Agenda item

I ystyried adroddiad yr Uwch Swyddog Harbwr

Derbyn a nodi yr adroddiad.

 

Cyflwynwyd yr adroddiadau isod, a gwahoddwyd yr Aelodau i gynnig sylwadau am eu cynnwys a gofyn cwestiynau.

 

a)      Adroddiad yr Uwch Swyddog Harbyrau yn rhoi diweddariad cryno i’r pwyllgor ar faterion yr harbwr ar gyfer y flwyddyn a ddaw i ben Mawrth 2022.

Yn absenoldeb yr Uwch Swyddog Harbyrau nododd Rheolwr Gwasanaeth Morwrol mai braf oedd cyhoeddi blwyddyn lwyddiannus gyda chynnydd yn nifer ymwelwyr a chwsmeriaid yn adlewyrchu llacio graddol cyfyngiadau covid a rhwystrau teithio tramor.

 

Tynnwyd sylw at y materion canlynol:

 

Angorfeydd a chofrestru cychod

 

Adroddwyd y byddai’r gwasanaeth cofrestru a thalu ar lein yn agor i gwsmeriaid gofrestru eu llestr drwy wefan y Cyngor ar y 31ain o Fawrth 2022. Adroddwyd bod y drefn a gyflwynwyd Mawrth 2021 wedi bod yn llwyddiannus iawn a gwelwyd am y tro cyntaf restr aros am angorfeydd yn Harbwr Pwllheli.

 

Côd Diogelwch Morol Porthladdoedd

 

Nodwyd bod y Gwasanaeth yn adolygu’r Côd Diogelwch Morol yn rheolaidd er mwyn sicrhau eu bod yn parhau i gydymffurfio’n llawn gyda’r safonau diogelwch yn harbyrau Gwynedd - bydd archwiliad allanol o’r côd yn cael ei gynnal gan unigolyn dynodedig. Ategwyd bod datganiad cydymffurfiaeth wedi ei arwyddo ac wedi ei gyflwyno i’r Asiantaeth Gwylwyr y Glannau. Amlygwyd pryderon difrifol ynglŷn â chyflwr y cei yn Aberdyfi (dim o ran ei strwythur ond y risg uchel i ddefnyddwyr eraill). Er bod gwybodaeth ac arwyddion yn ymddangos ar y cei yn amlygu risgiau a phryderon i ddiogelwch y cyhoedd, rhaid gwneud mwy ac mae yn anorfod bod yr Uned Morwrol yn gweithredu ar frys i sicrhau diogelwch y safle. Nodwyd bod y risg o beidio clirio / cadw offer pysgotwyr wedi ei gyfarch drwy greu lle cadw offer yn y compownd a derbyniwyd bod angen sicrhau cydweithrediad gan y pysgotwyr i flaenoriaethu diogelwch y cyhoedd. Ategwyd, pan fydd y gwaith clirio yn dechrau ar gyfer wal y cei, bydd yr offer yn cael ei symud yn barhaol i’r compownd.

 

Anogwyd yr Aelodau i gyflwyno sylwadau rheolaidd ar addasrwydd y Côd Diogelwch Morol

 

Materion Staffio

 

Canmolwyd yr holl staff (harbwr a thraeth) am eu gwasanaeth drwy gydol y pandemig i sicrhau diogelwch yr harbwr a’r traeth gan gydymffurfio yn llawn gyda chanllawiau Llywodraeth Cymru. Nodwyd bod 2 swydd barhaol yn Harbwr Aberdyfi gyda bwriad o gyflogi 2 swydd dymhorol yno a 3 yn Nhywyn. Ategwyd, bod ymateb i’r swyddi wedi bod yn siomedig iawn ond braf oedd cael adrodd bod Mr George Watson yn dychwelyd - un a phrofiad yn y maes, yn arweinydd tîm cryf ac yn gyfathrebwr da.

 

Materion Ariannol

 

Amlygwyd y tebygolrwydd y byddai ffioedd a thaliadau arfaethedig ar gyfer Harbwr Aberdyfi, ynghyd a ffioedd lansio cychod pŵer a chychod personol am 2022/23, yn codi yn unol â chyfradd chwyddiant.

 

Diolchwyd am yr adroddiad. Braf oedd adrodd bod y sefyllfa ariannol yn bositif ac er mai bychan yw’r incwm, bod cyfraniad yr Harbwr a thraeth Aberdyfi yn werthfawr i’r economi leol.

 

(b)    Adroddiad yr Harbwr Feistr yn crynhoi’r materion Mordwyo a Gweithredol a wnaed ac a brofwyd yn y cyfnod rhwng mis Hydref 2021 a Mawrth 2022, gan gynnwys materion cynnal a chadw.

 

Diolchodd yr Harbwr feistr am gefnogaeth yr Uned Forwrol ac am yr holl negeseuon a dderbyniodd ef a’i deulu yn ystod gwaeledd ei wraig.

 

Nodwyd bod dau Hysbysiad Lleol i Forwyr yn weithredol sy'n ymwneud â'r marciau mordwyo yn y sianel - y gwasanaeth wedi bod mewn cysylltiad gyda chontractwr lleol i ymgymryd â’r gwaith angenrheidiol pan fydd y tywydd yn caniatáu.

 

Adroddwyd bod Ymddiriedolaeth yr Outward Bound wedi cynnal rhaglen lawn o ddigwyddiadau ar yr afon a bod gweithgareddau pysgota masnachol wedi parhau dros fisoedd y gaeaf. Nodwyd bod Asiantaeth y Môr a Gwylwyr y Glannau wedi bod yn weithredol ym mis Mawrth gyda thîm yn cynnal archwiliadau diogelwch ar hap ar gychod pysgota masnachol.

 

Cyfeiriwyd at archwiliad dŵr isel a gynhaliwyd 03/03/22 yn ardal Cliffside wrth hen lithrfa'r Bad Achub. Nodwyd y byddai swyddogion yn parhau i fonitro'r sefyllfa cyn i’r contractwr angorfeydd ddechrau ar ei waith.

 

Adroddwyd y byddai’r gwaith cynnal a chadw yn parhau drwy’r misoedd nesaf mewn paratoadau ar gyfer gwaith wal y cei a thymor prysur o ymwelwyr a digwyddiadau.

 

Diolchwyd am yr adroddiad. Diolchwyd i Wil Stockford (Harbwr feistr) ac Oli Simmons       

(Cymhorthydd Harbwr Aberdyfi) am y gwaith clirio oedd wedi ei wneud o gwmpas yr Harbwr ac am wynebu heriau o bob math gan ymwelwyr.

 

Mewn ymateb i gwestiwn ynglŷn â threfniadau symud tywod a chais i symud tywod sydd yn casglu yn y maes parcio cyn gwyliau’r Pasg, nodwyd bod ardal y promenâd ynghyd ag ardal y Bad Achub wedi ei glirio a bod trafodaethau yn cael eu cynnal gyda’r Uned Trafnidiaeth a YGC am gynnal y llithrfa. Ategwyd bod cyfrifoldebau’r Uned Forwrol ynglŷn â gwaith rheolaeth yr Harbwr yn cael ei weithredu.

 

Mewn ymateb i gwestiwn ategol ynglŷn â’r awgrym o ddefnyddio arian o’r maes parcio i dalu i’r Uned Forwrol glirio'r tywod, nodwyd nad oedd trefniant trosglwyddo arian mewn bodolaeth ond bod modd annog mwy o gydweithio rhwng adrannau. Er yn derbyn bod sgil effeithiau’r arbedion yn amlygu eu hunain erbyn hyn a bod symud tywod yn frwydr yn erbyn natur, cydnabuwyd bod angen cynllun yn ei le i ymateb i’r pryderon lleol.

 

Amlygodd D George bod aelodau o gwmni TMS, wrth gynnal ymweliad safle, wedi awgrymu defnydd o’u peiriannau, fydd ar y safe, i glirio tywod. Awgrymwyd y gall Clwb Hwylio Aberdyfi gyfrannu’n rhannol at unrhyw gostau, gyda chyfraniadau pellach efallai gan Gyngor Gwynedd a’r Clwb Cychod.

 

PENDERFYNWYD

 

Nodi a derbyn yr adroddiadau.