Agenda item

Dymchwel uned storio bresennol ac adeiladu 2 uned wyliau (cais diwygiedig).

 

AELOD LLEOL:         Cynghorydd Gruffydd Williams

 

 

Dolen i’r dogfennau cefndir perthnasol

Dymchwel uned storio bresennol ac adeiladu 2 uned wyliau (cais diwygiedig)

 

(a)     Ymhelaethodd yr Uwch Swyddog Rheolaeth Datblygu ar gefndir y cais, gan nodi bod y safle yn gorwedd yng nghefn gwlad ac oddi fewn i’r tirwedd o ddiddordeb hanesyddol eithriadol Llŷn ac Ynys Enlli.  Ceir mynediad i’r safle ar hyd ffordd ddi-ddosbarth sydd gyda mynediad i ffordd ddosbarth 2 oddeutu 85 medr i’r de o’r safle.

 

Cyfeiriwyd at yr ymatebion i’r broses ymgynghori statudol ynghyd â’r polisïau cynllunio perthnasol o fewn yr adroddiad.

 

Nodwyd bod polisi TWR 2 Cynllun Datblygu Lleol yn gefnogol i ddatblygu llety gwyliau parhaol cyn belled a’u bod o ansawdd uchel o ran dyluniad, gosodiad ac edrychiad. Galluoga’r polisi hefyd i godi llety sy’n adeilad newydd os yw’r safle o fewn ffin datblygu neu’n gwneud defnydd o safle addas a ddatblygwyd o’r blaen.  Ceir uned wyliau bresennol ym Mwthyn Tynpwll a byddai’r bwriad dan sylw yn ymestyn sefydliad llety gwyliau presennol. Ystyrir felly bod y datblygiad yn dderbyniol o ran egwyddor adeiladu unedau gwyliau newydd.

 

Eglurwyd bod y cais yn ailgyflwyniad o gais blaenorol a gafodd ei wrthod oherwydd bod graddfa’r bwriad yn ormodol ar gyfer y safle ac nad oedd yn adlewyrchu’r hyn oedd o’i amgylch ac ystyrir o ran niferoedd unedau a dyluniad bod y bwriad dan sylw yn welliant ar y cais blaenorol.

 

Nid oedd gwrthwynebiad gan yr Uned Drafnidiaeth o safbwynt materion trafnidiaeth a mynediad.

 

Yn dilyn asesu’r holl ystyriaethau ynghyd â’r ymatebion a sylwadau, ystyrir bod y defnydd, dyluniad a’r deunyddiau yn dderbyniol ac ddim yn amharu ar fwynderau, cymeriad neu edrychiad y safle na’r ardal o’i gwmpas.  Argymhelliad y swyddogion ydoedd caniatáu’r cais a oedd yn cynnwys amod i gyfynu’r defnydd i uned gwyliau a chadw cofrestr o’r defnyddwyr.

 

(a)     Nododd yr Aelod Lleol nad oedd yn gefnogol i’r cais am y rhesymau canlynol:

 

·         nad oedd prinder llety na galw am fwy o lety gwyliau

·         y byddai dymchwel y cwt gwair ac adeiladu dau uned yn ei le yn gosod cynsail i geisiadau cyffelyb i’r dyfodol

·         ni ddylid caniatáu i droi adeiladau fferm fel hyn

 

(b)   Ategodd Aelod y sylwadau uchod gan nodi ymhellach bod digon o dai haf a rhoddodd enghraifft o 4 tŷ wedi eu gwerthu ym mhentref Edern yn ddiweddar ar gyfer tai gwyliau.  Pryderwyd hefyd am y tueddiad i ail-enwi a seisnigeiddio enwau tai.  Gwelwyd stadau o dai yn y pentref ar gyfer tai gwyliau a gofynnwyd faint o’r tai hyn oedd wedi cofrestru fel unedau gwyliau ar gyfer treth busnes.

(c)       Cynigwyd ac eilwyd i wrthod y cais yn seiliedig ar ormodedd o dai gwyliau.

 

(dd)  Mewn ymateb, eglurodd y Rheolwr Cynllunio y gellir gofyn i swyddogion wneud mwy o waith ymchwil er mwyn asesu’r effaith gronnol o unedau gwyliau, fodd bynnag eglurwyd nad oedd cystadleuaeth yn fater cynllunio.  Fodd bynnag, pwysleislwyd bod polisi TWR2 yn caniatau adeilad newydd ar safle priodol ac roedd y swyddogion o’r farn bod y safle dan sylw yn un priodol.

 

(d)       Ychwanegodd yr Uwch Gyfreithiwr y byddai’n rhaid bod yn wyliadwrus os yn ei wrthod ar hyn o bryd oherwydd nad oedd tystiolaeth rhifiadol.

 

(e)    Yn sgil y drafodaeth uchod, cynigiwyd ac eilwyd gwelliant i ohirio cymryd penderfyniad ar y cais hyd nes derbynnir mwy o dystiolaeth ynglŷn â’r niferoedd o unedau gwyliau  a’r effaith gronnol, gan gynnwys gwybodaeth ar faint o dai gwyliau sydd wedi cofrestru fel busnes.

 

(ff)    Mewn ymateb, anghytunodd Aelod â’r gwelliant uchod ac apeliodd i dderbyn adroddiad cytbwys di-duedd yn adlewyrchu’r gwir sefyllfa ynglŷn â faint o unedau gwyliau sydd yn yr ardal.  ‘Roedd o’r farn bod modd ymchwilio cofrestriad ar gyfer treth busnes.  Ar hyn o bryd, teimlai’n gryf nad oedd digon o wybodaeth wedi ei gyflwyno gyda’r cais.   Ychwanegodd Aelod y gellir cael tystiolaeth boed hyn yng nghynnydd casgliadau ysbwriel i fusnesau sydd wedi cofrestru fel unedau gwyliau.

 

(f)        Awgrymwyd y byddai modd i aelodau lleol fod o gymorth drwy gyflwyno gwybodaeth ynglŷn â faint o unedau gwyliau sydd ar gael yn lleol. 

 

(ng)   Mewn ymateb,  nododd y Rheolwr Cynllunio bod cynllun busnes wedi ei gyflwyno ond o bosib nad oedd yn cyfarch pryderon yr aelodau fel amlinellir uchod ac fe sicrhawyd y byddai’r swyddogion yn ymchwilio ymhellach i’r effaith gronnol.  

 

(g)       Ychwanegodd yr Uwch Gyfreithiwr, tra’n derbyn bod gan pob Aelod wybodaeth leol, ni ellir gwrthod y cais hyd nes derbynnir ystadegau penodol gan y swyddogion ac fe all tystiolaeth gan yr aelodau lleol gyrannu at hyn.

 

Pleidleiswyd ar y gwelliant i’w ohirio ac fe gariodd.

 

PENDERFYNWYD:        Gohirio’r cais hyd nes derbynnir adroddiad cytbwys yn cynnwys gwybodaeth  ynglŷn ag effaith gronnol o unedau gwyliau yn lleol.