Agenda item
I dderbyn adroddiad blynyddol Cronfa Bensiwn Gwynedd 2018/19
Cofnod:
a)
Nodyn
gan y Cadeirydd – y Cynghorydd John Pughe Roberts
Croesawyd pawb i gyfarfod blynyddol y Gronfa
Bensiwn. Mynegodd y Cadeirydd bod 2018/19 wedi bod yn flwyddyn drosiannol gyda
60% o asedau’r gronfa bellach wedi eu trosglwyddo i gronfeydd Partneriaeth
Cymru. Nodwyd y cafwyd dychweliadau buddsoddi o 7.6% am y flwyddyn gan asedau’r
Gronfa o’i gymharu ar’ gyfartaledd o 6.6% a ddychwelwyd gan gronfeydd CPLlL (a chwartil uchaf o 7.2%).
O ganlyniad roedd cyfanswm gwerth y Gronfa yn codi i fwy na 2 biliwn ar 31
Mawrth 2019. Ategwyd bod twf parhaus mewn gwerth asedau yn parhau’n galonogol
a’r gronfa mewn sefyllfa gymharol ffafriol gyda’r Actiwari
wedi cyhoeddi bod y Gronfa bellach wedi’i ariannu 108% yn y Prisiad ar
31/03/2019.
Eglurwyd, er bod sefyllfa cyflogwyr unigol yn y
Gronfa yn wahanol, yn gyffredinol mae cryfder y Gronfa wedi caniatáu cymryd
agwedd hyblyg tuag at gyfraddau cyfraniadau cyflogwyr fydd yn effeithiol o
Ebrill 2020. Amlygwyd bod y mwyafrif o’r cyflogwyr wedi derbyn hysbysiad o’u
lefel cyfraniadau pensiwn diwygiedig, fydd yn eu cynorthwyo gyda’r sefyllfa
ariannol yn wyneb y gwasgu parhaus ar wariant cyhoeddus.
Diolchwyd i’r holl swyddogion sydd yn gweinyddu’r
Gronfa, gyda sylw arbennig i Nicholas Hopkins (Rheolwr yr Uned Weinyddu) a
Caroline Roberts (Rheolwr Buddsoddi). Ategwyd bod Nick Hopkins a Caroline
Roberts yn ymddeol a dymunwyd ymddeoliad hapus i’r ddau. Cyhoeddwyd bod Meirion
Jones wedi ei benodi fel Rheolwr newydd ar gyfer yr Uned Weinyddu a Delyth
Jones-Thomas wedi ei phenodi fel Rheolwr Buddsoddi. Llongyfarchwyd y ddau ar eu
penodiadau. Diolchwyd i Tony Deakin sydd yn sefyll i
lawr fel aelod o’r Bwrdd Pensiwn ers iddo ymddeol am ei gyfraniad i waith y
Bwrdd a llongyfarchwyd Osian Richards ar gael ei ethol yn gadeirydd newydd y
Bwrdd.
b) Nodyn gan Gadeirydd y Bwrdd Pensiwn
(2018/19) - Mr Tony
Deakin
Cyfeiriwyd at adroddiad blynyddol Bwrdd Pensiwn y Gronfa oedd wedi
ei gynnwys yn yr adroddiad
ynghyd a phrif swyddogaethau’r Bwrdd fel corff sydd
yn monitro ac adolygu penderfyniadau’r Pwyllgor Pensiynau a gwaith yr Uned
Weinyddu. Mynegodd, o gymharu â chronfeydd eraill, bod y drefn yn llwyddo yng
Ngwynedd a bod y Bwrdd wedi cynorthwyo a chyfrannu at lwyddiant y Gronfa. Tynnwyd sylw at y cynllun gwaith a sylw penodol
i enghreifftiau o fewnbwn y Bwrdd i fuddsoddi cyfrifol
a threfniadau olyniaeth staffio. Nodwyd yr angen i
annog cyflogwyr i fabwysiadu meddalwedd
technoleg gwybodaeth i-Connect er mwyn
sicrhau data glan a chywir i’r dyfodol.
Tynnwyd sylw at yr angen a pharodrwydd
y Bwrdd i fynychu hyfforddiant er mwyn cadw
i fyny gyda
gwybodaeth a materion cyfredol. Cymerodd y cyfle i longyfarch
Meirion Jones a Delyth Jones-Thomas ar eu penodiadau ac i’w olynydd, Osian Richards, fel Cadeirydd y Bwrdd Pensiwn 2019/20
c)
Cyflwyniad y Pennaeth Cyllid
Adroddiad Blynyddol y Cynllun Pensiwn am 2018/19
Adroddwyd bod Cronfa Bensiwn Gwynedd mewn sefyllfa gymharol
iach gyda gwerth y gronfa wedi cynyddu yn
raddol ers 2010, a chynnydd sylweddol o £505m ers y prisiad diwethaf
yn 2016. Nodwyd fod y gyfran o’r
Gronfa gyfan roedd wedi’i ariannu
wedi cynyddu o 84% 2010, i 85% 2013, 91% ym Mhrisiad 2016, a 108% ym Mhrisiad 2019. Eglurwyd fod cyfran
o’r cynnydd yn 2016/17 oherwydd cyfraddau cyfnewid arian, gan fod
y Gronfa wedi’i brisio yn nhermau
punnoedd, ac asedau wedi’u rhestru yn nhermau doleri,
ac yn y blaen. Fodd bynnag, dangoswyd fod y mwyafrif o’r symudiad mewn
gwerth y Gronfa yn wir gynnydd
yn nhermau arian lleol.
Er gwaethaf sefyllfa ariannol foddhaol y Gronfa, awgrymwyd nad yw’r sefyllfa
byd eang yr un mor gadarnhaol.
Cyfeiriwyd at batrymau buddsoddi yn newid,
gyda llawer o fuddsoddwyr cyffredinol, ar wahân i
gronfeydd pensiwn, yn cymryd risgiau
i elwa yn
y tymor byr, yn hytrach na
buddsoddi cyfrifol hirdymor gydag ymgysylltiad a pherchnogaeth.
Mewn ymateb
i argyfwng newid yr hinsawdd
amlygwyd bod Cronfa Bensiwn Gwynedd bellach yn buddsoddi 12% o
werth y gronfa (£260m) yng nghronfa Carbon Isel BlackRock. Cafodd y penderfyniad i gadarnhau’r buddsoddiad yma ei wneud yn ffurfiol yng nghyfarfod 29 Gorffennaf 2019 o’r Pwyllgor Pensiynau.
Roedd y buddsoddiad hwn mewn asedau cynaliadwy yn ganlyniad o benderfyniad a wnaed
gan y Pwyllgor Pensiynau yn Nhachwedd 2018 i ddiwygio
Datganiad Strategaeth Buddsoddi'r Gronfa i nodi egwyddorion buddsoddi cyfrifol,
gan gynnwys “angen i ystyried y risgiau penodol sy'n codi o newid yn yr
hinsawdd wrth ystyried buddsoddiadau”. Ategwyd bod dyletswydd ar gyrff
cyhoeddus i arwain o'r blaen wrth wneud yr hyn sydd yn bosib sicrhau
gweithredu cyfrifol, o ystyried yr
effaith y bydd gweithredoedd yn ei gael ar genedlaethau'r dyfodol. Eglurwyd sut
bydd olrhain y Mynegai Carbon Isel MSCI yn buddsoddi mewn cwmnïau fydd ag
allyriadau carbon isel, tra hefyd yn sicrhau dychweliadau ariannol cyffelyb i’r
Mynegai Byd-eang safonol, a bodloni’r ddyletswydd ymddiriedol i staff,
pensiynwyr a chyflogwyr y cynllun. Adroddwyd bod Rheolwyr Cronfa Bensiwn Gwynedd ac aelodau’r
Pwyllgor Pensiynau yn hyderus y byddai buddsoddi 12%
(£260m ar hyn o bryd) o'r Gronfa Bensiwn mewn cronfa ecwiti carbon isel yn gosod
cydbwysedd cyfrifol ac yn tanlinellu’r ymrwymiad i ddyfodol mwy gwyrdd.
Nodwyd
nad oedd mynegai o'r fath
yn bodoli ar gyfer pob
ffactor amgylcheddol, cymdeithasol neu lywodraethu arall, megis osgoi buddsoddi
mewn cwmnïau sy’n cynhyrchu arfau. Eglurwyd bydd y Pwyllgor Pensiynau yn ystyried cerbydau
buddsoddi cyfrifol eraill, os a phan fydd y rhain ar
gael yn y dyfodol. Ategwyd bod Cronfa Bensiwn Gwynedd yn cyd-fuddsoddi fel un o 8 aelod o Bartneriaeth Pensiynau Cymru, gyda phartneriaid
eraill, megis cronfeydd Abertawe a Chaerdydd, sy’n rhannu’r awydd i leihau'r amlygiad
carbon mewn buddsoddiadau yn y dyfodol. I’r perwyl hyn,
roedd Partneriaeth Cymru wedi
comisiynu ymgynghorwyr
Russell Investments i ddyfeisio
tros-haen (‘overlay’ uwchben
detholiadau stoc ein rheolwyr asedau).
Diolchwyd i bawb am eu
cefnogaeth yn ystod 2018/19.
PENDERFYNWYD DERBYN ADRODDIAD BLYNYDDOL Y GRONFA BENSIWN AM 2018/2019
Dogfennau ategol: