Agenda item

I ystyried adroddiad yr Harbwrfeistr.

Cyflwynwyd yr adroddiad gan yr Harbwrfeistr Cynorthwyol yn nodi’r prif bwyntiau ar y materion gweithredol fel a ganlyn:

 

-        Gyda materion mordwyo nododd bod y sianel yn newid yn gyson ac yn cael ei fonitro drwy gydol y tymor fel bod modd rhoi rhybuddion i forwyr

-        Eglurwyd bod ‘Trinity House’ wedi bod i archwilio a nodwyd bod contractwyr lleol wedi cwblhau’r gwaith cynnal a chadw fel yr ofynnwyd ar y cynorthwyon mordwyo.

-        Mewn perthynas â materion gweithredol, nododd bod diwedd ar y cyfyngiadau Covid wedi arwain at Haf brysur iawn ond bod y wardeniaid ychwanegol wedi bod o gymorth mawr.

-        Ychwanegodd bod y mwyafrif o ymwelwyr wedi bod yn barchus, fodd bynnag cofnodwyd ambell i brofiad amharchus. Nododd yn ychwanegol bod cynnydd mewn sbwriel yn cael ei adael o amgylch yr harbwr a’r traeth.

-        Eglurodd bod cynnydd aruthrol mewn SUP’s (StandUp Paddleboards) ar y traeth, llwyddodd y warden i gynghori defnyddwyr ar ddiogelwch y môr ag i gadw’r sianel yn glir.

-         Aethpwyd ati i egluro’r holl waith cynnal a chadw sydd wedi bod megis gyda’r cytiau a’r bad patrolio.

 

 

Ychwanegodd y Rheolwr Morwrol y canlynol:

 

-        Bod recriwtio i swyddi tymhorol yn heriol a gofynnwyd i’r aelodau hysbysebu unrhyw swyddi o fewn eu wardiau neu gymunedau.

-        O ganlyniad i gamdriniaeth eiriol, mae’r gwasanaeth wedi buddsoddi mewn camerâu Teledu Cylch Gyfyng i staff wisgo.

-        Er mwyn ymdrin â sbwriel, y rhan fwyaf o ganlyniad i ymwelwyr yn dal crancod, nododd bydd angen cydweithio efo siopau lleol sy’n gwerthu’r offer yn ogystal â lleoli biniau ar gyfer plastig o amgylch yr harbwr.

-        Eglurodd sefyllfa wal y cei gan nodi ei fod yn deall rhwystredigaeth y Pwyllgor wrth i hyn fod yn bwnc trafod ers blynyddoedd. Fodd bynnag, nododd bod y gwaith wedi ei hail dendro a bod y ceisiadau yn cael eu hasesu gan yr adran YGC.

-        Ychwanegodd y byddai’r cyfathrebu gyda’r aelodau wedi’r penderfyniad gael ei wneud ar enillydd y contract.

 

Cafwyd y wybodaeth isod ynghylch sefyllfa Ynys Picnic gan gynrychiolydd Outward Bound Trust:

 

-        Nodwyd erbyn y pwyllgor nesaf bydd bont yn ei le neu ar y ffordd. Diolchwyd i Network Rail am eu cefnogaeth tra bod y gwaith yn digwydd.

-        Eglurodd bod partneriaid lleol a Chyngor Gwynedd yn asesu’r sylfaen ym mis Tachwedd ac yna bydd broses o dynnu’r hen strwythur a’i ddisodli gydag un newydd.

-        Mewn perthynas â chostau, nododd y Rheolwr Morwrol bod costau dur er enghraifft wedi cynyddu yn sylweddol a gobeithiwyd bod y tendr ffurfiol yn dod o fewn y gyllideb.

 

 

 

Yn ystod y drafodaeth, cafwyd y sylwadau isod gan aelodau:

 

-        Holwyd os oedd cost i’r gwasanaeth harbyrau i ddelio efo sgerbydau anifeiliaid sy’n cael eu golchi mewn gan y môr.

-        Mynegwyd bod llawer o bethau positif wedi bod yn yr ardal dros yr haf ond am y sbwriel. Ategwyd aelodau bod angen cychwyn sgwrs efo siopau ac awgrymwyd system benthyca offer fel eu bod yn dychwelyd wedi eu defnyddio.

-        Ategwyd bod y Cyngor Cymuned yn derbyn cwynion am y sbwriel a bod biniau ychwanegol wedi cael ei drafod.

-        Diolchwyd i’r holl staff am eu gwaith yn ystod y flwyddyn brysur iawn, ategodd aelod ddiolch arbennig i Swyddog Traeth Tywyn am ei waith yn ymgysylltu gydag ymwelwyr.

-        Gofynnwyd am sicrhad y bydd gwybodaeth sydyn ar gael ynghylch wal y cei gan ei fod yn mynd i greu problemau enfawr ar y gwaith sydd ar y cei. Ategodd bod sawl e-bost wedi dod yn barod yn holi am yr aflonyddwch a fydd i’r clwb hwylio.

-        Nodwyd ei fod yn bwysig bod gwaith ar wal y cei yn cael ei wneud cyn gynted â phosib er y  bydd cwynion a thrafferthion ond mae angen ei wneud ar frys.

-        Awgrymwyd bod angen ymgyrch cysylltiadau cyhoeddus i gadw trigolion yn ymwybodol am y camau a’r gwaith, unwaith fydd y contract wedi ei osod mae angen cychwyn ar hyn.

-        Holwyd am y posibilrwydd o gynnal cyfarfod arbennig unwaith fydd penderfyniad wedi ei wneud ar gontractwyr.

 

 

Mewn ymateb, nododd y Rheolwr Morwrol y pwyntiau isod:

 

-        Bod cost yn amrywio i ddelio a sgerbydau anifeiliaid ac os nad oes modd mynd a cherbyd ato y byddant yn cael eu claddu yn y fan a’r lle. Eglurodd bod y gost yn dod o gyllidebau traethau ac nid harbwr gan mai ar y traeth mae mwyafrif y sgerbydau yn ymddangos.

-        Nid ydynt yn rhagweld bod unrhyw golled ariannol am fod i unrhyw gorff sy’n gweithio ar y cei a bydd sicrhad bod busnesau yn parhau i aros ar agor trwy’r gwaith allweddol.

-        Nododd bydd cyswllt rhwng rheolwr safle’r gait ar y cei a defnyddwyr yr harbwr ar gyfer unrhyw wybodaeth. Ychwanegodd y bydd staff morwrol wrth law ac yn hwyluso’r gallu i gael gwybodaeth bellach.

-        Eglurodd na fydd yn bosib trefnu cyfarfod ffurfiol o’r Pwyllgor i drafod deilliant y tendr gyda wal y cei. Fodd bynnag, awgrymodd cyfarfod anffurfiol i gael trafodaeth.