif a chyfeiriwyd at adroddiad a baratowyd gan Bennaeth Cyllid Cynorthwyol - Technoleg Gwybodaeth (ar gyfer y Pwyllgor Archwilio a Llywodraethu) yn manylu ar y ddarpariaeth sydd mewn lle i liniaru’r risg o ymosodiad seibr.

Trafodwyd y camau hynny sydd yn eu lle i geisio atal ymosodiad seibr ynghyd a’r rhai sydd yn ymateb yn effeithiol i’r risgiau hynny. Cyfeiriwyd at achosion lleol diweddar oedd yn tystiolaethu bod ymosodiadau seibr yn fygythiad realistig ac felly’n herio’r Gwasanaeth Technoleg Gwybodaeth i sicrhau gwytnwch eu hamddiffynfeydd a’u gallu i adfer eu hunain o sefyllfa fregus petai’r amddiffynfeydd hynny yn methu.

Ategwyd bod drwg weithredwyr yn addasu eu dulliau o ymosodiadau seibr yn rheolaidd ac felly’r Cyngor yn adolygu eu mesurau yn gyson gyda chefnogaeth trydydd parti.  Nodwyd bod y Cyngor, yn bresennol, mewn lle da, ond bod elfen o risg yn bodoli bob amser.

Diolchwyd am yr adroddiad

Mewn ymateb i gwestiwn ynglŷn â chynnydd mewn cyfarfodydd rhithiol a sut mae’r adran TG yn sicrhau bod mynychwyr allanol i’r cyfarfodydd  ‘yn saff’, nodwyd bod sawl cymal mewn rhwydwaith yn rhoi gwarchodaeth DMZ (demilitarized zone) sy'n galluogi i sefydliadau amddiffyn eu rhwydweithiau mewnol.

Mewn ymateb i gwestiwn os oes bodolaeth cynllun adfer trychineb, nodwyd bod cynllun yn bodoli a bod y Cyngor hefyd yn rhan o’r Ymddiriedaeth Seibr Hanfodol (Cyber Eessentials Trust) sy’n eu cynorthwyo i warchod y sefydliad rhag ymosodiad seibr. Ategwyd bod  profion treiddiad (penetration tests) hefyd yn cael eu cynnal yn rheolaidd.

Mewn ymateb i gwestiwn os oedd cyllideb ddigonol i amddiffyn rhag ymosodiadau ac a oedd modd gwneud mwy i wella’r sefyllfa, nododd y Pennaeth Cynorthwyol bod cadw ar ben y sefyllfa yn waith llafurus ond bod rhaid cymryd y sefyllfa o ddifrif. Petai buddsoddiad annigonol yn y maes, byddai’ mater yn cael ei amlygu fel risg ac felly’n arwain at gynnal trafodaethau i ganfod penderfyniad o fuddsoddi ymhellach.

 Yn ystod y drafodaeth ddilynol nodwyd y sylwadau canlynol gan aelodau:

·         Pwysig cadw llygad ar sefyllfa sy’n ddibynnol ar arbenigedd yn y maes

·         Risg debygol fyddai colli arbenigedd

·         Angen sicrhau bod pobl allweddol yn aros yng Ngwynedd

Penderfynwyd:

Derbyn y wybodaeth

Diolch i’r Adran Technoleg Gwybodaeth am eu cefnogaeth

Aelodau'r Bwrdd i ystyried argaeledd ar gyfer arsylwi cyfarfodydd Pwyllgor

Pensiwn 2021/22

21-10-21

17-01-22

24-03-22

21-10-21 Sioned Parry

17-01-22 Eifion Jones

24-03-22 Osian Richards