Agenda item

Dymchwel storfa allanol bresennol, addasiadau i'r prif dŷ presennol ac estyniad rhannol unllawr, rhannol deulawr i'r ochr a'r cefn i greu rhagor o ofod byw

 

AELOD LLEOL: Cynghorydd Gruffydd Williams

 

Dolen i'r dogfennau cefndir perthnasol

PENDERFYNIAD:

Gwrthod, yn groes i’r argymhelliad:

 

Rhesymau gwrthod:

 

Ystyriwyd yr estyniad yn

• or-ddatblygiad fyddai’n cael effaith andwyol ar fwynderau gweledol yr ardal
• byddai’n cael ardrawiad andwyol ar olygfeydd i mewn ac allan o’r AHNE yn groes i Bolisi PCYFF 3 ac MG 1 o’r CDLl

 

Dymchwel storfa allanol bresennol, addasiadau i'r prif dŷ presennol ac estyniad rhannol unllawr, rhannol deulawr i'r ochr a'r cefn i greu rhagor o ofod byw

 

            Tynnwyd sylw at y ffurflen sylwadau hwyr.

 

a)    Amlygodd yr Uwch Swyddog bod y cais yn un i addasu ac ehangu’r eiddo presennol ac yn ail-ddyluniad o gynllun a wrthodwyd gan y Pwyllgor yn flaenorol (C20/0022/42/DT). Fe drafodwyd y cais hwn gan y Pwyllgor Cynllunio ar 24/05/21 pryd penderfynwyd gohirio’r drafodaeth er caniatáu ystyriaeth bellach o sylwadau a gyflwynwyd gan Gydbwyllgor Ymgynghorol AHNE Llŷn.

 

Cyflwynwyd y cais gerbron y Pwyllgor ar gais yr aelod lleol.

 

Saif yr eiddo ar lethrau Mynydd Nefyn mewn cefn gwlad agored, oddeutu 340m i’r dwyrain o ffin ddatblygu Canolfan Gwasanaeth Lleol Nefyn a 50m y tu allan i Ardal o Harddwch Naturiol Eithriadol Llŷn. 

 

Eglurwyd y byddai’r datblygiad yn cynnwys:

·         Dymchwel adeilad allanol presennol ac adleoli wal gerrig er mwyn creu safle parcio a lle troi

·         Dymchwel estyniad deulawr cefn ac estyniad gwydr ochr

·         Codi estyniad deulawr cefn ar ffurf cilgant gyda thair ffenestr gromen yn yr edrychiad blaen a ffenestri to yn yr edrychiad cefn ynghyd a chodi estyniad unllawr gyda tho llechi unllethr ar hyd ei flaen.

·         Gosod balconi ar dalcen y tŷ presennol

 

Dangoswyd sleidiau yn amlygu gosodiad y tŷ a sut y byddai’n cymryd ei le yn y dirwedd. Ategwyd bod yr ymgeisydd yn ymgeisio i ymateb i bryderon y pwyllgor.

 

Wedi ystyried y sylwadau a dderbyniwyd gan gydbwyllgor yr AHNE, gwerthfawrogwyd y pryder a amlygwyd ynghylch sensitifrwydd y dirwedd yn yr ardal. Er hynny, nid oedd y swyddogion cynllunio yn ystyried y byddai’r estyniadau fel y’u dyluniwyd yn cael effaith niweidiol ychwanegol arwyddocaol ar ansawdd y dirwedd ddynodedig ac na fyddai’r bwriad yn effeithio gosodiad yr AHNE, neu’r golygfeydd allan ohoni, mewn ffordd niweidiol. Ystyriwyd bod y bwriad yn welliant ar y cynllun a wrthodwyd yn flaenorol o safbwynt ei effaith ar y tirlun a’i fod yn cwrdd gyda gofynion polisi cynllunio lleol a chenedlaethol.

 

b)    Yn manteisio ar yr hawl i siarad nododd yr Aelod Lleol y pwyntiau canlynol:

·         Atgoffwyd yr Aelodau o ofynion statudol i warchod yr AHNE

·         Bod bythynnod traddodiadol ar hyd y mynydd o Nefyn i Pistyll

·         Eiddo gerllaw i’r bwriad wedi derbyn nifer o estyniadau rhwng 2008 a 2011

·         Dim angen gor-ddatblygiadau ar lechweddau’r Mynydd

·         Creu effaith ar y golygfeydd

·         Bod pobl yn dod i aros yn yr ardal i werthfawrogi yr hyn sydd o’u cwmpas

·         Bod polisïau yn gadael gormod o ddisgresiwn i’r swyddog roi ei farn yn hytrach na sylwadau cyd bwyllgor ymgynghorol ac unigolion

·         Y datblygiad yn un cam rhy bell

·         Bod prisiau tai allan o gyrraedd pobl leol

·         Bod cynlluniau o’r fath yn boneddigeiddio’r ardal

·         Erfyn ar y Pwyllgor i wrthod y cais

 

c)     Cynigwyd ac eiliwyd i wrthod y cais am y rhesymau canlynol:

 

-       Y bwriad yn orddatblygiad

-       byddai’r bwriad yn cael effaith andwyol ar fwynderau gweledol yr ardal

-       byddai’n cael ardrawiad andwyol ar olygfeydd i mewn ac allan o’r AHNE

-       creu effaith gronnol os caniatáu

 

ch)    Yn ystod y drafodaeth ddilynol nodwyd y sylwadau canlynol gan aelodau:

·         Bod y dyluniad yn un da – yn wellaint i’r adeilad

·         Nad oedd sail i wrthod

·         Mater o farn

·         Pryderon apêl

 

·         Er derbyn barn swyddogion, y gymuned leol yn gwrthwynebu’r datblygiad yma a bod dyletswydd gwrando ar eu sylwadau

·         Yn dŷ mawr, sylweddol ei faint, yn ormesol ar y tirlun

·         I'w weld o Nefyn, Morfa Nefyn, Buan ac Edern

·         Pleser un teulu yn ddiflastod i bobl leol ac ymwelwyr

·         Nad yw’r tai eraill sydd ar y mynydd yn ymddangos mor ormesol

·         Yn groes i Bolisi PS19 - nid yw’n gwarchod / gwella'r ardal leol

·         Bod yr ymgeisydd yn bwriadu newid cymeriad y tŷ maent wedi ei brynu

·         Creu ardal i’r boneddigion

·         Byddai’n gam dinistriol i Fynydd Nefyn sydd yn atyniad i Dwristiaid

·         Yn ddiangen ac yn gynsail peryglus

 

d)    Mewn ymateb i gwestiwn ynglŷn â beth yw pendraw estyniad ar estyniad ar estyniad, nodwyd nad oedd polisïau yn rheoli trefn ar yr hyn sydd yn dderbyniol - bod mwy o ystyriaeth yn cael ei roi ar ddyluniad, ansawdd, maint ac edrychiad.

 

Gwnaed cais am bleidlais gofrestredig

 

PENDERFYNWYD: 

 

Gwrthod, yn groes i’r argymhelliad:

 

Ystyriwyd yr estyniad yn

 

•           or-ddatblygiad fyddai’n cael effaith andwyol ar fwynderau gweledol yr ardal

•           byddai’n cael ardrawiad andwyol ar olygfeydd i mewn ac allan o’r AHNE yn groes i Bolisi PCYFF 3 ac MG 1 o’r CDLl

 

Yn unol â’r Rheolau Gweithdrefn, cofnodwyd y bleidlais ganlynol:

 

O blaid:           Stephen Churchman, Elwyn Edwards, Simon Glyn, Louise Hughes, Berwyn Parry Jones, Gareth T Jones, Dilwyn Lloyd, Edgar Owen, Eirwyn Williams ac Owain Williams (12)

 

Yn erbyn :      Anne Lloyd Jones (1)

 

Atal:                (0)