Agenda item

I ddiweddaru’r Pwyllgor ar ganfyddiadau’r Arolygaeth Gofal a rhaglen waith yr Adran i  ymateb iddynt. Bydd Huw ap Tegwyn a Myfanwy Moran o Arolygaeth Gofal Cymru yn mynychu.

Derbyn yr adroddiad a chanfyddiadau’r Arolygaeth Gofal gan nodi’r sylwadau a gyflwynwyd yn ystod y cyfarfod.

Derbyn rhaglen waith yr Adran Oedolion, Iechyd a Llesiant i’r ymateb

Amlygodd yr Aelod Cabinet Oedolion, Iechyd a Llesiant bod Arolygaeth Gofal Cymru wedi cynnal arolwg ar berfformiad Gwasanaethau Oedolion y Cyngor yn ystod Medi 2022. Ategodd bod yr Adran yn ymwybodol o’r materion a gafodd eu hadnabod.

Croesawyd Myfanwy Moran a Huw ap Tegwyn (Arolygaeth Gofal Cymru) i’r cyfarfod. Darparwyd cyflwyniad i’r Aelodau oedd yn adrodd ar ganfyddiadau Arolygiad Gwerthuso Perfformiad  Gwasanaethau Oedolion Cyngor Gwynedd, Medi 2022. Cyfeiriwyd at bedwar maes roedd yr arolygaeth yn eu hymchwilio ac at gryfderau’r Cyngor wrth ymateb i’r gofynion hynny. Amlygwyd bod disgwyl i Gyngor Gwynedd ystyried y meysydd a nodwyd i’w gwella gan gymryd camau gweithredu priodol i fynd i’r afael â’r meysydd hynny. Bydd AGC yn monitro cynnydd drwy weithgarwch adolygu perfformiad parhaus gyda’r Awdurdod Lleol.

Diolchwyd am y cyflwyniad

Yn ystod y drafodaeth, cyflwynwyd y sylwadau a ganlyn gan aelodau:-

·         Llongyfarch yr Adran am eu gwaith

·         Nad oedd dim byd trawiadol wedi ei ganfod a bod hyn yn galonogol

Mewn ymateb i sylwadau a chwestiynau gan aelodau, nodwyd:-

·         Wrth ymgynghori gyda defnyddwyr a gofalwyr fe adolygwyd sampl o ffeiliau gan gynnal trafodaethau a grwpiau ffocws oedd yn cynnwys gweithwyr ym maes gofal, defnyddwyr y Cyngor a defnyddwyr cwmnïau preifat. Ategwyd bod llawer wedi cael ei wneud i geisio cynnwys llais defnyddwyr.

·         Nad oedd cyfeiriad at Wasanaethau Cefnogol na Gweithwyr Cefnogol a hynny oherwydd natur a ffiniau’r arolwg. Nodwyd bod yr elfen ‘maes’ a ‘lleoliad penodol’ ddim yn berthnasol i’r arolwg yma gan mai edrych ar y gwasanaeth yn gyflawn oedd y gwaith. Yng nghyd-destun elfennau Gwasanaethau Cefnogol byddai hyn wedi ei gasglu drwy adolygu’r ffeiliau. Ategwyd bod yr Arolygwyr wedi trafod gyda grwpiau ffocws, Gwasanaethau Cefnogol yn y trydydd sector a’r Cyngor. Mewn ymateb, amlygwyd os yw Gwasanaethau Cefnogol y Cyngor yn comisiynu Gwasanaeth Cefnogol yna dylai gael ei ymgorffori fel rhan o’r adroddiad

·         Gyda diffyg mewn capasiti staff a chynnydd yn y galw, nodwyd bod yr arolwg wedi adnabod y diffyg ac wedi tynnu sylw at y mater fel un sydd angen ei wella. Ategwyd bod cyllid ychwanegol wedi ei adnabod ar gyfer 2022/23 i gefnogi’r gwaith ond mai anodd yw denu gweithwyr cymwys i weithio contractau tymor byr Er hynny, derbyniwyd bod angen bod yn fwy creadigol wrth gyfarch hyn i’r dyfodol.

·         Wrth dderbyn bod llawer o waith recriwtio wedi ei wneud drwy gyhoeddi fideos a hysbysebion, a bod y broblem recriwtio yn un genedlaethol, gofynnwyd os oedd yr Arolygaeth wedi gweld llwyddiant recriwtio mewn ardaloedd eraill ynteu arian oedd yn gyrru’r broblem? Rhoddwyd ymateb drwy nodi bod rhai ardaloedd gyda chynlluniau gwahanol. Awgrymwyd ystyried moderneiddio gwasanethau ac ystyried esiamplau o arfer da gan Awdurdodau eraill - mentrau cymdeithasol yn engraifft dda..

·         Er nad oedd sicrwydd bod y sefyllfa recriwtio wedi gwella nodwyd bod adolygiadau yn cael eu gwneud yn rheolaidd.

·         I wella a datblygu systemau i sicrhau ansawdd a gwybodaeth am berfformiad ymhellach nodwyd bod bidiau wedi eu cyflwyno sawl gwaith am adnodd ychwanegol i gryfhau’r tîm ond heb fod yn llwyddiannus. Er bod y Gwasanaeth wedi gwneud yn dda gyda rhai bidiau yn y gorffennol, efallai nad yn ddigon llwyddiannus mewn ymateb i ddisgwyliadau’r Llywodraeth, defnyddwyr a thwf yn y galw. Y bwriad yw yntau gwneud cais am grantiau neu ail ddefnyddio adnoddau presennol. Os bydd galw statudol i sicrhau ansawdd bydd rhaid ymateb.

·         Bod y Gwasanaeth yn agored i ystyried strwythuro shifftiau fel bod modd i ofalwyr   gael sefydlogrwydd mewn gwaith arall i gryfhau a gwella’r gweithlu. Cyfeiriwyd at enghreifftiau lle cafodd myfyrwyr o Goleg Merion Dwyfor brofiad gwaith yn y maes a mynd ymlaen i dderbyn cyfleodd fel gweithwyr achlysurol. Ategwyd, petai rhywun eisiau gweithio yn y maes gofal y gellid trafod yr oriau gwaith posib a bod yr adran yn agored i unrhyw syniadau er mwyn denu mwy o staff.

·         Gyda’r Bwrdd Iechyd dan gryn bwysau ac yn rhoi blaenoriaeth i wella pobl, gellid dadleu nad yw’r elfen partneriaethol yn derbyn yr un sylw. Er hynny gyda chydweithio gyda Phartneriaethau yn rhan o’r Cynllun Gwella nodwyd bod cydweithio da ar lefel llinell flaen, ond cydnabuwyd bod lle i wella ar yr elfennau strategol

PENDERFYNWYD:

a)    Derbyn yr adroddiad a chanfyddiadau’r Arolygaeth Gofal gan nodi’r sylwadau a gyflwynwyd yn ystod y cyfarfod.

b)    Derbyn rhaglen waith yr Adran Oedolion, Iechyd a Llesiant i’r ymateb