Agenda item

Cais i estynnu'r adeilad cartref nyrsio a maes parcio ynghyd a chadarnhau lleoliad presennol uned biomass

 

AELOD LLEOL: Cynghorydd Eirwyn Williams

 

Dolen i'r dogfennau cefndirol perthnasol

Caniatáu

 

Amodau:

 

1. 5 mlynedd
2. Unol a’r cynlluniau ac adroddiadau
3. Llechi
4. Gorffeniad allanol
5. Amodau dwr Cymru
6. Cytuno manylion a lleoliad uned(au) awyru allanol cyn eu gosod
7. Ni chaniateir ffenestri sy’n agor ar yr estyniad sy’n destun y caniatâd yma
8. Amod sŵn - cyfraddiad sŵn 25 rhwng 2300 - 0700 ac 35 ar unrhyw adeg arall
9. Amodau archeolegol
10. Tirweddu
11. Cynllun gwastraff
12. Parcio i’w gwblhau yn unol gyda’r manylion a gymeradwyir ac yn gwbl weithredol cyn dod a’r adeilad i ddefnydd
13. Math o biomas boiler / ffliw
14. Cynllun gwastraff i’w weithredu yn unol â’r manylion cymeradwyedig

Tynnwyd sylw at y ffurflen sylwadau hwyr.

a)    Amlygodd y Rheolwr Cynllunio bod y safle wedi ei leoli mewn lleoliad canolog o fewn Tref Cricieth gyda’r adeilad presennol eisoes wedi ei ymestyn yn sylweddol ac yn cael ei ddefnyddio fel cartref nyrsio. Eglurwyd bod y prif estyniad bwriedig yn mesur 28m wrth 16m ar ei fwyaf, 7.9m o uchder i’r crib a 5m o uchder i’r bondo; wedi ei leoli ar ran o’r safle sy’n is na’r briffordd a’r rhan blaen yr adeilad. Byddai’n darparu 11 ystafell wely ynghyd ac ystafelloedd staff/nyrs cysylltiol ar y llawr gwaelod a 9 ystafell ychwanegol ar y llawr cyntaf ynghyd a derbynfa ac ystafelloedd eraill cysylltiol. Ategwyd bod y bwriad hefyd yn golygu ymestyn y maes parcio presennol i ran o dir gwyrdd sydd wedi ei leoli drws nesaf i’r safle i ddarparu 14 llecyn parcio ynghyd a llecyn ar gyfer yr anabl. Y bwriad yw cadw gweddill y tir gwyrdd ar gyfer bywyd gwyllt.

 

Tra bod Polisi TAI 11 yn ymwneud a cheisiadau ar gyfer datblygu Cartrefi Gofal preswyl /ychwanegol / arbenigol o’r newydd, ystyriwyd egwyddorion a meini prawf y Polisi gyda’r cais. Eglurwyd bod maen prawf (1) o’r Polisi yn cyfeirio tuag at y ffaith fod y bwriad wedi ei leoli o fewn ffin datblygu Canolfan Isranbarthol, Trefol neu Leol. Nodwyd bod Cricieth wedi ei adnabod fel Canolfan Wasanaeth Lleol yn y Cynllun. Yn ogystal, mae maen prawf (4) yn cyfeirio at yr angen i sicrhau na fydd y bwriad yn arwain at orddarpariaeth o lety gofal o gymharu ag anghenion yr ardal leol. Adroddwyd bod  Gwasanaeth Cymdeithasol Cyngor Gwynedd wedi cadarnhau bod prinder cartrefi yng Ngwynedd sy’n gallu darparu gofal nyrsio, yn benodol gofal nyrsio dementia. Ategwyd , fel comisiynwyr, eu bod yn falch o weld cartref sydd yn cynnig y math yma o ofal ac yn un sydd yn edrych i ddatblygu a chynyddu capasiti i’r dyfodol.

 

Yng nghyd-destun yr ardal agored, nodwyd bod pwysigrwydd i’r ardal agored yma yng nghanol tref Criccieth, a’r golygfeydd allan dros y safle tua’r arfordir, wedi ei amlygu ym mhenderfyniadau cynllunio ar /ger y safle yn y gorffennol. Mynegwyd bod yr ardal wedi ei gwarchod fel llecyn agored o dan y Cynllun Datblygu Unedol ond nad oedd ganddo'r un warchodaeth ffurfiol o dan y Cynllun Datblygu Lleol cyfredol. Eglurwyd bod y term ‘man agored’, a gynhwysir ym mholisi ISA 4, yn cynnwys mannau gwyrdd amwynder, rhandiroedd, parciau a gerddi cyhoeddus, cyfleusterau chwaraeon awyr agored a darpariaeth chwarae i blant a phobl ifanc fel y disgrifir o fewn Nodyn Cyngor Technegol 16: Chwaraeon, Hamdden a Mannau Agored. Ystyriwyd  bod yr ardal agored yma yn fan gwyrdd amwynder a bod gofynion polisi ISA 4 yn berthnasol i’r bwriad. Ategwyd bod y polisi yn gwrthod cynigion fyddai’n arwain at golli llecynnau agored presennol oni bai fod y bwriad yn cydymffurfio gyda’r meini prawf. Nodwyd bod yr ‘ardal agored’ dan sylw yn dir preifat ac nad oedd mynediad i’r cyhoedd iddo.

 

Yng nghyd-destun mwynderau gweledol, cyffredinol a phreswyl, nodwyd bod yr  estyniadau bwriedig yn eithaf sylweddol, ond wedi ei leoli ar lefel islaw na’r adeilad presennol ac o faint deulawr ac unllawr yn unig. Oherwydd maint presennol y safle a’i leoliad ynghyd a maint a dyluniad y bwriad, ni ystyriwyd y byddai’r estyniadau yn ymddangos yn ormesol o’i gymharu â’r adeilad presennol. Ni ystyriwyd y byddai’r bwriad yn gyfystyr a gorddatblygiad o’r safle oherwydd bod y cynllun lleoliad yn dangos bod llefydd gwag o gwmpas yr adeilad. Cyfeiriwyd at leoliad y tai agosaf i’r safle (Teras Mona) sydd wedi eu lleoli ar draws trac cul i ffin y safle ble bwriedir gosod estyniad unllawr yn unig.

 

Amlygwyd bod y bwriad yn cynnwys materion yn ymwneud a’r boiler biomas sydd wedi ei leoli ar y safle gyda chynlluniau wedi eu cyflwyno i gadarnhau lleoliad y boiler gan gydnabod nad oes caniatâd cynllunio yn bodoli ar gyfer y sefyllfa bresennol. Nodwyd bod  pryderon wedi eu hamlygu gan y cyhoedd ynglŷn â llygredd yn deillio o’r boiler a’r effaith weledol. Ategwyd bod Uned Gwarchod y Cyhoedd wedi cadarnhau fod y math o foiler a gynigir yn addas ar gyfer ardal breswyl a mynegwyd bod amod tirweddu wedi ei gynnwys ar gyfer lleddfu’n rhannol unrhyw effaith weledol.

 

Adroddwyd bod nifer o sylwadau wedi eu derbyn ynghylch a’r sŵn sy’n deillio o’r cartref presennol ynghyd ac achosion o ymddygiad anghymdeithasol ar adegau. Mynegwyd bod y  cartref nyrsio yn bodoli’n bresennol gyda mesurau sydd yn ymdrin â materion niwsans cyhoeddus tu hwnt i reolaeth cynllunio. Er bod y safle wedi ei leoli o fewn ardal brysur o Griccieth, ni ystyriwyd y byddai’r bwriad gerbron yn debygol o gael effaith sylweddol fwy ar fwynderau’r trigolion lleol o ran ymddygiad anghymdeithasol. Ategwyd bod asiant y cais wedi cadarnhau bwriad i ddarparu unedau awyru o fewn yr ystafelloedd fyddai’n golygu na fyddai angen agor ffenestri yn yr haf / yn y nos. Byddai hyn yn lleihau’r effaith sŵn ac yn unol â dymuniad Uned Gwarchod y Cyhoedd, byddai angen cytuno ar fanylion y ddarpariaeth drwy amod cynllunio briodol.

