Rhaglen a Phenderfyniadau

Derbyn yr adroddiad gerbron sy’n adrodd ar waith y Rhaglen Cefnogi Pobl ar gyfer y flwyddyn 2025/26.

Bod y Cabinet yn cymeradwyo yr addasiadau i’r Cynllun Argyfwng Hinsawdd a Natur ac yn mabwysiadu Cynllun Argyfwng Hinsawdd a Natur 2022/23 – 2029/30 Cyngor Gwynedd (F.2).

Penderfynwyd:

Mabwysiadu Strategaeth Wastraff ac Ailgylchu Cyngor Gwynedd 2025–2030 fel y ddogfen strategol sy’n gosod cyfeiriad, gweledigaeth a blaenoriaethau’r Cyngor ym maes gwastraff ac ailgylchu dros y pum mlynedd nesaf.

Cymeradwyo’r egwyddor o ddefnyddio Cyllid Cyfrifoldeb Estynedig y Cynhyrchydd (EPR) fel y prif ffynhonnell ariannu i gefnogi a galluogi gweithredu blaenoriaethau’r Strategaeth, gan gynnwys cynlluniau i gynyddu ailgylchu, gwella gwasanaethau, cynnal seilwaith presennol a buddsoddi mewn isadeiledd y dyfodol.

Cymeradwyo’r cyfeiriad strategol ar gyfer defnyddio cyllid EPR i:

 · reoli risgiau ariannol uniongyrchol y gwasanaeth drwy greu darpariaeth ariannol “rhag ofn”, megis delio gyda gorwariant ar ddarparu gwasanaethau lle nad oes dull amgen o’i gyfarch, lleihau’r risg o ddirwyon am fethu â chyrraedd targedau ailgylchu a pharatoi ar gyfer costau’r Cynllun Masnachu Allyriadau (ETS).

· darparu sail ariannol gadarn ar gyfer gweithredu’r cynlluniau a nodir yn y Strategaeth, gan gynnwys y camau i gyrraedd y targed ailgylchu o 70% a’r buddsoddiadau tymor byr sydd eu hangen ar gyfer uwchraddio.

· sefydlu Cronfa Cydariannu i gefnogi datblygu sylweddol yn safleoedd y dyfodol yng Nghaernarfon a Harlech.

Nodi y bydd penderfyniadau pellach yn ofynnol ar rai elfennau gweithredol unigol o’r Strategaeth a’r defnydd o’r cyllid EPR , ond bod mabwysiadu’r Strategaeth a chymeradwyo cyfeiriad defnydd EPR yn darparu’r fframwaith polisi a’r sail ariannol i symud ymlaen gyda’r rhaglen waith.

Nodi y bydd angen i’r Cyngor ystyried pob ffynhonnell ariannol posib wrth fynd ati i osod cyllideb refeniw 2027/28 a’r blynyddoedd dilynol ac na ellir diystyru y posibilrwydd o orfod ail ymweld â’r penderfyniadau uchod pe byddai angen dargyfeirio elfen o’r cyllid EPR ar gyfer gallu gosod cyllideb hafal.

Derbyn yr adroddiad gerbron sef y pedwerydd adroddiad chwarterol gan Gadeirydd y Bwrdd Rhaglen Cynllun Ymateb.

Derbyn Adroddiad Blynyddol y Panel Strategol Diogelu ar gyfer y flwyddyn 2025/26.

Fod y Cabinet yn mabwysiadu Polisi Diogelu Diwygiedig 2026 ac yn cymeradwyo y camau ymwybyddiaeth a nodir yn yr adroddiad.

Dyrannu’r incwm ychwanegol o’r premiwm ar eiddo gwag ac ail-gartrefi i’r meysydd blaenoriaeth a nodir yn Rhan 4 isod.

Mae Atodiad 2 ar wahân ar gyfer Aelodau’r Cabinet yn unig.

Mae’r Atodiad yn eithriedig o dan Paragraff 14 o Atodiad 12A o Ddeddf Llywodraeth Leol 1972 – Gwybodaeth ynglŷn â thrafodion ariannol neu fusnes unrhyw berson penodol (yn cynnwys yr awdurdod sydd yn dal y wybodaeth hynny).

Mae’r atodiad i’r adroddiad sydd dan sylw yn cynnwys gwybodaeth gyfrinachol a masnachol sensitif am nifer o prosiectau. Mae hyn yn berthnasol i nifer o sefydliadau.

Cytuno i ymrwymo’r £6,317,640 o’r arian ddarparwyd i Gyngor Gwynedd ei ddyrannu i brosiectau yn 2026/27, i’r 10 cynllun a restrir yn yr adroddiad.

Dirprwyo’r hawl i’r Pennaeth Economi a Chymuned, mewn ymgynghoriad â’r Pennaeth Gwasanaeth Cyfreithiol, Pennaeth Cyllid a’r Prif Weithredwr, i gadarnhau manylion y cynlluniau a’r cyfraniad ariannol, penderfynu ar ddarparu llythyr cynnig ac unrhyw ddogfennaeth arall ar gyfer cytuno ariannu’r prosiectau.

Cytuno i leihau cworwm cyfarfodydd Cydbwyllgor Cenedlaethol Gwasanaeth Mabwysiadu Cenedlaethol Cymru a Maethu Cymru o 60% i 40%, ar yr amod bod o leiaf dri rhanbarth yn cael eu cynrychioli.