Cyflwyno adroddiad y Pennaeth Cyllid.
Cofnod:
Cyflwynwyd adroddiad yr
Aelod Cabinet Cyllid ar Gyllideb y Cyngor ar gyfer 2019/20 er mwyn rhoddi cyfle
i’r Pwyllgor Archwilio a Llywodraethu graffu’r wybodaeth o ran ei briodoldeb
ariannol a’r risgiau perthnasol, cyn i’r adroddiad fynd gerbron y Cabinet ar 19
Chwefror.
Gosodwyd cefndir a chyd-destun i’r adroddiad gan
yr Aelod Cabinet Cyllid. Eglurodd bod yr holl aelodau
wedi cael mewnbwn mewn gweithdai
a bod ymgynghoriad cyhoeddus
wedi ei gynnal
ar Dreth y Cyngor ynghyd â’r
cynlluniau arbedion. Nododd bod trafodaethau manwl wedi arwain
at y gyllideb a argymhellwyd.
Manylodd y Pennaeth Cyllid ar gynnwys yr
adroddiad, gan nodi bod bwlch ariannol o £13 miliwn a oedd yn
cynnwys costau chwyddiant o £7.5 miliwn a galw anorfod am wasanaethau o £4 miliwn. Nododd nad
oedd y cynnydd grant gan Lywodraeth Cymru i’r awdurdodau
lleol yn ddigonol i gwrdd
â’r costau hyn. Cyfeiriodd at Atodiad 2 o’r adroddiad
a oedd yn
cynnwys manylion bidiau ariannol anorfod i ymateb
i’r pwysau ar wasanaethau, gwerth cyfanswm o £2.5 miliwn. Ymhelaethodd bod y bidiau ariannol wedi eu trafod
mewn gweithdai yn fis Rhagfyr,
lle'r oedd yr aelodau’n cydsynio
bod y gwariant yn anorfod. Amlygodd bod gofynion gwario 2019/20, cyn arbedion, yn
£253.2 miliwn.
Nododd bod £2.48 miliwn o arbedion eisoes wedi’u cymeradwyo,
bod £2.45 miliwn o arbedion
arfaethedig, £0.5 miliwn o arbedion effeithlonrwydd pellach, a oedd yn dod i gyfanswm o £5.4 miliwn o arbedion i leihau’r bwlch.
Tynnodd sylw at yr hyn
a argymhellir i’r Cabinet ei gymeradwyo, sef:
“(a) Argymell i’r Cyngor (yn ei gyfarfod ar 7
Mawrth 2019) y dylid:
1.
Sefydlu cyllideb o £247,797,900 ar gyfer 2019/20 i’w ariannu drwy Grant Llywodraeth o £176,551,790 a
£71,246,110 o incwm o’r Dreth Cyngor gyda chynnydd o 5.5%.
2. Ychwanegu £18,316,130 at y rhaglen gyfalaf i’w wario yn 2019/20 er mwyn
sefydlu rhaglen gyfalaf gwerth £34,991,250 erbyn 2019/20 i’w ariannu o’r
ffynonellau a nodir yn Atodiad 4 i’r adroddiad.
(b) Cymeradwyo symud ymlaen i weithredu’r rhestr
cynlluniau arbedion sy’n Atodiad 3, er mwyn sefydlu’r gyllideb argymhellir i’r
Cyngor llawn.
(c) Nodi’r Strategaeth Ariannol Tymor Canol a’r
tafluniadau sy’n Atodiad 8, a mabwysiadu’r cynllun sy’n rhan 18-20 ohono.”
Nododd bod yr hyn a
argymhellir yn amodol ar benderfyniad y Cabinet i gymeradwyo symud ymlaen i weithredu’r
cynlluniau arbedion a oedd wedi eu cynnwys yn Atodiad 3, neu i beidio
gweithredu ambell gynllun, fel yr awgrymwyd yn Atodiad 12. Eglurodd pe byddai
penderfyniad i beidio gweithredu’r 5 cynllun yn Atodiad 12, byddai’r ffigyrau
yn newid i:
·
sefydlu cyllideb o
£247,869,620 ar gyfer 2019/20,
·
i’w ariannu drwy Grant
Llywodraeth o £176,551,790,
·
a £71,317,830 o incwm o’r
Dreth Cyngor gyda chynnydd o 5.6%.
