Rhaglen, penderfyniadau a chofnodion drafft

I dderbyn unrhyw ymddiheuriadau o absenoldeb.

Derbyniwyd ymddiheuriadau gan Paul Smith (Cynrychiolydd Ysgolion Uwchradd)

I dderbyn unrhyw ddatganiad o fuddiant personol.

Ni dderbyniwyd unrhyw ddatganiad o fuddiant personol gan unrhyw aelod oedd yn bresennol.

Nodi unrhyw eitemau sy’n fater brys ym marn y Cadeirydd fel y gellir eu hystyried.

Dim i’w nodi

Bydd y Cadeirydd yn cynnig y dylid llofnodi cofnodion cyfarfod o’r pwyllgor hwn a gynhaliwyd ar 2 Hydref 2024 fel rhai cywir.

Derbyniodd y Cadeirydd gofnodion cyfarfodydd blaenorol o’r pwyllgor hwn a gynhaliwyd 2il Hydref 2024

Cyflwyno Datganiad o’r Cyfrifon ôl-Archwiliad, Adroddiad Swyddfa Archwilio Cymru ac Llythyr Cynrychiolaeth.

PENDERFYNIAD:

·       Derbyn a nodi adroddiad  ISA260 gan Archwilydd Cyffredinol Cymru

·       Cymeradwyo Datganiad Cyfrifon 2023/24

·       Awdurdodi’r Cadeirydd a  Phennaeth Cyllid Cyngor Gwynedd (fel Swyddog Cyllid Statudol GwE) i lofnodi’r llythyr cynrychiolaeth

Cyflwynwyd adroddiad Pennaeth Cyllid Cyngor Gwynedd yn gofyn i’r cydbwyllgor ystyried a chymeradwyo’r Datganiad o’r Cyfrifon 2023/24 (ôl-archwiliad), adroddiad ‘ISA260’ Archwilio Cymru a’r Llythyr Cynrychiolaeth cyn awdurdodi’r Cadeirydd a’r Pennaeth Cyllid i ardystio’r llythyr yn electroneg.

Arweiniodd y Pennaeth Cyllid Cynorthwyol - Cyfrifeg a Phensiynau (Cyngor Gwynedd), yr Aelodau drwy’r datganiad gan eu hatgoffa bod cyfrifon amodol wedi eu cyflwyno i’r Cydbwyllgor ym mis Hydref 2024 ble amlygwyd y prif faterion a’r nodiadau perthnasol. Adroddwyd na fu unrhyw newid i brif ddatganiadau ariannol yr adroddiad hwnnw (y Fantolen, Datganiad Incwm a Gwariant, Datganiad Llif Arian na’r Datganiad o’r Symudiadau mewn Reserfau), ond bod ambell addasiad i’r nodiadau sydd yn cefnogi’r  Datganiad;

·  Nodyn 17b ‘Taliadau i Swyddogion – dim newid wedi bod yn y nifer sydd yn ymddangos yn y tabl ar gyfer 2023/24 (43 o swyddogion), ond yn hytrach bod  newid i’r bandiau cyflog roedd tri swyddog yn ymddangos ynddo. Nodwyd nad oedd chwyddiant cyflogau Soulbry 2022/23 wedi ei gadarnhau tan 2023/24 ac felly yn cymhlethu’r sefyllfa. Y nodyn bellach yn adlewyrchu y darlun am gyflogau y flwyddyn ariannol 2023/24 yn unig.

·  Nodyn 20 Partïon Cysylltiedig / Aelodau - bu modd tynnu'r datgeliad gan nad oedd yn ofynnol ei gynnwys i gydymffurfio efo gofynion CIPFA.

Yn ychwanegol i hyn roedd nifer fach o fân ddiwygiadau naratif.

Gofynnwyd i’r Cydbwyllgor i ystyried a chymeradwyo’r Datganiad o’r Cyfrifon a’r ISA260 gan Archwilio Cymru ar gyfer cyfrifon 2023/24.

