Agenda item

I ystyried

a) adroddiad gan yr Uwch Swyddog Harbyrau

b) adroddiad gan yr Harbwrfeistr   

Nodi a derbyn yr adroddiad.

Croesawyd pawb i’r cyfarfod, a nodwyd bod nifer yn mynychu am y tro cyntaf, a chymerwyd y cyfle i bawb gyflwyno eu hunain.  Yn ychwanegol, nodwyd bod nifer i ffwrdd yn sâl a chytunwyd i ddanfon neges i ddymuno gwellhad buan iddynt.

 

Yn sgil absenoldeb salwch yr Uwch Swyddog Harbyrau, cyflwynwyd yr adroddiad gan y Rheolwr Gwasanaeth Morwrol.  Cymerodd y Rheolwr Gwasanaeth Morwrol y cyfle i atgoffa y Pwyllgor bod Barry Davies, y cyn-Reolwr Gwasanaeth Morwrol yn ymddeol ar y 31/3/23 ar ôl 27 mlynedd o wasanaeth i’r Cyngor.  Diolchwyd yn fawr i Barry Davies am ei waith a’i arweiniad. 

 

Angorfeydd Abermaw a Chofrestru Cychod

Cadarnhawyd bod gwaith cynnal a chadw wedi ei wneud ar yr angorfeydd ‘trots’ a bod cyflwr yr offer yn dderbyniol.  Mae Contractwr Angori Lleol wedi cadarnhau bod 2 allan o 3 angorfa ymwelwyr wedi eu codi oherwydd eu bod yn sefyll ar fanc tywod ond bod y contractwr wedi cael trafferth gyda chodi yr angoraf agosaf at y bont rheilffordd.

 

Mae y drefn o gofrestru badau pŵer ar-lein yn weithredol erbyn hyn, sydd o gymorth mawr gyda rheoliadau GDPR.  Cadarnhawyd bod y problemau cychwynnol wedi eu datrys a’r drefn yn gyffredinol yn gweithio yn esmwyth.

 

Cod Diogelwch Morol Porthladdoedd

Cyfeiriwyd at y Ddeddf Newydd ar gyfer Badau Pŵer sydd yn weithredol o 31/3/23 sef y 'Merchant Shipping (Watercraft) Order 2023', gan nodi bod angen arweiniad pellach, er bod cyfarfod cychwynnol gyda’r Heddlu wedi cymryd lle.

 

Cadarnhawyd bod yr Uwch Swyddog Harbyrau yn arwain ar y Cod Diogelwch, a bod gwaith gwella wedi ei wneud i sicrhau bod yr Harbwr mor ddiogel â phosib, mewn cydweithrediad a Chapten Matt Forbes, Harbwrfeistr Conwy.

 

Materion Staffio

Adroddwyd bod Kane A Triggs wedi ei benodi yn Harbwrfeistr Cynorthwyol ac fe’i croesawyd i’w gyfarfod cyntaf.  Cadarnhawyd y bwriad i benodi pum swyddog traeth, gyda dau o’r rhain yn cychwyn cyn y Sulgwyn, ac y bydd swyddogion yn parhau gyda y gwaith cynnal a chadw, ond nad oedd bwriad cyflogi rhagor yn yr Harbwr.

 

Gwahoddwyd Aelodau i gynnig sylwadau ar yr uchod, a nodwyd fel a ganlyn :

 

Mae y sustem cofrestru ar-lein yn weithredol ac unrhyw bryderon wedi eu datrys.

 

Mae cais wedi dod i Swyddogion Traeth Tymhorol dderbyn hyfforddiant cymorth cyntaf gwell.  Ymhelaethwyd nad oedd amser i hyfforddi yn ddigonol flwyddyn ddiwethaf, er cyn y cyfnod Covid roedd cymorth cyntaf uwch yn rhan o’r anwytho, ac mae hwn yn rhywbeth sydd wedi llithro, ond bod bwriad trefnu hyfforddiant flwyddyn yma.  Nodwyd bod yr Heddlu a Chymdeithas y Bad Achub hefyd wedi codi yr un pwynt.  Adroddwyd bod cydweithredu da ar y traethau gyda Gwylwyr y Glannau, y Bad Achub a’r Heddlu a bod pawb yn werthfawrogol o’i gilydd.  Atgyfnerthodd y Pennaeth Cynorthwyol Economi a Chymuned y sylw am y newid mewn Deddfwriaeth ar gyfer Badau Dwr personol, yn enwedig y pryder nad oeddynt yn disgyn i’r categori cychod, a chadarnhaodd eu bod yn parhau i ddisgwyl canllawiau ac y bydd yn cymryd amser i dderbyn y trefniadau gweithredol, ond cytunodd i drefnu i gylchredeg y wybodaeth pan ddaw i law.

