Agenda item

Adroddiad gan Dafydd L. Edwards, Swyddog Cyllid Statudol yr Awdurdod Lletya.

1.   Cymeradwyo Cyllideb Refeniw 2021/22 fel y'i cyflwynir yn Atodiad 1 i’r adroddiad. Mae hyn yn cynnwys trosglwyddiadau unwaith ac am byth o £415,000 yn y gyllideb refeniw i'w hariannu o'r gronfa wrth gefn a glustnodir.

2.  Cymeradwyo Cyllideb Gyfalaf 2021/22 hyd 2025/26 fel y'i cyflwynir yn Atodiad 2.

3.  Cyllido'r Adolygiadau Porth (Sicrwydd) ar gyfer y prosiectau sydd dan arweiniad y Bwrdd Uchelgais ac Arianwyr y Prosiectau.

4.  Gofyn yn ffurfiol i bob un o'r chwe awdurdod lleol gydweithredu wrth ddefnyddio eu hyblygrwydd ariannu i ryddhau cyllid refeniw i'r Bwrdd Uchelgais. Golyga hyn gyfnewid y cyllid sydd wedi'i ddynodi i'r Cynllun Twf yn erbyn prosiectau cyfalaf eraill o fewn eu rhaglenni cyfalaf a sicrhau bod cyllid refeniw o werth cyfartal ar gael i'r Cynllun Twf i ariannu eu heitemau math refeniw.

5.  Gofyn i'r Swyddfa Rheoli Portffolio adolygu costau'r prosiectau yn ystod y flwyddyn wrth i ragor o wybodaeth ddod i law, ymhellach i'r costau nas ragwelwyd sydd bellach wedi'u hadnabod yn y gyllideb refeniw. Bydd yr adolygiad hwn yn ystyried yr opsiwn o ariannu rhan o'r gwariant hwn o gyllideb gyfalaf y prosiect unigol.

Cyflwynwyd yr adroddiad gan Dafydd L.Edwards (Swyddog Statudol Statudol – Awdurdod Lletya) a Sian Pugh (Cyfrifydd Grŵp – Corfforaethol a Phrosiectau).

 

PENDERFYNWYD

(1)     Cymeradwyo Cyllideb Refeniw 2021/22 fel y’i cyflwynir yn Atodiad 1 i’r adroddiad.  Mae hyn yn cynnwys trosglwyddiadau unwaith ac am byth o £415,000 yn y gyllideb refeniw i’w hariannu o’r gronfa wrth gefn a glustnodir.

(2)     Cymeradwyo Cyllideb Gyfalaf 2021/22 hyd 2025/26 fel y’i cyflwynir yn Atodiad 2.

(3)     Cyllido’r Adolygiadau Porth (Sicrwydd) ar gyfer y prosiectau sydd dan arweiniad y Bwrdd Uchelgais ac Arianwyr y Prosiectau.

(4)     Gofyn yn ffurfiol i bob un o’r chwe awdurdod lleol gydweithredu wrth ddefnyddio eu hyblygrwydd ariannu i ryddhau cyllid refeniw i’r Bwrdd Uchelgais.  Golyga hyn gyfnewid y cyllid sydd wedi’i ddynodi i’r Cynllun Twf yn erbyn prosiectau cyfalaf eraill o fewn eu rhaglenni cyfalaf a sicrhau bod cyllid refeniw o werth cyfartal ar gael i’r Cynllun Twf i ariannu eu heitemau math refeniw.

(5)     Gofyn i’r Swyddfa Rheoli Portffolio adolygu costau’r prosiectau yn ystod y flwyddyn wrth i ragor o wybodaeth ddod i law, ymhellach i’r costau nas ragwelwyd sydd bellach wedi’u hadnabod yn y gyllideb refeniw.  Bydd yr adolygiad hwn yn ystyried yr opsiwn o ariannu rhan o’r gwariant hwn o gyllideb gyfalaf y prosiect unigol.

 

RHESYMAU DROS Y PENDERFYNIAD

 

(1)     Gosod y gyllideb arfaethedig yn ôl pennawd gwariant a’r ffrydiau ariannu cyfatebol ar gyfer y flwyddyn.

(2)     Gosod y gyllideb arfaethedig fesul prosiect a’r ariannu cyfalaf cyfatebol ar gyfer 2021/22 hyd 2025/26.

(3)     Er mwyn gweithredu’n effeithiol o fewn y cyllid sydd ar gael, mae angen i gyllideb flynyddol gael ei chymeradwyo ar gyfer y Bwrdd Uchelgais.

(4)     Awdurdodi’r Cyfarwyddwr Portffolio i wario arian yn unol â’r gyllideb gymeradwy.

 

TRAFODAETH

 

Cyflwynwyd yr adroddiad oedd yn cynnig Cyllideb Refeniw a Chyfalaf 2021/22 ar gyfer y Bwrdd Uchelgais.

 

Manylwyd ar y cefndir ac ystyriaethau perthnasol a’r ymgynghoriadau a gynhaliwyd.

