Agenda item

Adeiladu prif ganolfan gofal, mynedfa, parcio, tirlunio a draenio

 

AELOD LLEOL: Cynghorydd Edgar Owen

 

Dolen i'r dogfennau cefndir perthnasol

PENDERFYNIAD:

 

Dirprwyo’r hawl i Bennaeth Cynorthwyol Adran yr Amgylchedd i ganiatáu’r cais yn ddarostyngedig i’r amodau isod:-

 

1. 5 mlynedd.
2. Yn unol â’r cynlluniau.
3. Llechi.
4. Samplau o’r deunyddiau allanol.
5. Ymgymryd â’r gwaith tirweddu o fewn cyfnod penodedig.
6. Amodau Priffyrdd.
7. Cyflwyno Cynllun Amgylcheddol Rheoli Adeiladwaith (i gynnwys cynllun atal llygredd er mwyn gallu ymgymryd ag asesiad manwl o effaith y datblygiad ar Afon Gwyrfai).
8. Cyflwyno Cynllun Gwelliannau Bioamrywiaeth a Rheoli Cynefin.
9. Cyflwyno asesiad Risg Diogelwch-bio.
10.  Cydymffurfio gyda mesurau lliniaru a nodwyd o fewn yr Asesiad Rhagarweiniol Ecolegol.
11. Cyflwyno manylion triniaeth ffiniau’r safle (i ddangos lleoliad a math y ffensys ac yn y blaen).
12. Cytuno a manylion enw Cymraeg i’r ganolfan ynghyd ac arwyddion/rhybuddion cysylltiedig.
13. Cyfyngu oriau gweithio i 08:00 – 18:00 yn yr wythnos, 08:00 – 13:00 ar ddydd Sadwrn a dim o gwbl yn ystod y Sul a Gwyliau Banc/Cenedlaethol.
14. Cyflwyno cynllun gosod rhwystr ar draws y fynedfa arfaethedig.
15. Cyflwyno cynllun goleuo allanol.
16. Amod i ddiogelu’r coed sydd eisoes ar ffiniau’r safle.
17. Amod grasscrete ar y lle parcio ger y tai

 

Nodyn: Cyflwyno cynllun system draenio dŵr cynaliadwy (SuDS) i’r Uned Dŵr ac Amgylchedd y Cyngor

 

Adeiladu prif ganolfan gofal, mynedfa, parcio, tirlunio a draenio

 

          Tynnwyd sylw at y ffurflen sylwadau hwyr.

 

a)    Ymhelaethodd yr Uwch Swyddog Rheolaeth Datblygu ar gefndir y cais gan nodi mai cais llawn ydoedd ar gyfer adeiladu prif ganolfan gofal iechyd, mynedfa, parcio, tirlunio a chynllun draenio yn Waunfawr. Eglurwyd bod y safle wedi ei leoli tu allan, ond gerllaw i ffin datblygu Waunfawr fel y’i nodir yn y CDLl, ond heb ei ddynodi ar gyfer unrhyw ddefnydd tir penodol. Adroddwyd y bydd y feddygfa bresennol yn Waunfawr yn symud  i’r safle newydd fyddai wedi ei adeiladu’n bwrpasol.

 

Amlygwyd bod sawl elfen i’r cais:

·         Codi adeilad un a deulawr ar ffurf “L” o faint arwynebedd llawr 990 medr sgwâr i gynnwys ardaloedd gwasanaethau cymunedol, ardaloedd cyfrannol fel ystafelloedd cyfarfod, ystafelloedd newid a swyddfeydd ynghyd a phractis doctoriaid. Bydd y bwriad yn cynyddu’r niferoedd o weithwyr presennol o 29 i 35.

·         Darparu llecynnau parcio ar gyfer 38 o ymwelwyr, ar gyfer 15 staff a 6 ar gyfer ymwelwyr anabl.

·         Tirlunio ar gyrion ac oddi fewn i’r safle.

·         Cynllun draenio cynaliadwy.

·         Creu llwybr troed newydd i redeg cyfochrog a ffin ogleddol y safle gyda’r ffordd sirol dosbarth I (A.4085) ynghyd a chreu llwybrau troed o fewn y safle ei hun.

·         Creu mynedfa newydd i’r safle oddi ar y ffordd sirol dosbarth i gyfochrog.

·         Darparu storfa biniau ynghyd a darpariaeth ar gyfer beics.

 

Cyfeiriwyd at un o’r polisïau perthnasol i’r cais sef Polisi ISA2 o’r CDLL sy’n gefnogol i gynnal a gwella cyfleusterau cymunedol er bod rhaid i cydymffurfio â’r meini prawf:

-       i) eu bod wedi’u lleoli oddi mewn neu’n gyfagos â ffiniau datblygu lle bydd y cynnig yn darparu cyfleuster angenrheidiol i gefnogi’r gymuned leol. Yn yr achos yma, ystyriwyd bod safle’r cais yn cyffwrdd â ffin datblygu’r pentref gyda gwybodaeth wedi ei dderbyn fel rhan o’r cais, yn datgan bod gwir angen cyfleuster iechyd newydd yn Waunfawr fyddai’n ymateb yn gyflawn i anghenion iechyd y boblogaeth leol â phoblogaeth y dalgylch.

-       ii) yn achos adeiladau newydd, na ellid bodloni anghenion y gymuned leol trwy wneud defnydd deuol o gyfleusterau presennol neu drosi adeiladau presennol. Yn yr achos yma ystyriwyd 4 safle o fewn y pentref, ond am resymau yn ymwneud a maint cyfyngedig, diffygion mynedfa/parcio ac agosatrwydd at adeiladau eraill, penderfynwyd mai safle’r cais yma oedd yr un mwyaf addas ar gyfer canolfan iechyd newydd.

-       iii) os yw’r cynnig yn gofyn am ail-leoli cyfleuster, y gellid dangos nad yw’r safle presennol bellach yn addas ar gyfer y defnydd hwnnw. Yn yr achos yma, nid oes cyfleusterau digonol o fewn y feddygfa bresennol i ymateb i ofynion amrywiol a chynyddol cleifion y gymuned leol. Nid yw’r safle presennol yn ddigon mawr i ymestyn y cyfleuster presennol i ymateb yn effeithiol i ofynion iechyd y gymuned.

-       iv) bod graddfa a math y cynnig yn briodol o gymharu â maint, cymeriad a swyddogaeth yr anheddle. Yn yr achos yma, ystyriwyd bod graddfa, lleoliad a dyluniad yr adeilad wedi bod yn destun trafodaethau o flaen llaw gyda Swyddogion Cynllunio gyda newidiadau wedi ei gwneud i’r cynlluniau gwreiddiol er mwyn ystyried mwynderau gweledol a mwynderau preswyl trigolion cyfagos. Ystyriwyd bod lleoliad a gosodiad y safle gyferbyn a ffin datblygu’r pentref yn dderbyniol a'i fod yn creu estyniad rhesymegol i ffurf rubanog y rhan yma o’r pentref ac na fyddai yn cael effaith andwyol annerbyniol sylweddol ar fwynderau gweledol yr ardal

-       v) bod y cynnig yn hawdd ei gyrraedd ar droed, beic a chludiant cyhoeddus. Yn yr achos yma ystyriwyd bod y safle, er wedi ei leoli y tu allan i’r ffin datblygu, yn hygyrch i amrywiol ddulliau teithio amgen gan gynnwys trafnidiaeth gyhoeddus, cerdded a beicio. Fodd bynnag, rhagwelwyd y byddai’n anochel i rai cleifion ymweld â’r ganolfan drwy ddefnyddio cerbyd oherwydd eu cyflwr neu amgylchiadau personol.

 

Yng nghyd-destun mwynderau cyffredinol a phreswyl, derbyniwyd gwrthwynebiadau ar sail y byddai’r bwriad o’i ganiatáu yn, i) amharu’n andwyol ar breifatrwydd deiliaid anheddau cyfagos: ii) byddai agor y caeau i fyny yn y tu cefn i’r anheddau yn codi pryderon diogelwch, iii) cynnydd mewn traffig yn creu aflonyddwch sŵn ar draul mwynderau preswyl. Amlinellwyd yr ymatebion fesul pennawd:

 

-       Preifatrwydd: yr adeilad ei hun wedi ei leoli ar ran gorllewinol y safle felly yn osgoi gor-edrych i mewn i erddi’r anheddau a adnabyddir fel Llwydiarth, Cobweb Cottage a Ty’n Llain. O ganlyniad, bydd y maes parcio ar gyfer y cleifion yn cael ei osod y tu cefn i’r anheddau hyn. Er derbyn nad yw colli golygfeydd yn ystyriaeth faterol i gynllunio, mae colli preifatrwydd a gor-edrych yn ystyriaethau perthnasol a dilys. Derbyniwyd (o’i gymharu â’r sefyllfa bresennol) y bydd rhywfaint o or-edrych tuag at Ty’n Llain gan ddefnyddwyr y maes parcio, ond ystyriwyd mai am gyfnodau byr byddai hyn ac felly nid yw’n golygu gor-edrych uniongyrchol parhaol nac annerbyniol i'r tŷ (ac eraill gerllaw). Ategwyd y gellid cynnwys amod codi ffens coedyn close-boarded ar hyd ymylon y maes parcio ynghyd ag amod gosod grasscrete ar y lle parcio ger y tai.

 

-       Diogelwch – pryder yn ymwneud gydag agor cefnau’r anheddau i fyny a fyddai’n creu mynediad hwylus i’r anheddau eu hunain. Er mwyn lleihau’r fath bryder, amlygwyd bod asiant yr ymgeisydd wedi datgan y posibilrwydd o osod rhwystr ar draws y fynedfa pan mae’r ganolfan ar gau.

 

-       Aflonyddwch sŵn - cydnabuwyd y  byddai’r bwriad, o’i ganiatáu, yn creu sŵn a allai fod yn uwch na lefelau sŵn presennol o amgylch safle’r cais. Adroddwyd bod  datganiad byr yn ymwneud a sŵn wedi ei gyflwyno gyda’r cais yn nodi: i) na fydd llety preswyl yn rhan o’r cais ii) yr adeilad wedi ei osod er mwyn lleihau sŵn gyda’r ffenestri wedi eu trefnu i gyfyngu sŵn iii) yr adeilad wedi ei godi gan ddefnyddio waliau ceudod, iv) ni fydd gan yr adeilad unrhyw gyfarpar offer a fyddai’n allyrru sŵn - bydd y rhain wedi eu lleoli o fewn yr adeilad .

 

Adroddwyd bod bwriad creu mynediad newydd i’r safle yn uniongyrchol i’r ffordd sirol dosbarth 1 cyfochrog (A.4085) ynghyd a darparu llwybr troed/pafin ar hyd blaen y safle gan ymestyn y llwybr troed presennol. Amlygodd yr Uned Drafnidiaeth fod safle’r cais yn un hygyrch i drigolion lleol ac nad oedd ganddynt wrthwynebiad i’r cais yn ddarostyngedig ar gynnwys amodau a nodiadau perthnasol.   

 

Yng nghyd-destun materion llifogydd, derbyniwyd gwrthwynebiadau parthed y nant sy’n rhedeg drwy’r safle ac sy’n dueddol o orlifo yn ystod glaw trwm gan arwain at lifogydd ar y ffordd fawr. Mewn ymateb i’r pryderon hyn, nodwyd bod yr Uned Dwr ac Amgylchedd wedi datgan eu bod yn ymwybodol bod y nant wedi gorlifo yn y gorffennol, ond ystyriwyd bod hyn o ganlyniad i ddiffyg ymgymryd â gwaith cynnal a chadw gan berchennog y tir. Nodwyd hefyd bod yr Uned yn ymwybodol fod dwr yn cronni ar y ffordd sirol ac o ganlyniad mae’r ardal yn cael ei hystyried gan y Cyngor ar gyfer ymgymryd â chynllun atal llifogydd dalgylchol.

 

Ystyriwyd y byddai’r bwriad fel y’i cyflwynwyd yn welliant sylweddol ar gyfleusterau a darpariaeth feddygol ac iechyd ar gyfer y gymuned leol ynghyd a’r ardal ehangach ac na fyddai’r datblygiad yn ei gyfanrwydd, yn creu effaith sylweddol niweidiol sydd yn groes i bolisïau cynllunio a chyngor cenedlaethol perthnasol.

 

b)      Cynigwyd ac eiliwyd i ganiatáu y cais

 

       PENDERFYNWYD

 

Dirprwyo’r hawl i Bennaeth Cynorthwyol Adran yr Amgylchedd i ganiatáu’r cais yn ddarostyngedig i’r amodau isod:-

 

1.  5 mlynedd.

2.  Yn unol â’r cynlluniau.

3.  Llechi.

4.  Samplau o’r deunyddiau allanol.

5.  Ymgymryd â’r gwaith tirweddu o fewn cyfnod penodedig.

6.  Amodau Priffyrdd.

7.  Cyflwyno Cynllun Amgylcheddol Rheoli Adeiladwaith (i gynnwys cynllun atal llygredd er mwyn gallu ymgymryd ag asesiad manwl o effaith y datblygiad ar Afon Gwyrfai).

8.  Cyflwyno Cynllun Gwelliannau Bioamrywiaeth a Rheoli Cynefin.

9.  Cyflwyno asesiad Risg Diogelwch-bio.

10. Cydymffurfio gyda mesurau lliniaru a nodwyd o fewn yr Asesiad Rhagarweiniol Ecolegol.

11.  Cyflwyno manylion triniaeth ffiniau’r safle (i ddangos lleoliad a math y ffensys ac yn y blaen).

12.  Cytuno a manylion enw Cymraeg i’r ganolfan ynghyd ac arwyddion/rhybuddion cysylltiedig.

13.  Cyfyngu oriau gweithio i 08:00 – 18:00 yn yr wythnos, 08:00 – 13:00 ar ddydd Sadwrn a dim o gwbl yn ystod y Sul a Gwyliau Banc/Cenedlaethol.

14.  Cyflwyno cynllun gosod rhwystr ar draws y fynedfa arfaethedig.

15.  Cyflwyno cynllun goleuo allanol.

16.  Amod i ddiogelu’r coed sydd eisoes ar ffiniau’r safle.

17.  Amod grasscrete ar y lle parcio ger y tai

 

Nodyn: Cyflwyno cynllun system draenio dŵr cynaliadwy (SuDS) i’r Uned Dŵr ac Amgylchedd y Cyngor