Cyfeiriodd at yr asesiad effaith
o safbwynt cydraddoldeb, asesiad llesiant o ran gofynion Deddf Llesiant Cenedlaethau’r Dyfodol (Cymru) 2015 ynghyd ag asesiad
o gadernid yr amcangyfrifon a oedd yn nodi’r risgiau.
Amlygodd bod Strategaeth Ariannol Tymor Canol wedi
ei lunio, er gwaethaf cryn
ansicrwydd am y dyfodol, yn bennaf oherwydd
Adolygiad Gwariant 2019 Llywodraeth San Steffan. Nododd o ystyried y tafluniadau ei fod yn debygol
byddai angen mwy o arbedion i’r dyfodol, felly byddai rhaid pwyso
ar Lywodraeth Cymru i ariannu
awdurdodau lleol yn briodol.
Rhoddwyd cyfle i’r
aelodau ofyn cwestiynau a chynnig sylwadau. Yn ystod y drafodaeth, amlygwyd y
prif bwyntiau a ganlyn:-
·
Pryder o ran effaith cynnydd
blynyddol yn Nhreth y Cyngor ar drigolion. Fyddai’n bosib codi ymwybyddiaeth o
Gynllun Gostyngiadau Treth Cyngor? Oedd cymorth ar gael i drigolion ar gyfer
hawlio gostyngiad?
·
Beth oedd lefel y risg o ran
grantiau penodol?
·
Pryder o ran canlyniadau’r
cynni ariannol a’r effaith ar drigolion o ystyried bod Gwynedd yn un o’r
ardaloedd tlotaf yng ngorllewin Ewrop. Byddai’n anodd cadw’r ddysgl yn wastad
os nad oedd y cynni ariannol yn dod i ben.
·
Bod cynnydd yn Nhreth y Cyngor
yn gyson uwch yng Ngwynedd dros y 6 mlynedd diwethaf a bod cynghorau Ynys Môn a
Conwy yn bwriadu cynyddu eu Treth Cyngor ar gyfer 2019/20 9% i ddal i fyny
efo’r cynnydd yng Ngwynedd. Siomedig o’r nifer a oedd wedi ymateb i’r ymgynghoriad
cyhoeddus. O ystyried y nifer isel o ymatebion sut gellir gwneud penderfyniad?
·
Ni ellir parhau i gynyddu
Treth y Cyngor gyda thrigolion yn gorfod gwneud dewisiadau anodd o ran gwario
eu harian.
·
Bod aelodau wedi cael digon o
gyfle i gyfrannu at y broses ac yn ddiolchgar o’r trafodaethau agored. Fe
fyddai’r sefyllfa ariannol yn llawer gwaeth heb waith yr Adran Gyllid dros y
blynyddoedd ac fe ddylai Cymdeithas Llywodraeth Leol Cymru gyfleu neges gryf i
Lywodraeth Cymru o ran yr angen i ariannu awdurdodau lleol yn briodol. Er mwyn
cael cyllideb hafal roedd rhaid dewis rhwng cynyddu Treth y Cyngor a thorri
gwasanaethau.
·
Bod yr adroddiad yn cyfeirio
at £0.5 miliwn o arbedion effeithlonrwydd pellach, a fyddai’n bosib nodi mwy o
fanylion a’r amserlen ar gyfer eu gwireddu yn yr adroddiad cyn iddo fynd
gerbron y Cyngor Llawn? Annog y Cabinet i wrando ar farn rhai o’r aelodau yn y
gweithdy a pheidio gweithredu ar y 5 cynllun a nodir yn Atodiad 12 ac o
ganlyniad cynyddu Treth y Cyngor 5.6%.
Ymatebwyd i’r cwestiynau a sylwadau, fel a ganlyn:-
·
Bod y Cyngor yn ei gyfarfod ar
6 Rhagfyr 2018 wedi mabwysiadu Cynllun Gostyngiadau Treth Cyngor 2019/20. Roedd
staff yr Uned Trethi yn unol â Ffordd Gwynedd yn rhoi cymorth i drigolion o ran
talu neu glirio eu dyled a’u cynorthwyo i hawlio gostyngiadau pan yn briodol.
