Agenda item

Newid defnydd adeilad amaethyddol i weithdy mecanig trin peiriannau cychod (Defnydd Dosbarth B1).

 

AELOD LLEOL:         Cynghorydd Dafydd Meurig

 

Dolen i'r dogfennau cefndir perthnasol

Newid defnydd adeilad amaethyddol i weithdy mecanig trin peiriannau cychod (Defnydd Dosbarth B1).

        

(a)       Ymhelaethodd y Rheolwr Cynllunio ar gefndir y cais, gan nodi ei fod yn gais ôl-weithredol. Eglurodd bod y safle gerllaw adeiladau cyn fferm Tal y Bont Uchaf, a oedd yn cynnwys tŷ sylweddol, anecs ac adeiladau allanol a oedd yn adeilad rhestredig (Gradd II). Nododd bod yr adeilad mewn ardal wledig oddeutu 1.2 km i’r dwyrain o ffin ddatblygu Pentref Lleol Llandygai fel y’i diffinnir gan Gynllun Datblygu Lleol ar y Cyd Gwynedd a Môn (CDLl).

 

Nododd bod Polisi Strategol 13 o’r CDLl yn anelu tuag at hwyluso twf economaidd trwy gefnogi sawl agwedd o'r economi leol gan gynnwys cefnogi ffyniant economaidd cymunedau gwledig a hwyluso twf ar raddfa briodol trwy ail-ddefnyddio adeiladau a oedd yn bodoli'n barod mewn ardaloedd gwledig. Eglurodd bod y bwriad yn cwrdd â meini prawf Polisi CYF6 o’r CDLl a oedd yn annog caniatáu ail ddefnyddio ac addasu adeiladau gwledig ar gyfer defnydd busnes.

 

Tynnodd sylw mai’r ddwy prif elfen, a fyddai’n gallu effeithio ar fwynderau cymdogion oedd materion sŵn a thrafnidiaeth. Nododd y cyflwynwyd adroddiad sŵn gyda’r cais a bod yr adroddiad yn dod i’r casgliad nad oedd y gweithdy’n achosi niwed arwyddocaol i fwynderau cymdogion o safbwynt sŵn. Eglurodd bod yr ymgeisydd yn y broses o brynu Fferm Tal y Bont Uchaf a’r adeiladau cysylltiedig â phetai hynny’n digwydd, mater i’r perchennog fyddai rheoli’r sŵn, fel na fyddai’n effeithio ei eiddo ei hun. Argymhellwyd, pe caniateir y cais, y dylid cynnwys amod yn clymu’r caniatâd cynllunio i berchennog / preswylydd Fferm Tal y Bont Uchaf yn unig.

 

Amlygodd nid oedd gan yr Uned Drafnidiaeth wrthwynebiad i’r bwriad, ond y derbyniwyd cryn wrthwynebiad gan y gymuned leol yn honni bod y cynnydd yn y drafnidiaeth eisoes yn niweidiol i ddiogelwch y ffordd a mwynderau lleol. Nododd wrth ystyried defnydd blaenorol y safle at ddefnydd amaethyddol ‘doedd dim i rwystro cerbydau amaethyddol / peirannau sylweddol rhag mynd a dod i’r safle at y diben hwnnw.

 

Nododd bod Cyfoeth Naturiol Cymru wedi tynnu’n ôl eu gwrthwynebiad i’r cais. Roedd y datblygiad yn dderbyniol o safbwynt polisïau lleol a chenedlaethol perthnasol am y rhesymau a roddwyd yn yr adroddiad.

         

(b)     Yn manteisio ar yr hawl i siarad nododd asiant yr ymgeisydd y prif bwyntiau canlynol:-

·         Bod y busnes yn fusnes arbenigol a oedd yn cyflogi 9 aelod o staff llawn amser;

·         Bod les safle blaenorol y busnes wedi dod i ben, cynhaliwyd trafodaeth gyda swyddogion y Cyngor ag eraill o ran safle amgen addas ond nid oedd un ar gael;

·         Bod y busnes wedi gorfod ail-leoli ar fyr rybudd. Felly, yn anffodus roedd y cais yn gais ôl-weithredol;

·         Bod y teulu bellach yn berchen y safle yn ei gyfanrwydd;

·         Bod y peiriannau’n guddiedig a bod hyn yn bwysig gyda phroblemau lladrata yn y gorffennol;

·         Bod y safle yn gyfleus i Porth Penrhyn ym Mangor, Y Felinheli a Marina Conwy, ac yn  agos at yr A55;

·         Bod asesiad sŵn manwl wedi ei gyflwyno fel rhan o’r cais, a oedd yn cadarnhau nad oedd effaith andwyol ar drigolion lleol;

·         Ymgeisydd yn fodlon o ran amod amser gweithio rhwng 8.00am a 4.30pm ac amod i glymu’r defnydd i berchennog / preswylydd Fferm Tal y Bont Uchaf;

·         Bod yr ymgeisydd yn barod i gyfarfod gyda’r aelod lleol a thrigolion cyfagos i drafod eu pryderon.

