Cyflwyno
adroddiad Arweinydd y Cyngor (ynghlwm).
Cofnod:
Croesawyd y swyddogion canlynol o Swyddfa Archwilio Cymru i’r cyfarfod i
roi gair o gyflwyniad ar y cychwyn ac i ateb cwestiynau’r aelodau.
·
Alan Hughes
(Arweinydd Archwilio Perfformiad Llywodraeth Leol)
·
Jeremy Evans
(Rheolwr Archwilio Perfformiad Llywodraeth Leol)
Yn dilyn y cyflwyniad, rhoddwyd cyfle i’r aelodau ofyn cwestiynau ar
gynnwys yr adroddiad.
Gan gyfeirio at yr Archwiliadau Deddf Llesiant Cenedlaethau’r Dyfodol
(Cymru) 2015 (tudalen 27 o’r rhaglen), oedd yn manylu ar y graddau mae’r Cyngor
wedi gweithredu yn unol â’r egwyddor datblygu cynaliadwy wrth sefydlu’r
Gwasanaeth Ieuenctid newydd, codwyd pryder gan sawl aelod ynglŷn â
chasgliad y Swyddfa Archwilio bod y Cyngor angen gwneud mwy o waith i sefydlu’r
pum ffordd o weithio yn llawn.
Cwestiynwyd sylw’r Archwilwyr bod darpariaeth y gwasanaeth wedi’i
hysgogi’n bennaf gan gyfyngiadau ariannol yn hytrach na dealltwriaeth o’r galw
hirdymor am y gwasanaeth.
Pwysleisiodd y cyn-Aelod Cabinet fu’n gyfrifol am gychwyn y broses o
ad-drefnu’r Gwasanaeth Ieuenctid mai diben yr ail-fodelu oedd edrych ar y tymor
hwy, gan ystyried sut i foderneiddio’r gwasanaeth a’i wneud yn fwy cynaliadwy
ac yn fwy addas ar gyfer anghenion pobl ifanc heddiw ac i’r dyfodol. Roedd hefyd o’r farn bod ystyriaeth wedi’i
roi i’r pum ffordd o weithio a’r amcanion llesiant a chyfeiriodd at yr
ymgynghori gyda’r bobl ifanc a’r cydweithio gyda mudiadau lleol eraill yn y
maes ieuenctid fel rhai enghreifftiau o hynny.
Ategwyd sylwadau’r cyn-Aelod Cabinet ac eraill gan yr Arweinydd a
bwysleisiodd ei bod yn amlwg bod yna deimlad cryf iawn ymhlith yr aelodau bod
canfyddiad y Swyddfa Archwilio yn hollol anghywir. Dadleuodd y gellid dweud bod pob newid mae’r
Cyngor wedi’i wneud dros y blynyddoedd diwethaf wedi’i ysgogi gan doriadau
ariannol. Er hynny, roedd y Cyngor wedi
bod yn canfod ffyrdd newydd o weithio sy’n cyfarch gofynion y Ddeddf Llesiant,
ac roedd y Gwasanaeth Ieuenctid yn enghraifft glasurol o hynny ac wedi’i ganmol
fel model effeithiol ac arloesol a ddylai fod yn esiampl i gynghorau eraill ei
ddilyn. Ychwanegodd fod yr hyn roedd yr
aelodau wedi’i glywed yn tanseilio eu hymddiriedaeth yn y Swyddfa Archwilio i
ddod i’r casgliadau cywir a galwodd am ddeialog rhwng y Cyngor a’r Swyddfa
Archwilio ar y pwynt penodol yma er mwyn symud ymlaen i’r dyfodol.
Mewn ymateb, nododd y Rheolwr Archwilio Perfformiad Llywodraeth Leol fod
gan y Swyddfa Archwilio safbwynt gwahanol i’r Cyngor ar y mater penodol
hwn. Eglurodd fod trafodaethau wedi’u
cynnal gyda nifer o swyddogion gwahanol o fewn y Cyngor wrth fynd drwy’r broses
a bod tystiolaeth y Swyddfa Archwilio yn seiliedig ar y cyfweliadau hynny. Roedd hefyd yn fodlon â thrylwyredd y gwaith
a gyflawnwyd yn ystod y flwyddyn. Er
hynny, roedd yn cydnabod y gallai ail-ymweld â’r sefyllfa arwain at farn
wahanol a gellid rhoi ystyriaeth i gynnal adolygiad dilynol ar y pwynt yma yn y
dyfodol, gan gynnal trafodaethau llawnach gyda’r swyddogion, defnyddwyr y
gwasanaeth a’r cyn-Aelod Cabinet fel rhan o’r gwaith hwnnw.
Gan gyfeirio at yr
adolygiad Darparu Gwasanaethau Llywodraeth Leol i Gymunedau Gwledig:
Trosglwyddo Asedau Cymunedol (tudalen 45 o’r rhaglen), holwyd beth oedd y
meddylfryd y tu cefn i drafod y ffaith bod asedau cynghorau sir yn mynd am y
nesaf peth i ddim i’r gymuned, gan fod hynny’n lleihau’r potensial o gael incwm
i mewn i’r Cyngor Sir i gynnal y gwasanaethau sydd gennym. Mewn ymateb, nododd y Rheolwr Archwilio
Perfformiad Llywodraeth Leol y byddai’n mynd â’r cwestiwn yn ôl i’r tîm
prosiect fu’n gyfrifol am gynhyrchu a llunio casgliadau’r adroddiadau yn yr
atodiadau i’r Adroddiad Gwella Blynyddol ac yn darparu ateb ysgrifenedig i’r
aelod a gododd y mater.
PENDERFYNWYD derbyn
Adroddiad Gwella Blynyddol 2018/19, yn amodol ar drafodaethau pellach ar rai
eitemau o fewn yr adroddiad.
Dogfennau ategol: