Agenda item

Cyflwyniad gan Huw Ynyr a Gwern ap Rhisiart

Nodwyd bod holl aelodau’r Fforwm wedi derbyn copi o adroddiad a baratowyd gan y Pennaeth Cynorthwyol Technoleg Gwybodaeth ar y cyd â Swyddog Addysg Ardal Dwyfor / Meirion ar y Cynllun Grant Seilwaith Mewn Ysgolion - Hwb.  Eglurwyd na lwyddwyd i gynnwys yr adroddiad ar raglen y Fforwm oherwydd na dderbyniwyd y ffigurau terfynol gan Lywodraeth Cymru tan yr unfed awr ar ddeg. 

 

Manylwyd ar gynnwys yr adroddiad.  Nodwyd:-

 

·         Yng Ngorffennaf 2019, y cyhoeddodd y Gweinidog Addysg raglen ariannu i helpu i drawsnewid Technoleg Addysg Mewn Ysgolion yng Nghymru. 

·         Y byddai’r fenter £50m yn defnyddio ‘catalog TGCh Cymru Gyfan’ newydd fel cyfrwng i helpu awdurdodau lleol i brynu’r cyfarpar addas angenrheidiol ar ran eu hysgolion.

·         Yn unol ag amodau’r cynllun, awdurdodau lleol fyddai’n gwasanaethu fel y partner cyflenwi strategol ar gyfer y rhaglen a byddai’n rhaid defnyddio’r cyllid yn briodol er mwyn sicrhau bod pob ysgol yn cael ei huwchraddio yn unol â’r safon cenedlaethol.

·         Bod Gwynedd wedi ymrwymo i fod yn gyswllt ar gyfer ysgolion y sir ac wedi cytuno i egwyddorion craidd safoni, cysondeb ac, yn bwysicaf oll, cynaliadwyedd.

·         Bod y grant yn galluogi adnewyddu rhwydwaith ysgolion Gwynedd er mwyn cyrraedd y safon genedlaethol, gan uwchraddio pwyntiau rhwydwaith diwifr a chabinetau rhwydwaith a gosod ceblau newydd lle bo angen.

·         Bod y caledwedd ar gyfer uwchraddio’r rhwydwaith wedi ei archebu, a byddai’r gwaith mewnosod yn digwydd dros y ddau dymor nesaf.

·         Gan fod y Cyngor wedi ymrwymo i gynaliadwyedd yr offer yma, ni fyddai yna oblygiadau cost ar yr ysgolion pan fyddai’r offer a osodid drwy’r grant yn cyrraedd diwedd ei oes.

·         Y buddsoddwyd yn agos i £1.4m o’r grant eleni ar galedwedd i uwchraddio’r rhwydwaith.

·         Bod asesiad o niferoedd a chyflwr y dyfeisiadau presennol ar draws ysgolion Gwynedd yn dangos bod ystod eang o ddyfeisiadau ar gael yn yr ysgolion, ond bod llawer ohonynt wedi dyddio.

·         Bod Strategaeth Addysg Ddigidol yr Adran Addysg wedi gosod uchelgais o ran cyfradd dyfais i blentyn o 1:4 yn y cyfnod sylfaen ac 1:1 yng nghyfnodau allweddol 2, 3 a 4, ynghyd â dyfais i bob athro/athrawes ac i nifer o’r staff cynhaliol.

·         Byddai peidio cynnal cyfradd 1:1 yn y sector uwchradd yn golygu cadw elfennau o’r hen system ac yn golygu cynnydd sylweddol mewn costau cynnal a chadw’r offer.

·         Amcangyfrifid bod angen 13,676 o ddyfeisiadau ar gost o £2,908,205.02.  Byddai’r grant yn ein galluogi i brynu’r dyfeisiadau hyn.

·         Yn seiliedig ar gylch adnewyddu o 5 mlynedd byddai’n rhaid canfod 20% o gost y dyfeisiadau hyn bob blwyddyn am y 5 mlynedd nesaf.  Ar ddiwedd y 5 mlynedd, byddai set newydd o ddyfeisiadau yn cael eu cyflwyno.  Byddai’r costau fel a nodir yn y tablau isod:-

 

	Nifer Disgyblion	Nifer cyfrifiaduron (ar sail ratio)	Cost (ar sail ratio)	Cyfraniad Adnewyddu	Cost y Disgybl
CS	3,530	883	£293,431.25	£58,686.00	£16.62
CA2	5,150	5,150	£916,242.16	£183,248.43	£35.58
CA3 a 4	6,455	6,455	£1,017,759.85	£203,551.97	£31.53
Cyfanswm	15,135	12,488	£2,227,433.26	£445,486.65	£29.43

 

Athrawon

	Nifer Athrawon	Nifer cyfrifiaduron (ar sail ratio)	Cost (ar sail ratio)	Cyfraniad Adnewyddu	Cost yr Athro
Pob ysgol*	1,188	1,188	£462,452.76	£92,490.55	£6.11

 

*£218,319 ei angen ar gyfer Gorsaf Ddocio, Monitor, Bysellfwrdd a Llygoden – ni chynhwyswyd y rhain yn y costau adnewyddu gan y dylent oresgyn y cyfnod adnewyddu.

