Agenda item
- Cyfarfod Pwyllgor Cynllunio, Dydd Llun, 22ain Gorffennaf, 2019 1.00 y.h. (Item 5.3)
- Datganiadau o fuddiant ar gyfer eitem 5.3
- Y cefndir i eitem 5.3
Estyniad blaen, creu balconi llawr cyntaf, addasiadau i'r to
ac ymestyn adeilad allanol i greu anecs
AELOD LLEOL: Cynghorydd Gareth T Morris Jones
Cofnod:
Estyniad blaen,
creu balconi llawr cyntaf, addasiadau i'r to ac ymestyn adeilad allanol i greu
anecs
Amlygwyd bod y
cais yn cael ei gyflwyno i Bwyllgor ar gais yr Aelod Lleol a dau Aelod arall.
(a) Ymhelaethodd
y Rheolwr Cynllunio ar gefndir y cais, gan nodi mai cais ydoedd ar gyfer codi
estyniad porth ar flaen y tŷ; gosod balconi llawr cyntaf ar hyd blaen y
tŷ uwchben rhannau tô gwastad presennol; ymgymryd ag addasiadau i’r tô
trwy osod tô llechi a drws gromen fechan i’r blaen; decin blaen; ymestyn
adeilad allanol presennol o fewn cwrtil yr eiddo yn anecs ym Mwthyn Bridyn, Lon
Bridyn, Morfa Nefyn. Nodwyd bod yr eiddo wedi ei leoli gyfochrog a mynediad i
draeth Morfa Nefyn, ond ar lefel ychydig uwch na’r traeth, gyda wal derfyn
uchel yn amgylchynu’r blaen ac ochrau.
Adroddwyd bod y
cais yn cynnwys dwy elfen, sef yr estyniad a’r newidiadau i’r tŷ a’r
estyniad i’r adeilad allanol i greu anecs. Adroddwyd mai tô dalennau asbestos
sydd i’r tŷ yn bresennol gyda’r bwriad yn golygu ei ail doi â llechi sydd
yn welliant ynghyd â drws gromen ddigon bychan na fyddai’n amharu’n sylweddol
ar edrychiad a chymeriad y wyneb blaen.
Derbyniwyd sawl
gwrthwynebiad i’r bwriad yn mynegi pryder am gyflwyno nodweddion modern i’r
eiddo gan fod y bythynnod pysgotwyr presennol heb eu difethaf. O ystyried mai sgrin wydr ysgafn fyddai i
flaen y balconi ac na fyddai siâp yr adeilad yn newid yn arwyddocaol, ni
ystyriwyd y byddai’r newidiadau yn amharu’n sylweddol ar edrychiad yr eiddo i
gyfiawnhau gwrthod yr addasiadau. Gan
mai cymharol fychan yw’r newidiadau i’r tŷ, ystyriwyd eu bod yn
ychwanegiadau derbyniol o ran ymddangosiad, graddfa a’r driniaeth drychiadau ac
yn cydymffurfio â gofynion polisi PCYFF 3 y Cynllun Datblygu Lleol.
Nodwyd bod yr ail
elfen yn golygu codi estyniad ar yr adeilad allanol presennol sy’n ffurfio rhan
o berchnogaeth yr eiddo. Gan fod y
cwrtil wedi ei amgáu gan wal derfyn uchel, dim ond ychydig o wal a thô fyddai’n
weledol o ffordd fynediad y traeth.
Amlygwyd fod y gwrthwynebiadau
wedi datgan pryder am newid golwg adeilad hanesyddol, fodd bynnag ni ystyriwyd
fod y newidiadau yn sylweddol ymwthiol nac yn annerbyniol o ran graddfa, uchder
a mas ar y safle hwn sydd wedi ei amgáu gan wal uchel. Ystyriwyd bod yr anecs yn cydymffurfio â
gofynion PCYFF3.
Cyfeiriwyd at y
materion llifogydd oedd wedi eu cynnwys yn yr adroddiad ynghyd a sylw bod y
cynlluniau wedi newid yn sylweddol ers i’r Swyddog Morwrol a Pharciau Gwledig
gyflwyno gwrthwynebiadau.
Wedi pwyso a mesur
y cais a’r cynlluniau diwygiedig yn erbyn gofynion y polisïau perthnasol ynghyd
a’r holl sylwadau a gwrthwynebiadau a dderbyniwyd yn ystod y cyfnod ymgynghori,
ystyriwyd bod y bwriad yn dderbyniol i’w ganiatáu gyda’r amodau perthnasol.
(b)
Yn manteisio ar yr hawl i siarad
nododd yr ymgeisydd y prif bwyntiau canlynol:-
·
Bod gan ei deulu barch tuag at y pentref
·
Bod addasiadau i’r cynlluniau wedi eu cytuno
·
Bod defnyddio llechi ar y to yn cydweddu gyda thai
cyfagos
·
Bod yr eiddo wedi bod ym mherchnogaeth y teulu ers
1957 a dymuniad y teulu yw ei warchod i’r dyfodol
·
Nad oedd bwriad defnyddio’r tŷ ar gyfer unrhyw
fenter fasnachol - defnydd ar gyfer y
teulu yn unig yw’r bwriad
·
Bod yr adeilad wedi ei lygru gydag asbestos ac os
na fuasai gwaith yn cael ei wneud i’w arbed, byddai’r tŷ yn mynd yn
adfail.
·
Bod symud yr asbestos yn angenrheidiol ac felly
cyfle i ddiweddaru a moderneiddio’r tŷ
·
Bod angen sicrahu bod y tŷ yn drigiadwy ac yn
addas ar gyfer cenedlaethau’r dyfodol
(c) Gwnaed
y prif bwyntiau canlynol gan yr aelod lleol (nad oedd yn aelod o’r Pwyllgor
Cynllunio hwn):-
·
Ei fod yn ystyried yr addasiadau fel rhai sylweddol
·
Bod y Cyngor Cymuned a thrigolion lleol yn pryderu
am newid i edrychiad a gwedd yr ardal
·
Bod rhannau o’r cais yn dderbyniol – derbyn bod y
tŷ angen ‘gofal’
·
Bod gosod llechi ar y tô yn ddymunol ac yn
gwella golwg allanol yr adeilad
·
Bod estyniad i’r adeilad allanol i greu anecs hefyd
yn dderbyniol oherwydd byddai hyn hefyd yn gwella gwedd yr ardal
·
Nad oedd o blaid creu estyniad blaen a balconi – ei
fod yn gwrthwynebu ar sail gorddatblygiad o fewn Ardal o Harddwch Naturiol
Eithriedig (AHNE), tiroedd o ddiddordeb ac ardal sensitif
·
Nododd na fyddai’r dyluniad modern yn gweddu’r
clwstwr tai cyfochrog
·
Er i’r cwrtil fod wedi ei amgáu gyda wal uchel, ac
awgrym na fydd modd gweld hyn o’r traeth, roedd yn amau’r awgrym ac yn nodi y
byddai’n weledol o’r traeth
·
Byddai’r balconi yn weledol ac yn newid golwg yr
adeilad hanesyddol
·
Yr adeilad yn cael ei gynnwys ar gardiau post sydd
yn hyrwyddo’r ardal – angen cadw yr olygfa fel ag y mae
·
Bod yr holl fythynnod yn weddus heb falconi
·
Bod y cynllun yn anghydnaws ac felly yn annog y
Pwyllgor i wrthod
ch) Cynigiwyd ac eiliwyd i gynnal ymweliad
safle
a)
Yn ystod
y drafodaeth ddilynol nodwyd y prif sylwadau canlynol gan aelodau:
·
Bod newidiadau i’r tô i’w croesawu ynghyd a gwella’r
adeilad allanol
·
Buasai gosod balconi yn amharu ar heddwch y
traeth ac yn anghydnaws gyda’r clwstwr tai
·
Yr adeiladau yn rhai hanesyddol gyda rhinweddau
arbennig
·
Angen gwarchod yr eiddo rhag cael ei
orddatblygu
·
Bod yr adeilad angen gofal neu fel arall y
byddai’n cwympo
·
Bod y balconi yn gam rhy bell, ond eto rhannau
o’r cais i’w cymeradwyo
(d) Mewn
ymateb i’r sylwadau, nododd yr Uwch Reolwr Cynllunio ei fod yn derbyn bod
cefnogaeth i rannau penodol o’r cais ac efallai y byddai modd i’r swyddogion
gynnal trafodaethau gyda'r ymgeisydd ynglŷn â’r balconi.
PENDERFYNWYD,
·
Cynnal ymweliad
safle
·
Cynnal trafodaethau pellach gyda'r
asiant / ymgeisydd ynglŷn â’r balconi llawr cyntaf
Dogfennau ategol:
- Bwthyn Bridyn, Lon Bridyn, Morfa Nefyn, Pwllheli, eitem 5.3 PDF 143 KB
- Cynlluniau, eitem 5.3 PDF 813 KB