Agenda item

- Polisi Trwyddedu Gyrru Cerbyd Hacni/Hurio Preifat Gyfunol

- Polisi Trwyddedu Cerbydau Hacni/Hurio Preifat

- Polisi Trwyddedu Gweithredwyr Hurio Preifat

 

Cyflwyno adroddiad Pennaeth yr Adran Rheoleiddio i dderbyn cefnogaeth y pwyllgor ar gyfeiriad lefel uchel y newidiadau arfaethedig parthed i bolisïau trwyddedu tacsi

·         Polisi Trwyddedu Gyrru Cerbyd Hacni/Hurio Preifat Gyfunol

·         Polisi Trwyddedu Cerbydau Hacni/Hurio Preifat

·         Polisi Trwyddedu Gweithredwyr Hurio Preifat

 

Cyflwynwyd adroddiad Pennaeth yr Adran Rheoleiddio yn gofyn am gefnogaeth y pwyllgor i adolygu’r polisïau  trwyddedu a chreu polisi unedig yn hwyrach na thri polisi /  dogfen arwahan. Nodwyd hefyd bod y Pwyllgor hwn yn ei gyfarfod ar 22 Mehefin 2015 wedi penderfynu bod angen diweddaru ac adolygu'r polisïau a gweithdrefnau sy’n ymwneud a Thrwyddedau Tacsi yn dilyn cynnydd yn y nifer o geisiadau i drwyddedu cerbydau sydd ddim yn cwrdd â’r polisi ac yn dilyn y Ddeddf Dadreoleiddio 2015 a’r mesurau sy’n cael effaith ar y Ddeddf Llywodraeth Leol (Darpariaethau Amrywiol) 1976.

 

O safbwynt polisi unedig, nodwyd bod  Cymdeithas Llywodraeth Leol: (cyf ‘Taxi and PHV Licensing - Councillor’s Handbook’ dyddiedig Mawrth 2015) yn annog yn gryf i awdurdodau Trwyddedu greu polisi unedig sy’n dod a’r holl bolisïau a’u gweithdrefnau i un lle. Bydd creu polisi unedig sydd yn cael ei adolygu’n rheolaidd yn rhoi eglurder i yrwyr a gweithredwyr, yn ogystal â chryfhau sefyllfa’r Cyngor petai her yn erbyn penderfyniad yn y llys.  

 

Tynnwyd sylw'r Aelodau at y newidiadau arfaethedig lefel uchel y buasai angen eu hystyried yng nghyd -destun gyrwyr, cerbydau a gweithredwyr gan roi sylw penodol i ‘hawliau taid’ , ‘manyldeb oedran cerbyd’ a ‘mynediad cadair olwyn’.

 

O dan ‘hawliau taid’ cynigiwyd:

 

Cynnig 1: Bod statws ‘Hawliau Taid’ perchnogion cerbydau hacni Arfon yn cael ei dynnu o’r polisi a bod holl berchnogion cerbydau hacni yn ddarostyngedig i’r un amodau a gofynion cerbyd.  Cynigir hefyd bod y gofynion ar gyfer holl gerbydau ym mhob parth yn cael eu huno er mwyn creu polisi mwy tryloyw a perthnasol i holl berchnogion ar draws y sir.

 

O dan ‘manyldeb oedran cerbyd’ cynigiwyd,

 

Cynnig 2: Ym mhob parth, rhaid cais i drwyddedu cerbyd am y tro cyntaf fel Cerbyd Hacni neu Gerbyd Hurio Preifat fod mewn perthynas â cherbyd sy’n llai na 6 mlwydd oed ar y dyddiad pan fydd y cais cyflawn wedi ei dderbyn gan yr Awdurdod Trwyddedu.

 

Cynnig 3: Ym mhob parth, rhaid cais i adnewyddu trwydded Cerbyd Hacni neu Gerbyd Hurio Preifat fod mewn perthynas â cherbyd sy’n llai na 12 mlwydd oed ar y dyddiad pan ddaw’r drwydded gyfredol i ben.  

 

Cynnig 4: Bydd Cyngor Gwynedd yn caniatáu adnewyddu trwydded Cerbyd Hacni neu Gerbyd Hurio Preifat y tu hwnt i’r terfyn oedran uchaf o 12 mlynedd os gellir dangos bod y cerbyd mewn ‘cyflwr eithriadol’.

 

O dan ‘mynediad cadair olwyn’ cynigiwyd:

 

Cynnig 5: Bydd yr holl berchnogion yn cael eu hannog i drwyddedu cymaint o gerbydau sy’n hygyrch i gadair olwyn y maent yn ystyried yn angenrheidiol.  Fodd bynnag, bydd Cyngor Gwynedd yn gosod gofyniad bod rhaid oeliaf 1 cerbyd hacni mewn fflyd o 7 cerbyd hacni fod yn gerbyd sy’n hygyrch i gadeiriau olwyn.  Felly os yw maint y fflyd yn 14 cerbyd hacni byddai gofyn i o leiaf 2 o’r 14 cerbyd fod yn gerbydau hygyrch i gadeiriau olwyn.  

 

Rhagwelwyd y byddai Cynigion 1 - 5 yn cael eu hystyried fel newidiadau dadleuol i’r polisi cyfredol ac amodau Cerbydau Hacni a Cherbydau Hurio Preifat gan rhai perchnogion neu ddefnyddwyr, yn enwedig yn ardal Arfon.  Fodd bynnag, amlinellwyd y byddai’r newidiadau hyn yn cael eu gweithredu yn ysbryd ‘Ffordd Gwynedd’ ac yn sicrhau cysondeb i bawb ar draws y parthau. Nodwyd bod  amrywiaeth i ofynion yn gymhleth ac felly'r gobaith yw cyflwyno polisïau sydd yn cyfarch pobl Gwynedd a sicrhau gwasanaeth Trwyddedu effeithiol ar gyfer holl berchnogion a defnyddwyr.

 

O ran amserlen, nodwyd bod yr Aelod Cabinet yn awyddus i’r Pwyllgor dderbyn copi drafft o’r polisi unedig cyn dechrau ymgynghoriad. Bydd y swyddogion yn anelu at gyflwyno dogfen drafft i’r cyfarfod nesaf (Rhagfyr 7fed 2015)

 

PENDERFYNWYD derbyn yr adroddiad yn unol â’r argymhellion diwygiedig:

 

Bod y Pwyllgor yn awdurdodi’r Pennaeth Rheoleiddio i gychwyn adolygiad o’r polisïau trwyddedu mewn perthynas â gweithredwyr, cerbydau a gyrwyr hacni a hurio preifat.

 

Bod y Pwyllgor yn cefnogi cyfeiriad cyffredinol Cynigion 1 i 5 fel man cychwyn ar gyfer yr adolygiad.

 

 

Dechreuodd y cyfarfod am 10.00am a daeth i ben am 10.55am