Rhaglen, penderfyniadau a chofnodion drafft

I dderbyn unrhyw ymddiheuriadau am absenoldeb

Derbyniwyd ymddiheuriadau gan y Cynghorwyr Annwen Hughes, Nia Jeffreys, Cai Larsen, Beth Lawton, Dafydd Meurig, Gwynfor Owen, Angela Russell, a Wendy Cleaver.

Mynegwyd siom bod nifer sylweddol wedi ymddiheuro am fethu mynychu’r Pwyllgor a hynny am amryw o resymau teilwng. Y gobaith i’r dyfodol yw gweld gwell cynrychiolaeth yn y cyfarfodydd hyn gan fod presenoldeb Aelodau yn allweddol i sicrhau prosesau cadarn a thryloyw. 

Croesawyd Eleri Jones i’r cyfarfod a llongyfarchwyd hi ar ei phenodiad yn Rheolwr Gwasanaethau Ymgynghorol Adnoddau Dynol. Dymunwyd y gorau iddi yn y swydd.

I dderbyn unrhyw ddatganiad o fuddiant personol

Dim i’w nodi

Nodi unrhyw eitemau sy’n fater brys ym marn y Cadeirydd fel y gellir eu hystyried.

Dim i’w nodi

Bydd y Cadeirydd yn cynnig y dylid llofnodi cofnodion cyfarfod o’r pwyllgor hwn a gynhaliwyd 12fed o Fawrth 2026 fel rhai cywir  

Llofnododd y Cadeirydd gofnodion cyfarfod o’r pwyllgor hwn a gynhaliwyd ar 12fed o Fawrth 2026 fel rhai cywir

Bydd y Cadeirydd yn cynnig y dylid cau’r wasg a’r cyhoedd allan o’r cyfarfod yn ystod y drafodaeth ar yr eitemau canlynol gan ei fod yn debygol y datgelir gwybodaeth eithriedig fel y’i diffinnir ym mharagraff 12, Rhan 4, Atodiad 12A, Deddf Llywodraeth Leol 1972.

Mae’r paragraff yma yn berthnasol oherwydd bod yr adroddiad yn cynnwys gwybodaeth am unigolion penodol sydd â hawl i breifatrwydd. Nid oes unrhyw fudd cyhoeddus sydd yn galw am ddatgelu gwybodaeth bersonol am yr unigolion yma fyddai’n gorbwyso hawliau’r unigolion yma. O ganlyniad mae’r budd cyhoeddus yn disgyn o blaid cadw’r wybodaeth yn eithriedig

PENDERFYNWYD cau’r wasg a’r cyhoedd allan o’r cyfarfod yn ystod y drafodaeth ar yr eitem ganlynol gan ei fod yn debygol y datgelir gwybodaeth eithriedig fel y’i diffinnir ym mharagraff 12, Rhan 4, Atodiad 12A, Deddf Llywodraeth Leol 1972. Mae’r paragraff yma yn berthnasol oherwydd bod yr adroddiad yn cynnwys gwybodaeth am unigolion penodol sydd â hawl i breifatrwydd. Nid oes unrhyw fudd cyhoeddus sydd yn galw am ddatgelu gwybodaeth bersonol am yr unigolion yma. O ganlyniad mae’r budd cyhoeddus yn disgyn o blaid cadw’r wybodaeth yn eithriedig.

I gyfweld ymgeisydd ar gyfer y swydd

PENDERFYNIAD:

Penodi Sharron Williams Carter fel Pennaeth Adran Plant a Chefnogi Teulueodd (Dros Dro)

Cadarnhawyd trefn y diwrnod gyda’r Aelodau.

Cyfwelwyd un ymgeisydd ar gyfer y swydd Pennaeth Adran Plant A Chefnogi Teuluoedd (Dros Dro)

Gwahoddwyd yr ymgeisydd i roi cyflwyniad rhwng 10 a 15 munud ar y testun,

“Sut ellir darparu sicrwydd ar effeithiolrwydd gwasanaeth, ansawdd gwaith cymdeithasol a gweithredu diogel yr Adran Plant?”

Ymatebwyd i bum cwestiwn ffurfiol a ofynnwyd gan y Cadeirydd, y Cynghorydd Ioan Thomas, ynghyd a chwestiynau ategol gan yr Aelodau.

Ar ddiwedd y cyfweliad, ymneilltuodd yr ymgeisydd o’r ystafell.

Gwahoddwyd Mr Dylan Owen (Cyfarwyddwr Statudol Gwasanaethau Cymdeithasol) i gyflwyno adborth cryno o berfformiad yr ymgeisydd mewn cyfweliad proffesiynol gydag yntau a Catrin Thomas (Cyfarwyddwr Corfforaethol) gyda’r Cyng. Menna Trenholme (Aelod Cabinet Adran Plant A Chefnogi Teuluoedd) yn arsylwi. Eglurwyd na chynhaliwyd profion ac ymarferion seicolegol gan mai penodiad dros dro oedd hwn.

Trafodwyd y cyflwyniad ac ymateb yr ymgeisydd i’r cwestiynau

Cynigiwyd ac eiliwyd cynnig y swydd i Sharron Williams Carter

PENDERFYNWYD penodi Sharron Williams Carter i’r swydd Pennaeth Adran Plant A Chefnogi Teuluoedd (Dros Dro)