 

·         Byddai cost cynaliadwyedd y cynllun felly’n £537,976 ar gyfer y ddau sector gyda £280,939 o’r cynradd a £257,038 o’r uwchradd.

·         Ar gyfer ysgolion cynradd byddai disgwyl i ysgol sydd â 100 o blant gyfrannu tua £3,250, ysgol sydd â 200 o blant £5,900, ac ysgol â 300 o blant £9,500.

·         Byddai amcan gost cynaliadwyedd y cynllun ar gyfer yr uwchradd fel a nodir yn y tabl isod:-

 

Ysgol
Ardudwy	£12,723.13
Botwnnog	£17,022.62
Bro Idris (Ysgol 3-16)	£11,612.64
Brynrefail	£24,428.27
Dyffryn Nantlle	£14,186.52
Dyffryn Ogwen	£16,213.59
Eifionydd	£15,052.72
Friars	£44,842.83
Glan y Môr	£19,266.51
Syr Hugh Owen	£28,662.73
Tryfan	£13,058.23
Tywyn	£13,418.84
Godre’r Berwyn (Ysgol 3-19)	£13,234.61
Y Moelwyn	£13,314.43

 

·         Na ragwelid y byddai yna unrhyw ofyn ar ysgolion i gyfrannu tuag at gynaliadwyedd y cynllun yn y flwyddyn gyllidol nesaf.

·         Bod hyd at £800,000 ar gael ar gyfer dyfeisiadau eleni, ac na ellid gwario’r grant heb ymrwymiad i gynaliadwyedd y buddsoddiad hwn.

·         Fel arwydd o ymroddiad y Cyngor i’r Strategaeth Addysg Ddigidol, a’r ymrwymiad i sgiliau digidol y dysgwyr, bod yr Adran Addysg yn dymuno buddsoddi yng nghynaliadwyedd y cynllun hwn.  Byddai unrhyw fuddsoddiad gan yr Adran yn lleihau cost cynaliadwyedd yr ysgolion.

 

Ymhellach i gynnwys yr adroddiad, nodwyd:-

 

·         Er na dderbyniwyd y ffigurau terfynol ynglŷn â’r grant tan yr unfed awr ar ddeg, bod rhaid rhoi archeb i mewn erbyn hanner dydd ar y 4ydd o Fawrth am werth £798,000 o offer. 

·         Y cynhaliwyd nifer o drafodaethau gyda’r Pennaeth Addysg ynglŷn â sut y gallai’r Adran gefnogi’r buddsoddiad yng nghynaliadwyedd y ddarpariaeth.  Bwriedid edrych ar bob cyllideb o fewn yr Adran gan hefyd gynnal trafodaethau gyda Chabinet y Cyngor.  Cadarnhawyd y byddai’r Adran yn cefnogi’r buddsoddiad, ond ni ellid cadarnhau beth fyddai’r union swm ar hyn o bryd.

·         Bod yr Adran am ymrwymo i 20% o’r £800,00 ar unwaith, neu ni fyddai’n bosib’ gwario’r grant.

 

Croesawyd bwriad yr Adran i fuddsoddi yng nghynaliadwyedd y ddarpariaeth.

 

Pwysleisiwyd bod yr ysgolion angen gwybod pryd y byddai’r offer newydd yn cyrraedd, fel y gallent gynllunio ar gyfer hynny.  Mewn ymateb, eglurwyd, yn hytrach na rhedeg dwy system na fyddai, o bosib’, yn siarad â’i gilydd, y bwriedid dod ag un system i mewn.  Gan hynny roedd yr amseru’n bwysig iawn.

 

Nodwyd bod yr ysgolion angen gwybodaeth am y penderfyniadau hyn yn ystod yr wythnosau nesaf.  Mewn ymateb, eglurwyd ei bod yn anodd i’r Cyngor o safbwynt cynllunio, gan nad oedd yn hysbys eto faint yn union o arian oedd yn y pot ar gyfer y flwyddyn nesaf.  Gan hynny roedd yn debygol na fyddai’r offer newydd ar gael tan yn fuan ar ôl y Nadolig, ond byddai’r gwaith o’u paratoi wedi ei wneud cyn hynny a’r cwbl fyddai angen ei wneud fyddai eu dosbarthu i’r ysgolion.

 

Nodwyd, er mai Cynnal sy’n paratoi adroddiad blynyddol ar ansawdd, mai’r Cyngor sy’n gwneud y penderfyniad bod yr offer yn safonol.  Mynegwyd y farn bod hyn yn dir llwyd ac awgrymwyd y byddai’n fuddiol darparu cytundeb lefel gwasanaeth ar gyfer yr ysgolion.

 

Awgrymwd y byddai’n syniad darparu rhyw fath o newyddlen bob bythefnos ar gyfer yr ysgolion hynny oedd heb sedd ar y Fforwm.  Mewn ymateb, eglurwyd bod dwy newyddlen yn cael eu hanfon i’r ysgolion yn fisol.  Awgrymwyd hefyd y gellid gofyn i’r cynrychiolwyr ar y grwpiau strategol / technegol adrodd yn ôl i’r penaethiaid.