Ystyried adroddiad y Rheolwr Priodoldeb ac Etholiadau.
Penderfyniad:
4(a)
Rhaid i Aelodau gyflawni eu dyletswyddau a’u cyfrifoldebau gan roi sylw dyladwy
i’r egwyddor y dylai fod cyfle cyfartal i bawb, waeth beth fo’u rhyw, eu hil,
eu hanabledd, eu cyfeiriadedd rhywiol, eu hoed neu eu crefydd.
4(b)
Rhaid i Aelodau ddangos parch at eraill ac ystyriaeth ohonynt.
6(1)(a)
Rhaid i Aelodau beidio ag ymddwyn mewn ffordd y gellid yn rhesymol ei hystyried
yn un sy’n dwyn anfri ar eu swydd neu ar eu hawdurdod.
Cofnod:
Yna esboniodd y
Cadeirydd natur / fformat y gwrandawiad.
Cefndir
1. Ystyriodd y
Pwyllgor adroddiad gan Ombwdsmon Gwasanaethau Cyhoeddus Cymru (“yr Ombwdsmon”)
i gŵyn a wnaed gan Mr Howard Huws (“yr Achwynydd”), bod y Cynghorydd
Louise Hughes (“yr Aelod”) wedi torri
Cod Ymddygiad Cyngor Gwynedd (“y Cyngor”).
2. Honnwyd bod yr
Aelod wedi ymddwyn yn amhriodol drwy ymateb mewn Almaeneg i ddau e-bost
anfonwyd ati gan yr Achwynydd yn y Gymraeg.
3. Daeth yr
Ombwdsmon i’r penderfyniad y gallai’r Aelod fod wedi torri Cod Ymddygiad y
Cyngor, yn benodol, paragraffau 4(a), 4(b) sy’n darparu:
“4. Mae'n rhaid i chi:
(a)
gyflawni eich dyletswyddau a’ch cyfrifoldebau gan roi
ystyriaeth briodol i'r egwyddor y dylai fod cyfle cyfartal i bawb, waeth beth
fo'u rhyw, hil, anabledd, cyfeiriadedd rhywiol, oedran neu grefydd;
(b) dangos parch at bobl eraill ac ystyriaeth
iddynt;
Canfu'r Ombwdsmon
hefyd y gellid ystyried gweithredodd yr Aelod yn rhesymol fel ymddygiad a allai
fod wedi torri paragraff 6 (1) (a) y Cod Ymddygiad:
“6 (1) Mae'n rhaid i chi:
(a) beidio ag ymddwyn mewn ffordd y gellid ystyried
yn rhesymol ei bod yn dwyn anfri ar eich swydd neu'r awdurdod;”
4. Cyfeiriodd yr
Ombwdsmon ei adroddiad ymchwilio at Swyddog Monitro Cyngor Gwynedd i'w ystyried
gan ei Bwyllgor Safonau.
Y Gwrandawiad
5. Cyflwynodd y
Rheolwr Priodoldeb ac Etholiadau (Dirprwy Swyddog Monitro Cyngor Gwynedd), oedd
yn cynghori’r Pwyllgor, ei adroddiad ar gychwyn y gwrandawiad.
6. Ystyriodd y
Pwyllgor adroddiad ysgrifenedig ymchwiliad yr Ombwdsmon, y dogfennau pellach a
gyflwynwyd ymlaen llaw gan yr Aelod a’r Ombwdsmon yn unol â threfn cyn-wrandawiad
y Pwyllgor, a’r dystiolaeth gan yr Awdurdod yn cadarnhau’r ddarpariaeth
gyfieithu oedd ar gael pan dderbyniwyd yr e-byst gan yr Aelod. Ystyriodd y Pwyllgor hefyd y cyflwyniadau
llafar yn ystod y gwrandawiad gan Katrin Shaw, Prif
Gynghorydd Cyfreithiol a Chyfarwyddwr Ymchwiliadau Ombwdsmon Gwasanaethau
Cyhoeddus Cymru, Swyddog Ymchwilio’r Ombwdsmon, yr Achwynydd, fel tyst, a’r
Aelod ei hun. Roedd yr Aelod wedi nodi’n
flaenorol na fyddai’n bresennol, gan ei bod wedi dweud yr hyn yr oedd am ei
ddweud yn ei chyflwyniadau ysgrifenedig i’r ymchwiliad. Fodd bynnag,
penderfynodd fod yn bresennol, er gwaethaf y pryder a'r trallod yr oedd y mater
yn ei achosi iddi, i sicrhau'r Pwyllgor ei bod yn cymryd y mater o ddifrif.
Y Penderfyniad
7. Ystyriodd y
Pwyllgor yn gyntaf unrhyw ganfyddiad o ffaith yr oedd angen iddo wneud. Nid
oedd unrhyw ffeithiau oedd yn destun anghydfod yn yr achos hwn. Roedd y gŵyn yn deillio o gynnwys dau
e-bost anfonwyd gan yr Aelod ar 4/12/21 a 21/2/22. Roedd copïau o’r ddau e-bost yma yn y
dystiolaeth ysgrifenedig gerbron ac nid oedd amheuaeth felly ynglŷn â’r
hyn yr oedd yr Aelod wedi ei ddweud.
8. Aeth y Pwyllgor
ymlaen i ystyried ymddygiad yr Aelod, ac ar ôl ystyriaeth ofalus o’r holl
dystiolaeth a gyflwynwyd, penderfynodd y Pwyllgor fod yr Aelod wedi methu a
chydymffurfio â’r Cod Ymddygiad fel a ganlyn:
9. Canfu’r
Pwyllgor fod yr Aelod wedi torri paragraff 4(a) y Cod Ymddygiad am y rhesymau
canlynol:
9.1 Trwy ymateb i e-byst
gan yr Achwynydd yn Almaeneg roedd yr Aelod wedi gwadu’r cyfle i’r Achwynydd
allu cysylltu ag aelod etholedig o’r Cyngor yn ei ddewis iaith, sef Cymraeg.
Credai'r Pwyllgor y dylai fod gan bawb yr hawl i gysylltu ag aelod o'r awdurdod
a derbyn yr un lefel o wasanaeth, waeth ym mha iaith y gwneir y cyswllt. Fodd
bynnag, roedd yr aelod wedi trin yr Achwynydd yn wahanol oherwydd iddo
ysgrifennu ati yn Gymraeg. Roedd y Gymraeg yn rhan annatod a sylfaenol o
hunaniaeth ddiwylliannol yr Achwynydd ac roedd ei drin yn wahanol ar y sail hon
yn wahaniaethol ym marn y Pwyllgor. Er bod yr ymatebion yn ôl pob golwg yn
gofyn am gyfieithiad, mae’r ffaith iddi ddewis ysgrifennu yn Almaeneg, nad yw’n
iaith swyddogol yng Nghymru, ar ddau achlysur yn dangos ym marn y Pwyllgor nad
dyna oedd y bwriad mewn gwirionedd.
10. Canfu’r Pwyllgor fod yr Aelod wedi torri
paragraff 4(b) y Cod Ymddygiad am y rhesymau canlynol:
10.1 Nid oedd yn
rhesymol ym marn y Pwyllgor i ddehongli negeseuon yr Aelod fel ymgais ddiffuant
i ddeall e-byst yr Achwynydd, nac fel ymgais i gyfleu’r teimlad o dderbyn neges
mewn iaith nad oeddech yn ei deall. Ymhellach, roedd yr Achwynydd yn cysylltu â
hi yn rhinwedd ei swydd fel cynrychiolydd Cylch yr Iaith, mudiad sy'n ymwneud
yn benodol â hybu'r Gymraeg. 'Roedd yr aelod yn ymwybodol o hyn ac o
bwysigrwydd yr iaith Gymraeg i'r Achwynydd.
10.2 Roedd yr
Achwynydd wedi dehongli ymateb yr aelod fel sarhaus, gwatwarus a choeglyd a
chredai mai dyma'r unig ddehongliad rhesymol. Er bod yr Aelod yn cyfaddef mai
ymgais ‘blentynnaidd’ ar hiwmor oedd ei hateb, gwadodd ei bod yn ddirmygus o’r
Gymraeg mewn unrhyw ffordd. Wrth nodi’r esboniad yr Aelod ynghylch ei bwriad,
barn y Pwyllgor oedd y dylai fod wedi bod yn glir iddi na fyddai ei hatebion yn
cael eu dehongli fel rhai doniol ond yn hytrach yn goeglyd ac yn ddilornus o
ddewis iaith yr Achwynydd. Daeth y Pwyllgor i’r casgliad nid yn unig ei bod
wedi dangos diffyg parch at yr achwynydd fel unigolyn a oedd yn dymuno
ysgrifennu ati yn Gymraeg ond hefyd at y sefydliad yr oedd yn ei gynrychioli.
Roedd y ffaith iddi wneud hyn ddwywaith, tua 3 mis ar wahân, yn atgyfnerthu'r
canfyddiad mai gweithred fwriadol oedd hon yn hytrach na chamgymeriad byrbwyll.
10.3 Beth bynnag
fo’r sefyllfa gyda chefnogaeth cyfieithu gan y Cyngor nodwyd na wnaeth yr Aelod
unrhyw ymdrech i gael cymorth gan eraill i ddeall beth oedd cynnwys e-byst yr
Achwynydd. Petai hi’n wirioneddol dymuno
deall beth oedd cynnwys yr e-byst gallai fod wedi gofyn am gymorth.
11. Canfu’r
Pwyllgor fod yr Aelod wedi torri paragraff 6(1)(a) y Cod Ymddygiad am y
rhesymau canlynol:
11.1 O edrych ar
ymddygiad yr Aelod yn ei gyfanrwydd, roedd y Pwyllgor o’r farn ei fod yn ddigon
difrifol ei natur fel ei fod yn dwyn anfri ar ei swydd fel cynghorydd ac ar ei
hawdurdod. Roedd y pwyllgor yn cytuno
gyda barn yr Ombwdsmon bod ei ymddygiad wedi dangos diystyrwch o hawl yr
Achwynydd i gysylltu gydag aelod etholedig drwy gyfrwng y Gymraeg ac yn dangos
y byddai methu â chyfathrebu yn Saesneg
yn arwain at wasanaeth o safon is gan aelod etholedig. Cymerodd y Pwyllgor ystyriaeth hefyd o’r
effaith y byddai hyn yn ei gael ar Gyngor Gwynedd yn enwedig o ystyried pwysigrwydd a safle canolog yr iaith
Gymraeg ym mhob agwedd o’i weithrediad.
Cosb
12. Roedd Pwyllgor
o’r farn bod hwn yn achos difrifol o dorri cod ymddygiad yn enwedig o ystyried
y ffaith ei fod wedi dwyn anfri ar swydd yr aelod ac ar yr awdurdod. Ystyriodd yr hyn yr oedd gan yr Ombwdsmon a’r
Achwynydd i’w dweud yn y gwrandawiad ynghyd â’r arweiniad a roddir yng
Nghanllaw ar Gosbau Panel Dyfarnu Cymru (y “Canllawiau”).
13. Ystyriodd y
Pwyllgor ddifrifoldeb yr ymddygiad ac yn arbennig y ffaith fod yr ymddygiad
wedi dwyn anfri ar swydd ac awdurdod yr Aelod.
Cymerodd i ystyriaeth hefyd bwrpas gosod cosb sef yr angen i feithrin
hyder y cyhoedd mewn democratiaeth leol a bod angen felly adlewyrchu
difrifoldeb y mater. Roedd y Pwyllgor
o’r farn felly y byddai cosb yn cynnwys ataliad yn addas yn yr
amgylchiadau. Aeth y Pwyllgor ati i
ystyried y ffactorau lliniarol a gwaethygol hynny a restrir
yn y Canllawiau (ym mharagraff 42):
14. O safbwynt ffactorau
lliniarol canfu’r Pwyllgor fod y ffactorau canlynol yn berthnasol yn yr
achos hwn:
·
hanes blaenorol o
wasanaeth da (yn enwedig os yw dros gyfnod maith);
·
cydnabod ac
edifarhau’r camymddwyn ac unrhyw ganlyniadau
·
ymddiheuriad, yn
enwedig ymddiheuriad cynnar, i unrhyw un a gafodd ei effeithio; yn y cyd-destun
yma roedd y pwyllgor yn deall ac yn derbyn esboniad yr Aelod pam na wnaeth
ymddiheuro yn gynharach, sef y rhybudd gan yr Ombwdsmon yn ystod yr ymchwiliad
i beidio â thrafod y mater ag unrhyw un arall.
·
cydweithredu â’r
swyddog ymchwilio a’r pwyllgor safonau / PDC;
·
derbyn bod angen
newid ymddygiad yn y dyfodol;
·
yn cydymffurfio
â’r Cod ers y digwyddiadau a arweiniodd at y dyfarniad.
·
Yn ogystal â’r
materion penodol yn y Canllawiau, cymerwyd i ystyriaeth hefyd y llythyrau a
dderbyniwyd yn tystio i gymeriad yr Aelod.
Ystyriodd y
Pwyllgor os dylid ystyried diffyg darpariaeth gyfieithu fel ffactor lliniarol
yn yr achos hwn, ond penderfynodd nad oedd, am y rhesymau a roddir ym
mharagraff 10.3 uchod.
15. Gan droi at ffactorau
gwaethygol, canfu’r Pwyllgor fod y canlynol yn
berthnasol yn yr achos hwn:
·
profiad maith,
safle uchel a/neu swydd gyfrifol;
·
gweithred/gweithredoedd
sydd wedi dwyn anfri ar yr awdurdod perthnasol
a/neu’r gwasanaeth cyhoeddus; - tra’n bresennol yn yr
achos yma, roedd y Pwyllgor eisoes wedi ei gymryd i ystyriaeth wrth benderfynu
ar ddifrifoldeb y drosedd ac felly ni ystyriwyd ef fel ffactor waethygol bellach.
16. Ar ôl pwyso a mesur difrifoldeb yr ymddygiad
dan sylw ac ar ôl ystyried y ffactorau lliniarol a’r ffactorau gwaethygol perthnasol penderfynodd y Pwyllgor y dylai’r
Aelod gael ei gwahardd o fod yn aelod o Gyngor Gwynedd am gyfnod o 1 mis.
17 Penderfynodd y Pwyllgor hefyd:
17. Ei fod yn disgwyl i’r Aelod fanteisio ar unrhyw
gyfleoedd hyfforddiant a gynigir gan y Cyngor yn y dyfodol, sy’n ymwneud ag
ymddygiad aelodau.
18. Y dylai’r Aelod ysgrifennu at yr Achwynydd o
fewn 3 wythnos (o ddyddiad derbyn yr hysbysiad yma) i ymddiheuro am ei
hymddygiad (gyda chopi i’r Swyddog Monitro)
19. Y dylid argymell i Gyngor Gwynedd ystyried os
gellid darparu cymorth i aelodau mewn perthynas â gohebiaeth a dderbynnir
ganddynt mewn iaith nad ydynt yn ei deall, unai yn fewnol neu drwy gyfeirio
aelodau at ffynonellau eraill priodol.
Apêl
20. Nodwyd y caiff yr Aelod ofyn am ganiatâd i
apelio yn erbyn penderfyniad y Pwyllgor i dribiwnlys apeliadau a dynnwyd o
Banel Dyfarnu Cymru, drwy roi hysbysiad ysgrifenedig o fewn 21 diwrnod o
dderbyn y rhybudd penderfyniad i lywydd Panel Dyfarnu Cymru. Rhaid i’r cais am ganiatâd i apelio nodi’r
rhesymau dros apelio a pa un a roddir caniatâd i apelio ai peidio, ei bod yn
cydsynio i’r apêl gael ei chynnal drwy gyfrwng sylwadau ysgrifenedig. (Ceir
manylion pellach ar wefan y Panel Dyfarnu www.paneldyfarnu.llyw.cymru).
Dyddiad dod i rym
unrhyw waharddiad
21. Yn unol â’r Rheoliadau (rh.8(6)), bydd unrhyw gyfnod atal neu
atal yn rhannol yn dechrau ar y diwrnod:
(a) ar ôl i'r amser a ganiateir i gyflwyno hysbysiad apêl ddod i
ben,
Neu, os cyflwynir apêl:
(b) ar ôl i hysbysiad ynghylch casgliad unrhyw apêl ddod i law, neu
(c)
ar ôl dyfarniad pellach gan y Pwyllgor Safonau a wnaed ar ôl cael argymhelliad
gan dribiwnlys apeliadau ,
p'un
bynnag sy'n digwydd olaf.
Hysbysiad o’r
Penderfyniad
22. Yn unol â Rheoliadau
Ymchwiliadau Llywodraeth Leol (Swyddogaethau Swyddogion Monitro a Phwyllgorau
Safonau (Cymru) 2001 (fel y’i diwygiwyd) (“y Rheoliadau”) hysbysir yr Aelod, yr
Achwynydd ac Ombwdsmon Gwasanaethau Cyhoeddus Cymru o benderfyniad y Pwyllgor
drwy Hysbysiad o Benderfyniad.
Dechreuodd y cyfarfod am 10.00yb a daeth i ben am
2.50yp.
Cadeirydd
Dogfennau ategol: