Agenda item

I dderbyn ymateb i gwestiynau ffurfiol a dderbyniwyd ers y cyfarfod diwethaf:

 

·         Cyngor Cymuned Llangylennin

·         Cyngor Cymuned Llanbedr

·         Cyngor Tref Criccieth

·         R Goodhew (Cymdeithas Teithwyr Amwythig-Aberystwyth)

 

 

 

 

Cyngor Cymuned Llangelynnin

 

Cwestiwn i Network Rail NR): Hoffai Cyngor Cymuned Llangelynnin ofyn y cwestiwn i NR ac unrhyw barti perthnasol arall ynghylch pryd y gall gwaith ddechrau ar Allt Friog Hill A493 parthed y wal ffin /rhwystr damwain, gan fod hyn wedi'i amserlennu i gychwyn yn Chwarter 1 o 2023, (rydym bron ar ddiwedd y cyfnod erbyn hyn) Mae rheolaeth traffig wedi bod ar waith ers cryn amser bellach a dim arwydd o unrhyw waith wedi ei wneud.

 

Ategodd Y Cynghorydd Louise Hughes (Aelod Lleol) bod y sefyllfa wedi bod yn destun pryder i’r ardal ers bron i 10 mlynedd ac er bod trafodaethau ac asesiadau yn cael eu cwblhau, nid yw’r gwaith wedi dechrau.

 

Ateb: NR yn dal yn ymrwymedig i wneud y gwaith atgyweirio i'r wal ar Allt Friog Fodd bynnag, bod rhai datblygiadau dros yr wythnosau diwethaf  wedi newid elfennau o’r gwaith roeddynt yn bwriadu ei wneud. Daeth i’r amlwg, wrth edrych trwy hen ddogfennau, fod llythyr yn dyddio’n ôl i 1976 yn nodi y bydd NR yn parhau i gynnal a chadw’r wal derfyn, ond bod y rhwystr damwain ar yr A493  yn eiddo i Cyngor Gwynedd a’r Cyngor felly yn gyfrifol am ei gynnal. Ategwyd bod  Tîm Eiddo NR wedi cysylltu â Steffan Jones, Pennaeth Priffyrdd Cyngor Gwynedd, i geisio trafod y mater. Er na fydd hyn yn effeithio cynlluniau NR i atgyweirio’r wal, bydd yn newid sgôp y gwaith ac felly byddent ond yn gwneud gwaith cynnal a chadw ar yr asedau sydd o fewn eu perchnogaeth.

 

O ran y broses, nodwyd bod NR wrthi yn cwblhau dyluniadau ac yn adolygu'r costau. Wedi sicrhau cyllid digonol i gyflawni'r prosiect bydd angen gosod amserlen i gwblhau’r gwaith. Awgrymwyd cynnal galwad Teams neu Zoom gyda chynrychiolwyr o ardal Friog - Cyngor Cymuned Llangelynnin, Cyngor Cymuned Arthog ac Aelodau’r wardiau priodol i drafod yn fanylach gyda Thîm Asedau NR

 

Nododd y Cynghorydd Dafydd Meurig (Aelod Cabinet Amgylchedd) y buasai’n cysylltu gyda Phennaeth Priffyrdd, Peirianneg a YGC am ddiweddariad o safbwynt y Cyngor.

 

Nododd Y Cyng. Louise Hughes y byddai’n croesawu gwahoddiad i gyfarfod Teams  / Zoom  i drafod ymhellach ac o’i dymuniad i gael ei chynnwys mewn unrhyw ohebiaeth pellach. Roedd hefyd yn awyddus i wahodd Aelod Cabinet Amgylchedd ac Aelod Cabinet Priffyrdd, Peirianneg a YGC am ymweliad safle.

 

Cyngor Cymuned Llanbedr

 

Cwestiwn: Hoffwn wybod os a phryd fydd Gorsaf Drên Llanbedr yn cael ei adnewyddu. Diolchwn fod yr orsaf wedi cael ei phaentio yn ddiweddar.

 

Ateb Trafnidiaeth Cymru (TC): Nid oes unrhyw ddiweddariad mewn perthynas â gwella cyfleusterau gorsaf Llanbedr. Mae'r holl orsafoedd wedi'u cynnwys mewn Cynllun Integredig a bod bwriad ymweld i gwblhau gwaith ail-frandio, arwyddion a gwelliannau i asedau gorsafoedd h.y. seddi, llochesi ac ati. Fodd bynnag, nid oes cyllid wedi’i ddyrannu ar hyn o bryd i symud ymlaen ar hyn.