Ar ran Archwilio Cymru, nododd Osian Roberts bod Archwilio Cymru yn bwriadu cyhoeddi barn di-amod ar gyfrifon 2023/24 gan ategu bod y cyfrifon yn rhoi darlun gwir a theg o’r sefyllfa, yn cydymffurfio ag arferion priodol ac mai gweithio i lefel o ‘berthnasedd’ roedd Archwilio Cymru. Adroddwyd bod y lefel o berthnasedd yn cael ei  bennu i geisio adnabod a chywiro camddatganiadau allai beri fel arall i’r sawl sydd yn defnyddio’r cyfrifon gael eu camarwain. Pennwyd y lefel perthnasedd o £356,000 ar gyfer archwiliad 2023/24 ac adroddwyd ar  gamddatganiadau trothwy uwchlaw £17,000, (a gyfrifir fel 5% o berthnasedd). Ategodd bod y camau gweithdrefn bellach wedi eu cwblhau ac nad oedd materion ychwanegol i adrodd arnynt.

Yng nghyd-destun cydymffurfio moesegol, nodwyd bod Archwilio Cymru wedi parhau yn annibynnol a diolchwyd i Dîm Cyllid Cyngor Gwynedd am eu cefnogaeth.

Croesawyd yr adroddiad a diolchwyd i bawb am eu gwaith.

Cynigwyd ac eiliwyd derbyn yr adroddiad.

PENDERFYNWYD:

·  Derbyn a nodi adroddiad  ISA260 gan Archwilydd Cyffredinol Cymru

·  Cymeradwyo Datganiad Cyfrifon 2023/24

·         Awdurdodi’r Cadeirydd a  Phennaeth Cyllid Cyngor Gwynedd (fel Swyddog Cyllid Statudol GwE) i lofnodi’r llythyr cynrychiolaeth

Diweddaru aelodau’r Cydbwyllgor ar yr adolygiad ariannol diweddaraf o gyllideb GwE am y flwyddyn gyllidol 2024/25.

PENDERFYNIAD:

·       Derbyn a chymeradwyo’r adroddiad.

Cyflwynwyd adroddiad Pennaeth Cyllid Cyngor Gwynedd yn diweddaru aelodau ar yr adolygiad ariannol diweddaraf o gyllideb refeniw GwE am y flwyddyn gyllidol 2024/25 a’r rhagolygon tuag at ddiwedd y flwyddyn ariannol. Eglurodd Pennaeth Cyllid Cynorthwyol - Cyfrifeg a Phensiynau (Cyngor Gwynedd), bod yr adroddiad yn canolbwyntio ar yr amrywiannau ariannol sylweddol ynghyd â gwybodaeth ariannol gyflawn a bod yr adolygiad wedi ei gynnal yn seiliedig ar wybodaeth diwedd Hydref 2024. Cyfeiriwyd at dalfyriad o’r sefyllfa derfynol gyda’r rhagolygon yn awgrymu y bydd tanwariant o £78 mil erbyn diwedd y flwyddyn ariannol. Tynnwyd sylw at y prif faterion;

·       Gweithwyr – tanwariant o £18 mil. Cyllideb GwE ar gyfer y flwyddyn gyfredol wedi ei sefydlu yn seiliedig ar nifer staff yn Chwefror 2024. Yr arbediad wedi ei wireddu wedi i rai o aelodau staff GwE adael eu swyddi ynghyd â derbyniad grant sydd wedi ei ddefnyddio i gyllido swyddi. Ategwyd bod y ffigyrau hefyd wedi ymgorffori penderfyniad y Cydbwyllgor ar 1af Awst, gan gynnwys ailstrwythuro’r Uwch Dîm Reoli.

·       Rhent - gorwariant o bron i £10 mil. Hyn yn unol â’r tueddiad hanesyddol, a rhagwelir y bydd GwE yn gorwario ar y pennawd yma eto eleni a hynny yn bennaf o ganlyniad i GwE yn rhentu gofod mwy o faint yn swyddfa Caernarfon.

·       Cludiant - y darlun yn parhau i fod yn gyson gydag adolygiadau blaenorol gyda thanwariant o £50 mil ar y pennawd yma gan fod costau teithio wedi lleihau o ganlyniad i ffyrdd newydd o weithio dros y blynyddoedd diwethaf.

·       Cyflenwadau a Gwasanaethau - Rhagwelir tanwariant o bron i £20 mil ar y pennawd yma.

O ran sefyllfa cronfa wrth gefn, nodwyd mai swm y gronfa agoriadol oedd £221 o filoedd, ac yn dilyn ychwanegu’r tanwariant a ragwelir, bydd cyfanswm y gronfa yn tyfu i £300 o filoedd.

Diolchwyd am yr adroddiad a diolchwyd i’r staff am gwblhau’r gwaith o fewn cyfnod anodd.

Cynigiwyd ac eiliwyd cymeradwyo’r adroddiad.

          PENDERFYNWYD:

          Derbyn a chymeradwyo’r adroddiad.

Cyflwyno adroddiad cynnydd i Aelodau Cyd-bwyllgor GwE ar yr elfen ‘Diwygio’ o’r Grant Addysg Awdurdod Lleol (GAALl), yn benodol: Cwricwlwm i Gymru a Dysgu Proffesiynol ac Arweinyddiaeth.

PENDERFYNIAD:

Derbyn a chymeradwyo’r adroddiad cynnydd.

Cyflwynwyd adroddiad gan Pennaeth Gwasanaeth GwE - Dysgu Proffesiynol.  Eglurwyd penderfyniad Llywodraeth Cymru i gyfuno prif grantiau addysg o dan un pennawd sef yGrant Addysg Awdurdodau Lleol (GAALl) o 2024-25 ymlaen. Bydd y grant yn cael ei dalu yn uniongyrchol i’r Awdurdodau Lleol / Ysgolion  gyda gofynion, risgiau telerau ac amodau’r grant bellach yn gyfrifoldeb yr Awdurdod Lleol unigol.

Eglurwyd, er mwyn sicrhau parhad y gefnogaeth i ysgolion tra bod adolygiad haen ganol y system addysg yng Nghymru yn mynd yn ei flaen, nododd Llywodraeth Cymru'r disgwyliad bod unrhyw drefniadau gweithio rhanbarthol presennol yn parhau yn ystod y cyfnod yma a'u bod yn cael eu hwyluso drwy'r cyllid grant penodol i gefnogi'r cwricwlwm a dysgu proffesiynol mewn ysgolion.  Ategwyd bod yr elfennau ‘Cwricwlwm i Gymru’ a ‘Dysgu Proffesiynol ac Arweinyddiaeth’ wedi ei drosglwyddo o’r GAALl ‘Diwygio’ yn llawn i GwE gan holl Awdurdodau Lleol y rhanbarth er mwyn cynnig darpariaeth i gefnogi’r agweddau yma ac sydd yn  bodloni telerau ac amodau'r grant.

Yn unol â chynlluniau busnes GwE a’r Awdurdodau Lleol ar gyfer 2024-25, bydd GwE yn adrodd i’r Cydbwyllgor ar yr elfen Diwygio  - ‘Cwricwlwm i Gymru’ a ‘Dysgu Proffesiynol ac Arweinyddiaeth’.  Yn ogystal, ac yn unol â gofynion monitro’r GAALl, bydd GwE yn darparu adroddiadau ddwywaith y flwyddyn ar yr elfennau yma, fel bod modd i’r Awdurdodau Lleol gyflwyno adroddiadau monitro yn erbyn y dibenion a'r amcanion a osodwyd, i Lywodraeth Cymru. 

Cyfeiriwyd at yr adroddiad cynnydd am y cyfnod 01/04/2024 – 30/09/2024 oedd wedi ei gynnwys gyda’r adroddiad, gan nodi nad oedd cwtogiad i’r ddarpariaeth ac nad oedd risgiau i’r gefnogaeth ar hyn o bryd. Tynnwyd sylw hefyd at lefel uchel o staff oedd wedi mynychu’r sesiynau hyfforddi er cyfyngiadau i’r gwasanaeth.

Diolchwyd am yr adroddiad.

Nododd y Cadeirydd bod y data yn rhyfeddol o ystyried yr holl newidiadau sydd yn digwydd yn GwE a diolchwyd i’r staff, er gwaethaf y sefyllfa, am sicrhau parhad i’r gwasanaeth a’r gefnogaeth i ysgolion. Ategodd ei bod yn ddiolchgar iawn o’u hymrwymiad i’r gwaith.

   Mewn ymateb i gwestiwn ynglŷn â’r data rhanbarthol ac a yw ar gael fesul Awdurdod Lleol, cadarnhawyd bod y wybodaeth yn cael ei rannu gydag Awdurdodau Lleol unigol y Rhanbarth. 

Cynigiwyd ac eiliwyd cymeradwyo’r adroddiad. 

PENDERFYNWYD:

Derbyn a chymeradwyo’r adroddiad cynnydd.