Agenda item

I ystyried cais gan Mr B

 

(copi arwahan i aelodau’r Is Bwyllgor yn unig)

 

 

 

Croesawodd y Cadeirydd bawb i’r cyfarfod. Amlygodd y byddai'r penderfyniad yn cael ei wneud yn unol â pholisi trwyddedu Cyngor Gwynedd. Nodwyd mai pwrpas y polisi oedd gosod canllawiau ar y meini prawf wrth ystyried cais yr ymgeisydd gyda’r nôd o ddiogelu’r cyhoedd drwy sicrhau:

 

•           Bod yr unigolyn yn unigolyn addas a phriodol

•           Nad yw'r unigolyn yn fygythiad i'r cyhoedd

•           Bod y cyhoedd wedi'u diogelu rhag pobl anonest

•           Bod plant a phobl ifanc wedi'u diogelu

•           Bod pobl ddiamddiffyn wedi'u diogelu

•           Bod y cyhoedd yn gallu bod yn hyderus wrth ddefnyddio cerbydau trwyddedig.

 

      Gwahoddwyd cynrychiolydd / cyflogwr yr ymgeisydd i ymhelaethu ar y cais a chynnig       eglurhad am y troseddau gyrru. Amlygodd bod Llys Ynadon Caernarfon wedi caniatáu i’r    ymgeisydd gadw ei drwydded oherwydd ei amgylchiadau personol. Eglurodd y byddai        nifer o’r pwyntiau ar y drwydded wedi ei diddymu erbyn diwedd mis Chwefror fyddai, o    ganlyniad yn gadael    cyfanswm o 5 pwynt. Amlygodd cynrychiolydd yr ymgeisydd nad         oedd wedi derbyn cwynion am Mr A ac ategodd ei fod yn gymeriad hoffus, cwrtais a            dibynnol.

 

Ymneilltuodd yr ymgeisydd a’i gynrychiolydd o’r ystafell tra bu i aelodau’r Is-bwyllgor drafod y cais.

 

PENDERFYNWYD bod yr ymgeisydd yn berson addas a phriodol ar gyfer trwydded gyrrwr cerbyd hacni/hurio preifat gyda Chyngor Gwynedd.

 

Wrth gyrraedd eu penderfyniad, roedd yr Is-bwyllgor wedi ystyried y canlynol:

 

·         Gofynion ‘Polisi Trwyddedu ar gyfer Hurio Preifat a Cherbydau Hacni Cyngor  Gwynedd’

·         ffurflen gais yr ymgeisydd

·         sylwadau llafar, a gyflwynodd yr ymgeisydd a’i gynrychiolydd yn ystod y gwrandawiad

·         llythyr geirda

·         adroddiad yr Adran Drwyddedu ynghyd a’r datganiad DBS  ac adroddiad trwydded gyrru yr ymgeisydd a ddarparwyd gan Asiantaeth Trwyddedu Gyrwyr a Cherbydau (DVLA).

 

Rhoddwyd ystyriaeth benodol i’r materion canlynol.

 

Derbyniodd yr ymgeisydd 3 pwynt cosb am oryrru ar ddau achlysur ym mis Ionawr 2016 (daeth y pwyntiau hyn i ben yn Ionawr 2019). Yn mis Chwefror 2016 derbyniodd 3 pwynt am oryrru (dod i ben Chwefror 2019) a pum pwynt pellach ym mis Gorffennaf 2016 (dod i ben Gorffennaf 2019). Nid oedd collfarnau, rhybuddion nac arnodiadau eraill gan yr ymgeisydd.

 

Ystyriwyd paragraff 2.2 o Bolisi’r Cyngor lle nodi’r nad oes rheidrwydd i berson sydd â chollfarn am drosedd ddifrifol gael ei wahardd rhag cael trwydded, ond bydd disgwyl iddo fod yn rhydd rhag unrhyw gollfarnau am gyfnod priodol fel y nodir yn y Polisi, a dangos tystiolaeth ei fod yn unigolyn addas a phriodol i ddal trwydded. Mae cyfrifoldeb ar yr ymgeisydd i brofi ei fod yn berson addas a phriodol.

 

      Ystyriwyd paragraff 4.5 sydd yn nodi bod y Gorchymyn Deddf Ailsefydlu    Troseddwyr 1974       (Eithriadau) (Diwygio) 2002 yn caniatáu’r Is-bwyllgor           ystyried pob collfarn, p’run ai ydynt    wedi eu treulio o dan Ddeddf 1974 neu            beidio.

 

Ystyriwyd paragraff 12.2 sydd yn rhestru troseddau traffig difrifol at ddibenion y Polisi. Amlygwyd nad yw SP30 (goryrru) yn cael ei gynnwys yn y rhestr ac ymhellach ym mharagraff 13.1 nodir bod troseddau traffig sydd heb eu rhestru yn y Polisi yn cael eu trin fel ‘mân droseddau traffig’. Ym mharagraff 13.3 nodir y gall mwy nag un ‘mân drosedd traffig’ (gan gynnwys goryrru) arwain at wrthod cais ac os oes mwy na dwy drosedd a/neu gyfanswm  6 pwynt ar y drwydded, caiff gyrrwr trwyddedig ei gyfeirio at Is-bwyllgor.

 

Daeth yr Is-bwyllgor i’r casgliad bod y 4 digwyddiad o oryrru yn 2016 yn amlygu bod paragraff 13.3 yn berthnasol i’r drafodaeth. Er hynny, nid yw’r paragraff yn nodi y dylid gwrthod y cais ac mai opsiwn posib yw hynny. Penderfynwyd mai trothwy yw ‘dau drosedd a/neu 6 pwynt ar y drwydded’ ar gyfer cyfeirio ac nid trothwy i’r Is-bwyllgor wrthod y cais.

 

Cytunodd yr Is-bwyllgor bod y cais wedi cyrraedd trothwy cyfeirio oherwydd bod yr ymgeisydd wedi cael ei ddal yn goryrru pedair gwaith yn 2016 gydag 8 pwynt yn fyw ar ei drwydded. Serch hynny, nodwyd y byddai 3 pwynt arall yn cael eu diddymu cyn diwedd mis Chwefror fyddai yn gadael cyfanswm o 5 phwynt ar y drwydded. Ystyriwyd hefyd mai pwyntiau yn unig a dderbyniodd yr ymgeisydd ac nid collfarnau troseddol am oryrru. 

 

Wedi pwyso a mesur y wybodaeth a gyflwynwyd, nid oedd yr Is-bwyllgor o’r farn bod y troseddau goryrru mor ddifrifol fel bod angen gwrthod y cais.