Rhaglen a chofnodion

I dderbyn unrhyw ymddiheuriadau am absenoldeb

Dim i’w nodi

I dderbyn unrhyw ddatganiad o fuddiant personol

Dim i’w nodi

Nodi unrhyw eitemau sy’n fater brys ym marn y cadeirydd fel y gellir eu hystyried.

Dim i’w nodi

Bydd y Cadeirydd yn cynnig y dylid llofnodi cofnodion cyfarfod o’r Bwrdd hwn a gynhaliwyd 7fed o Fawrth 2022 fel rhai cywir  

Derbyniodd y Cadeirydd gofnodion cyfarfod blaenorol y pwyllgor hwn a gynhaliwyd 7fed o Fawrth 2022 fel rhai cywir.

I ystyried yr adroddiad drafft

Cyflwynodd y Cadeirydd yr adroddiad drafft oedd wedi ei baratoi ar gyfer ei gynnwys yn adroddiad blynyddol Cronfa Bensiwn Gwynedd, am sylwadau. Nodwyd bod yr adroddiad drafft wedi ei ysgrifennu yn unol â gosodiad adroddiad 2021, ond wedi ei ddiweddaru i gynnwys y pynciau a drafodwyd yn ystod y flwyddyn. Gwnaed cais i’r Aelodau gyflwyno manylion sesiynau hyfforddiant yr oeddynt wedi eu mynychu dros y flwyddyn – bydd cofnod o’r sesiynau hynny sydd wedi eu mynychu gan fwyafrif o aelodau’r Bwrdd yn cael ei gynnwys yn yr adroddiad.

Cyfeiriwyd at faterion yr oedd y Bwrdd wedi cynnig sylwadau arnynt ac awgrymwyd cynnwys enghreifftiau at gyfraniadau penodol. Yn unol â dymuniad y Bwrdd i ychwanegu cymal am fiduciary duty yn y Polisi Buddsoddi Cyfrifol, awgrymwyd cyfeirio at hyn yn yr Adroddiad Blynyddol. Cytunwyd ar y datganiad canlynol.

Roedd y Bwrdd yn cyfrannu i ddatblygiad polisi’r gronfa drwy flaen-graffu rhai polisïau drafft a mireinio rhai agweddau cyn iddynt fynd i’r Pwyllgor am benderfyniad i’w mabwysiadu, e.e. Ychwanegwyd cymal am “fiduciary duty” i’r Polisi Buddsoddi Cyfrifol ar ôl trafodaethau manwl yng nghyfarfod y Bwrdd ar y 7fed o Fawrth 2022.

Diolchwyd am yr adroddiad

Yn ystod y drafodaeth ddilynol nodwyd y sylw canlynol gan aelod:

·           Awgrym y dylid cynnwys penodiad Osian Richards (Cynrychiolydd Aelodau Bwrdd Pensiwn Gwynedd) fel cynrychiolydd aelodau ar gyd bwyllgor Partneriaeth Pensiwn Cymru – hyn yn benodiad positif iawn

PENDERFYNWYD derbyn y wybodaeth

Ystyried yr adroddiad ynghyd a derbyn adborth gan y Bwrdd ar y Polisi Cynrychiolaeth newydd

Cyflwynwyd adroddiad gan y Rheolwr Pensiynau yn ymateb i argymhellion Adolygiad Llywodraethu Da i awdurdodau sicrhau bod angen i bob cronfa gynhyrchu a chyhoeddi polisi ar gynrychiolaeth aelodau’r cynllun a chyflogwyr sydd ddim yn rhan o’r awdurdod gweinyddu ar y Pwyllgorau, gan egluro trefniadau hawliau pleidleisio pob plaid

Amlygwyd bod y polisi yn cadarnhau safbwynt y Gronfa mewn perthynas â phenodiadau a hawliau dirprwyaeth y Pwyllgor, yn ogystal â chyfansoddiad y Bwrdd Pensiwn.

Diolchwyd am yr adroddiad

Yn ystod y drafodaeth ddilynol nodwyd y sylwadau canlynol gan aelodau;

·           Cywiro’r frawddeg sydd yn nodi bod saith aelod etholedig Cyngor Gwynedd yn cael eu henwebu gan y Cyngor i nodi, bod saith aelod etholedig Cyngor Gwynedd yn cael eu dyrannu ar sail cydbwysedd gwleidyddol rhwng y gwahanol grwpiau o aelodau etholedig ar y Cyngor Llawn.

·           Bod angen tynnu sylw at Partneriaeth Pensiwn Cymru gan nodi bod Cadeirydd y Pwyllgor Pensiynau yn eistedd ar Gydbwyllgor Llywodraethu (CLl) Partneriaeth Pensiwn Cymru ac y byddai gwahoddiad yn ymestyn i’r Is gadeirydd os na fyddai’r Cadeirydd yn gallu mynychu.

Mewn ymateb i awgrym y dylid ceisio annog merched  i  fod yn aelodau ar y Pwyllgor Pensiynau (o gofio fod merched yn cynrychioli 60% o’r gweithlu, yn talu pensiwn, a dymuniad i aelodaeth y Pwyllgor adlewyrchu aelodaeth y cynllun pensiwn), nodwyd y gellid amlygu’r dymuniad yma i’r pleidiau unigol wrth i adroddiad cydbwysedd gwleidyddol aelodaeth y Pwyllgorau gael ei gyflwyno i’r Cyngor llawn ym mis Mai, tra hefyd yn amlygu’r manteision pe bai sawl aelod cyfredol yn parhau ar y Pwyllgor Pensiynau (o gofio’r anghenion hyfforddiant sy’n arbennig i’r maes).

I ystyried y rhaglen waith ac awgrymu eitemau ychwanegol neu newidiadau.

Cyflwynwyd rhaglen waith diwygiedig ar gyfer 2022/23. Nodwyd bod y rhaglen yn cynnwys materion a nodwyd yn dilyn ystyriaeth gan y Bwrdd mewn cyfarfodydd blaenorol a materion yn codi. Amlygwyd hefyd bod cymariaethau wedi eu gwneud gyda rhaglenni Byrddau Pensiwn eraill am bynciau trafod. Atgoffwyd yr Aelodau bod y ddogfen yn ddogfen weithredol ac i’w addasu yn unol â’r gofyn.

Awgrymwyd y pwnc canlynol i’w gynnwys ar y rhaglen waith:

·         Diweddariad ar ddiogelwch seiber yng nghyfarfod Hydref / Rhagfyr

Diolchwyd am yr adroddiad –  y rhaglen waith yn gosod trefn i waith y Bwrdd

Awgrymwyd dechrau pob cyfarfod am 1pm

PENDERFYNWYD derbyn y wybodaeth

Cymerodd y Cadeirydd, y Cynghorydd Aled Evans y cyfle i ddiolch am y gefnogaeth roedd wedi ei dderbyn gan ei gyd-aelodau, am gydweithrediad y Pwyllgor Pensiynau ac i’r staff am eu cymorth parod bob amser.

Diolchwyd i’r Cynghorydd Aled Evans am ei gyfraniad i’r Bwrdd Pensiwn dros y blynyddoedd a dymunwyd y gorau iddo i’r dyfodol