Agenda item

I dderbyn Adroddiad Blynyddol y Gronfa Bensiwn 2017-2018

Cyflwynodd y Pennaeth Cyllid Adroddiad Blynyddol y Cynllun Pensiwn am 2017/18

Er bod 2017/18 wedi bod yn flwyddyn heriol adroddwyd bod y Gronfa wedi derbyn dychweliadau cadarnhaol ac wedi adeiladu ar y lefel ariannu. Bu cynnydd o 10.8% mewn aelodau’n cyfrannu i’r cynllun a chynnydd o 4.3% yn y niferoedd pensiynwyr sydd yn y cynllun. Diolchwyd i’r cyflogwyr oedd wedi cyflwyno data yn gywir a chyflym ac eglurwyd bod hyn yn hanfodol er mwyn i’r Uned Bensiynau ddiweddaru cofnodion cyflogwyr a chynhyrchu buddion blynyddol yn amserol ar gyfer bodloni’r Rheoleiddiwr Pensiynau. Nodwyd y bydd cyflwyno data cywir ac amserol yn hanfodol ar gyfer 2019 fel dyddiad prisiad teirblynyddol.

Ategodd y Pennaeth Cyllid ei fod wedi holi Actiwari’r Gronfa ynglŷn â beth fyddai canlyniad prisiad teirblynyddol 2019 yng nghyd-destun penderfyniad Actiwari’r Llywodraeth i godi cyfradd cyfrannu’r Cynllun Pensiwn Athrawon o 16% i 24% ym mis Medi 2019. Eglurwyd bod y naid sylweddol yma yn digwydd oherwydd bod lefelau cyfraddau’r athrawon yn ceisio dal i fyny o lefelau hanesyddol oedd yn rhy isel ac addasiad i raddfa disgownt SCAPE oedd ond yn cael ei adolygu bob pum mlynedd. Mynegwyd nad oedd y ffactorau hyn yn mynd i effeithio’r Cynllun Pensiwn Llywodraeth Leol.

Cyfeiriwyd at ymrwymiadau’r cynllun Pensiwn, gan adrodd bod y Gronfa wedi bod yn gweithredu’n ddarbodus, a’r ffactor fydd yn dylanwadu fwyaf ar y prisiad fydd dychweliadau buddsoddi a gwerth yr asedau. Er  i’r farchnad stoc fod yn heriol yn 2017/18 adroddwyd bod y Gronfa yn parhau i adeiladu ar berfformiad buddsoddi rhagorol 2016/17 ac yn 2017/18 cafwyd dychweliadau buddsoddi o £56m (3%) gan asedau’r Gronfa. Roedd hyn yn adlewyrchu marchnadoedd gwannach o’i gymharu â 22% a ddychwelwyd y flwyddyn flaenorol, ond roedd y cynnydd pellach a welwyd yn ystod chwarter cyntaf 2018/19 yn ddigon i weld gwerth y Gronfa yn tyfu i fwy na dau biliwn o bunnoedd.

Eglurwyd bod elfen o dwf sylweddol 2016/17 yn adlewyrchu effaith cwymp y bunt ar werth buddsoddiadau byd eang. Dosbarthwyd graff a gafodd ei baratoi gan Ymgynghorydd Buddsoddi’r Gronfa oedd yn gwahanu’r elfennau twf mewn gwerth ecwiti rhwng gwerth arian lleol a gwerth mewn punnoedd. Ategwyd bod y twf mewn gwerth asedau yn galonogol gyda Chronfa Gwynedd wedi ariannu 91% ym mhrisiad teriblynyddol 2016 (oedd o fewn y 10 uchaf yng Nghymru a Lloegr) wrth ddefnyddio rhagdybiaethau actiwaraidd darbodus. Ar gyfer prisiad 2019, dylai cryfder y Gronfa ganiatáu cymryd agwedd hyblyg tuag at gyfraddau cyfrannu cyflogwyr effeithiol o 2020.

Nodwyd y byddai trefn buddsoddi i’r dyfodol yn newid a chyfeiriwyd at egwyddorion buddsoddi cyfrifol a datblygu Partneriaeth Pensiwn Cymru. Gyda strategaeth fuddsoddi’r Gronfa yn canolbwyntio ar asedau twf, disgwylir dychweliadau mwy deniadol na’r dychweliadau gellid ennill o fuddsoddiadau risg isel. Yn adeiladu ar hynny adroddwyd bod Pwyllgor Pensiynau Gwynedd a Bwrdd Pensiwn y Gronfa, ar y cyd, wedi datblygu egwyddorion buddsoddi cyfrifol sydd yn ystyried ffactorau amgylcheddol, cymdeithasol a llywodraethu.

