Agenda item

Dymchwel tŷ presennol ac adeiladu tŷ 3 llawr yn ei le

 

 

AELOD LLEOL:         Cynghorydd Dewi Wyn Roberts

 

 

Dolen i’r dogfennau cefndir perthnasol

Dymchwel tŷ presennol ac adeiladu tŷ 3 llawr yn ei le.

 

(a)       Ymhelaethodd y Rheolwr Cynllunio ar gefndir y cais, gan nodi fod y cais yn ail gyflwyniad o gais a wrthodwyd gan y Pwyllgor ar 25 Medi 2017. Nododd bod yr ymgeisydd yn datgan bod y bwriad wedi ei ddiwygio drwy leihau maint y tŷ bwriedig er ymateb i bryderon a godwyd gan y Pwyllgor a rhesymau gwrthod y cais blaenorol.

 

          Nodwyd y lleolir y safle ar benrhyn Abersoch, y tu mewn i ffin datblygu’r pentref a thu mewn i Ardal o Harddwch Naturiol Eithriadol Llŷn (AHNE).

 

          Tynnwyd sylw at y sylwadau ychwanegol a dderbyniwyd.

 

          Eglurwyd bod polisïau lleol a chenedlaethol yn gefnogol i ail-ddefnyddio tir a ddefnyddiwyd o’r blaen ar gyfer datblygiadau yn hytrach na defnyddio tir gwyrdd. Roedd y bwriad yn unol â pholisi TAI 13 o’r CDLl a oedd yn ymwneud yn benodol gyda dymchwel a chodi tŷ newydd y tu mewn i ffin pentref.

 

          Nodwyd yr ystyrir y byddai dyluniad y tŷ, yn arbennig felly'r edrychiad yn wynebu’r môr, yn gweddu gyda’r safle oherwydd ei fod yn dilyn siâp, gosodiad a phroffil y safle a’r defnydd o ddeunyddiau yn creu dyluniad ysgafn. Nodwyd nad oedd gan yr Uned AHNE wrthwynebiad i’r bwriad ar y sail yma.

 

          Adroddwyd bod nifer o wrthwynebiadau a dderbyniwyd yn nodi eu bod yn teimlo nad oedd y bwriad yn gweddu a theimlir bod y gwrthwynebiadau hyn wedi eu cyflwyno oherwydd bod y dyluniad yn wahanol i eiddo eraill yn yr ardal. Nid oedd hyn ohono’i hun yn golygu bod y bwriad yn cael effaith niweidiol ar gymeriad yr ardal.

 

          Ystyriwyd bod y bwriad yn addas i’r lleoliad a’i gyd-destun ac na fyddai’n cael effaith andwyol ar yr AHNE. Hefyd, oherwydd y lleoliad yn erbyn cefndir adeiledig Abersoch ni ystyrir y byddai’r bwriad yn amharu’n sylweddol ar olygfeydd i mewn ac allan o’r AHNE.

 

          Nodwyd yr ystyrir bod y dyluniad a dwysedd ar y safle yn dderbyniol a bod y bwriad yn cyd-fynd â’r polisïau perthnasol.

 

          Argymhellwyd i’r Pwyllgor ganiatáu’r cais efo’r amodau a nodwyd yn yr adroddiad ynghyd ag amod ychwanegol o ran oriau gweithio a Chynllun Rheoli Adeiladu er mwyn gwarchod mwynderau trigolion lleol.

 

(b)     Yn manteisio ar yr hawl i siarad nododd asiant yr ymgeisydd, y prif bwyntiau canlynol:

·         Bod yr ymgeisydd yn hytrach na chyflwyno apêl ar y cais blaenorol a wrthodwyd wedi diwygio’r bwriad er mwyn cyfaddawdu o ran y pryderon a godwyd;

·         Bod maint y tŷ wedi ei leihau 25% gyda lleihad yn lled y tŷ o 1.5m, dyfnder 3.5m ac uchder o 1m. Byddai’n sicrhau na fyddai’r tŷ yn amharu ar yr olygfa o’r Llwybr yr Arfordir tu cefn y safle;

·         Bod y lluniau a gyflwynwyd yn dangos na fyddai’r datblygiad i’w weld o gyfeiriad Lôn Pont Morgan;

·         Byddai’r tŷ’n cymryd 25% o’r safle gyda gweddill y safle ar gael i dirweddu’n effeithiol. Roedd tai llawer mwy yn yr ardal (oddeutu 60% o’r safle) gyda llai o dir ar gael i dirweddu;

·         Bod y safle tu mewn i’r AHNE ond yn bwysig cofio ei fod o fewn y ffin datblygu.

 

(c)     Gwrthwynebwyd y cais gan yr aelod lleol (nad oedd yn aelod o’r Pwyllgor Cynllunio hwn), gan nodi’r prif bwyntiau canlynol:-

·         Pryder yn lleol bod y bwriad yn or-ddatblygiad ac ni fyddai’n gweddu i’r safle;

·         Er bod newidiadau i’r cynlluniau gwreiddiol roedd y tŷ’n parhau i fod yn 3 llawr ac yn fwy na ôl-troed y tŷ gwreiddiol;

·         Byddai’r bwriad yn cael effaith andwyol ar yr AHNE. Pryder Cyd-Bwyllgor Ymgynghorol AHNE Llŷn o ran ôl-troed llawer mwy na’r gwreiddiol ac effaith gronnol datblygiadau o’r fath yn yr AHNE;

·         Ddim yn cytuno efo casgliad y swyddogion bod y bwriad yn bodloni gofynion Polisïau PCYFF 3 a PCYFF 4 o’r CDLl;

·         Synnu nad oedd cyfeiriad at sylwadau’r Cyd-Bwyllgor Ymgynghorol ac nid oedd ymgynghori pellach ynglŷn â’r newidiadau;

·         Gofyn i’r Pwyllgor ohirio’r cais er mwyn rhoi cyfle i’r Cyd-Bwyllgor Ymgynghorol gyflwyno sylwadau ar y cais;

·         Os na ohirir y cais gofyn i’r Pwyllgor wrthod y cais ar sail or-ddatblygiad ac effaith niweidiol ar yr AHNE.

 

Mewn ymateb i sylwadau’r aelod lleol, nododd yr Uwch Reolwr Gwasanaeth Cynllunio y gwrthodwyd y cais blaenorol ar sail or-ddatblygiad o’r safle, roedd lleihau swmp y datblygiad yn lleihau’r effaith weledol. Amlygodd sylwadau’r Uned AHNE “Credir fod y deunyddiau ar y cyfan yn addas i’r safle a bydd y cyfuniad ohonynt, a’r to gwyrdd, yn gymorth i’r datblygiad weddu i’r safle heb amharu ar yr AHNE.”

 

(ch)   Cynigwyd i ohirio’r cais er mwyn rhoi cyfle i Gyd-Bwyllgor Ymgynghorol AHNE Llŷn gyflwyno sylwadau ar y cais. Nodwyd, o ystyried mai prif reswm gwrthod y cais blaenorol oedd sylwadau’r Cyd-Bwyllgor Ymgynghorol fe ddylid rhoi cyfle iddynt ystyried y cais.

 

          Eiliwyd y cynnig.

 

Penderfynwyd:   gohirio’r cais er mwyn rhoi cyfle i Gyd-Bwyllgor Ymgynghorol AHNE Llŷn gyflwyno sylwadau ar y cais.