Agenda item

Codi 12 tŷ fforddiadwy, mynedfa newydd ynghyd a gwaith cysylltiedig.

 

AELOD LLEOL: Cynghorydd Dafydd Owen

 

Dolen i'r dogfennau cefndir perthnasol

 

Dirprwyo’r hawl i’r Uwch Reolwr Cynllunio i ganiatáu’r cais yn ddarostyngedig i’r ymgeisydd gwblhau Cytundeb Cyfreithiol o dan Adran 106 er mwyn sicrhau cyfraniad ariannol ar gyfer darpariaeth llecynnau agored ac i’r amodau isod:-

1. 5 mlynedd.
2. Yn unol â’r cynlluniau a dogfennau a gyflwynwyd gyda’r cais.
3. Llechi naturiol.
4. Amodau priffyrdd.
5. Cynllun plannu coed.
6. Amodau mesurau lliniaru bioamrywiaeth i gynnwys cydymffurfio gyda gofynion yr asesiad Ecolegol Rhagarweiniol; darparu Cynllun Atal Llygredd; sicrhau bod y safle yn athraidd i ddraenogod a chyflwyno cynllun gwelliannau bioamrywiaeth
7. Cyfyngu oriau gweithio rhwng 08:00-18:00 Dydd Llun - Dydd Gwener, 08:00-13:00 Dydd Sadwrn a dim o gwbl ar Ddydd Sul a Gŵyl Banc.
8.  Cytuno manylion parthed enw Cymraeg ar gyfer y datblygiad ynghyd ag arwyddion sy’n hysbysu ac yn hyrwyddo’r datblygiad o fewn ac oddi allan y safle.
9. Tynnu hawliau datblygu o’r tai fforddiadwy.
10. Sicrhau cynllun/trefniadau ar gyfer darparu’r tai fforddiadwy.
11.  Cyflwyno Cynllun Rheoli Amgylcheddol i gynnwys sŵn, dirgryniad a llwch.
12. Sicrhau cydymffurfiaeth a Rhif Prydeinig BS 5837:2012.
13. Amod cyflwyno cynllun draenio dŵr aflan o’r datblygiad.
14. Samplau o’r deunyddiau a’r lliwiau ar gyfer y tai a’r tirlunio caled a meddal.

 

Nodyn: hysbysu’r ymgeisydd o’r angen i gyflwyno cynllun strategaeth draenio gynaliadwy i’w gymeradwyo gan Uned Dwr ac Amgylchedd y Cyngor.

 

Nodyn: cyngor i’r ymgeisydd ystyried llechi lleol

 

Codi 12 tŷ fforddiadwy, mynedfa newydd ynghyd a gwaith cysylltiedig.

 

Tynnwyd sylw at y ffurflen sylwadau hwyr

 

a)    Amlygodd yr Uwch Swyddog Rheolaeth Datblygu bod y cais ar gyfer codi 12 tŷ fforddiadwy deulawr ar safle sydd a’i ran helaelth wedi ei leoli o fewn ffin datblygu Pentref Lleol Tregarth. Roedd y cais yn cynnwys yr elfennau canlynol: -

 

·         Darparu 12 tŷ fforddiadwy ar ffurf: (i) 4 tŷ x 2 ystafell wely 4 person (rhent cymdeithasol); (ii) 4 tŷ x 3 ystafell wely 5 person (rhent cymdeithasol); 1 tŷ x 2 ystafell wely 4 person (rhent canolradd) a 3 tŷ x 3 ystafell wely 5 person (rhent canolradd).

·         Cau’r fynedfa bresennol oddi ar y ffordd sirol dosbarth III (Tal Cae) a chreu mynedfa newydd ymhellach i’r dwyrain.

·         Creu llwybr troed yn nhu blaen y safle a fydd yn cysylltu â’r llwybr troed presennol i’r gorllewin.

·         Lledu’r ffordd gyfochrog i 5.5m i gyfarfod a gofynion mabwysiedig y Cyngor.

·         Gwyro’r cwrs dwr sy’n rhedeg drwy’r safle i ymylon gorllewinol y safle.

·         Creu coridorau ecolegol.

·         Llecynnau parcio o fewn cwrtil y tai arfaethedig.

·         Codi ffensys o amrywiol dyluniad, uchder a deunydd. 

·          Codi siediau domestig o fewn y gerddi cefn ynghyd a llecynnau storio biniau.

 

Adroddwyd bod yr egwyddor o godi tai ar y safle arbennig hwn wedi ei selio ym Mholisi PCYFF 1, TAI 4, TAI 15 a PS 5 o’r CDLL. Amlygwyd bod polisi TAI 4 y cefnogi tai newydd mewn pentrefi lleol i gwrdd â strategaeth y CDLL drwy ddyraniadau tai a safleoedd addas heb eu dyrannu o fewn y ffin datblygu ar sail y ddarpariaeth ddangosol o fewn y Polisi ei hun. O gnalynaid, bydd y bwriad yn golygu bydd Tregarth yn mynd y tu hwnt i’w lefel twf dangosol ,ond y gellid cefnogi cymeradwyo’r safle hwn yn erbyn darpariaeth gyffredinol (yn seiliedig ar y gyfradd gwblhau hyd yma) o fewn y categori Pentrefi, Clystyrau & Chefn Gwlad agored..

 

Nodwyd bod Polisi TAI 15 yn ceisio darpariaeth briodol o dai fforddiadwy a gyda’r datblygiad arfaethedig yn cynnig cynnydd o 12 fforddiadwy, golygai hyn fod y bwriad yn cyd-fynd â gofynion canran o unedau fforddiadwy o fewn y Polisi. Nodir Polisi PS5 y cefnogir datblygiadau ble gellid dangos ei bod yn gyson ag egwyddorion datblygu cynaliadwy gan gynnwys safleoedd addas oddi fewn i ffiniau datblygu ac y byddai’r elfen o ddatblygu cynaliadwy a hygyrchedd y safle yn un o’r brîf ystyriaethau wrth ddewis safleoedd ar gyfer codi tai o fewn y CDLL gan yr Arolygwr Cynllunio. Gan ystyried bod yr holl dai yn rhai fforddiadwy (yn hytrach na’r 20% sydd angen ei ddarparu) ystyriwyd fod y cais yn dderbyniol mewn egwyddor.

 

Yng nghyd-destun materion tai fforddiadwy a chymysgedd tai, cyflwynwyd Datganiad Tai Fforddiadwy gan Adra ynghyd a Datganiad Cymysgedd Tai yn unol â gofynion Polisi TAI8 a TAI15 o’r CDLL ynghyd a’r CCA: Cymysgedd Tai a Tai Fforddiadwy. Ymddengys bod tystiolaeth gadarn ar gael parthed yr angen am dai fforddiadwy ac mai’r angen mwyaf yn ardal Tregarth oedd am unedau 2 a 3 llofft rhent cymdeithasol a rhent canolradd. Gellid sicrhau fod y tai yn fforddiadwy’n bresennol ac am byth drwy gynnwys amod cynllunio arferol o fewn unrhyw ganiatâd cynllunio

 

Yng nghyd-destun materion trafnidiaeth a mynediad amlygwyd bod ystyriaeth wedi ei roi i  bryderon trigolion lleol parthed addasrwydd y rhwydwaith ffyrdd lleol i ymdopi a thrafnidiaeth ychwanegol. Mewn ymateb i’r broses ymgynghori statudol cadarnhaodd yr  Uned Drafnidiaeth nad oedd gwrthwynebiad i’r bwriad oherwydd bod y bwriad yn cynnig gwelliannau i’r ffordd gyfagos ac am ddarparu parcio ar raddfa 2 lecyn parcio fesul pob eiddo; ffordd stad fechan sy’n cynnwys mynedfa o ddyluniad safonol ynghyd a man troi i ganiatáu cerbydau i droi a gadael y safle mewn ger ymlaen.  Roedd yr Uned yn argymell cynnwys amodau/nodiadau perthnasol pe caniatawyd y cais er mwyn sicrhau bod y gwaith yn cael ei gwblhau i safonau statudol diogelwch ffyrdd.

 

Yng nghyd-destun llifogydd a draenio cyflwynwyd pryderon gan drigolion lleol parthed y ffaith bod y cwrs dŵr sy’n rhedeg drwy ran isaf y safle wedi ei leoli, yn bresennol, o fewn Parth A ym Mapiau Cyngor Datblygu (DAM) sydd wedi'u cynnwys yn Nodyn Cyngor Technegol 15: Datblygu a Pherygl o Lifogydd (Gorffennaf 2004). O ganlyniad, bydd angen ail-alinio’r cwrs dŵr presennol tuag at ymylon gorllewinol y safle gyda’r bwriad o arllwys dŵr hwyneb o’r safle/adeiladwaith newydd i’r cwrs dŵr ei hun. Bydd rhaid i unrhyw arllwysiad i’r cwrs dŵr gael ei gytuno gyda’r Uned Dŵr ac Amgylchedd fel Corff Cymeradwyo Systemau Draenio Cynaliadwy (CCS) ynghyd a bod angen Caniatâd Cwrs Dŵr Arferol ar gyfer unrhyw waith a allai effeithio ar lif yr afon. Awgrymwyd atodi nodyn yn cyfeirio’r ymgeisydd i’r angen o dderbyn caniatadau a thrwyddedau perthnasol gan Uned Dŵr ac Amgylchedd y Cyngor cyn i unrhyw waith ddechrau ar y safle.

 

Yng nghyd-destun materion llecynnau agored, yn ôl Polisi ISA 5 o’r CDLL, disgwylir i gynigion ar gyfer 10 tŷ neu fwy mewn ardaloedd ble na all llecynnau agored presennol fodloni anghenion y datblygiad tai arfaethedig gynnig darpariaeth addas o fannau agored. Ymddengys bod y wybodaeth gyfredol a dderbyniwyd gan yr Uned Polisi Cynllunio ar y Cyd yn amlygu diffyg llecynnau chwarae gyda chyfarpar offer i blant yn Nhregarth ac felly bydd angen cyfraniad ariannol o £2,380.43 i gwrdd a’r diffyg. Gellid sicrhau’r cyfraniad drwy ofyn i’r ymgeisydd arwyddo Cytundeb o dan Adran 106.

 

Ystyriwyd y byddai’r bwriad i ddatblygu 12 o dai fforddiadwy yn ymateb positif i’r anghenion tai amrywiol sydd wedi’u hadnabod yn yr ardal. Ni ystyriwyd fod y bwriad yn groes i bolisïau lleol na chenedlaethol ac nad oedd unrhyw fater cynllunio perthnasol yn gorbwyso’r ystyriaethau polisi.

 

b)    Yn manteisio ar yr hawl i siarad nododd yr Aelod Lleol y pwyntiau canlynol:

·         Nad oedd gan yntau na’r Cyngor Cymuned wrthwynebiad i’r cais, ond pryder am adeiladu 3 tŷ ger yr afon. Awgrymwyd gohirio adeiladu'r 3 tŷ yma hyd nes bydd y tai ar y llethr wedi eu hadeiladu ac yn amlygu patrwm llif dŵr wyneb.

·         Beth fydd sefyllfa tenantiaid y tai hyn petai’r tai yn dioddef effaith llifogydd - a fydd yswiriant ?

·         Pryder am ddiogelwch plant o gwmpas yr afon - a fydd ffens yn cael ei osod i arbed mynediad at yr afon?

·         Angen mwy o wybodaeth am y broses gollyngiad dŵr - a fydd y dŵr yn cael effaith ar anifeiliaid amaethyddol? A fydd sebon ynddo?

·         Derbyn bod bwriad ymestyn y llwybr troed ar hyd ymyl y safle, ond syndod nad oedd yr Adran Priffyrdd wedi gwneud sylw am y bont gul sydd gerllaw’r safle

·         Cynnig i osod amod am lechi lleol yn hytrach na llechi naturiol gan fod chwarel gerllaw

 

c)     Mewn ymateb i’r sylwadau, cadarnhawyd bod materion yr afon wedi eu trafod gyda’r Uned Dŵr cyn cyflwyno cais ac os byddai’r cais yn cael ei ganiatáu - yn unol â rheoliadau newydd, bydd rhaid i’r broses gydymffurfio gyda’r gofynion statudol. Cadarnhawyd hefyd y byddai ffens 1.8m yn cael ei osod tu cefn i’r gerddi i atal mynediad at yr afon. Nodwyd nad oedd sylwadau wedi eu derbyn gan yr Adran Priffyrdd ynglŷn â’r bont ac awgrymwyd i’r Aelod Lleol gysylltu yn uniongyrchol gyda’r Adran i drafod y pryderon. Yng nghyd -destun defnyddio llechi lleol, nodwyd bod y gofyniad yn groes i ofynion Ewropeaidd

 

ch)   Cynigwyd ac eiliwyd i ganiatáu’r cais

 

d)    Yn ystod y drafodaeth ddilynol nodwyd y sylwadau canlynol gan aelodau:

·         Bod y defnydd o lechi naturiol yn hytrach na llechi lleol i’w weld yn eironig o ystyried safle'r bwriad o fewn ardal llechi. Derbyn nad oes modd gorfodi, ond rhesymol fyddai gofyn i’r ymgeisydd ystyried llechi lleol

·         Bod y bont yn gul iawn ac y dylid ystyried y pryderon yn ystod y datblygiad

 

dd)    Mewn ymateb i sylw ynglŷn â defnyddio llechi lleol, nododd y Pennaeth Cyfreithiol  nad oedd modd gosod amod am fath penodol o lechi, ond y gellid rhoi cyngor i’r ymgeisydd ystyried llechi lleol.

 

PENDERFYNWYD: 

 

Dirprwyo’r hawl i’r Uwch Reolwr Cynllunio i ganiatáu’r cais yn ddarostyngedig i’r ymgeisydd gwblhau Cytundeb Cyfreithiol o dan Adran 106 er mwyn sicrhau cyfraniad ariannol ar gyfer darpariaeth llecynnau agored ac i’r amodau isod:-

 

1.         5 mlynedd.

2.         Yn unol â’r cynlluniau a dogfennau a gyflwynwyd gyda’r cais.

3.         Llechi naturiol.

4.         Amodau priffyrdd.

5.         Cynllun plannu coed.

6.         Amodau mesurau lliniaru bioamrywiaeth i gynnwys cydymffurfio gyda gofynion yr asesiad Ecolegol Rhagarweiniol; darparu Cynllun Atal Llygredd; sicrhau bod y safle yn athraidd i ddraenogod a chyflwyno cynllun gwelliannau bioamrywiaeth

7.         Cyfyngu oriau gweithio rhwng 08:00-18:00 Dydd Llun - Dydd Gwener, 08:00-13:00 Dydd Sadwrn a dim o gwbl ar Ddydd Sul a Gŵyl Banc.

8.         Cytuno manylion parthed enw Cymraeg ar gyfer y datblygiad ynghyd ag arwyddion sy’n hysbysu ac yn hyrwyddo’r datblygiad o fewn ac oddi allan y safle.

9.         Tynnu hawliau datblygu o’r tai fforddiadwy.

10.       Sicrhau cynllun/trefniadau ar gyfer darparu’r tai fforddiadwy.

11.       Cyflwyno Cynllun Rheoli Amgylcheddol i gynnwys sŵn, dirgryniad a llwch.

12.       Sicrhau cydymffurfiaeth a Rhif Prydeinig BS 5837:2012.

13.       Amod cyflwyno cynllun draenio dŵr aflan o’r datblygiad.

14.       Samplau o’r deunyddiau a’r lliwiau ar gyfer y tai a’r tirlunio caled a meddal.

 

Nodyn: hysbysu’r ymgeisydd o’r angen i gyflwyno cynllun strategaeth draenio gynaliadwy i’w gymeradwyo gan Uned Dwr ac Amgylchedd y Cyngor.

 

Nodyn: cyngor i’r ymgeisydd ystyried llechi lleol