Ategodd Cadeirydd y Bwrdd Pensiwn bod angen gwybodaeth dryloyw yng nghyd-destun arian sydd yn cael ei fuddsoddi yn erbyn dychweliadau gorau i’r Gronfa. Cyfeiriodd at yr egwyddorion roedd y Pwyllgor a’r Bwrdd wedi eu paratoi a diolchwyd i’r swyddogion ac i Hymans am drefnu’r gweithdy a chydlynu’r drafodaeth. Ategodd bod y flwyddyn wedi bod yn un brysur, ond bod sylfaeni cryf wedi eu gosod.

Adroddwyd bod gan y Pwyllgor Pensiynau ddyletswydd ymddiriedol orfodol i sicrhau bod ystyriaethau ariannol yn cario mwy o bwysau nac ystyriaethau anariannol, ond yn cydnabod hefyd bod ganddynt ddyletswydd i fod yn fuddsoddwyr cyfrifol i ymgysylltu gyda chwmnïau a newid ymddygiad corfforaethol i ddylanwadu ar allbynnau. Ategwyd bod y Gronfa yn agored i risgiau megis newid yn yr hinsawdd, a’r disgwyliad i drawsnewid i economi carbon isel. Y bwriad yw gwella deilliannau ariannol wrth reoli pa mor agored i risgiau o’r fath y mae’r Gronfa.

Adroddodd Cadeirydd y cyfarfod bod gwaith yn parhau i bŵlio buddsoddiadau gyda saith cronfa Cynllun Pensiwn Llywodraeth Leol arall yng Nghymru, gyda’r Bartneriaeth wedi ei sefydlu yn ffurfiol ym mis Mawrth 2017. Ategwyd bod Link Asset Services wedi ei benodi fel gweithredwr llwyfan buddsoddi mewn partneriaeth gyda Russell Investments fel rheolwr buddsoddi ac ymgynghorydd pŵl. Er y pŵlio, bydd yr 8 gronfa yn cael parhau i weithredu eu strategaethau buddsoddi unigol. Yn Awst 2018, awdurdodwyd ACS Partneriaeth Cymru gan y Financial Conduct Authority i gynnig dwy is-gronfa ecwiti byd eang i ddisodli mandadau ar wahân y cronfeydd unigol gyda rheolwyr buddsoddi. Adroddwyd y byddai Gwynedd yn trosglwyddo asedau i’r is-gronfeydd.

Amlygodd Cadeirydd y cyfarfod bod y newidiadau i reoli cronfa bensiwn yn newid sylweddol gyda sawl un yn pryderu o rôl y Pwyllgor o fewn y drefn newydd. Yn dilyn cyflwyniadau gan y 10 Rheolwyr Asedau, amlygwyd bod mwy o gyfleoedd ar  gael drwy gydweithio. Cyfeiriwyd at y Rheolwyr Asedau newydd gan amlygu ychydig ar eu harbenigedd amrywiol. Nodwyd y byddai’r dewis eang mewn arbenigedd o fudd i Wynedd. Bwriedir trosglwyddo £600m o asedau ecwiti byd eang yn hafal rhwng dwy is-gronfa y Bartneriaeth. Bydd disgwyl gwireddu arbedion pellach o ffioedd drwy pŵlio, ynghyd ag elwa ar fanteision nad oedd yn bosib fel cronfa unigol, gan ddal i gadw perchnogaeth a chyfrifoldeb am fuddsoddiadau’r Gronfa.

  Etholwyd y Cynghorydd Stephen Churchman yn Gadeirydd cyntaf cydbwyllgor     y Bartneriaeth. Mynegodd fod y cyfnod wedi bod yn un cyffrous a bod cynnydd        sylweddol wedi ei wneud yng ngwaith y Bartneriaeth. Diolchwyd i’r swyddogion       am eu gwaith ac i’w gyd-aelodau ar y Pwyllgor a’r Bwrdd Pensiwn am eu cefnogaeth.

Diolchwyd i bawb am eu cefnogaeth yn ystod 2017/18.

Mewn ymateb i gwestiwn ynglŷn ag eraill fydd yn defnyddio’r rheolwyr asedau      a ddewiswyd   gan Russell Investments, nodwyd bydd pob cronfa (gan           gynnwys Gwynedd) o’r wyth gronfa   yng Nghymru yn defnyddio naill neu’r llall          o’r ddwy is-gronfa. Ategwyd mai Gwynedd a Chastell Nedd yn unig fydd yn buddsoddi yn y ddwy is-gronfa, gyda Russell Investments yn gweithredu   trosolwg rheolaethol dros yr ail is-gronfa. Nodwyd bod y saith cwmni yn yr ail   is-gronfa yn newydd i bob un o’r 8 cronfa Cymreig.  Eglurwyd y bu cyfyngiadau yn y gorffennol o ran gallu cronfeydd C.P.Ll.L. i gaffael rheolwyr asedau tramor,          ond cyfleoedd yn codi gyda hyn.

            PENDERFYNWYD DERBYN ADRODDIAD BLYNYDDOL Y GRONFA    BENSIWN AM 2017/18