 

Adroddwyd bod nifer o wrthwynebiadau wedi eu derbyn gan y cyhoedd ynglŷn â’r sefyllfa parcio bresennol ynghyd a phryderon ynglŷn â’r sefyllfa parcio i’r dyfodol o ganlyniad i’r estyniad. Amlygwyd bod y bwriad yn cynnig estyniad i’r maes parcio gyda’r Uned Drafnidiaeth yn cadarnhau fod y ddarpariaeth yn cyrraedd gofynion parcio statudol. Roedd yr Uned Drafnidiaeth hefyd yn nodi  bod darpariaeth ar gael ar y stryd ac mewn meysydd parcio cyhoeddus fyddai'n ddigonol ar gyfer delio gyda threfn parcio sy’n deillio o’r datblygiad.

 

Derbyniwyd cadarnhad gan yr Uned Bioamrywiaeth bod y bwriad yn dderbyniol yn ddarostyngedig i amodau cynllunio i sicrhau fod y mesuriadau lliniaru sydd yn cael eu cynnig yn cael eu gweithredu. Derbyniwyd cadarnhad bod materion archeolegol a hanesyddol hefyd yn dderbyniol.

 

Yng nghyd-destun materion iaith, gan fod y cais yn gais Pwyllgor, mae’r CCA Cynnal a Chreu Cymunedau Nodedig a Chynaliadwy yn gofyn i ymgeiswyr/asiantwyr ddarparu datganiad i egluro sut mae’r bwriad yn rhoi ystyriaeth i’r iaith. Adroddwyd bod datganiad iaith wedi derbyn sylw gan yr Uned Hunaniaeth oedd wedi cadarnhau fod effaith y datblygiad yn gadarnhaol.

 

O ystyried yr holl faterion cynllunio perthnasol, gan gynnwys polisïau a chanllawiau perthnasol, ystyriwyd fod y bwriad i ymestyn y cartref presennol yn dderbyniol ac yn cydymffurfio gyda gofynion polisïau.

b)    Yn manteisio ar yr hawl i siarad nododd gwrthwynebydd i’r cais y pwyntiau canlynol:

·         Ei fod yn siarad  ar ran nifer o drigolion o’r ardal sy’n gwrthwynebu’n gryf i’r cais

·         Nad oedd digon o le ar y safle i geir ymwelwyr a staff, parcio ambiwlans, cerbydau nwyddau a lorïau sbwriel sy’n galw. O ganlyniad mae cerbydau’r Pines yn parcio ym mhobman ar y priffyrdd cyfagos gan greu dryswch a pherygl ger y fynedfa i’r safle - byddai ehangu’r Cartref yn gwaethygu’r problemau yma

·         Bod nifer o finiau gwastraff a sgip fawr ar y maes parcio.

·         Yn ôl safonau parcio cenedlaethol CSS Cymru, nid yw’r ddarpariaeth a fwriedir (14 lle i ymwelwyr a 2 i staff)  yn ddigonol. Mae angen 15 lle i ymwelwyr a 19 i  staff ynghyd a lle i’r biniau sbwriel, i’r lorïau sbwriel a cherbydau nwyddau ddadlwytho a throi’n ôl. Nid yw’r gofod yn y maes parcio newydd yn ddigonol.

·         Byddai’r bwriad yn cael effaith ar yr Ardal Gadwraeth Cricieth.

·         Buasai’r maes parcio newydd yn ymwthio i lecyn agored yn yr Ardal a buasai’r parcio, y compownd biniau a’r sgip yn edrych fel iard sbwriel gan amharu’n fawr ar gymeriad yr Ardal ac ar y golygfeydd arbennig oddi yno.

·         Bod y sied boiler wedi ei hadeiladu o ddalennau metel gyda chorn simdde mawr ddur - defnyddiau sy’n hollol anaddas mewn Ardal Gadwraeth.

