Agenda item

I dderbyn diweddariad ar Bartneriaeth Pensiwn Cymru

Cyflwynwyd adroddiad gan y Rheolwr Buddsoddi yn diweddaru’r aelodau’n ffurfiol o waith Partneriaeth Pensiwn Cymru (PPC). Adroddwyd bod cydweithio yn parhau i fynd o nerth i nerth ar faterion megis ymateb ceisiadau rhyddid gwybodaeth, pleidleisio ac ymgysylltu ac yn gyffredinol rhannu ymarfer da ar draws y cronfeydd. Nodwyd bod 83% o Gronfa Gwynedd wedi ei bwlio gyda PPC erbyn hyn.

Tynnwyd sylw at y cronfeydd ecwiti gan gyfeirio at berfformiad Cronfa Twf Byd Eang sydd â thri phrif reolwr sydd gweithredu arddull gwahanol iawn i’w gilydd - Baillie Gifford, Pzena a Veritas. Atgoffwyd yr Aelodau bod y gronfa yma, yn y blynyddoedd cynnar, yn perfformio yn dda iawn, a hynny yn bennaf oherwydd perfformiad Baillie Gifford. Bellach, amlygwyd bod Baillie Gifford yn tan berfformio a hynny yn bennaf oherwydd natur eu buddsoddiadau a bod eu perfformiad yn un ‘cylchol’ (weithiau yn dda, a thro arall ddim cystal). Ategwyd bod trafodaethau diweddar wedi eu cynnal gyda Baillie Gifford ac er y cyfnod heriol, eu bod yn hyderus yn y cwmnïau maent yn buddsoddi ynddynt.

Yng nghyd-destun Cronfa Cyfleoedd Byd-Eang adroddwyd bod y gronfa yn cynnwys wyth rheolwr sylfaenol ar er na fydd pob rheolwr yn perfformio yn dda ar yr un pryd, bod y dull amrywiol yn golygu sefyllfa sefydlog a’r gronfa yn perfformio yn uwch na’r meincnod yn rheolaidd.

Yng nghyd-destun Cronfeydd Incwm Sefydlog, cyfeiriwyd ar y Gronfa Gredyd Aml- ased sydd â phum rheolwr buddsoddi gwahanol. Adroddwyd bod y gronfa wedi tan - berfformio a hynny oherwydd ansefydlogrwydd yn y farchnad gyda rhyfel Wcráin, cyfyngiadau covid Tsiena, ac effaith codiadau llog cyflym. Ategwyd, er pryderon bod y gronfa yn mynd drwy gyfnod heriol, ymrwymiad buddsoddi tymor hir oedd yma ac felly parhau gyda’r buddsoddiadau yn y gobaith o brofi cynnydd ar ddiwedd yr ansefydlogrwydd oedd y nod.

Wrth drafod Cronfa Enillion Bond Absoliwt, sydd â phedwar rheolwr buddsoddi, amlygwyd bod yr amodau yn y maes yma hefyd wedi bod yn heriol gydag effaith chwyddiant a chyfraddau llog, ond eto, yr ymrwymiad yn un tymor hir ac felly parodrwydd i barhau gyda’r buddsoddiadau yn y gobaith o brofi cynnydd.

Adroddwyd bod y Gronfa Marchnadoedd Datblygol, a lansiwyd Hydref 2021, gyda chwe rheolwr buddsoddi sylfaenol gan gynnwys Bin Yuan arbenigwr Tsiena. Nodwyd bod yr amodau eto yn heriol iawn ac mai Bin Yuan oedd wedi  achosi’r elfen o dan berfformiad a hynny oherwydd polisi dim covid Tsiena. Ategwyd mai’r gobaith yw gweld gwellhad yn amodau’r farchnad a dychweliadau da.

Cyfeiriwyd at y datblygiadau sydd gan PPC ar y gweill gan nodi’r gwaith sy’n cael ei wneud yn y maes marchnadoedd preifat gyda chwmnïau wedi eu hapwyntio i redeg y mandadau dyled preifat ac isadeiledd. Ategwyd bod gwaith cefndirol yn cael ei wneud i sefydlu’r cwmnïau yn y gobaith o fuddsoddi ynddynt yn 2023/ 24. Bwriad Cronfa Gwynedd yw gadael i’r buddsoddiadau isadeiledd ac ecwiti preifat aeddfedu yn naturiol ac yna buddsoddi yn raddol gyda’r pwl. Nodwyd bod trafodaethau cychwynnol hefyd wedi dechrau mewn perthynas â’r dosbarth asedau eiddo.

Yng nghyd-destun Cronfa Ecwiti Cynaliadwy sef cronfa a grëwyd gan Russell Investments ar ôl asesu anghenion buddsoddi cyfrifol y pwl, amlygwyd bod bwriad i’r gronfa yma fynd yn fyw Chwarter 1, 2023 gyda nodweddion y gronfa yn sicrhau bod hwn yn gam i’r cyfeiriad cywir mewn buddsoddi cyfrifol. Ategwyd y bydd Cronfa Gwynedd yn symud rhan o’i buddsoddiadau ecwiti i’r Gronfa yma ond bod y manylion i’w cadarnhau.

Cyfeiriwyd yr Aelodau at wefan PPC lle ceir nifer o ddogfennau defnyddiol. Amlygwyd hefyd y ffioedd sylweddol sydd i redeg y pwl ac eglurwyd bod y ffioedd hyn yn cael eu rhannu’n gyfartal rhwng aelodau’r bartneriaeth - y ffioedd yn cynnwys ffioedd ymgynghorwyr, cyfreithwyr, gwaith cyfieithu a gwaith darparwr pleidleisio ac ymgysylltu.

Diolchwyd am yr adroddiad ac i’r holl staff oedd yn gysylltiedig â'r gwaith

Mewn ymateb i gwestiwn ynglŷn ar ffioedd, nodwyd bod y costau gweinyddol yn cael eu rhannu yn gyfartal rhwng yr wyth gronfa sydd yn rhan o’r bartneriaeth, ond bod costau buddsoddiadau yn cael eu rhannu fesul maint buddsoddiad unigol pob cronfa.

Derbyniwyd y wybodaeth