Agenda item

I dderbyn adroddiad gan Mr Dylan Bowen, Network Rail.

Ni chyflwynwyd adroddiad ysgrifenedig gan Network Rail ond bu i Mr Dylan Bowen adrodd yn llafar ar ddatblygiadau fel a ganlyn:

(i)            Bod Network Rail wedi ysgrifennu i’r rhanddeiliad i’w cynghori y byddai oediad gyda’r gwaith o gwblhau darpariaeth y lifft yng Ngorsaf Machynlleth tan mis Mawrth 2016.  Oherwydd rhagolygon y tywydd y penwythnos yma byddai’n amhosibl defnyddio’r craen ac felly hyderir y byddir yn gallu cwblhau’r gwaith erbyn mis Mawrth.

(ii)           Mewn ymateb i’r uchod datganodd Aelod siom yn hyn o beth, ac mai dim ond un platfform y gellir ei ddefnyddio ac yn ychwanegol at hyn bod teithwyr yn gorfod disgwyl yng Nghyffordd Dyfi.  Wedi dweud hynny, teimlwyd y byddai’r ddarpariaeth pan yn ei le yn welliant aruthrol.

(iii)          Mewn ymateb i gwestiwn y Cynghorydd Owain Williams ynglyn â phryder am yr oedi yng Nghyffordd Dyfi yn benodol i deithwyr o Fachynlleth i Bwllheli, eglurodd Mr Bowen o safbwynt uwchraddio y ffordd ar gyfer fforddolion (road-user) byddai Network Rail yn fwy na pharod i gydweithio gyda thrydydd parti mewn darparu cynllun ond y byddai’n mwy manteisiol pe byddai cynllun o’r fath yn cael ei gynnwys mewn cynllun trafnidiaeth ehangach.  Pwysleiswyd na fyddai Network Rail yn gyfrifol fel prif yrrwr unrhyw gynllun o safbwynt cyllido ond sicrhawyd y byddent yn cydweithio gydag awdurdodau a chyfeiriwyd at engreifftiau lle gweithredwyd cynlluniau o’r fath mewn darparu meysydd parcio yn Ne Cymru.

(iv)         Awgrymwyd y dylid cyfeirio eitem i drafod Cyffordd Dyfi i gyfarfod y Cyd-bwyllgor Rheilffordd Amwythig-Aberystwyth a Phwyllgor Rheilffordd Arfordir y Cambrian sydd i’w gynnal ar 27 Tachwedd 2015 yn Y Plas, Machynlleth.  

(v)          O safbwynt cwestiwn y Cynghorydd Gethin Williams ynglŷn â gweithredu moratoriwm ar daliadau Pont Abermaw yn ystod y cyfnod cynllunio / atgyweiriadau, nododd Mr Bowen ei fod wedi trafod y mater gyda’r Aelod yn gynharach.  Nododd ymhellach bod Network Rail yn yr un sefyllfa â Chyngor Gwynedd o safbwynt gorfod chwilio am arbedion gyda tharged i ddarganfod oddeutu 20% dros y cyfnod nesaf.  Fodd bynnag, roedd trafodaethau yn parhau gyda Chyngor Gwynedd ynglyn ag adnewyddu’r Bont gyda’r bwriad o leihau’r costau cynnal a chadw.  Ar hyn o bryd roedd yn gynamserol i adrodd yn llawn, ond nodwyd bod trafodaethau cychwynnol yn digwydd rhwng Network Rail â rhanddeiliad perthnasol gan gynnwys Cyngor Gwynedd, Parc Cenedlaethol Eryri, a CADW.

(vi)         Cyfeiriodd Mr David Roberts at bryder ynglŷn â thir ym mherchnogaeth Network Rail a elwir yn Bryn Llestair (Picnic Island) ac roedd yn ymwybodol bod Fforwm Mynediad De Eryri wedi cysylltu gyda Network Rail ynglyn â’r tir ond nad oeddynt wedi derbyn ymateb.  Defnyddir y tir gan oddeutu 1,000 o fyfyrwyr o Outward Bound Cymru.

(vii)         Mewn ymateb i’r uchod, nododd Mr Bowen nad oedd yn ymwybodol o’r mater ond os gall Fforwm Mynediad De Eryri gysylltu gydag ef a / neu drwy’r Swyddog Cefnogi Aelodau, fe sicrhaodd y byddai’n dilyn y mater i fyny.    

(viii)       Mynegwyd pryder gan y Cynghorydd Dewi Owen ynglyn a’r gordyfiant enfawr ar dir sydd ym mherchnogaeth Network Rail rhwng wal derfyn yr A493 a’r rheilffordd. Nodwyd bod corneli llym (sharp corners) ar y briffordd dan sylw a bod gwir angen torri’r gordyfiant i osgoi unrhyw ddamweiniau.

(ix)         Mewn ymateb i’r uchod, nododd Mr Bowen bod gan Network Rail gynllun rheolaeth llystyfiant a’i fod yn llwyddiannus gan bod diogelwch y rheilffordd yn flaenoriaeth i Network Rail.  Awgrymwyd pe byddai’r Aelod yn nodi union leoliadau lle mae’r gordyfiant a’u hanfon ymlaen i’r Swyddog Cefnogi Aelodau iddi ei anfon ymlaen i Mr Bowen i’w ddilyn i fyny.  Nodwyd ymhellach bod modd i Aelodau gysylltu gydag unrhyw fater o bryder drwy’r llinell gymorth sydd ar gael 24 awr ac os nad ydynt yn hapus gyda’r ymateb, yna gellir cysylltu’n uniongyrchol a Mr Bowen. 

Penderfynwyd:    (a)        Gofyn i’r Swyddog Cefnogi Aelodau gyfeirio y materion uchod i Mr Dylan Bowen, er sylw pellach.

                              (b)     Cyfeirio eitem i drafod Cyffordd Dyfi i gyfarfod y Cyd-bwyllgor Rheilffordd Amwythig-Aberystwyth a Phwyllgor Rheilffordd Arfordir y Cambrian sydd i’w gynnal ar 27 Tachwedd 2015 yn Y Plas, Machynlleth.