·         O dan y Ddeddf mae gan y Cyngor Lleol ddyletswydd ffurfiol i  ddiogelu a gwella cymeriad a golwg Ardaloedd Cadwraeth - byddai caniatáu'r estyniad yn amharu ar yr ardal

·         Nid yw boiler masnachol biomas yn addas i’w leoli mewn ardal breswyl nac wrth ymyl Cartref Nyrsio gan fod sŵn hymio cyson yn dod ohono a llwch du mân yn dod allan o’r simdde a gorchuddio popeth yn y cyffiniau.

·         Bod astudiaeth gan Lywodraeth Prydain yn dweud fod boiler biomass yn creu 13.5% mwy o lygredd na boiler olew a 300 gwaith mwy na boiler nwy. Honnir bod y gronynnau llygredig bychain o foiler biomas yn medru mynd i mewn i ffrwd gwaed ac organau pobl gan greu peryglon tymor hir i’w hiechyd a chael effaith ar anadlu a chreu problemau asthma.

·         Bod Llywodraeth Cymru’n disgwyl y bydd Awdurdodau Cynllunio yn cymryd llygredd aer yn ddifrifol wrth ystyried ceisiadau cynllunio ac os nad yw’n bosib lliniaru’r llygredd, dylai’r datblygiad gael ei wrthod.

·         Bod yn bwysig i’r Pwyllgor ystyried y rhesymau gwrthwynebu hyn, ynghyd ag eraill sydd wedi cael eu manylu’n llawn yn y rhaglen cyn dod i benderfyniad.

c)    Yn manteisio ar yr hawl i siarad nododd yr ymgeisydd y pwyntiau canlynol:

·         Bod y cwmni yn gweithredu dau gartref sy'n darparu gofal nyrsio arbenigol 24 awr i unigolion sy'n byw gyda Dementia. Mae Cartref Porthmadog a Chartref Criccieth yn gweithredu hyd eithaf eu gallu ac yn aml mae argaeledd gwelyau yn gyfyngedig oherwydd y galw sylweddol.

·         Bod y cartrefi yn darparu 84 gwely gofal nyrsio dementia arbenigol ar gyfer  Dwyfor a Meirionydd (poblogaeth o 62,000)

·         Dros y 3 blynedd diwethaf mae Cartref Criccieth wedi cynnal rhestr aros o hyd at 10 unigolyn sydd angen lleoliad preswyl, ond ers i Gartref Pwyliaid Penrhos, ger Llanbedrog gau yn ddiweddar, bod y rhestr aros wedi dyblu.

·         Disgwylir y bydd nifer unigolion sydd angen gofal preswyl nyrsio yn dyblu dros y blynyddoedd i ddod. Y bwriad yw i’r cartref yng Nghriccieth, ddarparu  20 gwely nyrsio ychwanegol fydd  yn cwrdd â'r galw.

·         Bod cael cartref nyrsio arbenigol yng Nghriccieth yn adnodd cymunedol hanfodol sydd yn caniatáu i deuluoedd fod yn agos at eu hanwyliaid

·         Ar hyn o bryd Cartref Criccieth yn cyflogi 55 o staff. Bydd yr estyniad arfaethedig yn creu 21 o swyddi llawn amser ychwanegol fydd yn cynnwys 15 Cynorthwyydd Gofal Iechyd, Arbenigwr Gofal Dementia a Swyddi Nyrsio Cofrestredig

·         Eu bod yn ceisio staff sy'n siarad Cymraeg i gefnogi’r preswylwyr. Bod 67% o'r staff presennol yn siarad Cymraeg iaith gyntaf  - yn falch eu bod yn cymryd agwedd ragweithiol i sicrhau bod iaith yn rhan annatod o ofal

·         Ymateb i'r pryderon a godwyd gan y gymuned yn ystod y broses ymgynghori, yng nghyd-destun sŵn yn cario o’r cartref wedi eu cydnabod

·         Eu bod yn bwriadu gosod system awyru a gosod lifft pwrpas dwbl newydd sydd wedi'i gynllunio ar gyfer cyfleusterau meddygol.

·         Wrth gymeradwyo'r cais, bydd hyn yn galluogi i’r tîm rheoli baratoi a moderneiddio'r cartref ar gyfer y dyfodol

·         Eu bod yn darparu adnodd cymunedol angenrheidiol, yn gyflogwr lleol allweddol a phwysig, ac yn chwarae rhan hanfodol yn economi gofal iechyd Gogledd Cymru.

ch)  Yn manteisio ar yr hawl i siarad nododd yr Aelod Lleol y pwyntiau canlynol:

·         Ei fod yn gwrthwynebu’r cais

·         Ei fod yn ystyried y bwriad yn orddatblygiad o’r safle

·         Y bwriad wedi ei leoli o fewn safle cadwraeth

·         Byddai’r bwriad yn amharu ar fwynderau trigolion cyfagos

·         Nad oedd y safle yn addas ar gyfer y cais

 

d)    Cynigiwyd ac eiliwyd i ganiatáu’r cais

 

dd)  Yn ystod y drafodaeth ddilynol nodwyd y sylwadau canlynol gan aelodau:

·     Bod gwir angen y ddarpariaeth yn y Sir

·           Bod y boblogaeth yn heneiddio ac felly angen gofal demtia o ansawdd

·           Croesawu swyddi newydd yn yr ardal

·           Nad yw’r datblygiad yn ymddangos yn ymwthiol

·           Angen mwy o ymdrech i gynyddu'r nifer o weithwyr Cymraeg

·           Bod y bwriad yn cyfarch materion polisi – dim sail i wrthwynebu

 

e)    Mewn ymateb i bryderon am drefniadau ar gyfer biniau a lorïau nwyddau, nodwyd bod y swyddogion wedi ymgynghori gyda’r Uned Gwastraff ond nad oedd ymateb wedi ei dderbyn. Tynnwyd sylw at amod 11 - yr angen am gynllun gwastraff

 

f)     Mewn ymateb i bryderon am y sefyllfa parcio nododd yr Uwch Beiriannydd Rheolaeth Datblygu bod ymateb i’r pryderon parcio wedi ei nodi ar dudalen 38 o’r rhaglen. Ategodd bod y ddarpariaeth, o ystyried yr holl ffactorau, yn cynnig balans teg

 

ff)    Mewn ymateb i bryderon am amod 7 - Ni chaniateir ffenestri sy’n agor ar yr estyniad sy’n destun y caniatâd yma, nodwyd bod hwn wedi ei gynnwys fel ymateb uniongyrchol i bryderon lleol. Yn dilyn ymgynghori gydag Uned Gwarchod y Cyhoedd, amlygwyd eu bod wedi awgrymu’r amod mewn ymateb i gwynion a dderbyniwyd ynglŷn â sŵn gan y cleifion

 

g)    Mewn ymateb i awgrym i ystyried boiler gwahanol i un biomas oherwydd pryderon am yr allyriadau, amlygodd y Cyfieithwr mai lleoliad yr uned biomas cyfredol oedd dan sylw. Cyfeiriwyd at sylwadau Gwarchod y Cyhoedd ynglŷn â’r uned biomas. Petai angen ystyried boiler gwahanol, buasai rhaid cyflwyno cais diwygiedig. Nid oedd unrhyw reswm cynllunio dros wrthod ail leoli’r uned biomas.

 

PENDERFYNWYD: Caniatáu y cais

 

Amodau:

 

1.    5 mlynedd

2.    Unol a’r cynlluniau ac adroddiadau

3.    Llechi

4.    Gorffeniad allanol

5.    Amodau dwr Cymru

6.    Cytuno manylion a lleoliad uned(au) awyru allanol cyn eu gosod

7.    Ni chaniateir ffenestri sy’n agor ar yr estyniad sy’n destun y caniatâd yma

8.    Amod sŵn - cyfraddiad sŵn 25 rhwng 2300 - 0700 ac 35 ar unrhyw adeg arall

9.    Amodau archeolegol

10.  Tirweddu

11.  Cynllun gwastraff

12.  Parcio i’w gwblhau yn unol gyda’r manylion a gymeradwyir ac yn gwbl weithredol cyn dod a’r adeilad i ddefnydd

13.  Math o biomas boiler / ffliw

14.  Cynllun gwastraff i’w weithredu yn unol â’r manylion cymeradwyedig