Agenda item

Cyflwyno adroddiad y Cyfarwyddwr Statudol Gwasanaethau Cymdeithasol.

Derbyn yr adroddiad.

Cyflwynodd y Cyfarwyddwr Statudol Gwasanaethau Cymdeithasol ei hadroddiad blynyddol mewn perthynas â pherfformiad y Gwasanaethau Cymdeithasol o fewn Gwynedd yn ystod y flwyddyn flaenorol.

Diolchodd y Cyfarwyddwr i Manon Elwyn Hughes (Uwch Swyddog Gweithredol) am ei chymorth yn rhoi’r adroddiad blynyddol at ei gilydd.  Fel rhan o’i chyflwyniad, amlygodd y Cyfarwyddwr rai o’r gwersi a ddysgwyd, gan amlinellu’r blaenoriaethau am y flwyddyn i ddod.  Eglurodd hefyd sut y bu i’r Gwasanaeth asesu anghenion pobl, a’u cynnwys yn ganolog wrth siapio’r gwasanaethau a’r ddarpariaeth gofal.  Nododd fod perfformiad Gwasanaethau Cymdeithasol Gwynedd yn dda ar y cyfan eto eleni, a bod barn Arolygiaeth Gofal Cymru yn cyd-fynd â hynny.  Ychwanegodd fod y 2 flynedd ddiwethaf wedi gosod heriau anhygoel ar y Gwasanaeth, ac roedd yn amlwg o’r perfformiad bod rheolwyr a staff wedi gwneud ymdrech arwrol i allu dygymod gyda’r gofynion a fu arnynt yn ystod y cyfnod. 

Ar ddiwedd ei chyfnod yn y swydd, nododd y Cyfarwyddwr y bu’n fraint bod yn Gyfarwyddwr ac yn Bennaeth Adran cyn hynny, a diolchodd i bawb y bu’n cydweithio â hwy dros y blynyddoedd.  Diolchodd i’r aelodau, yr aelodau craffu a’r aelodau cabinet yn y maes gofal dros y 10 mlynedd ddiwethaf.  Nododd hefyd iddi gael cefnogaeth wych gan dri Phrif Weithredwr yn ystod ei chyfnod yn y swydd, sef Harry Thomas, Dilwyn Williams a’r Prif Weithredwr presennol, Dafydd Gibbard.  Manteisiodd hefyd ar y cyfle i ddiolch i’r Penaethiaid Adran, Marian Parry Hughes (Pennaeth Plant a Theuluoedd) ac Aled Davies (Pennaeth Oedolion, Iechyd a Llesiant) a’r diweddar Gwenan Parry am eu gwaith yn y maes gofal, ac hefyd i Catrin Thomas (Pennaeth Cynorthwyol Cefnogi Teuluoedd) a Carys Fon Williams (Pennaeth Tai ac Eiddo) am eu gwaith ar y rhaglen Cefnogi Pobl Gwynedd.  Diolchodd hefyd i’r holl staff mewnol, allanol, trydydd sector, gofalwyr di-dâl a rhieni maeth fu’n rhan o’i siwrne dros y 10 mlynedd ddiwethaf, a dymunodd yn dda i’r Cyfarwyddwr newydd.

Rhoddwyd cyfle i’r aelodau gyflwyno sylwadau a gofyn cwestiynau.  Codwyd y materion a ganlyn gan aelodau unigol:-

·         Nodwyd bod angen cynnwys mwy o wybodaeth dan fesur perfformiad rhif 20 ar dudalen 196 o’r rhaglen (Canran y plant a ddychwelodd adref o ofal yn ystod y flwyddyn) er mwyn gwneud yn glir i bobl y tu allan i’r system gofal, aelodau newydd, ayyb, bod strategaethau mewn lle i sicrhau bod y plant hyn yn ddiogel.  Mewn ymateb, cadarnhawyd y byddai’r geiriad yn cael ei adolygu, a gofynnwyd i’r aelodau gysylltu â’r Cyfarwyddwr os oeddent o’r farn bod unrhyw beth arall yn yr adroddiad yn annelwig. 

·         Gan gyfeirio at y Cynllun Awtistiaeth (tudalen 169 o’r rhaglen), nodwyd y deellid yn flaenorol bod y Cynllun yn cychwyn gyda phlant ac yn symud ymlaen i bobl, ond bod sôn am blant a phobl yn yr un paragraff yma.  Mewn ymateb, nodwyd balchder bod y Cynllun yn ei le a’i fod wedi deillio o ddysgu o brofiadau unigolion sydd ag awtistiaeth, a nodwyd y mawr obeithid y byddai hynny’n parhau.  Cytunid bod yna waith i’w wneud o ran y cyfnod trosiannol, ac er bod rhai siroedd wedi cyfuno eu gwasanaethau awtistiaeth i blant ac oedolion, ni chredid ei bod yn ofynnol gwneud hynny.  Fodd bynnag, roedd yn rhaid gwneud yn siŵr bod yr unigolion dan sylw yn trosglwyddo’n ddi-dor o un cyfnod o’u bywyd i un arall o ran gwasanaethau’r Cyngor, ac roedd hynny’n rhywbeth y byddai’n rhaid i’r tîm fyddai’n cael ei sefydlu a’r cyfarwyddwr newydd gadw golwg arno.

·         Mewn ymateb i gwestiwn, nodwyd y credid bod y Cyngor wedi hysbysebu am gydlynydd a 2 weithiwr cymdeithasol i ddatblygu a gweithredu ar y Cynllun Awtistiaeth, ond y byddai swyddog o’r gwasanaeth yn cysylltu’n ôl â’r aelod i gadarnhau’r sefyllfa.

·         Gan gyfeirio at y bwriad i sicrhau hyfforddiant a chodi ymwybyddiaeth o awtistiaeth ar gyfer y gweithlu, holwyd a fyddai hyn ar gyfer y gweithlu cyfan yng Ngwynedd, staff y Gwasanaethau Cymdeithasol neu’r Tim Plant yn unig.  Mewn ymateb, eglurwyd bod rhai staff angen hyfforddiant mwy arbenigol nag eraill, ond y disgwylid y byddai pawb, yn aelodau a staff, yn cael yr ymwybyddiaeth o’r maes pwysig yma.

·         Gofynnwyd i’r Cadeirydd anfon nodyn at staff rheng flaen y Cyngor ar ran yr aelodau i ddiolch iddynt am eu holl waith mewn amgylchiadau anodd iawn dros y 2 flynedd ddiwethaf.

PENDERFYNWYD derbyn yr adroddiad.