·
Bod rhan fwyaf o grantiau yn
rhai Llywodraeth Cymru, roedd risg o ran lefel uwch o ddarpariaeth yn y
gyllideb a’r grant yn dod i ben. Roedd grantiau a dderbynnir gan yr Undeb
Ewropeaidd ar gyfer prosiectau penodol yn hytrach nac i ariannu gwasanaethau.
Pe byddai grant yn dod i ben byddai’n rhaid i’r Cyngor atal y ddarpariaeth
benodol neu wynebu’r gost. Roedd rhaid i’r Cyngor fyw gyda’r risg.
·
Cydweld o ran y cynni
ariannol, un o brif ystyriaethau’r Cabinet wrth asesu’r cynlluniau arbedion
oedd eu heffaith ar bobl Gwynedd. Yr unig ddewis i’r Cyngor oedd gweithredu
cynlluniau arbedion a chynnydd yn Nhreth y Cyngor er mwyn cyfarch y bwlch
ariannol.
·
Ei fod yn ddigon teg nodi’r
sylw o ran nifer yr ymatebion i’r ymgynghoriad cyhoeddus. Bu cyfle i bobl
Gwynedd leisio’u barn ar ddau achlysur, gydag ymgynghoriad ar beth oedd yn
bwysig i bobl Gwynedd ynghyd ag ymgynghoriad ar y cynlluniau arbedion. Mewn
cyfundrefn democratiaeth gynrychiadol roedd aelodau’r Cyngor yn cynrychioli eu
hetholwyr. Nodwyd gan fwyafrif o aelodau mewn gweithdy y dylid ail-edrych ar
rhai cynlluniau arbedion ac roedd y cynlluniau penodol yma i’w hystyried gan y
Cabinet cyn penderfynu ar argymhelliad i’r Cyngor Llawn.
·
Tra mai Treth Gyngor Cyngor
Gwynedd oedd y chweched uchaf yng Nghymru, roedd hyn yn deillio’n bennaf o’r
rhaniad grant a welwyd ar ad-drefnu yn 1996 wrth i’r dyraniad grant beidio
adlewyrchu’r rhaniad gwariant bryd hynny. Dengys y dystiolaeth fod cynnydd
Treth Gyngor Cyngor Gwynedd wedi bod yn llai nag 14 Cyngor arall yng Nghymru
dros y cyfnod ers hynny gan ddangos nad penderfyniadau Cyngor Gwynedd oedd wedi
golygu ei fod y 6ed uchaf ond megis yr hyn a ddigwyddodd ar ad-drefnu yn 1996.
·
Ei fod yn ddeddfwriaethol
angenrheidiol bod gan y Cyngor gyllideb hafal, yr unig opsiynau ar gael i’r
Cyngor i ariannu’r bwlch oedd gweithredu cynlluniau arbedion a chynyddu Treth y
Cyngor. Roedd angen i Lywodraeth Cymru roi sylw i’r ffordd yr ariennir
llywodraeth leol gyda sefyllfa ariannu cynghorau yn dod yn ddyrys. Bod yr hyn a
argymhellir o ran y gyllideb yn ateb lled-dderbyniol ar gyfer y flwyddyn
2019/20 ond roedd sefyllfa ariannol 2021/22 yn ddibynnol ar Lywodraeth Cymru.
·
O ran yr arbedion
effeithlonrwydd pellach, bod syniadau ar sut i wireddu’r arbedion effeithlonrwydd
pellach ac yn ffyddiog ei fod yn bosib i’w gael ond ni ellir manylu gan ei fod
yn sefyllfa sensitif o ran swyddi.
·
Cadarnhau y byddai’r 5 cynllun
i arbed a nodir yn Atodiad 12 yn derbyn ystyriaeth yn nhrafodaethau’r Cabinet
ar 19 Chwefror.
Nodwyd gwerthfawrogiad o waith swyddogion yr Adran
Cyllid, yr Aelod Cabinet Cyllid a’r Prif Weithredwr.
PENDERFYNWYD nodi a derbyn yr adroddiad a’r risgiau perthnasol.
Dogfennau ategol: