Cyflwyno
adroddiad Arweinydd y Cyngor.
Penderfyniad:
Mabwysiadu Cynllun Llesiant Bwrdd Gwasanaethau Cyhoeddus Gwynedd a
Môn 2023-28.
Cofnod:
Cyflwynodd Arweinydd y Cyngor, Y Cynghorydd Dyfrig Siencyn, adroddiad yn
gwahodd y Cyngor i fabwysiadu Cynllun Llesiant Bwrdd Gwasanaethau Cyhoeddus
Gwynedd a Môn 2023-28, ac ymhelaethodd Rheolwr Rhaglen Bwrdd Gwasanaethau Cyhoeddus Gwynedd
a Môn ymhellach ar y cynnwys.
Diolchodd yr
Arweinydd i’r Rheolwr Rhaglen am ei holl waith yn paratoi’r cynllun.
Rhoddwyd cyfle i’r aelodau gyflwyno sylwadau a gofyn cwestiynau. Codwyd y materion a ganlyn gan aelodau
unigol:-
Nodwyd bod pryder wedi’i leisio eisoes yn y Pwyllgor Craffu Cymunedau ynglŷn
â’r syniad bod y Gymraeg yn llinyn euraidd sy’n rhedeg drwy’r holl gynllun, yn
hytrach nag yn amcan clir mewn bocs, a gofynnwyd am sicrwydd bod y swyddogion
wedi gweithredu ar yr adborth hwnnw cyn cyflwyno’r adroddiad hwn i’r Cyngor.
Mewn ymateb, nododd yr Arweinydd:-
·
Ei bod yn fater o farn a ydi rhoi’r Gymraeg mewn
bocs yn cryfhau neu wanhau’r Gymraeg.
·
Bod
y Gymraeg yn rhan annatod o bob maes y mae’r Bwrdd yn ymwneud ag o, ac nad oes
angen rhoi’r Gymraeg mewn bocs. Credai
ei fod yn gryfach felly, a gallai roi sicrwydd na fyddai yna newid safbwynt o
gwbl o ran y Gymraeg.
·
Bod yr holl bartneriaid wedi cyfrannu’n ariannol at
brosiectau, dan arweiniad Cadeirydd y Bwrdd, Aled Jones-Griffith, yn ymwneud
â’r defnydd o’r Gymraeg ar draws y sefydliadau i gyd yn eu derbynfeydd, a
chredai fod yna ragor o arian i ddod i brosiectau yn y dyfodol ynglŷn â’r
Gymraeg.
Ychwanegodd y Rheolwr Rhaglen fod yr un sylw wedi codi wrth drafod gyda’r
grwpiau eraill, a’i bod yn gobeithio fod y cynllun presennol yn dipyn gwahanol
i’r drafft gwreiddiol, yn sgil cryfhau’r agwedd yn ymwneud â’r iaith.
Holwyd beth fyddai’r sefyllfa yn sgil newid mewn arweinyddiaeth yn y
dyfodol, heb bolisïau a gwarchodaeth i’r iaith.
Mewn ymateb, nododd yr Arweinydd nad mater iddo ef yn bersonol oedd y
Gymraeg a bod y Gymraeg yn flaenoriaeth i Gyngor Gwynedd fel sefydliad. Gan hynny, byddai pwy bynnag fyddai’n
cynrychioli’r Cyngor ar y Bwrdd yn y dyfodol yn gosod safbwynt y Cyngor o ran y
Gymraeg yn hollol glir.
Ychwanegodd y Rheolwr Rhaglen:-
·
Bod cylch gorchwyl y Bwrdd yn datgan yn glir bod
gwaith y Bwrdd yn Gymraeg.
·
Y credai fod y prosiectau mwyaf effeithiol y mae’r
Bwrdd wedi ymgymryd â hwy yn ymwneud â’r Gymraeg, lle mae’r partneriaid i gyd
wedi ymrwymo iddynt.
·
Bod
yna brosiect newydd ar y gweill i edrych ar anawsterau penodi i swyddi lle
mae’r Gymraeg yn angenrheidiol o fewn y gwahanol sefydliadau.
Gan gyfeirio at baragraff 2.9 o’r blaen-adroddiad, nodwyd bod y
gweithrediadau penodol i’r Gymraeg yn amlwg yn Amcan Llesiant 2, lle mae sôn am
drosglwyddo’r iaith, ond y dymunid cael enghreifftiau yn Amcan Llesiant 1 ac
Amcan Llesiant 3, lle nad oes amlygiad i’r iaith Gymraeg ar hyn o bryd.
Mewn ymateb, nododd y Rheolwr Rhaglen:-
·
Y cytunai ei fod yn fwy clir yn Amcan Llesiant 2,
ond ei fod yn treiddio drwy’r cynllun.
·
O ran Amcan Llesiant 3, bod mwy o waith i’w wneud
dros yr Haf, a gellid sicrhau’r aelodau y byddai’r iaith Gymraeg yn y cynllun
gweithredu maes o law.
Awgrymwyd mai geiriau gwag oedd dweud bod yr iaith Gymraeg yn llinyn
euraidd sy’n rhedeg drwy’r cynllun, os nad ydym yn ei wneud yn amcan neu’n faen
prawf y gellir ei fesur.
Mewn ymateb, nododd yr Arweinydd:-
·
Ei fod yn anghytuno â’r sylw ac yn gresynu at y
cyhuddiad, ac nad geiriau gwag mohonynt.
·
Na chredai fod angen cael prosiect arbennig i’r
Gymraeg yng Ngwynedd.
Awgrymwyd ychwanegu sylw, er bod y Gymraeg yn organig ac yn briod iaith y
cymunedau at ei gilydd, bod ffigurau’r Cyfrifiad o ddegawd i ddegawd yn dangos
nad yw sefyllfa’r iaith yn arbennig o ddiogel yma yng Ngwynedd chwaith, a’n bod
yn dilyn taflwybr tebyg i nifer o ardaloedd eraill.
Nodwyd bod erthygl ddiweddar yn nodi mai Gwynedd oedd â’r bwlch mwyaf
rhwng y ganran o’r boblogaeth sy’n medru’r Gymraeg yn gyffredinol a chanran y
boblogaeth o gefndiroedd lleiafrifoedd ethnig sy’n medru’r Gymraeg. Awgrymwyd nad oedd system addysg Gwynedd, o
bosib’, yn cynnig yr un cyfle i rai o gefndiroedd lleiafrifoedd ethnig afael yn
y Gymraeg, ac felly gymhwyso ar gyfer swyddi i’r un graddau ag aelodau’r
gymdeithas yn gyffredinol, a chredid bod hynny’n eithaf damniol ac yn awgrymu y
dylem newid polisi addysg, ayb.
Mynegwyd syndod nad oedd y cynllun yn rhoi mwy o flaenoriaeth i’r
argyfwng presennol yn y maes iechyd.
Mewn ymateb, nododd yr Arweinydd:-
·
Ei fod yn derbyn y sylw a’i fod yn ymwybodol o’r
argyfwng yn y maes iechyd.
·
Er mai’r Bwrdd Iechyd sy’n bennaf gyfrifol am y maes
iechyd, gellid edrych ar ffyrdd o gyfrannu at ddatrys y broblem iechyd trwy
bartneriaeth y Bwrdd.
Nodwyd bod pobl yn methu cael ambiwlans, meddyg na deintydd, a bod tlodi
yn gwaethygu yn ein cymunedau o ganlyniad i’r argyfwng costau byw. Hefyd, roedd diffyg trafnidiaeth gyhoeddus yn
caethiwo pobl yn eu cymunedau, a chredid nad oedd y cynllun yn cyfarch yr holl
faterion hyn.
Mewn ymateb, nododd yr Arweinydd:-
·
Er yn derbyn y pwynt, na allai’r cynllun gyfarch
popeth. Rôl y Bwrdd Gwasanaethau Cyhoeddus
oedd chwilio am ffyrdd i ychwanegu at waith y cynghorau a’r sefydliadau unigol,
ac nid gwneud y gwaith yma drostynt.
·
Bod yna bwynt am iechyd sy’n cyfeirio at rywbeth
sy’n draws-ffiniol ac yn draws-sefydliadol, a chredid bod yna rywbeth i’r Bwrdd
edrych arno.
·
Bod tlodi, fel newid hinsawdd, yn faes hynod
gymhleth ac ychydig iawn o reolaeth sydd gennym ni, ac ychydig iawn o reolaeth
neu arfau sydd gan Lywodraeth Cymru o ran tlodi, gan fod yr arfau yn gorwedd yn
Llywodraeth San Steffan.
Awgrymwyd bod y
symudiad tuag at sero net carbon am yrru mwy o bobl i sefyllfa o dlodi. Roedd mwyafrif poblogaeth y byd yn ddibynnol
ar fwyd sydd wedi’i gynhyrchu gan ddefnyddio gwrtaith ac roedd cwmnïau o’r tu
allan yn prynu ein tiroedd ar gyfer plannu coed i wrthbwyso eu ôl-troed
carbon. Nid oedd modd cyrraedd sero net
carbon yng nghefn gwlad. Roedd amaethwyr
angen diesel i’w tractors a
gweithwyr angen tanwydd i’w cerbydau er mwyn cymudo i'r trefi.
Mynegwyd siomedigaeth mai 499 yn unig o ymatebion a dderbyniwyd i’r
holiadur ar y cynllun a nodwyd bod unrhyw gydweithio rhwng Gwynedd a Môn yn
diystyru De Gwynedd.
Mewn ymateb, nododd yr Arweinydd, yn ogystal â’r holiadur ar y wefan, bod
yna waith ymgysylltu hefyd wedi digwydd trwy ddefnyddio gwaith ymgysylltu’r
Cyngor yng nghyswllt Ardal Ni.
Ychwanegodd y Rheolwr Rhaglen:-
·
Bod 499 o ymatebion yn uchel o gymharu ag ymatebion
i holiaduron eraill.
·
Bod mwyafrif y sesiynau ymgysylltu wyneb yn wyneb
wedi’u cynnal yn Ne Gwynedd ac y cafwyd ymateb da iawn.
Mynegwyd siomedigaeth na ymgysylltwyd gyda disgyblion hŷn ysgolion
uwchradd.
Mewn ymateb, nododd y Rheolwr Rhaglen nad oedd yr amseru wedi gweithio o
ran hynny, ond y cafwyd cytundeb bellach i fynd allan i ysgolion uwchradd yn eu
tro, a bod 4 ysgol wedi arwyddo i fyny i hynny eisoes.
Ychwanegodd yr Arweinydd mai’r Rheolwr Rhaglen oedd unig adnodd
ymgynghori’r Bwrdd Gwasanaethau Cyhoeddus a dyna pam ein bod yn gwneud defnydd
o waith ymgysylltu’r cynghorau hefyd.
Nodwyd bod sylw’r Arweinydd mai ychydig iawn o reolaeth sydd gennym dros
faterion megis tlodi yn un gonest iawn, ac awgrymwyd y dylai geiriad aml i
baragraff a chymal yn yr adroddiad fod yn fwy gwylaidd ac ymarferol, drwy nodi ‘byddwn
yn ymdrechu ...’ yn hytrach na ‘byddwn yn ...’ Fel enghraifft
o hynny, nodwyd bod y cynllun yn sôn am sicrhau llwyddiant a thegwch i bobl
ifanc, ond roedd yr ysgolion wedi’u naddu at yr asgwrn yn ariannol, a hyn a hyn
y gellid ei wneud yn unig o fewn y cyfyngiadau hynny. Roedd yr un peth yn wir am sylwadau Cylch yr
Iaith, a byddai’n braf mynegi bod yna rwystrau strwythurol na fedrwn ni wneud
dim yn eu cylch.
Mewn ymateb, nododd yr Arweinydd nad oedd yn rhannu negyddiaeth yr aelod
yn hyn o beth.
PENDERFYNWYD mabwysiadu Cynllun Llesiant Bwrdd Gwasanaethau Cyhoeddus Gwynedd a Môn
2023-28.
Dogfennau ategol: