Agenda item

Ty Beechwood, Stryd y Bont, Dolgellau

 

I ystyried y cais

TŶ BEECHWOOD, BRIDGE STREET, DOLGELLAU

 

Ar ran yr eiddo:                     Dean Hawkins  (Ymgeisydd)

                                                Llinos Rowlands (Cynllun Gwarchod Tafarndai / Perchennog Dylanwad Da)

                                               

Eraill a wahoddwyd:             Ian Williams (Heddlu Gogledd Cymru)

                                                Lis Williams (Heddlu Gogledd Cymru)

                                                Mark Mortimer (Swyddog Gorfodaeth Gwarchod y Cyhoedd)

 

Croesawodd y Cadeirydd bawb i’r cyfarfod. Croesawyd Lis Williams i’r cyfarfod fel cynrychiolydd newydd Heddlu Gogledd Cymru gan y byddai Mr Ian Williams yn ymddeol o’r Heddlu. Diolchwyd i Mr Williams am ei wasanaeth a'i gefnogaeth a dymunwyd ymddeoliad iach a hapus iddo.

 

Amlygodd y Cadeirydd y byddai gan bob parti hawl i hyd at 10 munud i gyflwyno eu sylwadau

 

a)                    Adroddiad yr Adran Trwyddedu

 

Cyflwynwyd adroddiad y Rheolwr Trwyddedu yn manylu ar gais am drwydded eiddo ar gyfer Tŷ Beechwood, Bridge Street, Dolgellau. Gwnaed y cais mewn perthynas ag eiddo ar gyfer siop drwyddedig a bar, drwy drawsnewid y llawr gwaelod. Y bwriad yw gwerthu alcohol oddi ar yr eiddo.

 

Tynnwyd sylw at fanylion y gweithgareddau trwyddedig a’r oriau arfaethedig yn yr adroddiad. Amlygwyd, ers cyhoeddi’r adroddiad bod yr ymgeisydd wedi cytuno i oriau cyfyngedig ac felly ystyriwyd y cais fel un diwygiedig.  Nodwyd bod gan Swyddogion yr Awdurdod Trwyddedu tystiolaeth ddigonol bod y cais wedi ei gyflwyno yn unol â gofynion Deddf Trwyddedu 2003 a’r rheoliadau perthnasol.

 

Cyfeiriwyd at y mesurau yr oedd yr ymgeisydd yn ei argymell i hyrwyddo’r amcanion trwyddedu ac amlygwyd y byddai’r mesurau hyn yn cael eu cynnwys ar y drwydded. Tynnwyd sylw at un gwrthwynebiad a dderbyniwyd yn ystod y cyfnod ymgynghori oedd yn mynegi pryder ar faterion gwrthgymdeithasol o ran sŵn, cwsmeriaid yn ysmygu tu allan ynghyd a materion glanweithdra y tu ôl i’r eiddo.

Nid oedd gan yr Heddlu na’r Gwasanaeth Tân wrthwynebiadau i’r cais ond roedd yr Heddlu wedi nodi sylwadau mewn perthynas â Theledu Cylch Cyfyng. Roedd yr ymgeisydd hefyd wedi cytuno i amodau Adran Gwarchod y Cyhoedd o ran cyfaddawdu gyda’r oriau agor.

b)         Wrth ystyried y cais dilynwyd y drefn ganlynol-:

·      Rhoi cyfle i aelodau’r Is-bwyllgor a’r ymgeisydd ofyn cwestiynau i’r Rheolwr  Trwyddedu.

·      Gwahodd yr ymgeisydd i ymhelaethu ar y cais

·      Rhoi cyfle i’r ymgynghorai gyflwyno eu sylwadau

·      Gwahodd deilydd y drwydded neu ei gynrychiolydd i ymateb i’r sylwadau

·      Rhoi cyfle i aelodau’r Is-bwyllgor ofyn cwestiynau i ddeilydd y drwydded.

·      Rhoi cyfle i aelodau’r Is-bwyllgor ofyn cwestiynau i’r ymgynghorai

Wrth ymhelaethu ar y cais, nododd yr ymgeisydd ei fod yn hapus gyda’r hyn oedd wedi ei gyflwyno.

Ategodd y sylwadau canlynol:

·         Mai ar gyfer digwyddiadau arbennig e.e., Sesiwn Fawr fyddai’r amseroedd ansafonol

·         Ei fod yn derbyn yr amodau a gynigiwyd gan Adran Gwarchod y Cyhoedd a’i fod yn barod i gwtogi'r oriau agor

·         Bod bwriad i greu bar o safon fel rhywle i ymlacio ac nid creu awyrgylch tŷ tafarn. Creu rhywbeth gwahanol yn y dref fel bod modd cadw pobl yn lleol a chyfrannu at yr economi leol.