 

(c)     Gwnaed y prif bwyntiau canlynol gan yr aelod lleol (nad oedd yn aelod o’r Pwyllgor Cynllunio hwn):-

·         Dim yn gwrthwynebu’r bwriad mewn egwyddor ac yn gefnogol i’r busnes a oedd yn creu swyddi;

·         Gerbron i gyflwyno pryderon trigolion a oedd yn lleol i’r safle;

·         Bod Cyngor Cymuned Llanllechid wedi cyflwyno sylwadau ar y cais, llawer ddim yn faterion cynllunio ond nodir pryder o ran cynnydd mewn symudiadau traffig ers i’r busnes ail-leoli i’r safle. Bod yr ymgeisydd i weld yn cydnabod y broblem drafnidiaeth gan anogir osgoi defnyddio cerbydau mawr. Bod y ffordd i’r safle yn rhan o rwydwaith  beics ac nid oedd lle i gerdded ar y ffordd pan fo fan neu lori yn teithio arno. Anghytuno bod y safle yn hygyrch a bod yno newid arwyddocaol i’r drafnidiaeth;

·         Bod lori ar un achlysur wedi taro ei ddrych ar y tŷ ger y fynedfa gan ychwanegu at bryder y teulu. Roedd gyrwyr cerbydau yn flin oherwydd yr anawsterau. Bod y troad am lôn giatws yn dro siarp gyda gyrwyr yn gorfod mynd yn ôl ac ymlaen sawl tro i gymryd y troad gan falu’r llain gwyrdd;

·         Wedi derbyn sylw gan drigolyn, bod busnesau newydd yn datblygu’n organig ac yn tyfu ond gan fod y busnes eisoes wedi ei sefydlu, roedd wedi effeithio ar fwynderau preswyl trigolion lleol;

·         Bod newid ym math y cerbydau, gyda thractorau yng nghyswllt y cyn-ddefnydd amaethyddol yn gallu edrych dros y gwrychoedd. Nawr roedd gyrwyr cerbydau cario nwyddau yn anghyfarwydd gyda’r ardal ac yn defnyddio’r lôn gul; 

·         Dylai’r pwyllgor ystyried gwrthod y cais ar sail Polisïau TRA4, PCYFF2 a PCYFF3 o’r CDLl;

·         Pe bwriedir caniatáu’r cais, fe ddylid cynnal ymweliad safle cyn penderfynu.

 

(ch)   Cynigwyd ac eiliwyd i gynnal ymweliad safle.

 

          Yn ystod y drafodaeth ddilynol nodwyd y prif sylwadau canlynol gan aelodau:

 

·         Pe cynhelir ymweliad safle, a fyddai’n bosib derbyn gwybodaeth o ran y math o drafnidiaeth, maint y cerbydau a oedd yn cario nwyddau i’r safle a’u hamlder, er mwyn gweld yr effaith?

·         Bod y busnes yn bodoli ac wedi ail-leoli. Gwerthfawrogi pe cynhelir ymweliad safle er mwyn asesu’r sefyllfa;

·         Nid oedd yr Uned Drafnidiaeth yn gwrthwynebu’r bwriad. Roedd y defnydd amaethyddol wedi dod i ben a’r busnes presennol yn cyflogi 9 aelod o staff llawn amser. A fyddai modd gwneud gwelliannau i’r ffordd?

·         Ddim yn anghytuno mewn egwyddor ond bod pryderon yr aelod lleol yn ei phryderu o ran trafnidiaeth drwm ar lonydd cefn gwlad. Cefnogi cynnal ymweliad safle;

·         Bod y Cyngor Cymuned yn gwrthwynebu’r bwriad yn gryf. Roedd newid defnydd o ddefnydd amaethyddol yn golygu newid yn y drafnidiaeth. Bod angen rhoi sylw i bryderon lleol.

         

PENDERFYNWYD cynnal ymweliad safle.