 

Holodd y Cadeirydd tybed fyddai modd i Swyddogion ymweld â meysydd carafanau yr ardal i amlygu y Ddeddf newydd a chadarnhawyd bod y gwaith hwn ar y gweill i atgoffa pobl am eu cyfrifoldebau.

 

Materion Ariannol : Sefyllfa Ariannol Harbwr Abermaw

 

Cyfeiriwyd at y tabl a rhoddwyd eglurhad pellach :

 

Costau Staffio - tanwariant o £12,948 - o ganlyniad i ymadawiad yr Harbwr feistr blaenorol a’r oedi mewn gwneud penodiad newydd.

 

Tiroedd ac Eiddo – bron yn gytûn.

 

Cwch a Cherbydau - (cyllideb amgen) - wedi gwario £90 ar betrol i’r cwch.  Ni chafodd y cwch ei lansio lawer gan fod y cwch wedi bod allan o ddefnydd am gyfnod.

 

Offer a Chelfi - adroddwyd bod gwariant o £20,004 gyda buddsoddiadau mewn  bwiau ychwanegol, cadwyni, goleuadau newydd ynghyd ag ôl-gerbyd i gwch yr Harbwr.

 

Incwm Harbwr - £30,760 oedd y targed a £30,869 wedi ei gasglu.

 

Felly mae cyfanswm y gyllideb yn £52,950 a chyfanswm y gwariant yn £45,964, gyda thanwariant o £6,986 - hyn yn seiliedig ar drafodaethau gyda’r Uned Gyllid yn Nhachwedd 2022. Hysbyswyd y Pwyllgor y bydd y £6,986 o danwariant yn debygol o leihau erbyn diwedd y mis.

 

Nododd yr Aelodau eu balchder o weld yr incwm yn codi gan nodi bod Abermaw yn le prysur, ond nodwyd pryder y byddai yr Harbwr yn cael ei farnu am wneud elw.

 

Ffioedd a Thaliadau 2023/24 – Ffioedd Angori

 

Cadarnhawyd bod ffioedd angori wedi codi 8.5%, gan gadarnhau bod rhai meysydd ffioedd wedi codi yn uwch na chwyddiant, a manylwyd fel a ganlyn :

 

Ffi badau pŵer            ffi flaenorol yn £50 Nawr yn £60

Ffi lansio                      ffi flaenorol £150 Nawr yn £170

 

Awgrymwyd rhewi'r ffi am lansio ar £20 eleni, gyda chychod llai na 30 marchnerth yn cynyddu o £30 i £35.

 

Nodwyd bod yn rhaid edrych ar bob ffynhonnell incwm, ond bod y gwasanaeth wrth gwrs yn ddibynnol ar dwristiaeth a thywydd braf.

 

Nododd y Cadeirydd bod y ffioedd yn eithaf rhesymol.

 

ADRODDIAD YR HARBWRFEISTR

 

Materion Mordwyo

 

Cadarnhawyd bod y sianel yn ddeinamig ac wedi symud.  Mae disgwyl contractwr i symud y cymhorthydd mordwyo cyn y Pasg.  Mae dau rybudd i forwyr ar hyn o bryd o ganlyniad i’r tywod - (5/22 a 2/23), tra mae'r bwi tramwyo wedi ei dynnu allan o’r dŵr yn barod i’w ail-leoli unwaith bydd y contractwr ar gael.  Cadarnhawyd bod yr archwiliad gan Tŷ’r Drindod ar y cymhorthion mordwyo wedi cadarnhau fod popeth yn cyrraedd y safon ddisgwyliedig.  Nodwyd bod anogaeth yn cael ei roi i forwyr gysylltu gyda’r Swyddfa Forwrol yn uniongyrchol gyda neu am unrhyw wybodaeth.

 

Materion Gweithredol

 

Cyfeiriwyd at yr angen i brynu ôl-gerbyd newydd, gyda’r arian wedi dod allan o’r gyllideb amgen, ac y bydd y cwch yn cael ei lansio wythnos nesaf.  Mae gan y Gwasanaeth 4 cwch gwaith, gan gadarnhau bod y gofynion statudol codio y cychod wedi newid a bod y gwaith buddsoddi i gydymffurfio wedi ei wneud i gynnal arolwg strwythurol, labelu y gwifrau ac ati.

 

Cynnal a Chadw

 

Adroddwyd bod y staff wedi gwneud ac yn parhau i wneud llawer o waith ar yr angorfeydd ac wedi cychwyn ar y gwaith o rifo pob angorfa.

 

Mae staff wedi bod yn rhannu ymarfer da mewn Harbyrau eraill fel byddai modd rhannu staff petai yr angen yn codi.

 

Mae gwaith da wedi ei wneud yn gosod angorfeydd, drysau newydd, gwaith ar y storfa SS Dora a’r Storfa Disl a gwaith twtio, a nodwyd bod yr Harbwr yn edrych yn dda.  Diolchwyd i staff am eu gwaith. 

 

Gwahoddwyd Aelodau i gynnig sylwadau, ac mewn ymateb nodwyd fel a ganlyn :

 

Cyfeiriodd Cynrychiolydd Grŵp Mynediad Traphont Abermaw i’r gwaith ar y bont, ac yn benodol mynediad i ddefnyddwyr y dŵr, gan nodi bod y man rhwng y rhychwant canolog wedi ei gyfyngu.  Nid oedd y Rheolwr Gwasanaeth Morwrol yn ymwybodol o hyn, ond nododd eu bod yn gweithio yn agos gyda Network Rail, a gyda phwynt cyswllt yn Network Rail ar gyfer unrhyw waith ar y bont.  Cadarnhaodd y Cymhorthydd Harbwr ei fod wedi siarad gyda’r contractwr a’i fod yn disgwyl am ragor o wybodaeth, ac y byddai yn trefnu i rannu unrhyw wybodaeth.  Yn ychwanegol, nodwyd bod weiren a malurion ar wely’r aber yn yr ardal ac y byddai yn broblemus i nofwyr neu ganwyr a holiwyd a oedd bwriad rhoi sylw i hyn?  Cytunwyd y byddai Cynrychiolydd y Grŵp Mynediad Traphont Abermaw yn danfon lluniau ar gyfer gweithredu priodol gan staff yr Harbwr.

 

Materion Eraill

 

Adroddwyd bod y cwmni sydd yn adnewyddu'r Bont yn awyddus i dynnu'r haearnau a’u cludo oddi ar y safle.  Adroddwyd bod cwpwl o awgrymiadau wedi eu gwneud ond cytunwyd mai cludo ar ysgraff i Bwllheli neu Aberystwyth fyddai'r ffordd hwylusaf.  Nodwyd gan y Cadeirydd, efallai yn ddibynnol ar gwrs y sianel y bydd yn rhaid symud rhaid angorfeydd. 

 

Nododd y Cadeirydd ei fod wedi clywed si am ddyddiad ar gyfer cau y bont, a nododd bryder am y dyddiad, gan ei fod yn agos iawn i ddechrau mis Medi.  Cadarnhaodd y Rheolwr Gwasanaeth Morwrol nad oedd wedi derbyn dyddiad gan Network Rail, ond yn anffodus nad oedd ganddo unrhyw ddylanwad ar y dyddiad.

 

Cyfeiriwyd mewn cyfarfod blaenorol at y dymuniad i osod rhwystr electroneg ar Ffordd y Compound, ond yn anffodus, nodwyd bod y costau dros £5,000 ac nad oedd bwriad ar hyn o bryd prynu rhwystr, ond y byddai bolardiau yn cael eu gosod mewn mannau parcio penodol.

 

Cadarnhawyd bod tywod wedi ei osod ynghyd a ffensys pren, a dybiwyd yn hynod lwyddiannus gan ei fod yn rhwystr naturiol a chadarnhawyd y bydd adran YGC yn clirio'r tywod cyn y Pasg a chlirio y cawsai.

 

Nodwyd bod nifer o geisiadau am ddigwyddiadau wedi dod i law, ac y byddai cyfathrebu gydag Aelodau Lleol ac Aelodau Cyngor Tref yn digwydd.

 

Gwahoddwyd Aelodau i gynnig sylwadau, ac mewn ymateb nodwyd fel a ganlyn :

 

Nodwyd ei bod yn  newyddion da ynglŷn â chlirio y cawsai cyn y Pasg, ond nodwyd bo llawer o bryderon wedi eu codi ynghyn a’r ffens, er bod arwyddion wedi eu gosod, ynglŷn â’u diogelwch.  Roedd y Rheolwr Gwasanaeth Morwrol yn teimlo bod y ffensys yn amlwg a bod arwyddion wedi eu gosod, ond yn anffodus nad oedd modd cau y traeth.  Nododd Cynrychiolydd Tref Abermaw bod llawer o bryder wedi ei nodi, yn enwedig gan y rhai sydd yn cerdded y traeth yn y nos.

 

Cwestiynwyd Dathliadau y Coroni (7/8 Mai), a chadarnhawyd nad oedd manylion pendant wedi dod i law gan Katie Price er bod awgrym bod y Cyngor Tref yn edrych i drefnu digwyddiad stryd ar yr 8fed  Fai, gyda chais i ddefnyddio y traeth o bosib. 

 

Wrth i’r drafodaeth ar yr eitem ddod i ben, atgoffodd Pennaeth Cynorthwyol Economi a Chymuned pawb petai unrhyw fater o bryder, iddynt gysylltu gyda Swyddfa yr Harbwrfeistr yn Abermaw.

 

Diolchwyd i bawb am eu cyfraniad.

 

PENDERFYNWYD

 

Nodi a derbyn yr adroddiadau.