Rhaglen a chofnodion

I ethol Cadeirydd am 2015/16

Penderfynwyd ethol Sharon Warnes yn gadeirydd y Bwrdd Pensiwn am 2015/16.

I ethol Is-gadeirydd am 2015/16

Penderfynwyd ethol Huw Trainor yn is-gadeirydd y Bwrdd Pensiwn am 2015/16.

Derbyn unrhyw ymddiheuriadau am absenoldeb

Dim i’w nodi 

Derbyn unrhyw ddatganiad o fuddiant personol

Ni dderbyniwyd datganiad o fuddiant personol gan unrhyw aelod oedd yn bresennol. Mewn ymateb i gwestiwn ynglŷn â chysylltiadau â gweithwyr yn yr Adran Pensiynau ac Aelodau o’r Pwyllgor Pensiynau, awgrymwyd datgan buddiant os bydd mater penodol perthnasol yn codi neu yn cael ei drafod.

Mabwysiadu Cylch Gorchwyl a Llywodraethu ar gyfer Bwrdd Pensiwn Cronfa Bensiwn Gwynedd

Cyflwynwyd Cylch Gorchwyl ar gyfer Bwrdd Pensiwn Lleol Cronfa Bensiwn Gwynedd. Paratowyd y ddogfen ar y cyd gan Swyddogion o’r Adran Cyllid, Swyddogion o’r Adran Cyfreithiol a’r Aelod Cabinet perthnasol.  Adroddwyd bod y Cylch Gorchwyl wedi ei dderbyn yn y Cyngor Llawn ar 5.03.15 a bod gofyn i’r Bwrdd ei fabwysiadu. Amlinellwyd rôl y Bwrdd yn cynorthwyo rheolwyr y cynllun pensiwn gan dynnu sylw at baragraff 2.2 o’r adroddiad.

Bydd y Bwrdd Pensiwn yn sicrhau ei fod yn cydymffurfio yn effeithiol ac yn effeithlon gyda’r cod ymarfer ar lywodraethu a gweinyddu'r cynlluniau pensiwn gwasanaethau cyhoeddus a gyhoeddir gan y Rheoleiddiwr Pensiynau. Bydd y Bwrdd Pensiwn hefyd yn cynorthwyo i sicrhau fod Cronfa Bensiwn Gwynedd yn cael ei rheoli a’i gweinyddu’n effeithiol ac yn effeithlon ac yn cydymffurfio gyda’r cod ymarfer ar lywodraethu a gweinyddu'r cynlluniau pensiwn gwasanaethau cyhoeddus a gyhoeddir gan y Rheoleiddiwr Pensiynau’.

Cadarnhawyd mai Adran Cyllid Cyngor Gwynedd fydd rheolwyr y Cynllun, a’r pwyntiau cyswllt i’r Bwrdd fydd Dafydd Edwards (Pennaeth Cyllid), Caroline Roberts (Rheolwr Buddsoddi), Gareth Jones (Rheolwr Pensiynau), Nicholas Hopkins (Dirprwy Reolwr Pensiynau) a Meirion Jones (Swyddog Cyfathrebu - Pensiynau).

Trafodwyd y cylch gorchwyl fesul pennawd.

Materion yn codi o’r drafodaeth;

-       Gan nad yw’r Cylch Gorchwyl yn caniatáu presenoldeb eilyddion yn lle aelodau’r Bwrdd, cadarnhawyd y byddai’r swyddogion yn fodlon derbyn sylwadau ymlaen llaw gan Aelodau petai ef/ hi yn methu a bod yn bresennol.

-       Nodir yn y Cylch Gorchwyl bod angen i’r Bwrdd Pensiwn gynnal o leiaf ddau gyfarfod ar wahân bob blwyddyn, ond petai angen sylw arbennig i unrhyw fater bydd modd trefnu cyfarfodydd ychwanegol. Y Bwrdd Pensiwn sydd a’r penderfyniad i amlder y cyfarfodydd.

-       Rôl y Bwrdd yw cysgodi gwaith a phenderfyniadau'r Pwyllgor Pensiynau. Petai cwestiwn / mater yn codi, fel arfer bydd y Bwrdd yn cyfeirio ystyriaethau drwy’r swyddogion.

-       Petai angen addasu’r Cylch Gorchwyl, yna bydd rhaid gwneud hynny drwy sêl bendith cyfarfod o’r Cyngor llawn.

Nodwyd bod y Bwrdd Pensiwn yn mabwysiadu’r Cylch Gorchwyl ac am ail ymweld â’r ddogfen petai unrhyw fater yn codi.

Hysbysu’r Bwrdd Pensiynau am y trefniadau hyfforddi ar gyfer aelodau o’r Bwrdd

Cyflwynwyd dogfen yn amlinellu trefniadau hyfforddi ar gyfer Aelodau’r Bwrdd Pensiwn. Amlinellwyd bod y Gronfa Bensiwn yn ceisio defnyddio unigolion gyda’r gallu a’r profiad perthnasol. I gynorthwyo Aelodau gyda gwybodaeth berthnasol / cyfredol, bydd y gronfa yn darparu hyfforddiant ar gyfer yr Aelodau, er mwyn eu galluogi i dderbyn a chynnal lefel briodol o arbenigedd. Amlinellwyd yn yr adroddiad y sesiynau hyfforddiant cychwynnol a'r adnoddau sydd i'w darparu.

Nodwyd bod yr Aelodau wedi derbyn sesiwn rhagarweiniol (gan Mr Stephen Lee o Investec) yn canolbwyntio ar rôl a chyfrifoldebau’r Bwrdd Pensiwn a’r prif feysydd o ddiddordeb ar y 13eg o Orffennaf 2015. Yn ychwanegol, nodwyd bydd cyfle i’r Aelodau fynychu sesiynau Hyfforddiant Hanfodion Ymddiriedolwyr Cynllun Pensiwn Llywodraeth Leol (CPLlL). Nodwyd bod y sesiynau hyn yn rhoi dealltwriaeth sylfaenol o’r CPLlL ac y bydd trefniadau'n cael eu gwneud gan Cyngor Gwynedd. Yn dilyn cwblhau'r Hyfforddiant Hanfodion (tri diwrnod), bydd holiadur yn cael ei gyflwyno i asesu  lefel cyfredol o ddealltwriaeth yr Aelodau. Yn dilyn yr asesiad, bydd rhaglen hyfforddi yn cael ei ddarparu i fynd i'r afael ag unrhyw fylchau mewn sgiliau a gwybodaeth pob unigolyn. Cyfeiriwyd hefyd at gyfleoedd hyfforddiant ar wefan y Rheolydd Pensiynau sydd yn cynnig modiwlau am ddim.

Nodwyd y wybodaeth a gwnaed cais i’r Aelodau gysylltu gyda Caroline Roberts neu Meirion Jones i gofrestru ar y cwrs Hyfforddiant Hanfodion Ymddiriedolwyr CPLlL.

Cyflwyno adroddiad y Rheolwr Buddsoddi

Cyflwynwyd adroddiad y Rheolwr Buddsoddi yn amlinellu angen y Bwrdd Pensiwn i osod strwythur i’w gwaith. Argymhellwyd yr angen i gytuno ar raglen o feysydd i’w harchwilio er mwyn i’r wybodaeth a’r adroddiadau gael eu darparu pan fydd angen. Yn ychwanegol i’r meysydd posib a restrwyd yn yr adroddiad, cynigiwyd y meysydd isod;

-       Deilliannau o’r hyfforddiant

-       Trafodaethau actwari

-       Cynnwys Adroddiad Blynyddol Cronfa Bensiwn Gwynedd - herio’r ystyriaethau a’r penderfyniadau

-       Adroddiadau i’r Pwyllgorau Pensiynau - herio’r ystyriaethau a’r penderfyniadau

-       Effaith cyllideb diweddar Llywodraeth San Steffan - Sut bydd hyn yn cael ei gyfathrebu?

-       Argymhellion perthnasol Swyddfa Archwilio Cymru ac Archwilio Mewnol - herio’r ystyriaethau a’r penderfyniadau

-       Craffu dulliau gweinyddu’r Cynllun - beth yw rôl a pherfformiad yr Uned Weinyddol?

-       Craffu a deall amrywiol ddulliau o fuddsoddi - beth yw portffolio buddsoddi'r gronfa?

-       Beth yw remit y Pwyllgor Pensiwn?

Mewn ymateb, nodwyd bod argymhellion Swyddfa Archwilio Cymru ac Archwilio Mewnol yn cael eu cyflwyno i’r Pwyllgor Archwilio ond byddai modd paratoi crynodeb o’r argymhellion hynny ar gyfer y Bwrdd Pensiwn.

Nodwyd nad oedd cyfarfodydd ychwanegol wedi eu trefnu ar gyfer y flwyddyn, ond bod modd ystyried cyfarfod ym mis Rhagfyr (yn dilyn y gyfres hyfforddiant) a mis Mawrth. Ar gyfer cyfarfod mis Rhagfyr, penderfynwyd cyflwyno

-       Crynodeb o argymhellion y Pwyllgor Archwilio

-       Rôl yr Uned Weinyddol

-       Y Portffolio Buddsoddi

Cytunwyd ar y meysydd uchod fel cynnwys i’r rhaglen waith 2015/2016

Cyflwyno adroddiad y Rheolwr Buddsoddi

Cyflwynwyd dogfen yn hysbysu’r aelodau o ddigwyddiadau perthnasol ynghyd â dyddiadau’r hyfforddiant sylfaenol i Ymddiriedolwyr. Gwnaed cais i’r Aelodau gyflwyno eu hunain i gyfarfod blynyddol y Gronfa Bensiwn fydd yn cael ei gynnal ar yr 8fed o Fedi 2015. Rhestrwyd hefyd ddyddiadau cyfarfodydd y Pwyllgor Pensiynau 2015/2016 a nodwyd bod modd i’r aelodau gysgodi’r Pwyllgorau hyn gan eu bod yn gyfarfodydd cyhoeddus.

Derbyniwyd y wybodaeth

Dechreuodd y cyfarfod am 3:10pm a daeth i ben 4:20pm