Agenda item

Aelod Cabinet: Cynghorydd Dyfrig Siencyn

I ystyried yr adroddiad

Cyflwynwyd adroddiad gan yr Aelod Cabinet Dyfrig Siencyn yn amlinellu’r hyn a gyflawnwyd dros y 6 mis diwethaf gan Bwrdd Gwasanaethau Cyhoeddus Gwynedd ac Ynys Môn. Atgoffwyd yr aelodau bod y Bwrdd wedi cytuno ar feysydd blaenoriaeth fyddai’n gwella llesiant economaidd, amgylcheddol a diwylliannol y ddwy sir ac wedi sefydlu is-grwpiau i weithredu swyddogaethau’r Bwrdd.

Adroddwyd bod y Bwrdd yn derbyn yr angen i ganolbwyntio ar yr hyn y gellid ei gyflawni yn yr hinsawdd sydd ohoni gan fod adnoddau’r corff cyhoeddus o dan bwysau a bygythiadau pellach mewn arbedion. Er hynny, drwy gydweithio gellid manteisio  ac adnabod cyfleoedd i weithio mewn ffyrdd gwahanol a chyflwyno dulliau arloesol o weithredu.

Rhoddwyd diweddariad byr ar y datblygiadau o fewn y chwe maes blaenoriaeth.

Yn ystod y drafodaeth ddilynol, amlygwyd y pwyntiau canlynol gan Aelodau unigol:

·         Tlodi – mynegwyd siom a phryder nad oedd is-grŵp yn arwain ar y gwaith yn bresennol

·         Awgrym i adolygu cyfansymiau rent tai cymdeithasol

·         Bod angen cynnwys cefnogaeth i deuluoedd / gofalwyr ym maes gwaith Iechyd a Gofal Oedolion

·         Newid Hinsawdd - graddfa’r effaith angen mwy o gefnogaeth. A yw’r Llywodraeth yn ymateb i’r hyn y mae’r Bwrdd yn ceisio ei weithredu?

·         Newid Hinsawdd yn fater byd eang ond, ym maes llifogydd a oes modd addysgu pobl ynglŷn â’r effaith / i arafu newid hinsawdd yn hytrach na derbyn bod hyn yn digwydd?

·         O ystyried tangyflawniad Bwrdd Iechyd Prifysgol Betsi Cadwaladr, angen sicrhau bod blaenoriaethau’r Is-grŵp Iechyd yn cael eu harwain yn effeithiol gan gynrychiolydd o’r Bwrdd Iechyd

Mewn ymateb i sylw ynglŷn â sicrhau arweiniad effeithiol ar yr agweddau iechyd nodwyd bod yr is-grŵp yn cyfarch dwy flaenoriaeth a bod y Bwrdd Iechyd a’r ddwy Sir yn cydweithio yn arbennig o dda. Ategwyd mai rôl yr Awdurdodau Lleol a’r Bwrdd Iechyd yw darparu gwasanaeth effeithiol ac mai rôl y Bwrdd Gwasanaethau Cyhoeddus yw ychwanegu gwerth i’r hyn sydd eisoes yn digwydd gan y cyrff cyhoeddus yn unigol.

Mewn ymateb i sylw ynglŷn â diffyg gwaith yn y maes tlodi, nodwyd mai trefniadau budd-daliadau Llywodraeth San Steffan a’u gallu cyllidebol sydd yn creu sefyllfaoedd o dlodi ac mai cyfyng yw gallu’r Awdurdod Lleol i adnabod darn o waith / prosiect penodol i geisio gwneud argraff yn y maes. Derbyniwyd y sylw bod gwaith angen ei wneud i adnabod maes gwaith /darganfod prosiectau all gyflawni a gwneud gwahaniaeth. Mewn perthynas a’r Bwrdd Gwasnaethau Cyhoeddus cytunwyd i ystyried y gwaith sydd eisoes ar y gweill gan yr Awdurdodau Lleol yn y maes tlodi cyn ystyried beth gall y Bwrdd wneud i ychwangeu gwerth i hynny. Bydd yr Awdurdodau Lleol yn darparu cyflwyniad ar gynnydd yn y maes tlodi yn ystod cyfarfod nesaf y Bwrdd ym mis Mawrth.

Mewn  ymateb i sylw ynglŷn â gwir effaith Newid yr Hinsawdd, nodwyd bod Ymgynghori aeth Gwynedd eisoes yn gwneud gwaith da yn lleol a’r dyletswyddau hynny yn cynyddu wrth i’r broblem gynyddu. Awgrymwyd bod Llywodraeth Cymru drwy gydweithio gyda Cyfoeth Naturiol Cymru wedi newid agwedd tuag at y problemau yn genedlaethol. Ategwyd bod datrysiadau i rai problemau yn sylweddol a thu hwnt i’r gallu i unrhyw awdurdod lleol ei gyflawni ar ben ei hun.

Derbyniwyd yr awgrym bod modd ‘addysgu pobl’ fod yn faes y gellid ei fabwysiadu yn hytrach nag ymateb i’r sefyllfa yn unig

Mewn ymateb i gwestiwn ynglŷn â phwy sydd yn monitro gwaith yr is grwpiau, adroddwyd bod Tîm Cefnogi’r Bwrdd Gwasanaethau Cyhoeddus yn sicrhau bod cynnydd yng ngwaith yr is-grwpiau ac yng nghyfarfodydd chwarterol o’r  Bwrdd, bydd yr adroddiadau cynnydd yn cael eu herio. Mewn ymateb i gwestiwn ynglŷn a risgiau a sut bydd disgwyl i adroddiad ar dlodi gael ei  gyflwyno yn Rhagfyr 2019 os nad oes is-grwp yn arwain ar y gwaith, nodwyd y bydd cofrestr risg  yn cael ei gyflwyno i gyfarfod nesaf y Bwrdd. Yn ogystal bydd yr Awdurdodau Lleol yn rhoi diweddariad are u cynlluniau tlodi.

PENDERFYNWYD derbyn yr adroddiad