 

Manylodd Swyddog Cyllid Statudol yr Awdurdod Lletya ar y newidiadau a’r sefyllfaoedd annisgwyl oedd wedi codi ers i’r Bwrdd drafod y gyllideb ddiwethaf, ac oedd wedi gyrru cyfran helaeth o’r defnydd o gronfeydd wrth gefn, sef:-

 

·         Y costau sylweddol annisgwyl untro ynghlwm â datblygu achosion busnes.

·         Costau’r gefnogaeth gyfreithiol i’r achosion busnes hynny.

 

Eglurodd:-

 

·         Bod arian digonol yn y cronfeydd wrth gefn i weithredu hyn, ond y ceisid adeiladu’r gronfa wrth gefn, yn hytrach na’i defnyddio ar y dechrau. 

·         Bod y Cyfarwyddwr Portffolio, y Rheolwr Gweithrediadau a Swyddog Monitro’r Awdurdod Lletya wedi’u herio ar y ffigyrau, a bod yr amcangyfrifon o’r costau untro ychwanegol yn rhai bras ar hyn o bryd.

 

Nododd ymhellach:-

 

·         Gan i’r rhandaliad cyntaf o £16m o’r grant Cynllun Twf gael ei dderbyn ar 12 Mawrth, 2021, bod cyfraniadau’r partneriaid ar ochr isaf yr amrediad a gyflwynwyd i’r Bwrdd ym mis Hydref 2020.

·         Yn dilyn cyhoeddiad Llywodraeth y DU yng Nghyllideb y Canghellor yng nghyswllt cwtogi’r cyfraniad ariannu o 15 mlynedd i 10 mlynedd, byddai’n rhaid ymweld â’r holl sefyllfa ariannol.  Daeth newyddion y Canghellor yn annisgwyl i Lywodraeth Cymru hefyd, ac nid oedd yn glir eto a oedd Llywodraeth Cymru hefyd am gwtogi’r cyfraniad ariannu i gyd-fynd ag amseru Llywodraeth y DU, na beth fyddai’r ymhlygiadau i oes y cynnyrch treth perthnasol.  

·         Bod y proffil gwariant cyfalaf wedi llithro rhywfaint hefyd, a byddai’n rhaid asesu’r holl faterion hyn i’r dyfodol.

·         Bod y gyllideb ar gyfer y flwyddyn bresennol yn balansio.  Erbyn dod â chyllideb 2022/23 gerbron y Bwrdd ymhen blwyddyn, o bosib’ y byddai yna newidiadau pellach, a byddai’n rhaid edrych ar yr holl gostau a’r grantiau yn eu cyfanrwydd eto yn ystod y flwyddyn.  Bwriedid rhoi sylw i hynny dros yr haf, gan roi rhybudd digonol i bob partner o’u cyfraniadau eto erbyn y flwyddyn nesaf.

 

Yn ystod y drafodaeth, codwyd y materion a ganlyn:-

 

·         Mewn ymateb i gwestiwn, eglurwyd, pe na fyddai cynllun yn mynd rhagddo, y byddai’n rhaid mynd yn ôl at y ddwy Lywodraeth i sicrhau bod unrhyw brosiect newydd fyddai’n dod gerbron y Bwrdd yn dal i ymateb i ofynion y Llywodraethau ar gyfer y buddsoddiadau.

·         Tynnwyd sylw at y ffaith bod y gorbenion yn dechrau mynd dros 10% o’r gwariant blynyddol, a phwysleisiwyd yr angen i gadw golwg ar y sefyllfa.

·         Mewn ymateb i gwestiwn, cadarnhawyd, er gwaethaf y newidiadau i’r proffil gwariant, ac ati, bod gofyn o hyd i’r partneriaid dalu’r cyfraniadau a osodwyd allan yn y gyllideb yn y flwyddyn bresennol. 

·         Mewn ymateb i sylw ei bod yn ymddangos bod popeth wedi’i seilio ar ragdybiaethau, ac nad oedd y rhagolygon ariannol yn gredadwy, eglurwyd bod rhaid gwneud y gorau gyda’r wybodaeth oedd ar gael ar hyn o bryd.  Gellid ymdopi am y flwyddyn gyfredol o fewn yr adnoddau oedd ar gael, ond byddai’n rhaid ail-asesu’r sefyllfa ar gyfer y flwyddyn nesaf.

·         Nodwyd bod angen i’r Bwrdd arddangos parodrwydd i fod yn hyblyg, yn wyneb y penderfyniadau sy’n cael eu gwneud y tu allan i’w reolaeth gan y ddwy Lywodraeth.

·         Diolchwyd i swyddogion cyllid statudol y chwe awdurdod lleol am gytuno mewn egwyddor i gytundeb ar gyfnewid y cyllid cyfalaf / refeniw dros holl gyfnod y Cynllun Twf, fel bod modd defnyddio grant cyfalaf y Bwrdd Uchelgais fel arian refeniw.