 

Mewn ymateb, nododd yr Aelod Lleol, gyda Llywodraeth Cymru wedi gwrthod ffordd osgoi i Lanbedr, bod angen uwchraddio a gwella cyfleusterau gorsaf Llanbedr.

 

Cwestiwn: Rydym fel Cyngor Cymuned wedi gwneud cais am fin baw cwn ger yr orsaf – gan Gyngor Gwynedd.  Pe baem yn llwyddiannus gyda hwn, a fydd yna siawns cael bin sbwriel ar yr orsaf?

 

Ateb TC: Bod ymateb i’r cais gyda Rheolwr yr Orsaf, Mr Dave Crunkhorn. Bydd angen adolygu’r sefyllfa pan fydd y bin baw cŵn yn ei le.

 

Ategodd yr Aelod Cabinet y byddai’n tynnu sylw at y mater i Bennaeth Adran Priffyrdd gan nodi y byddai TC yn fodlon rhoi'r bin ysbwriel yn ei ôl pe bai'r Cyngor yn gosod bin baw ci pwrpasol gerllaw.

 

Cwestiwn: Bod nifer o’r Cynghorwyr sydd wedi mabwysiadu'r Orsaf yn Llanbedr yn awyddus i gael atebion yn ôl parthed eu sylwadau maent yn eu hanfon bob pythefnos. A fydd hyn yn debyg o ddigwydd?

 

Ateb TC: Cwestiwn i’r Tîm Rheilffyrdd Cymunedol –  y Rheolwr Gorsaf yn delio â cheisiadau’r mabwysiadwyr

 

Cwestiwn: Adnabyddir yr hen Orsaf yma fel Halt Talwrn Bach yn y gorffennol.  Beth yw posibilrwydd adennill yr hen enw yma?

 

Ateb TC: Wedi holi swyddogion perthnasol Trafnidiaeth Cymru  ymddengys mai’r  ateb yw na. Nodwyd bod newid enw gorsaf yn rhy gymhleth o lawer, ac nid yw’n fater y byddai Trafnidiaeth Cymru yn ei gymeradwyo.

 

Cwestiwn: Ymddengys bod y canllaw pren sydd yma wedi pydru.

 

Ateb: Siaradwyd â gwasanaethau rheilffordd Trafnidiaeth Cymru mewn perthynas â hyn. Bu iddynt ymweld â’r safle 29 Mawrth 2023 - y canllaw bellach wedi’i atgyweirio.

 

Cwestiwn NR: Hefyd wedi derbyn cwyn bod yr arwydd rhaglen trên yn rhy uchel i bawb ei ddarllen.

 

Ateb:  Angen rhywfaint o eglurder ynghylch pa arwyddion y cyfeirir atynt? Os mai arwyddion gerllaw'r ffordd y cyfeirir atynt hwy, ni ellid gwneud llawer gyda’r arwyddion hynny gan eu bod yn sefydlog. Er hynny, nodwyd bod y wybodaeth yn cael ei ail adrodd yn yr orsaf sydd rhyw 20 llath i ffwrdd

 

Cyngor Tref Criccieth

 

Cwestiwn: Pam bod angen talu ffi gweinyddu o £10 y tocyn i gael ad-daliad hyd yn oed pan mae trenau wedi eu canslo gan y gwasanaeth e.e, oherwydd y tywydd?

 

Ateb TC: Nid yw TC yn codi ffi weinyddol nac unrhyw ffi ar deithwyr sydd wedi hawlio iawndal am drên sydd wedi’i ohirio neu wedi’i ganslo; yn ogystal nid yw TC yn codi ffi pan fydd cwsmeriaid yn hawlio iawndal.

 

Mae ‘Trainline’ (nid TC) yn codi ffi archebu o £10.00 ac nid ffi hawlio gan nad ydynt yn cynnig iawndal am deithiau – gwerthwyr yn unig ydynt

 

Mae TC yn codi ffi weinyddol os oes gan rywun docyn papur ac yn gwneud cais am ad-daliad - nid yw hyn yn berthnasol os bydd y tocyn wedi ei brynu ar-lein.

 

Mae TC yn codi ffi weinyddol os yw teithwyr eisiau newid manylion eu tocyn e.e. tocyn ymlaen llaw.

 

Nid oes ffi weinyddol nac unrhyw ffi ar gyfer teithwyr sydd wedi hawlio iawndal am drên sydd wedi'i ohirio neu wedi'i ganslo.

 

Mae’n bwysig nodi nad yw ad-daliad ac iawndal yr un peth.

 

Cwestiwn: Does dim ffens rhwng Teras Cambrian a'r rheilffordd, dim ond ychydig o wifren.

 

Ateb NR:  Wedi bod mewn cysylltiad â Rheolwr Croesfan Rheilffordd Criccieth sydd wedi bod i'r safle. Nodwyd bod y ffens bresennol, sy'n ffens postyn a gwifren, yn un eithaf cyffredin o amgylch ffiniau rheilffordd, ond mae'r tîm wedi ymweld â'r safle 31 Mawrth 23 i drafod beth sydd yn bosib. Bydd modd rhoi diweddariad o’r sefyllfa yn dilyn yr ymweliad safle.

 

Cwestiwn: Mae’r ffens haearn pigfain ger y groesfan reilffordd wedi torri ac yn cael ei gweld fel perygl.

 

Ateb NR: Wedi siarad â Rheolwr Croesfan sydd wedi bod i’r safle. Bydd y ffens   wen sydd wedi pydru yn cael ei disodli gan ffens newydd i sicrhau bod y safle yn ddiogel.

 

Cwestiwn: Mae sbwriel rhwng y rheiliau ger yr orsaf yn gwneud i’r orsaf edrych yn hyll

 

Ateb NR: Dim yn siŵr lle mae’r sbwriel ond os yw ar y traciau, bydd angen aros am ‘block line’ ac felly'r gwaith wedi ei gofnodi gyda Chydlynydd Cynnal a Chadw  yr ardal. Cyswllt hefyd wedi ei wneud gyda Thrafnidiaeth Cymru sydd a thrydydd parti sy’n mynychu’n rheolaidd – angen gwirio pryd fydd eu hymweliad nesaf. Ategwyd ei bod yn anodd iawn cadw rheolaeth o’r sbwriel gan ei fod yn aml yn cael ei chwythu yno.

 

Cymdeithas Teithwyr Amwythig - Aberystwyth

 

Cwestiwn: A oes modd i'r pwyllgor gyfarfod yn ei leoliad arferol ym Mhorthmadog ar ddyddiad y disgwylir i wasanaethau trên fod yn rhedeg yn arferol yng Nghymru a'r Gororau?

Ateb: Yng nghyfarfod y Cyngor Llawn ar yr 2il o Ragfyr 2021 bu i’r Cyngor benderfynu ar yr egwyddor o gynnal cyfarfodydd pwyllgorau ffurfiol yn rhithiol lle bo modd gwneud hynny a chynnal cyfarfodydd hybrid lle bo diddordeb uchel gan y cyhoedd.  Mae’r adroddiad yn nodi mai cyfarfodydd y Cyngor Llawn, Cabinet, pwyllgorau craffu a phwyllgor Cynllunio yn unig sy’n cael eu cynnal yn aml leoliad (sef yn hybrid). Bydd yr holl bwyllgorau eraill yn rhithiol llwyr gyda rhai eithriadau megis e.e, Pwyllgor Apêl Cyflogaeth (dibynnol ar gais yr unigolyn). Pwyllgor Penodi Prif Swyddogion - ystyriaeth pan fo cyfweliadau – rhithiol fel arall Pwyllgorau ac Is Bwyllgorau lle cynhelir gwrandawiadau quasi- farnwriaethol.

 

Mae’r adroddiad wedi ei fabwysiadu yn sgil gofynion Rhan 3 Deddf Llywodraeth Leol ac Etholiadau (Cymru) 2021 sy’n nodi fod yn rhaid sicrhau mynediad o bell i Gynghorwyr i bwyllgorau.  Mewn geiriau eraill, nid yw cynnal cyfarfodydd ffurfiol wyneb yn wyneb yn unig yn bosib.

 

Diolchwyd am y cwestiynau

 

Diolchwyd i Network Rail ac i Trafnidiaeth Cymru am eu cefnogaeth ac am ymateb i’r materion a godwyd yn y Pwyllgor.  Fe’i hanogwyd i sicrhau cyfathrebu clir gyda’r cyhoedd o unrhyw ddigwyddiadau / diweddariadau.

 

Gofynnodd  Rhian Williams (Rheolwr Cludiant Integredig a Diogelwch Ffyrdd Cyngor Gwynedd) i Trafnidiaeth Cymru gysylltu yn uniongyrchol gyda’r ysgolion os bydd y rheilffordd yn cau am unrhyw reswm e.e, llifogydd