Ategwyd y sylwadau canlynol gan Llinos Rowlands

·         Bod cynlluniau’r fenter yn fanwl

·         Bod y fenter yn ychwanegiad da i’r dref

·         Byddai’r fenter yn cyflogi pobl leol ac yn cyfrannu at yr economi leol

·         Bod modd gosod mwy o oleuadau a chamerâu teledu cylch cyfyng i leihau pryderon

·         Bod cyfrifoldeb ar yr ymgeisydd i reoli yn dda

Yn manteisio ar ei hawl i siarad, amlygodd Swyddog o’r Heddlu nad oedd gan yr Heddlu dystiolaeth i wrthwynebu’r cais gan mai cais o’r newydd ydoedd. Derbyniwyd bod trafferthion wedi digwydd yn y gorffennol gyda thafarn ‘The Stag Inn’ ond bod y trafferthion hynny yn amherthnasol i’r eiddo dan sylw.

Ategodd y sylwadau canlynol:

·         Ei fod yn fodlon gyda chynlluniau a threfniadau rheoli'r safle

·         Bod amod Teledu Cylch Cyfyng wedi ei gynnwys ar y cais

·         Bod yr oriau yn rhai rhesymol iawn

Yn manteisio ar ei hawl i siarad, amlygodd Swyddog Gorfodaeth Gwarchod y Cyhoedd bod trafodaethau a chydweithio da wedi digwydd gyda’r ymgeisydd a chyfaddawd wedi ei gytuno ynglŷn â’r oriau agor

Ategodd y sylwadau canlynol:

·         Bod amodau wedi eu gosod ar y cais

·         Nad oedd caniatâd i gynnal digwyddiadau tu allan (dim lle)

·         Byddai modd rheoli gwastraff drwy’r drefn cynllunio

·         Bod y pryderon a fynegwyd  yn y gwrthwynebiad yn cyfeirio at dafarndai eraill gerllaw

Wrth grynhoi ei achos ategodd yr ymgeisydd,

·         Nad oedd mynediad i blant ar ôl 8pm – arwyddion i’w gosod yn hysbysu teuluoedd o’r rheolau

·         Nad oedd mynediad i’r bar o’r storfa beics yn y cefn – mynediad i’r fflatiau uwchben yn unig

·         Bod toiledau ychwanegol y cael eu gosod o fewn yr eiddo

c)            Ymneilltuodd yr ymgeisydd a’r ymgynghorai o’r ystafell tra bu i aelodau’r Is-bwyllgor drafod y cais

d)         Wrth gyrraedd y penderfyniad ystyriodd yr Is-bwyllgor ffurflen gais yr ymgeisydd, sylwadau ysgrifenedig a gyflwynwyd gan y partïon â diddordeb, adroddiad y Swyddog          Trwyddedu, yn ogystal â sylwadau llafar a dderbyniwyd yn y gwrandawiad.             Ystyriwyd hefyd Polisi Trwyddedu’r Cyngor a chanllawiau’r Swyddfa Gartref. Roedd yr holl        ystyriaethau yn cael eu pwyso a’u mesur yn erbyn yr  amcanion trwyddedu o dan y     Ddeddf Trwyddedu 2003, sef:

                       i.       Atal trosedd ac anhrefn

                      ii.       Atal niwsans cyhoeddus

                     iii.       Sicrhau diogelwch cyhoeddus

                     iv.       Gwarchod plant rhag niwed

PENDERFYNWYD caniatáu y cais 

Wrth dderbyn pryderon perchennog busnes cyfagos am gynnydd mewn materion gwrthgymdeithasol o ran sŵn, cwsmeriaid yn ysmygu tu allan a materion glanweithdra tu ôl i’r eiddo, nid oedd yr Is-bwyllgor wedi eu perswadio y byddai rhoi’r drwydded yn tanseilio’r amcanion trwyddedu. Ni chafwyd tystiolaeth y byddai rhoi’r drwydded yn arwain at gynnydd mewn sŵn, cwsmeriaid yn ysmygu a phroblemau glanweithdra ac felly yn achosi niwsans cyhoeddus.

 

Roedd yr Is-bwyllgor yn fodlon bod y cais am drwydded fel y’i diwygiwyd yn gydnaws â’r amcanion trwyddedu.

 

Adroddodd y Cyfreithiwr y byddai’r penderfyniad yn cael ei gadarnhau yn ffurfiol drwy lythyr i bawb oedd yn bresennol.