Agenda item

Sefydlu maes carafanau teithiol (19 uned) gyda bloc toiledau a gwaith cysylltiedig 

 

AELOD LLEOL: Cynghorydd Rhys Tudur

 

Dolen i'r dogfennau cefndir perthnasol

PENDERFYNIAD:

 

Gwrthod y cais, yn groes i’r argymhelliad.

 

Byddai’r bwriad yn sefydlu safle carafanau teithiol newydd mewn lleoliad ble ceir gormodedd o safleoedd carafanau teithiol a sefydlog presennol, gan beri niwed i ansawdd gweledol y dirwedd yn ogystal ac achosi aflonyddwch sŵn a fyddai’n cael effaith andwyol annerbyniol ar fwynderau’r cymdogion cyfagos, yn groes i amcanion polisi TWR 5 a PCYFF 2 o Gynllun Datblygu Lleol ar y Cyd Gwynedd a Môn.

 

Sefydlu maes carafanau teithiol (19 uned) gyda bloc toiledau a gwaith cysylltiedig

 

Bu i rai Aelodau ymweld â’r safle a’r ardal o gwmpas Afonwen bore 27ain Chwefror 2023

 

a)    Amlygodd y Rheolwr Cynllunio mai cais ydoedd ar gyfer newid defnydd tir amaethyddol, i sefydlu safle carafanau teithiol i 19 uned, ymestyn adeilad presennol i greu bloc toiledau a gwaith cysylltiedig ar dir yn Nhŷ’n Lôn, Afonwen. Gohiriwyd y cais ym Mhwyllgor Cynllunio 16 Ionawr 2023 er mwyn i’r Aelodau gynnal ymweliad safle. Ers cyflwyno’r cais i gyfarfod 16 Ionawr 2023, derbyniwyd un llythyr yn gwrthwynebu’r bwriad.

 

Nodwyd, gan mai’r bwriad yw creu safle ar gyfer carafanau teithiol, ystyriwyd y cais o dan Bolisi TWR 5 o Gynllun Datblygu Lleol ar y Cyd Gwynedd a Môn (CDLl) sy’n gosod cyfres o feini prawf ar gyfer caniatáu datblygiadau o’r fath.  Mynegwyd bod maen prawf 1 o’r polisi yn datgan y dylai unrhyw ddatblygiad carafanau teithiol newydd fod o ansawdd uchel o ran dyluniad, gosodiad ac edrychiad ac wedi’i guddio’n dda gan nodweddion presennol y dirwedd a / neu mewn lle gellir cydweddu’r unedau teithiol yn hawdd i’r dirwedd mewn modd nad yw’n peri niwed sylweddol i’w hansawdd weledol. 

 

Eglurwyd y byddai’r bwriad arfaethedig wedi ei leoli mewn cae gwastad gyda choed aeddfed ar y terfynau ac felly’n guddiedig o leoliadau cyhoeddus. Ategwyd bod bwriad atgyfnerthu sgrinio’r safle trwy blannu gwrych newydd o goed cynhenid fel ffin orllewinol newydd i wahanu’r cae carafanau o’r cae ehangach. Nid yw’r safle o fewn yr Ardal o Harddwch Naturiol Eithriadol (AHNE) nac o fewn Ardal Tirwedd Arbennig a ni ystyriwyd y byddai’n achosi niwed arwyddocaol i ansawdd y dirwedd. Amlygwyd bod y bwriad wedi ei ddylunio i gwrdd â gofynion trwyddedu o safbwynt gofod a chyfleusterau - derbyniwyd fod y datblygiad yn un safonol.

 

Ym mhwyllgor Ionawr 2023, amlygwyd pryderon am yr ‘effaith gronnus’ o ran agosatrwydd y safle at safleoedd carafanau sefydlog eraill megis Hafan y Môr ac Ocean Heights a safle teithiol Afon Wen gyferbyn a Sŵn y Môr i’r cefn. Er bod sawl safle sefydlog a teithiol yn y cyffiniau, ni ystyriwyd yr ardal dan sylw yn esiampl o leoliad sydd o dan bwysau aruthrol o ran datblygiadau twristiaeth o’r fath. Mynegwyd, yn wahanol i bolisi TWR 3 sy’n ymwneud a safleoedd carafanau sefydlog, nid yw effaith gronnus yn ystyriaeth ym meini prawf polisi TWR 5 gan mai defnydd dros dro yw’r defnydd teithiol gyda llai o effaith na strwythurau sefydlog. Fodd bynnag, mae’r meini prawf eu hunain yn ymateb i’r effaith gronnus yn yr ystyr na ddylid caniatáu safleoedd mewn mannau ymwthiol nad ydynt yn agos i’r prif rwydwaith ffyrdd.

 

Cyfeiriwyd at baragraff 6.3.81 o’r polisi sydd yn nodi na ddylid caniatáu carafanau mewn lleoliadau agored ger yr arfordir nac mewn AHNE - y safle yma wedi ei leoli i ffwrdd o leoliad arfordirol agored a heb unrhyw ddynodiad tirwedd i’r cyffiniau.

 

Yng nghyd-destun materion cyffredinol a phreswyl nodwyd, ar sail y pellter a natur guddiedig y cae, ni ystyriwyd y byddai’r bwriad yn cael effaith andwyol sylweddol nac achosi aflonyddwch ar unrhyw drigolion cyfagos. Ystyriwyd fod y bwriad yn dderbyniol o agwedd Polisi PCYFF 2 y CDLl sy’n ymwneud ag amddiffyn mwynderau defnyddwyr tir cyfagos.

 

Yng nghyd-destun materion bioamrywiaeth ymgynghorwyd a’r Uned Bioamrywiaeth gan fod y cae dan sylw ynghyd â’r tir i’r gogledd a gorllewin o’r safle wedi ei adnabod yn safle Bywyd Gwyllt Lleol. Mewn ymateb i’w sylwadau, gofynnwyd i’r datblygwr gyflwyno Asesiad Ecolegol Cychwynnol ac yn sgil canlyniadau’r arolwg a chais am asesiadau pellach, cyflwynwyd Arolwg Botanegol, Arolwg Moch Daear a Chynllun Mesurau Lliniaru Bywyd Gwyllt yn ddiweddarach ar y cais. Nodwyd bod yr Uned Bioamrywiaeth wedi cadarnhau bod yr adroddiadau wedi eu gwneud i safon dda gan gynghori y dylai’r bwriad ddilyn y mesurau lliniaru a’r gwelliannau a gynhigiwyd

 

Roedd y Swyddogion Cynllunio yn parhau o’r farn bod y bwriad yn dderbyniol ac na fyddai’n cael effaith niweidiol sylweddol ar y dirwedd, mwynderau’r gymdogaeth na diogelwch ffyrdd.

 

b)    Yn manteisio ar yr hawl i siarad nododd yr Aelod Lleol y sylwadau canlynol:

·         Safleoedd carafanau sefydlog ynteu symudol - yr un yw’r farn - creu dwysedd uchel drwy Wynedd gyfan

·         Safle Hafan y Môr ac Abererch Sands yn safleoedd mawr iawn heb son am safleoedd eraill cyfagos. Pa amgylchiadau eraill felly fyddai yn sail i ‘ormodedd’?

·         Derbyn bod TWR3 yn cyfeirio at safleoedd sefydlog a dim teithiol, ond dyma  wendid TWR5 - dim diffiniad clir i ‘ormodedd’ - blerwch y Cynllun Datblygu o beidio gosod maen prawf i garafanau teithiol fel sydd i garafanau sefydlog.

·         Rhaid ystyried y safbwyntiau o ddehongli polisi mewn modd priodol - rhaid gosod diffiniad clir o ormodedd mewn polisïau i gynnwys safleoedd teithiol.

·         Annog y pwyllgor i wrthod y cais ar sail gormodedd a chreu diffiniad polisi gwell i’r dyfodol

 

c)    Cynigiwyd ac eiliwyd caniatáu y cais yn unol ar argymhelliad.

 

ch)     Yn ystod y drafodaeth ddilynol nodwyd y sylwadau canlynol gan Aelodau:

·         Bod y cais yn cyfateb i ofynion polisi cyfredol

·         Bod y safle yn daclus – yr adeiladau a’r toiledau o safon uchel

·         Bod un cais wedi ei ganiatáu yn groes i ofynion polisi yn Nwyfor – angen cysondeb

 

·         Bod angen ystyried sylwadau'r Aelod Lleol a’r Cyngor Cymuned sydd yn gwrthwynebu’r cais ar sail gormodedd

·         Nad yw rhai safleoedd carafanau teithiol yn cydymffurfio gyda rheolau o orfod symud carafanau dros y Gaeaf - dim digon o swyddogion gorfodaeth i gadw golwg ar y sefyllfa

·         Dylai’r maen prawf ‘effaith gronnus’ fod ar gyfer teithiol a symudol

·         Bod nifer o safleoedd carafanau yn y cylch – i’r dyfodol, un parc carafanau fydd yr arfordir rhwng Criccieth a Pwllheli

·         Pam bod y polisi mor flêr yn diffinio ‘gormodedd’? Angen llunio polisi newydd

·         Bod yr effaith gronnus yn annerbyniol

·         Y dylid rhestru niferoedd carafanau. Gormod o garafanau yn yr ardal yma

·         Gormodedd / gor-dwrisitiaeth yn effeithio ar ddiwylliant, iaith, cefnogaeth i wasanaethau ac aflonyddwch i gymdogion

 

d)            Mewn ymateb i’r sylwadau, nododd Pennaeth Cynorthwyol Cynllunio ac Amgylchedd bod y cais yn cyfateb i ofynion polisi cyfredol CDLl - yr adroddiad yn un clir ac yn datgan y polisïau perthnasol ar gyfer carafanau teithiol. Y cais yn cyd-fynd a’r gofynion. Cyfeiriwyd at gais a ganiatawyd yn groes i’r argymhelliad am 32 carafanau teithiol  mewn ardal o fewn AHNE - angen sicrhau bod y Pwyllgor yn gyson wrth weithredu polisïau. Amlygwyd y risgiau fydd yn agored i’r Cyngor petai y cais yn cael ei wrthod.

 

Mewn ymateb i’r sylwadau, nododd y Swyddog Monitro bod y cais yn cyfarch y meini prawf ac os bydd awgrym o wrthod ar sail effaith gronnus, bydd angen tystiolaeth i amlygu ardrawiad o’r sefyllfa. Ategwyd bod rhaid i’r Pwyllgor amlygu sicrwydd cyson wrth weithredu a dehongli polisïau a meini prawf.

 

dd)        Yn dilyn pleidlais gofrestredig, disgynnodd y cynnig i ganiatáu

 

e)      Cynigiwyd ac eiliwyd gwrthod y cais ar sail gormodedd ac aflonyddwch  gweledol

 

PENDERFYNWYD: GWRTHOD y cais, yn groes i’r argymhelliad

 

Rheswm: Byddai’r bwriad yn sefydlu safle carafanau teithiol newydd mewn lleoliad ble ceir gormodedd o safleoedd carafanau teithiol a sefydlog presennol, gan beri niwed i ansawdd gweledol y dirwedd yn ogystal ac achosi aflonyddwch sŵn a fyddai’n cael effaith andwyol annerbyniol ar fwynderau’r cymdogion cyfagos, yn groes i amcanion polisi TWR 5 a PCYFF 2 o Gynllun Datblygu Lleol ar y Cyd Gwynedd a Môn.