Agenda item

Cais llawn ar gyfer dymchwel cyn ganolfan iechyd a chodi 12 annedd (8 o fflatiau a 4 o efeilldai) ynghyd â mynedfa, parcio a thanadeiledd cysylltiol.

 

AELODAU LLEOL:               Cynghorydd Anne Lloyd Jones

                                                Cynghorydd Mike Stevens

 

 

Dolen i’r dogfennau cefndir perthnasol

         Bu i’r Is-gadeirydd gadeirio’r cais uchod gan fod y Cadeirydd wedi datgan buddiant personol ac wedi gadael y Siambr.

 

         Cais llawn ar gyfer dymchwel cyn ganolfan iechyd a chodi 12 annedd (8 o fflatiau a 4 o efeilldai) ynghyd â mynedfa, parcio a thanadeiledd cysylltiol.

 

(a)       Ymhelaethodd y Rheolwr Cynllunio ar gefndir y cais, gan nodi y byddai’r tai wedi eu gosod allan mewn un bloc o 8 o fflatiau ar ffurf adeilad tri llawr / deulawr, a 4 o dai pâr deulawr. 

        

         Nodwyd bod y safle wedi ei leoli tu fewn i ffin datblygu tref Tywyn a thynnwyd sylw bod gweddill manylion y cais i’w gweld yn yr adroddiad gerbron a’r ffurflen sylwadau ychwanegol.  Yn ogystal, tynnwyd sylw at ymatebion yr ymgynghoriadau cyhoeddus a’r ddeiseb a gyflwynwyd yn gwrthwynebu’r bwriad a oedd wedi derbyn sylw fel rhan o’r asesiad.

 

         Nodwyd bod yr egwyddor o ddatblygu’r safle yn cwrdd â gofynion y polisi perthnasol a’r 12 annedd yn cyfrannu’n bositif at ddarpariaeth tai hap yn Nhywyn  a hefyd yn gwneud defnydd da o dir a ddatblygwyd o’r blaen.  Nodwyd y byddai’r unedau yn rhai fforddiadwy ar gyfer eu rhentu yn gymdeithasol. 

 

         Er bod pryderon wedi eu codi  gan y cyhoedd y bydd y safle yn arwain at or-ddatblygiad ystyrir y byddai’r datblygiad yn gydnaws â chymeriad yr ardal bresennol ac ni fyddai yn achosi niwed gormodol i rinweddau gweledol yr ardal na’r drefwedd ehangach. 

 

         Nodwyd bod y datblygiad wedi’i gynllunio’n i sicrhau pellter preifatrwydd da rhwng yr anheddau bwriedig ac adeiladau presennol, yn ogystal mae pellter yr adeiladau oddi wrth dai presennol ger y safle yn sicrhau na fydd yn effeithio ar lif golau naturiol i’r anheddau hynny. O safbwynt pryderon ynglŷn â gor-edrych i gerddi cyfagos, nodwyd bod gor-edrych i erddi mewn sefyllfa drefol yn anorfod.  Ni ystyrir bod gwrthwynebiad ynglŷn ag amhariaeth a tharfu ar fwynderau trigolion cyfagos gan deuluoedd a phlant a allai breswylio yn y datblygiad  yn rhesymol a chredir y byddai’r datblygiad yn cyfrannu at gymuned amrywiol ei natur.

 

         Yng nghyd-destun trafnidiaeth a mynediad, ystyrir bod y bwriad yn dderbyniol o ran diogelwch ffyrdd ac yn cydymffurfio gyda gofynion polisïau perthnasol.

 

         Mewn ymateb i ymgynghoriad gyda Dŵr Cymru, derbyniwyd sylwadau yn nodi na ddylai dŵr wyneb oddi ar y datblygiad gael ei gysylltu i’r garthffos gyhoeddus ac i’r perwyl hwn cynigir amod i’w gynnwys ar unrhyw ganiatâd cynllunio yn nodi y dylid cytuno ar y modd o waredu dŵr wyneb ac aflan cyn y cychwynnir unrhyw ddatblygiad.

 

         Yn dilyn ystyried yr holl faterion cynllunio perthnasol, yr holl sylwadau a dderbyniwyd a’r ymatebion i’r ymgynghoriadau cyhoeddus, ystyrir bod y bwriad arfaethedig yn gwneud defnydd da o safle tir llwyd ac argymhelliad y swyddogion cynllunio ydoedd i’w ganiatáu yn unol ag amodau perthnasol.

(b)       Yn manteisio ar yr hawl i siarad, nododd cynrychiolydd ar ran yr ymgeisydd y prif bwyntiau canlynol:

 

·         Bod Cartrefi Cymunedol Gwynedd (CCG) yn ymwybodol bod deiseb wedi ei gyflwyno ond er gwybodaeth bu iddynt gynnal ymgynghoriad gyda thrigolion Tywyn ac roedd yr adborth yn bositif yn gyffredinol, gyda dros 80% yn cwblhau holiadur barn ac yn cefnogi neu yn cefnogi’n gryf y datblygiad arfaethedig

·         Cynhaliwyd trafodaethau gyda’r Adran Gynllunio ac yn dilyn adborth diwygiwyd y cynllun i ostwng rhan o’r bloc o fflatiau i ddau lawr i leihau’r effaith ar y byngalos  gyferbyn

·         Bydd y fflatiau ar gyfer darpar denantiaid dros 55 oed

·         Bydd trefniadau cefnogaeth tenantiaeth gan staff CCG yn y cynllun gwarchod pobl hŷn yn Morfa Cadfan sydd yn agos i’r datblygiad

·         Bydd y tai dwy lofft yn helpu i ddiwallu anghenion am y math yma o dai o ganlyniad i  reoliadau gyda threth ystafell wely, gyda’r angen bellach fwyfwy am unedau llai

·         Bod anghenion tai ar gyfer tai fforddiadwy yn Nhywyn yn uchel iawn gyda dros 40 yn aros am dai dwy lofft a dros 60 am fflatiau un / dwy lofft gyda chanran uchel ohonynt wedi cofrestru yn unigolion dros 55 oed

·         Credir bod tystiolaeth gadarn i gyfiawnhau adeiladu’r datblygiad, yn ymateb i’r angen ac wrth wneud hynny yn adfywio safle sydd yn segur  

           

(c)       Nododd aelod ei phryder ynglŷn â’r safle gan ei fod yn safle bychan iawn ac o ganlyniad yn creu gor-ddatblygiad. Pryderwyd hefyd am fynediad i’r safle a theimlwyd nad oedd y cynlluniau gerbron yn adlewyrchu hyn ac y byddai’n fuddiol i’r Pwyllgor Cynllunio ymweld â’r safle er mwyn cael gweld drostynt eu hunain maint Heol Talyllyn. Yn ogystal, pryderwyd am leoliad y safle biniau a oedd yn gor-edrych ar ffenestri byngalo cyfagos. Tra’n datgan nad oedd yn erbyn caniatáu’r cais a bod angen tai fforddiadwy cymdeithasol yn Nhywyn, roedd yr Aelod o’r farn y dylid gohirio cymryd penderfyniad a chynnal ymweliad â’r safle gan ei fod yn ddatblygiad helaeth. 

 

(ch)   Cynigwyd ac eiliwyd i’r Pwyllgor Cynllunio ymweld â’r safle.

 

(d)      Mewn ymateb i sylwadau’r Aelod, esboniodd y Rheolwr Cynllunio bod y swyddogion wedi ystyried cynnal ymweliad safle ond yn seiliedig ar y wybodaeth a’r lluniau gerbron, ac y gellir ail-leoli’r safle biniau, roeddynt o’r farn na fyddai’n realistig gohirio cymryd penderfyniad ar y cais gan fod Cartrefi Cymunedol Gwynedd wedi negodi gyda’r Bwrdd Iechyd i ymestyn y cyfnod i brynu’r tir tan ddechrau mis Ionawr ac na fyddai Pwyllgor Cynllunio arall cyn hynny i fedru ymdrin â’r cais.  Felly drwy ohirio cymryd penderfyniad, byddai peryg i CCG golli’r cyfle i allu prynu’r tir. 

 

(dd)   Pleidleisiwyd ar y cynnig i ymweld â’r safle ond fe syrthiodd y cynnig hwn.  

 

(e)       Cynigwyd ac eilwyd i ganiatau’r cais ac fe gariodd y bleidlais.

 

(f)        Mewn ymateb i bryder amlygwyd ynglŷn â diffyg darpariaeth maes chwarae i blant fel rhan o’r cynllun, esboniodd y Rheolwr Cynllunio bod y mater hwn yn cael ei gyfarch ym mhwynt 5.5 o’r adroddiad ac nad oedd yn cyrraedd y trothwy am yr angen i lecyn chwarae gan fod rhan helaeth o’r datblygiad ar gyfer unigolion yn yr oedran dros 55 oed.

 

(g)       Amlygwyd y pwyntiau canlynol gan Aelodau unigol o blaid yr argymhelliad i’w ganiatau:

 

·         Cefnogol i’r bwriad gan fod y cynllun yn cynnwys tai bychan ac sydd yn hynod o bwysig i’r ardal ac yn dymuno gweld cynlluniau tebyg mewn ardaloedd eraill o Wynedd

·         Bod dros 3,000 o unigolion ar restr aros am dai ac y byddai’r datblygiad yn cyfrannu at leihau’r rhestr

 

Penderfynwyd: Caniatáu yn unol â’r amodau isod:

 

1        Cychwyn o fewn 5 mlynedd.

2        Unol gyda’r cynlluniau.

3        Cytuno llechi to.

4        Cytuno gorffeniad waliau allanol.

5        Tynnu hawliau datblygu a ganiateir ar gyfer estyniadau ac adeiladau cwrtil ar gyfer y tai fforddiadwy.

6        Dim dŵr wyneb i gael ei waredu i’r garthffos gyhoeddus oni bai y bydd yr awdurdod cynllunio lleol yn cytuno i hynny yn ysgrifenedig.

7        Llefydd parcio a mynedfeydd i’w cwblhau yn unol gyda chynlluniau ac i fod yn weithredol cyn i’r tai gael eu meddiannu am y tro cyntaf.

8        Cyflwyno cynllun tirlunio er cymeradwyaeth o fewn deufis i gychwyn datblygu.

9        Amserlen gweithredu cynllun tirlunio.

10     Amod safonol cyfyngu’r datblygiad i dai fforddiadwy yn unig.

11     Cyfyngu oriau gweithio ar y safle.