Cyflwyno adroddiad
yr Uwch Swyddog Harbyrau.
Penderfyniad:
Nodi a derbyn yr adroddiad.
Cofnod:
Cyflwynwyd yr
adroddiadau isod a gwahoddwyd adborth gan yr aelodau ar faterion diogelwch a
materion gweithredol yr harbwr.
(1) Adroddiad yr Uwch Swyddog Harbyrau yn rhoi diweddariad bras i’r pwyllgor ar faterion
yr harbwr am y flwyddyn oedd yn dod i ben ar ddiwedd mis Mawrth 2022.
Nododd y Rheolwr
Morwrol:-
·
Y
bu o fudd cynnal cyfarfodydd rhithiol o’r pwyllgor dros y cyfnod diwethaf, ond
bod colled o beidio cael presenoldeb pobl o amgylch y bwrdd a’r trafodaethau
sy’n digwydd yn naturiol o flaen ac ar ôl y cyfarfodydd. Nid oedd yn hysbys eto beth fyddai’r
trefniadau i’r dyfodol, ond nodwyd bod y trefniadau rhithiol wedi gweithio’n wych,
a diolchwyd i bawb am hwyluso hynny.
·
Yr
hoffai ddymuno’n dda i David Eastwood (Cynrychiolydd
Buddiannau Harbwr) oedd wedi ymddiswyddo o’r pwyllgor yn ddiweddar. Nododd y bu’n aelod ffyddlon iawn o’r
pwyllgor, ac yn gefnogol i’r staff ar hyd y blynyddoedd, a byddai colled ar ei
ôl. Ychwanegodd y Rheolwr Morwrol y
byddai’n cysylltu â’r sawl sydd â buddiannau masnachol yn yr harbwr i dynnu
sylw bod sedd ar gael ar y pwyllgor.
·
Y
dymunai hefyd ddiolch ar ran y Gwasanaeth Morwrol i’r Cynghorydd Selwyn
Griffiths am ei arweiniad a’i gefnogaeth fel Cadeirydd y pwyllgor hwn, ac hefyd
fel yr aelod lleol dros Orllewin Porthmadog.
Nododd y Cadeirydd ei fod yntau’n ddiolchgar
iawn i staff yr harbwr am eu gwaith.
·
Bod
nifer o elfennau yn yr adroddiad ar goll ar hyn o bryd oherwydd absenoldeb
salwch, ond y bwriedid cylchredeg y wybodaeth honno, sef y ffioedd a’r
cyllidebau, i’r aelodau yn dilyn y cyfarfod hwn.
·
Yn
sgil cysylltu â phob cwsmer yn yr harbwr, y derbyniwyd nifer o geisiadau am
angorfeydd. Bwriedid cynnal archwiliad
tanddwr o’r angorfeydd yn yr harbwr cyn cyfnod y Pasg, a phwysleisiwyd
pwysigrwydd cyflawni’r gwaith hwnnw oherwydd y gallai angorfeydd gwan neu
ddiffygiol achosi difrod sylweddol.
Ychwanegodd, er i stormydd Chwefror daro ar benllanw, nad oedd yr un
cwch wedi torri i ffwrdd, a bod hynny’n amlygu cryfder yr angorfeydd i gymryd
yr holl bwysau.
·
Yn
sgil llwyddiant y system gofrestru Cychod Pŵer a Badau Dŵr Personol
ar-lein llynedd, y bwriedid parhau â’r un drefn ar gyfer y flwyddyn i ddod, a
byddai’r system yma’n ail-agor ar 31 Mawrth ar gyfer y tymor i ddod.
·
Bod
y gwasanaeth yn monitro ac yn ail-asesu’r Cod Diogelwch Morol Porthladdoedd yn
rheolaidd, gan ychwanegu ac addasu asesiadau risg yn ôl yr angen. Nodwyd hefyd bod yr Asiantaeth Forol a
Gwylwyr y Glannau (MCA) wedi cyhoeddi rhestr gyflawn yn y pythefnos diwethaf o harbyrau sy’n cydymffurfio â’r Cod, a bod Harbwr Porthmadog
wedi’i gynnwys ar y rhestr honno. Y
Cynghorydd Gareth Thomas, Aelod Cabinet Datblygu’r Economi, oedd y Deilydd Cyfrifoldeb ar gyfer hyn, ac roedd yntau’n ymwybodol bod yr MCA wedi cymeradwyo’r Cod
Diogelwch.
·
Bod
marcio’r sianel mordwyo a chynnal y cymorthyddion
mordwyo yn heriol gan fod y sianel yn newid yn barhaus. Roedd y sianel wedi bod yn newid tuag at Gricieth, ond yn y pythefnos diwethaf roedd wedi symud fwy
at Harlech. Nodwyd ymhellach nad oedd
unrhyw fater wedi dod gerbron o safbwynt diogelwch yr harbwr.
·
Y
bwriedid parhau â’r lefelau staffio presennol yn yr harbwr. Rhagwelid y byddai’n gyfnod heriol iawn i’r
gwasanaeth dros yr haf oherwydd prinder pobl i lenwi swyddi a’r angen i
gynorthwyo yn Abermaw yn ystod Mai/Mehefin oherwydd diffyg staff yno.
·
Y
rhagwelid y byddem yn cyrraedd ein cyllideb yn Harbwr Porthmadog yn y flwyddyn
ariannol bresennol. Roedd y targed incwm
ar gyfer y flwyddyn bresennol yn £65m, ond llwyddwyd i ddenu tua £2m o incwm yn
fwy na hynny, gan arwain at gyfanswm o tua £67m o incwm yn 2021/22. Hefyd, o ganlyniad i danwariant bychan yn y
gwasanaeth o safbwynt Harbwr Porthmadog, rhagwelid y byddai’r gyllideb tua £5m
yn uwch na’r nod, ac roedd hynny ar ôl ariannu’r archwiliad tanddwr o’r
angorfeydd. Ychwanegodd y Swyddog
Morwrol y bu’n flwyddyn heriol, ond roedd yn falch o adrodd bod y gyllideb yn
ôl i’r lefel ddisgwyliedig.
·
Y
byddai’r cynnydd yng ngraddfa chwyddiant yn cael effaith ar gostau’r Harbwr a
chostau sy’n gysylltiedig â phobl sy’n gwneud defnydd o’r Harbwr ei hun. Bwriedid codi’r ffioedd tua 3.5%, yn unol â
lefel chwyddiant a thargedau’r Cyngor, ond roedd hyn yn parhau i fod ychydig yn
is na’r cynnydd mewn rhai harbyrau ar draws y
wlad. Gobeithid na fyddai’r cynnydd hwn
yn cael effaith niweidiol ar niferoedd cychod yn yr Harbwr eleni.
·
Y
byddai’r ffi cofrestru cychod yn codi i £50.
Byddai’r ffioedd lansio yn aros yr un fath, gyda’r ffi ddyddiol yn
parhau yn £20 a’r ffi flynyddol yn aros ar £150, a gobeithid y byddai hynny’n
annog pobl i gofrestru am flwyddyn, yn hytrach na thalu o ddydd i ddydd.
Rhoddwyd
cyfle i’r aelodau ofyn cwestiynau a chyflwyno sylwadau. Codwyd y materion a ganlyn:-
·
Pwysleisiwyd
bod Harbwr Porthmadog yn rhan greiddiol o Safle Treftadaeth y Byd Llechi Cymru,
a bod angen manteisio ar unrhyw gyfleoedd posib’ all godi yn sgil hynny. Mewn ymateb, nododd y Rheolwr Morwrol y
byddai’n cysylltu â Roland Evans, Pennaeth Cynorthwyol Diwylliant, sy’n arwain
ar hyn yn y Cyngor, i drafod ymhellach.
·
Holwyd
a fyddai’r £5m o incwm ychwanegol yn cael ei fuddsoddi yn Harbwr Porthmadog,
neu’n diflannu i mewn i’r cyllidebau canolog.
Mewn ymateb, nododd y Rheolwr Morwrol y gwneid pob ymdrech i sicrhau bod
pob harbwr arall ar draws y sir yn cyrraedd y gyllideb, ond y byddai’r arian yn
cael ei fuddsoddi yn ôl yn y Gwasanaeth Morwrol. Efallai y byddai yna elfennau yn gorfod cael
eu buddsoddi mewn llefydd eraill mwy bregus, ond roedd y ffigurau’n dangos ein
bod yn buddsoddi’n synhwyrol yn Harbwr Porthmadog, a gofynnwyd i’r aelodau roi
gwybod i’r Rheolwr Morwrol pe dymunent i’r gwasanaeth fuddsoddi mewn prosiectau
penodol. Cydnabuwyd, fodd bynnag, na
fyddai’r sefyllfa mor addawol ar gyfer y flwyddyn nesaf, gyda chostau ar
gynnydd a’r gyllideb wedi’i gosod yn barod.
(2) Adroddiad yr Harbwrfeistr
yn crynhoi’r materion Mordwyo a Gweithredol a wnaed ac a brofwyd yn y cyfnod
rhwng mis Hydref 2021 a Mawrth 2022, gan gynnwys materion cynnal a chadw.
Nododd Harbwrfeistr Porthmadog:-
·
Gan
fod y sianel mordwyo yn symud tuag at Harlech bellach, y gofynnwyd am ganiatâd
gan Tŷ’r Drindod i symud Bwi Fairway.
·
Bod
Bwi Rhif 1 wedi bod ar draeth Harlech ers cyn y Nadolig gan fod y fynedfa i’r
traeth wedi codi gymaint fel ei bod yn amhosib’ mynd â cherbyd i’w nol.
·
Iddo
fynd i lawr i draeth Morfa Bychan yn gynharach yn y dydd i weld beth sydd angen
ei wneud yno cyn y Pasg. Gobeithid y
byddai’r caban yno yn ystod wythnos gyntaf Ebrill a byddai’r staff yn dechrau
ar eu gwaith ar y penwythnos cyn y gŵyl banc.
Rhoddwyd
cyfle i’r aelodau ofyn cwestiynau a chyflwyno sylwadau. Codwyd y materion a ganlyn:-
·
Cyfeiriwyd
at ddigwyddiad diweddar pan fu i’r arwyddion 10mya ger y fynedfa i draeth Morfa
Bychan gael eu tynnu i lawr yn fwriadol, a diolchwyd i’r Harbwrfeistr
am fynd yno i’w hail-osod. Nododd yr Harbwrfeistr y cafwyd problem gyda’r biniau wrth y fynedfa
i’r traeth tua mis yn ôl hefyd, wrth i rywun orlenwi’r biniau’n barhaus gyda
gwastraff tŷ, ond bod y broblem bellach wedi diflannu yn sgil symud y
biniau oddi yno. Nododd y Rheolwr
Morwrol ei bod yn drueni bod y sefyllfaoedd hyn wedi codi, ond mai ychydig iawn
o broblemau sy’n codi’n gyffredinol, o ystyried y niferoedd sy’n defnyddio’r
traeth. Canmolwyd y cydweithio rhwng y
Cyngor a’r Heddlu hefyd.
·
Holwyd
a oedd y biniau ger y fynedfa i draeth Morfa Bychan o Lôn Gwydryn wedi’u symud
oddi yno’n barhaol, gan fod pobl wedi bod yn gadael
ysbwriel yno. Mewn ymateb, eglurodd y
Rheolwr Morwrol mai trefniant dros dro oedd symud y biniau oddi yno i geisio
annog pwy bynnag oedd yn gwaredu gwastraff tŷ yn y biniau i wneud
trefniadau amgen, ac y byddai’r biniau traeth tymhorol yn eu lle yn unol â’r
trefniant arferol yn fuan.
·
Nodwyd
bod ysbwriel, oedd yn edrych fel ysbwriel oedd wedi dod o’r môr, wedi’i adael
am rai wythnosau mewn pentwr yn y fynedfa i Fae Carreg Samson wrth waelod y
grisiau ar y llwybr arfordir, a holwyd pwy oedd yn gyfrifol am ei gasglu. Mewn ymateb, nododd y Rheolwr Morwrol ei bod
yn wych bod gwirfoddolwyr yn mynd ati i lanhau’r traeth, ond ei bod yn bwysig
eu bod yn rhoi gwybod i’r gwasanaeth, fel y gellid mynd yno i gasglu’r
ysbwriel. Gorau oll hefyd pe bai’r
ysbwriel yn cael ei adael mor agos at ben ffordd â phosib’, fel bod modd i
gerbyd ei gasglu. Cadarnhawyd y byddai’r
Harbwrfeistr yn rhoi sylw i hyn cyn diwedd yr
wythnos.
·
Holwyd
a oedd y mwd dan Cei Newydd wedi cynyddu, ac os felly, a fyddai hynny’n achosi
problemau. Mewn ymateb, nododd y Rheolwr
Morwrol fod yna gynnydd yn y llaid yn yr Harbwr yn ei gyfanrwydd oherwydd bod y
pontwns yn tawelu ac yn dargyfeirio’r dŵr i
lefydd eraill. Ychwanegodd fod bwriad i
gael contractwr lleol i asesu’r sefyllfa er mwyn gweld beth sy’n bosib’.
Nododd
y Rheolwr Morwrol, yn sgil llwyddiant cludo trawsnewidydd ar long i draeth
Morfa Bychan ac ymlaen i Drawsfynydd yn 2020, bod
bwriad i gynnal ymarferiad tebyg eto y flwyddyn nesaf. Roedd y gwaith cynllunio wedi cychwyn eisoes,
a byddai rhagor o wybodaeth yn cael ei chyflwyno i aelodau’r pwyllgor hwn yn yr
hydref. Nodwyd pwysigrwydd sicrhau bod y
gwaith o dorri coed ar hyd llwybr y daith yn digwydd ymlaen llaw.
Cyfeiriwyd
at amrywiol ddigwyddiadau yn yr Harbwr yn y gorffennol, a nododd y Rheolwr
Morwrol ei bod yn braf cael mewnbwn yr aelodau i faterion fel hyn.
Diolchodd
y Cadeirydd i bawb am eu mewnbwn, gan ddymuno’n dda i bawb fyddai’n aelodau o’r
pwyllgor yn dilyn yr Etholiadau ym mis Mai.
PENDERFYNWYD nodi a
derbyn yr adroddiad.
Dogfennau ategol: